Лариса Бурановалэн азбукаез

Ангелина Снигирева
By Ангелина Снигирева Апрель 3, 2019 17:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

3-тӥ апреле зарни юбилейзэ пусъе Лариса Буранова — Удмуртиысь йӧскалык политикая министр. Лариса Николаевна кыл кутэ быдэс элькунысьтымы выжы калыкъёсын ужан понна. Али министерстволы оскемын 2020-тӥ арын Удмуртилэн кунлыкезлы 100 ар тырмонлы сӥзем ужрадъёсты ортчытыны.
Нош кыӵе со огшоры улон-вылонын, кыӵе анай-атай вордӥллям сое, мае яратэ, ужзэ сяна? Ми ӵектӥм Лариса Николаевналы улонзэ азбука пыр усьтыны.

Л. Буранова
Фото: Л. Гонин

Анай — дунне вылысь тужгес быдӟым адями. Мынам анае Маргарита Григорьевна Конюхова — туж огшоры удмурт нылкышно. Дышетскемезъя со библиотекарь, но городэ улыны выжыса, заводэ интыяськиз. Одӥгаз юбилеяз эшез вераз, макем со егит дыръяз етӥз, шаплы, калыкез огазеяны быгатӥсь вал, мыным со туж паймымон потӥз, угось мон анайме тодӥсько мукетэн. Быземез бере со ассэ быдэсак кузпалэзлы, мыным сӥзиз. Музъемозь йыбырттӥсько солы монэ вордэмез, яратыса будэтэмез понна. Со ноку ӧз косъяськылы, котьку мыным оскылӥз. Туж ӧз но тышкаськылы, ӧз но ушъялля. Но мон кылылӥ, кызьы со мон сярысь ӟечен вералляз ӵыжы-выжыосмылы, данъяськылӥз туж пичи вормонъёсыным но. Сое туж ярато мынам эшъёсы — ачим ӧвӧл дыръя но дораз куное вуыло.
Атае Николай Леонтьевич Конюхов — туж юн сямо, зэмлыко, азьпалзэ адӟыны быгатӥсь, ужез гажась… Коммунист. Верховной Советлэн 3 созываз депутат вал, пыртэмын УАССР-лэн Ужысь славая но героизмъя книгаяз.
Песятае Леонтий Николаевич Н. Кузнецовлэн «Спасители Отечества» книгаяз пыртэмын, со туж визьмо, юн сямо вылэм, война дыръя бронь сётӥллям, малы ке шуоно председатель вылэм. Улон вылэм туж секыт, калык сютэм, катьтэм. Ужасьёсты жаляса, со огпол, жуммем валэз вандытыса, ваньмызлы сӥль люкылэм, нош аслыз быжзэ но пыдъёссэ гинэ кельтэм. Война вакытэ валэз вандэм понна ыбыны быгатысалзы, но гуртоос кызьы ке огез но ӧвӧл чагиськиллям, угось со сӥльлы луыса тросэз катьяськиллям. Но ачиз дедмы со учыр бере фронтэ куриськем. Пусъемын «За боевые заслуги» медален.
Мон туж шудо адями, малы ке шуоно анае-атае улэпесь на, асме огдыре нылэн но, анаен но шӧдӥсько.

Букварь. Мон дышетски Ижысь 11-тӥ школаын. Туж ӟеч тодӥсько на нырысьсэ школае мынэмме — али сямен ик, пиналъёслэсь школалы дась луэмзэс азьлапал эскерылӥзы. «Экзаменэ» монэ атае нуиз. Дышетӥсь косӥз тодмотэм книгалэсь нимзэ лыдӟыны. Со вал «Дети подземелья». Мон, конешно, лыдӟиськисько ни вал.
Нырысетӥ сентябре мон дышетӥсьлы матэ, нырысетӥ парта сьӧры, пукси. Вӧзам интыяськиз Наташа Воронова — ми соин али ке но эшъяськиськом.
Школа туж шулдырен тодэ лыктэ, мон нормальной пинал вал: «вить» понна ӧй висьылы, урокъёсысь но пегаллямы. Но мон асме та дырозь дышетскисен лыдъясько, нуналлы быдэ ас поннам маке выльзэ усьтӥсько.

Вакыт. Котькуд поколенилэн аслаз вакытэз — кинлы мар усе. Ми будӥм совето вакытэ. Бен, вал туж кужмо идеология, милям ӧй вал быръёнмы, дуннеез валанмы, ми зэмзэ но кожаллям, СССР-ын кадь ӟеч улон нокытын ӧвӧл шуыса. Тодӥсько на, Берлинысь одӥг нылашен гожтэт пыр кусып возьылӥм, мон ялан сое жалялляй, со Германиын улэ шуыса… Но мон чик уг жаляськы, со вакытэ будӥ шуыса, мон таӵе луи комсомоллы луыса.
Туала вакыт сярысь ке верано, али егитъёслы дышетскыны, азинскыны луонлыкъёс пумтэм — тодон-валанэз кырымен омыръяны кулэ: кунгожъёс усьтэмын, Интернет котькуд коркан! Туж шумпотӥсько, удмурт егитъёс асьсэды палэнын но шедьто, азинлыко луо ке.
Город. Ижевск — мынам вордӥськем интые. Мон яратӥсько аслэсьтым городме. Со мыным туж мусо но шуныт потэ. Дорам куноос вуылыку, одно ик нуисько соосты Кибашлыослэн юртазы, «Бобровая долина» кафее, «Мугур» студие.
Но туннэ городын туж трос на тэк улӥсь инты (пространство), мон малпасько, сое одно тырмытоно калык шӧмен. Тунсыко но матын луэ зэмосэз гинэ.

Сяськаосты яратэ

Дор. Ижкарез сяна, дорен лыдъясько Алнаш ёросысь Кучыран гуртэз, Дэри черкогуртэз но, малы ке шуоно отысь выжыосы, отын песянайёсы дорын мон ортчытӥ пичи дырме. Но кӧня ке ар талэсь азьло мынам кылдӥз эшшо одӥг доре — Вавож ёросысь огаз починкае корка басьтӥ. Та пумысен ваньмыз паймо: малы сокеме? Малы калыклэсь палэнэ? Кызьы валэктод, мон та интылы, огпол адӟыса, синмаськи шуыса? Со вал ай, отчы студент дыръям экспедициен вуылыкум. Мон абдрай, дунне вылын сыӵе шулдыр, шыпыт инты вань шуыса. Соку отысь адямиосын тодматскыса пыраклы эшъяськи. Вавож пала вуылыкум, одно кожалляй бырись гуртэ. Мон татысь корка басьтысал, верай огпол эшелы шыпыт ульчаостӥ поръян сямен. Жаль, шуиз со, вузась ӧвӧл, колхоз но музъем уг висъя. Но кӧня ке ар ортчыса, мыным туж удалтӥз — корка вузась сюриз! Со дырысен мон 10 ар пала ни отчы бертылӥсько, 3 ар ӵоже ини отын уло анай-атае. Отын кадь ӟеч асме нокытын но уг шӧдӥськы: тулыс тӧдь-тӧдь льӧмпу пурӟе, ӝытъёссэ ныс-ныс шыпыт луэ, укно ултӥ зыл-зыл Вало шур бызе… Выжыкыл!

Е. О, еэн мыным пичи дыръям йӧтылӥз. Папае кӧня ке пол визьмалляз — мон пиос кадь шаян вал ук: каникулъёсы гуртын улыкум, одӥг липет но, кенер но мон тубатэк ӧз кыльы, дыр. Уг алда, пиме будэтыкум, аслам но е кутылэме вань…
Нош «е но преник» сярысь веран мыным туннэ нуналлы уг тупа ни кадь потэ. Яке мыным кулэ ӧвӧл? Милям коллективамы еэн тышкано кадьёс ӧвӧл, ваньмыз тодо асьсэлэсь ужзэс, валало, малы со кулэ, мар мон соослэсь возьмасько.
Бен, дисциплина котькуд организациын валтӥсь инты басьтэ — вань пуктэм ужпумъёс дыраз но ӟеч быдэсъяськыны кулэ. Адямилэн уг ке поты командаын ужамез, иське, нимаз кариськоно.

Жадён. Уг ваты — жа-дьылӥсько. Берло дыре — ӵемгес. Мон 25 ар ини одӥг удысын тыршисько, нош огпӧртэм ужлэсь куке но акыльтоно, малы ке шуоно адями дугдэ выльзэ адӟемысь, дыше огкабъёсъя ужаны. Соин ик туннэ мыным кыӵе ке мукет уж ӵектысалзы ке, мон эскерысал асме. Со удыс чылкак мукет ке но луысал.

Зарезь. Куке но пинал дыръям, куке потыны кутскизы пӧртэм гороскопъёс, нумерологияя книгаос, мон «тодӥ», азьвыл улонам мон пиосмурт вылӥськем, зарезь дурын улӥськем но корабельщик луыса ужаськем шуыса. Мыным со сыӵе тунсыко потӥз — ваньмыз тупа пуш шӧдонъёсылы! Зарезь асьмелэсь кыдёкын, но мон сое туж яратӥсько. Тужгес но Балтикаез. Но огшоры пыласькыса, шунды шорын тэк кылльыса улыны уг чидаськы, мыным кулэ маке выльзэ тодыны-адӟыны, тодматскыны, дышетскыны. Жаляса верано, дуннеез трос уг котыръяськы, но 50 аресэ азьын аслым сыӵе план пуктӥ.

Интеллигент. Та кылэз вераса, соку ик син азям пуксе Дышетӥсе Владимир Емельянович Владыкин. Со кадь интеллигентъёсыз шедьтыны шуг: визьмо, сабырлы, сайкыт…
Мон соглаш ӧвӧл, куке интеллигентэн лыдъяло ваньзэсты вылӥ образованиен адямиосты, нош элитаен — ваньзэсты вылӥ должностьёсын пукисьёсты… Сыӵе ним басьтон понна туж трос ас бордад ужано, калыкед понна лэсьтоно. Интеллигент трос тодэ, солэн паськыт кругозорез, солэн вань аслаз малпанэз, адӟонэз, но со быгатэ кылзыны мукетсэ но.
Нуналмысь улонэз ке басьтоно, интеллигент, ӝӧк сьӧры огназ пуксьыкуз но, чебер посуда пуктоз, ассэ котьку утялтыса возёз, бускелезлы небыт вазёз…

Йӧскалык политика. Нырысь ик со — тупаса улон. Но мон понна та валан, конешно, трослы паськытгес, бадӟымгес, малы ке шуоно мон отын улӥсько: 50 аресысьтым 25-ез сётэмын та удыслы. Мон ужме воштӥ яке шутэтскыны кошки ке но, со весь мон бордын луоз.

Коньдон. Мыным малы ке пичи дыръям ик коньдонэз оскылӥзы, семьяын сое ноку ӧз ватылэ. Дефицит вакытъёсы быдэ вуи бере, кытысь ке мае ке адӟисько ке, дорысь уксё кутӥсько но басьтӥсько вал. Анаелэн-атаелэн одӥг пол но тышкаськемзы ӧвӧл, кулэтэм азе уксёез быдтӥд шуыса.
Но вал мынам но улонам 1990-тӥ аръёс, куке мон шӧдӥ, мар со сыӵе ёрмон, астэ куанер муртэн шӧдон. Сокугес гинэ Нациосын ужан политикая министерствоын ужаны кутски, тодӥ, адямиос Москваын тодон-валанзэс будэто шуыса, куриськи Кун службая академие. Нырысь ӧз кутэ вал, отын министръёс, замъёс гинэ дышетскылӥзы, нош мон соку специалист вал ай. Но вазиськи министрлы, кутӥзы. Зэм, Москвае мыныны билетлы но уксёе ӧй вал. Юрттылӥз Светлана Константиновна Смирнова. Но со но мултэссэ сётыны ӧз быгатылы, сьӧрам картошкаен, «Магги» кубикъёсын ветлӥ. Адямиос нуназеяны столовое, ӝытазе кафее мыно, нош мон общежитиын картошка сиисько… Сьӧразы чорто ке, мынонтэм вылысь олокыӵе но амал шедьтӥсько. Нош куное ӧтё ке, шумпотыса мынӥсько ни вал — шулдыр но, кӧт но тыр. Зэмзэ ке, сием потонэз чиданы луэ ай, пересьёсмы но картош вылын улӥзы, но сыӵе ултӥяськонэз мынам выльысь шӧдэме уг поты ни.
Али, конешно, улон чылкак мукет ни. Мынам уждунэ тырмыт семьяме утьыны, но малы ке ноку ӧй вал узырмон сярысь малпанъёсы.
Лариса. Мыным туж яра аслам нимы! Зэмзэ ке, мынам нимы кема вылымтэ, угось нокин но ӧвӧл оскылэм, 6 толэзяз вордскем нуны улӥсь луоз шуыса, соин больницаын кема возиллям. Медсестра ёртылэм анайме: ачид ним уд понӥськы бере, мон сое Наташа нимасько! Ӵуказеяз ик понӥллям Лариса ним. Кыӵе умой, малпасько али, кыӵе мон Наташа?! Будыса ини, мон адӟи дорысьтымы нимъёс сярысь книгаез — озьыен, папае ним поныны рос-прос дасяськем — ваньзэ лыдӟем-учкем, нош «Лариса» химической карандашен пусъемын! Ӧйтӧд, маиз солы ярам, но мынам сямыя со туж тупа.

Мон секыт адями. Мынам трос куронъёсы. Солэсь ачим но курадӟисько. Мынам трос пиосмурт сямъёсы. Со герӟаськемын, дыр, пичи дырен но — мон семьяын одӥг нылпи вал бере, папае ӵемысь шуылӥз: тон милям ныл но, пи но. Озьы мон анаен артэ керттӥськыны, сиён пӧзьтыны дышетскылӥ, атаен артэ кортӵог шуккылӥ. Малы ке улон мыным киям руль сётӥз: ужын но кивалтӥсько, машина но ачим нуллӥсько, дорын но кузёяськисько…

Ним-дан. Нокыӵе данъетъёсы мынам ӧвӧл, малпасько, адями со понна тыршыны кулэ ӧвӧл. Мон понна тужгес бадӟым дунъет, куке дышетӥсьёсы «молодец» шуозы, ӵыжы-выжыосы мон понна шумпотозы, данъяськозы.

Оскон. Мон кема со дорозь мынӥ. Но мыным удалтӥз — мон шедьтӥ аслэсьтым духовной наставникме. Инмарлы сяна, оскисько анай-атаелы, пиелы, матысь эшъёсылы.
Пие — мынам шумпотонэ. Дималы 25 арес ни, со программист. Туж шумпотӥсько, ог-огмылы эш луыны быгатӥськом шуыса. Возьыт, конешно, пичи дыръяз трос саклык висъяны ӧй быгаты шуыса — мон весь ужын вал, тау анаелы. Дима ачим кадьгес — туж бырйиськись, монэ песянай карыны уг дырты…

Рекорд. Мон синмаськисько кужмо адямиослы, но лыдъясько, адями нырысь ик ассэ ачиз, аслэсьтыз кышканъёссэ вормыны кулэ. Та ласянь тодам лыктэ пинал дыры, куке мон анай-атаелэсь лушкем парашютной школае гожтӥськи. Туж кышкыт вал, но 3 пол тэтчытэк, свидетельство ӧз сётъялэ. Тэтчатэк ӧйлась. Мон али но тодӥсько ай со мылкыдме — асме чемпионэн шӧдӥ кадь. Дорын свидетельствоме возьматӥ но, чабкиськизы.

Серекъян. Мыным туж кельшо серекъятыны быгатӥсь адямиос. Нялтас вераса, удмуртъёс туж быгато маскаръяськыны, соос уг куатасько исамлы, ай асьсэды асьсэос но серем карыны быгато.
Министр луытозям, мон туж серекъясь вал. Эшъёсы болтушка-хохотушка шуылӥзы, нош табере, ачим но шӧдӥсько, туж шер пальпотӥсько (серекъя). Малпаськон тросгес луиз, дыр.

Тол бабай. Вот паймоно кадь, мон, бадӟым будытозям, яратылӥ выжыкылъёс лыдӟыны, малпаськылӥ, куке но отчы сюри ке, мар каро сояз я таяз учырын. Нош Тол бабайлы ноку ӧй оскылы. Садикын воспитательёс Тол бабай кариськылӥзы — соин-а, мар-а.
Али, нациосын ужан политика понна кыл кутӥсь сямен, туж шумпотӥсько, Тол бабай одӥгез устоез бренд луиз шуыса. Со пыр туристъёс тодматско шаеренымы, удмуртлыкен.

Удмуртлык. Одӥг пол тэк пукон сяменымы ӟуч эше юаз: вот тон астэ удмурт шуиськод, мар со тон понна? Соку мынам син азям пуксиз Китайысь горд сюй статуяослэсь армия — сыло соос бӧрсьысь бӧрсе 8 сюрс кузя, асьсэ императорзэс утьыса… Ми, удмуртъёс, 500 сюрслэсь трос. Мышкамы — вашкалаосмы, анай-атайёсмы. Ми али — нырысетӥ радын. Ми ке пограм, усёзы мышкамы сылӥсьёс, уз кылдэ азьпаламы султӥсьёс…
Удмуртлык — со кыл, лулчеберет сярысь вераськонъёс гинэ ӧвӧл. Со — асьмеды гажаны быгатон, но кесяськыса, гадямы мыжгаса ӧвӧл, зэмос ӟеч ужъёс лэсьтыса, мукетъёслы адӟем карымон луыса. Удмуртлык одно татын гинэ но луыны уг быгаты, со луыны кулэ котькытын! Сыӵе дыръя син азям пуксе ялан тыбыр сьӧраз рюкзакен ветлӥсь Света Ядыгарова — со кемалась улэ кунгож сьӧрын, но удмуртлыксэ котьку сьӧраз нуллэ, кытчы ке дугдэ ке, сое рюкзакысьтыз поттэ но ваньмызлы возьматэ-люкылэ… Асьмелэн али трос сыӵе адямиосмы, со туж шумпотымон.

Студент дыръяз стройотрядын тыршиз (нырысетӥ рядын бур паласез)

Фин-угоръёс. Фин-угор дунне — малпам дунне. Но со урод ӧвӧл, асьмеос ог-огмес зэмзэ но вынъёс-сузэръёс кадь шӧдӥськом, капчиен ог-огмес валаськом, асьмелэн уго огвыллем сюлэм висёнъёсмы. Но сямъёсмы сярысь верано ке, асьмеос туж пӧртэмесь. Мон шумпотӥсько, фин-угор дуннеын удмуртъёсты вылэгес пукто ке, удмуртъёс быгато туж ӝог туала улонлэн куронъёсызъя кариськыны, шуо.
Зэм, одӥгез пор эше шуэ, удмуртъёс, пе, малпатэк номырзэс уз вералэ, нош поръёс нырысь верало, собере малпало…

Хобби. Паймоно кадь, берло дыре соос тросгес но тросгес луо. Мон пичи дырысеным яратӥсько вал киужен вырыны, керттӥськыны. Но огпӧртэм ужлэсь мон туж ӝог акыльтӥсько. Кылсярысь, огвакыт шудонъёс гындылӥ, но дыши но аналтӥ. Али висёнэ — розаос. Туж возьмасько ни тулысэз, толалтэ юромо ландшафт дизайнъя курсъёсы ветлӥ, бакчаме аслам киыным шулдыртэме потэ. Нош вордӥськем нуналам ваньзэс утялтыны малпасько… аслам пӧзьтэм сыръёсыным — соос 2 толэзь ӵоже чырсало ни. Юромо мастер доры дышетскыны ветлӥсько, 8 пӧртэмзэ лэсьтыны дыши ни, но дугдыны уг малпаськы.

Чеберлык. Пинал дыръям мынам асме ноку чеберен лыдъяме ӧвӧл — синмаськыса учкисько вал мукет нылъёс шоры. Соин, куке студент дыръям пиос синмаськемзэс вераны ӧдъязы, мон туж пайми: мон чебер? Мыным синмаськыны луэ?
Но будыса чеберлыкез дунъяны кутскиськод мукет сямен. Ӵапак алигес син шорам йӧтӥз Интернетысь юалляськон — кыӵе адямиез чеберен лыдъяськоды юанлы пиосмуртъёс гинэ но пусйиллям кышномуртлэсь узыр пуш дуннезэ. Адями тунсыко, куке со ымдуръёссэ буяса гинэ уг улы, ялан дышетске, трос выльзэ, тунсыкозэ тодыны тырше.

Шуд. Та ласянь мон номыр выльзэ уг вера, шуд — со куке адями шумпотыса ужаз мынэ но шумпотыса дораз бертэ. Мон шудо адями!

Эрик — со куке адямилэн пушказ бурдъёсыз вань, куке со быгатэ аслэсьтыз мылкыдъёссэ-малпанъёссэ творчество пыр усьтыны. Ватӥськыса уг улы, калыке потэ, солэн вань аслаз малпанэз, со быгатэ лобаны…

Югытлык. Мынам вань яратоно веранэ: пеймыт ке потэ, эн ӝожтӥськы, тыл ӧвӧл шуыса — сюсьтыл ӝуаты. Валамон ини, тыл сярысь гинэ ӧвӧл та.

Яратон. Мон сое валасько православие пыр: ачид ке яратӥд, тонэ но яратозы. Яратон пӧртэм луэ ук: дордэ, семьядэ, уждэ яратон. Яратон — со куке тон котьку шӧдӥськод со мылкыдэз, артэ-а со адями, ӧвӧл-а… Татын мон нош ик шуыны быгатӥсько: мон шудо адями, малы ке шуоно улонам шӧдӥ зэмос яратонэз.
Дунне улэ яратонлы луыса!

Зинаида Рябинина

Туспуктэмъёс: Леонид Гонинлэн но Л. Бурановалэн архивысьтыз

Ангелина Снигирева
By Ангелина Снигирева Апрель 3, 2019 17:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<