Лыдъяно, чотано, пайда утчано

Ангелина Снигирева
By Ангелина Снигирева Апрель 25, 2019 16:48

Кун Кенешлэн сессияз Удмурт Правительстволэн 2018-тӥ арын ужамезлы йылпумъянъёс лэсьтӥз Тӧро Александр Бречалов.

А. Бречалов
Фото: udmurt.ru

Кивалтӥсь пусйиз: али шаплы азинске республикаын чаклам нацпроектъёсты быдэстон. Уката бадӟым саклык висъяське экономика удыслы. «Покчи но шоро ужбергатонэз но нимаз ужбергатонэз азинтон», «Кооперация но экспорт», «Калыклы уж сётон» проектъёс юрттыны кулэ республикаысь экономикаез кужмогес карыны, шаерамы инвестициос кыскыны.
Экономика азинскиз ке, ужбергатон удыс кужмояз ке, озьыен бюджетэ вуись вытъёс но мукет табышъёс тросгес луозы. Со бордысь меӵак потэ, кызьы улоз калык, быгатомы-а социальной удысысь ужпумъёсты быдэсъяны.
Республикамылэн Тӧроез ӧз дырты ушъяськыны гинэ. «Удмуртилэн командаез» кык янгыш но лэсьтӥз, шуэ Александр Бречалов. Нырысь ик, малпамъя ӧз пӧрмы, «Ижавиа» компаниез но аэропортэз люкыса. Аэропортлэн кивалтӥсез воштӥськиз, вылаз ик, кылем ар пумын кӧня ке рейсъёсты дугдытӥзы — пассажиръёс азьвыл басьтэм билетъёссэс берыктоно луизы, ӝеган учыръёс тупазы. Но та проектэз пумозяз вуттыны выль амалъёс утчаськомы, вераз Тӧро.
Кыкетӥез сюлмаськон — «Удмуртиез азинтонъя корпорацилэн» ужамез. Кивалтӥсь верамъя, та удысын ӟеч ужасьёс уг тырмо. Корпорация кулэ вал Удмуртиысь бизнеслы юрттыны, инвесторъёсты утчаны. Кылем арын декабре огазеяськонлэн кивалтӥсез воштӥськиз, команда но выльдӥськиз, собере уж но кисьмаз — инвестициосъя 12 огкыл но гожтэмын ни.
Кылем арын республикаысь бюджетлэн доход люкетэз 85 миллиард 441 миллион манет луиз. Выт чотын люкаськиз 218 миллиард 340 миллион манет. 2017-тӥ арен ӵошатон ке, со 50 миллиард манетлы тросгес. Озьы ке но котькуд манетэз уже кутоно, рос-прос лыдъяса-чотаса гинэ, шуэ Александр Бречалов.
Тани 2017-тӥ арын Кез ёросысь Тортым гуртэ 8 иськем сюрес лэсьтӥзы. Уго со школа маршрутэ пыре вал, отысь 1 пиналэз бускель гуртысь школае нуллӥзы. Талы 92 миллион манет кисьтӥзы. Но сюресэз лэсьтыозь, нылпиё семья Тортымысь кошкиз. Гуртын али 50 мурт пусъемын, нош улэ 20 адями гинэ. Та 92 миллион манетэз быдтытозь, пайдаёгес ӧй луысал-а калыклы мукет гуртэ улон коркаос басьтыны?
Кун ваньбурез чотаса, шараяськиз: 2 сюрс 275 объект тэк сылэ. Нош соосты шунтыны-чакланы огъя бюджетысь коньдон кошке. Кылсярысь, 2006-тӥ арысен юнме улӥз «Буммаш» заводлэн огез юртэз. Сое возьыны бюджетысь арлы быдэ висъяськиз 3 миллион манет. Та юрт интыын туэ усьтӥськоз туала бизнес-центр. Сое нырысь ик арендае басьтоз «Промсвязьбанк». Соин валче ар ӵоже банк 18 миллион манет выт тыроз. Аренда чотын гинэ бюджетэ 2 миллион манет мында вуоз. Эшшо 400 муртлы ужан интыос усьтӥськозы.
Соин тэк улӥсь юртъёсты азьланяз но вузалозы. Туэ 1-тӥ апрельлы 284 объект вузамын ни, эшшо 215 юртлэн выль кузёосыз кылдозы туэ нырысетӥ паларе.
Александр Бречалов пыр-поч ивортӥз на, кыӵе воштӥськонъёс луозы социальной удысын. Шаерамы туэ Тазалыклэн арез ялэмын бере уката но бадӟым саклык эмъян удыслы. Кылсярысь, арысь аре секыт югдур льготая чаклам эмъюмъёсты висъянлы. Сое тырмыт басьтыны уг быгато онкологиен висисьёс но, диабетэн курадӟисьёс но. 2019-тӥ арлы эмъюм басьтыны ватсаса мыноз 318 миллион манет.

Елена Скворцова

Ангелина Снигирева
By Ангелина Снигирева Апрель 25, 2019 16:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<