Кызамак керӟегъяськытэ

Ангелина Снигирева
By Ангелина Снигирева Апрель 4, 2019 15:17

1-тӥ апрельысен 1-тӥ августозь элькунысьтымы ог 6 сюрс муртлы — со пӧлысь 1 но ӝыны сюрсэз нылпиос — пуктозы кызамаклы (корь) пумит прививка. Кыӵе муген?

Удмуртиын чаклало ог 6 сюрс муртлы вакцина пуктыны
Фото: nauka.vesti.ru

Эскеризы ог 3 сюрс муртэ

Кызамак — кышкыт паласькись висён. Муре пыӵаса вуттэ ке, адямилэсь улонзэ куддыр утьыны секыт луэ ни. Угось со борды капчиен кырмисько мукет черъёс, кылсярысь, менингит, энцефалит. Нош палаське кызамак туж ӝог, пыэдэн ӵошатыса но.

Жаляса верано, та кышкыт висёнэн черлан учыръёс быдэс дуннеын шараяськыло. Палэнэ уг кыльы Россия, соин ӵош — Удмуртия но. Кылем арын шаерамы 7 учыр вал.

Кемалась ӧвӧл элькунамы вӧлмиз ивор: туэ ар понна кызамакен черлам мурт вань ини. Нош таяз арня кутсконын эмъясьёс шуизы: Паласькись висёнъёсъя элькун больницае 2-тӥ мурт, горд виштыосын шобыртӥськыса, сюремын.

— Но солэн анализъёсыз лабораториын эскеронъёс пыр потымтэ на, соин ик меӵак вераны ум быгатӥське, кызамак кырмиськемын шуыса, — вераз Паласькись висёнъёсъя элькун больницаысь врач-инфекционист Марина Петренко. — Но висёнэз туж кельше кызамаклы.

Марина Петренко верамъя, висён 21 нуналозь «ватскыса» улыны быгатэ. Собере мугор 39 градусозь ӟырда, адями кӧс кызыны кутске, ньылоныз горд-горд луэ, синъёсыз урӟектыны быгатозы — конъюнктивит кутске. Со сяна, ымпушказ векчи, манной кеньыр выллем, потосъёс кылдыны быгатозы. 5-тӥ нуналысеныз ни мугор горд виштыосын шобыртӥськыны кутске. Нырысь соос пото ымныр котыре, собере пумен уллань васько.

— Адями ачиз но валаса уг вутты на, черламын шуыса, нош висёнзэ мукетъёсызлы паланы быгатэ ни, — азинтэ веранзэ Марина Витальевна. — Соин ик корен висись мурт шараяське ке, туж трос калыкез эскероно луэ.

Кылсярысь, 1-тӥез висись шараяськем бере инфекционистъёс ог 3 сюрс муртэ эскеризы. 900 адямилы кызамаклы пумит прививка пуктӥзы, угось соос уг тодо, азьло басьтылӥзы-а сое. Воргорон висёнзэ кырмем Вьетнамысь. Отысь бертэмез бере Дэри ёросэ куное ветлыса вуттэм на. Со сяна, улэ Ижысь трос квартираем коркан — 17 этажын кӧня ке подъезд…

2-тӥез черлам мурт но — воргорон, таиз кемалась ӧвӧл берытскем Узбекистанысь. Соин сэрен 240 муртлы кызамаклы пумит прививка пуктэмын ни. Таиз улэ Ижысь нимаз коркан, соин ик ӧжытгес адямиосын пумиськылыса вуттэмын…

Оскон сётэ прививка

Кышканы кулэ-а, шаерамы кызамакен сэрен эпидемия кылдыны быгатоз шуыса?

Эмъясьёс буйгато: укыр трос висисьёс луыны кулэ ӧвӧл. Угось калык пӧлысь ог 95 процентэзлы куке но соку та висёнлы пумит прививка пуктэмын ик. Со кемалась дырысен пыртэмын Прививкаос пуктылонъя национальной календаре.

— Национальной календаре пыртэмын тужгес капчиен вӧлмись, тазалыклы кышкыт луись висёнъёслы, кылсярысь, пыэдлы, туберкулёзлы, ӵужектонлы пумит прививкаос, — вераз Тазалыкез утёнъя министерствоысь вакцинопрофилактикая валтӥсь специалист Елена Данилова. — Со календарьын ваньмыз лад-лад пусъемын, кыӵе висёнлэсь ку прививка пуктоно. Кызамаклы пумит вакцина нырысьсэ пуктӥське 1 арескын, кыкетӥзэ — 6 арес тырме ке. Таӵе нылпилэн быдэс улытозязлы кышкыт висёнлы пумит иммунитетэз кылдэ ни.

Бадӟымъёслы прививка озьы ик пуктылӥське. 1-тӥзэ но 2-тӥзэ лэсьтон вис 3 толэзьлэсь ичигес медаз луы. Кин уг тоды ни, пичи дыръяз пуктэмын-а вал вакцина, соос сое выльысь лэсьтыны быгатозы. Уката ик кунгож сьӧры потаны дасяськисьёс.

— Но висёнэз, кунгож сьӧры потатэк гинэ но, шедьтыны луэ, — пусъе Елена Данилова. — Кылсярысь, югдур умой ик ӧвӧл бадӟым городъёсын — Москваын, Санкт-Петербургын. Со сяна, элькунамы но трос туристъёс вуыло. Эшшо ӧжыт ӧвӧл ужаны лыктӥсь мигрантъёс. Зэм, соос ваньзы ортчо эмъясьёс пыр.

Но прививка нокинэ кужмысь пуктытыны уг луы. Соин ик эмъясьёс туж оско: адямиос валалозы, тазалыксы асьсэ бордысь но потэ шуыса. Озьы 1-тӥ апрельысен вань поликлиникаосын кызамаклы пумит прививка пуктылыны кутскизы. Со лэсьтӥське дунтэк. Вакцина ваньмызлы тырмыны кулэ.

— Кин уг тоды, кызамаклы пумит прививкаез вань-а шуыса, нимысьтыз эскерон ортчытыны луоно, — ватсаз Елена Данилова. — Сое лэсьто Паласькись висёнъёсъя элькун больницаын, частной клиникаосын. Но адямилэн озьы выремез уг поты ке, кыкетӥ ползэ но пуктыса, номыр кышкытэз уз луы. Сое пуктыны алэмын соослы гинэ, кинлэн курегпуз тӧдьылы аллергия кылдэ, кин черламын туберкулёзэн, но нуны ваёно нылкышноослы.

Нош нуны ваён сярысь малпаськись нылкышноослы прививка одно пуктоно — кызамаклы кылдэм иммунитетсы кӧня ке но выжоз нунылы но. Озьы ик поликлиникаосын та вие витё трос калык пӧлын ужасьёсты, палэнэ кошкылыны дасяськисьёсты.

Элина Кумачёва

Ангелина Снигирева
By Ангелина Снигирева Апрель 4, 2019 15:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<