Кӧттырмон изён

Ангелина Снигирева
By Ангелина Снигирева Апрель 3, 2019 13:44

Малы нылпиос уйин будо?

Юнме верамын ӧвӧл: талалэ адямилэсь осконзэ но изёнзэ — со дунне вылысь тужгес шудтэм адями луоз. Малы? Юалом Ижысь 8 номеро больницаысь неврологлэсь Линар Фаимовлэсь.

Тырмыт кӧлид ке, кужымед но трос луоз
Фото: tjournal.ru

Ку адӟиськомы уйвӧт?

— Адями улонэзлэсь куиньмос люкетсэ кӧлэ, кылсярысь, 90 аресозь улэ ке, 30 арзэ изе, — вера эмъясь. — Нош тужгес троссэ изьытэк ог 10 нунал чиданы быгатэ. Рекорд пуктӥз Америкаысь студент — ӧз изьы 11 нунал. Со аслыз уг кельшы ни вал: йырсазьзэ ыштылӥз, ваньзэ вунэтыны кутскиз, вераськыны ӧз быгаты ни… Эскеронъёс возьмато: адями кӧня ке нунал ӵоже гинэ но тырмыт уг кӧлы ке, мугораз тазалыклы кышкытлык кылдытӥсь 80-лэсь трос воштӥськонъёс кутско. Кема дыр ӵоже тырмыт кӧлӥсьтэм адями борды капчиен кырмиськыны быгатэ сакыр диабет, со куае, керӟег луэ. Тужгес кышкытэз — инсульт но шуккыны быгатоз.

Мар луэ изись адямилэн мугораз? Умме усьыкуз, небӟо сӥльбыгытъёсыз, синкӧльыосыз калленгес вырыны кутско. Бӧрысьгес мугор сӥялэс луыны кутске, температура лэзиське, сюлэм калленгес йыгаське. Бӧрысь ини будон гормонъёс тросгес потыны кутско, сӥльбыгытъёсы уногес вир лыктэ но мукет. Со понна лулсэръёс сак чакласько — вир умой мед ветлоз, шокан ёзвиос мед ужалозы. Шутэтсконэз уг тоды йырвиым но — уйёсы но со одӥгъёссэ мугор ёзвиосты золгес ужатэ, мукетъёссэ шутэтскытэ.

Эшшо ке вань сыӵе валанъёс: вылтӥз изён (быстрый сон) но мур изён (медленный сон). Уй ӵоже соос ялан ог-огзэс вошъяло. Вылтӥз гинэ изьыкуз, адями уйвӧтъёс адӟе. Энцефалография возьматоз: та вакытэ йырвиым кӧлӥсьтэм адямилэн кадь ужа, сюлэм но, изись муртлэн сярысь, золгес йыгаське. Но ог 20 минут ортчыса, адями выльысь мур умме усе.

Тодэ кельтоно яке вунэтоно?

Кӧлӥсь муртлэн мугораз мелатонин гормонэз йылэ. Соку ик пусъёно: со люкаськыса уг кыльы, озьыен, кӧня ке нуналлы кӧттырмон изьыны уз пӧрмы.

— Мелатонинэз кема улыны юрттӥсь гормон шуо на, — пусъе Линар Фаимов. — Малы? Малы ке шуоно солэн мугорлы пайда ваемез вераса быдтонтэм. Нырысь ик, со мугорлэсь висёнъёсын нюръяськон кужымзэ — иммунитетэз — юнматэ. Юнме уг верало ук: тужгес умой эмъюм — изён. Шуом, адями кызыны-кизьнылыны кутске, ӟигарыз бырыны ӧдъя ке, тросгес кӧлоно — чер муре пыӵаса ӧз вутты ке, мугор таза ке, висён ас понназ но ортчыны вормоз.

Эшшо, пе, изьыку мугорын выль лулпырыос (клеткаос) кылдо, глюкоза, белок люкасько. Нош «ӝуам», ярантэм луэм веществоос, токсинъёс мугорысь пото. Нунал ӵоже выль басьтэм тодон-валанъёс, кылэм-адӟемъёс йырысь «ӝажыосы» пуксё. Йыр ас сяменыз соослы дунъет сётоз, кудзэ ке кемалы тодэ ваёнъёсы кельтоз, кудзэ ке вунэтытоз. Соин ик адямилэн кыӵе ке сюлмаськонъёсыз вань ке, ӝыт соосты сэрттыны-пертчыны выронэз ӧвӧл ни. Ӵукна вуоз — ваньмыз ас интыяз пуксёз.

Мар бордын на мелатонинлэн кужымез?

— Мугорысь веществоослэсь воштӥськонзэс юнматэ, адямиез куаёнлэсь уте.

— Мугорлы пересьмыны уг сёты, воргорон кужымез юнматэ.

— Ньылондор безлэсь (щитовидная железа), будон гормонъёслэсь ужамзэс радъя.

— Вирез кизермытэ, вирзӥбетэз умоятэ.

— Лек пыктослэн лулпырыосызлы аляны уг сёты.

— Мелатонин мугоре уката зол люкаськыны кутске 20 часысен. Таӵе вакыт ог 2 час кыстӥське, — пусйиз эмъясь. — Соин ик туж умой, адями 22 час котырын ке но кӧлыны выдэ ке. 23-24 часын — бер ни. Мелатонин но ӧжытгес луоз, мугорлы шутэтскыны кулэ луись вакыт уз тырмы.

Зэм, котькуд адями ассэ умой мед шӧдоз шуыса, изьыны пӧртэм дыр кулэ. Озьы ке но лыдъяське: пересьёслы тырмыны кулэ 7-8 час, бадӟымъёслы — 7-9 час, школьникъёслы — 9-11 час, школае ветлыны вуымтэослы — 10-13 час, воксё пичиослы — 12-15 час. Мултэс кӧлон тазалыкез уз юнматы ни.

Малы умме усьыны курадӟоно?

Лыдпусъёс возьмато: бадӟымъёс пӧлысь котькуд 3-тӥез умме усьыны шугъяське. Талы мугъёс пӧртэмесь луыны быгато. Линар Фаимов верамъя, умме усьыны шугъяськоно, кыӵе ке сюлмаськонъёс вань ке. Ужаса (коть йырын, коть секыт ӝуткаса) укыр жадем дыръя но валесын кема бергано на. Умме усьыны ӵемысь озьы ик шугъясько вирзӥбетэз, сюлэм укыр зол шудэмез лапкомытӥсь, кызонэз быдтӥсь, кызез поттӥсь но куд-ог мукет эмъюмъёсты юисьёс. Адями борды кырмиськемын ке депрессия, со уйбыт но кӧлытэк потыны быгатоз.

— Но изьытӥсь эмъюмъёс вылэ чӧлскыны, соосты 10 нуналлэсь кема юыны уг яра, — пусъе эмъясь. — Угось умой карем интые, тазалыклы уката бадӟым изъян вайыны луоз. Со сяна, изьытӥсь эмъюмъёс кӧлонэз уз умоятэ. Кылсярысь, умме усьыны юрттӥзы ке но, мур уз кӧлтэ. Но озьы-а, тазьы-а, эмъюмъёсты ас коже бырйыны уг яра, одно вазиськоно специалистъёслы.

Мар юрттоз ческыт уммен кӧлыны?

3 Кӧлыны выдон азьын кӧё-вӧё сиськоно ӧвӧл ни. Бен, чылкак сютэм но изьыны выдоно ӧвӧл. Туж иназ луозы йӧл сиёнъёс, кылсярысь, йӧлын ӝукъёс ик. Кофе ӝӧк вылын медаз луы. Чай нап медаз луы. Нош сое турынъёсын, кылсярысь, пыштурынэн, муштурынэн, бутникен (мята), сюлэмтурынэн (пустырник), сабачаен (иван-чай), тимьянэн париды ке, оло, огшоры дыръялэсь ӝоггес но умме усёды. Вылаз ик, иземез поттэм сяна, та турын паросъёс сюлэм, йыр висёнъёсты но буйгато.

— Изьыны выдоно огвакытэ, шутэтскон нуналъёсы но.

— Миндэр, валес укыр небыт но, чурыт но медаз луэ. Мугорлы шоканы медаз люкетэ.

— Кӧлон интыын салкым но пеймыт мед луоз. Телевизорез, телефонэз кысоно.

Элина Кумачёва

фото басьтэмын tjournal.ru сайтысь

Ангелина Снигирева
By Ангелина Снигирева Апрель 3, 2019 13:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<