Дышетӥсь интыын — Бэтмен

Ангелина Снигирева
By Ангелина Снигирева Апрель 9, 2019 15:10

Ку деепричастной оборотъёсты висъяно? Кызьы «не» частицаез ӵош, ку нимаз гожтоно? Ваньзэ тае тодэ ваёно луоз «Тотальный диктант» акцие пыриськисьёслы. Ижкарын сое гожтозы 13-тӥ оштолэзе 15 часын.

Лыдӟоно ӟуч классикаез

Нырысетӥез ӟуч диктант ортчиз 2004-тӥ арын. Сое радъязы Новосибирскысь кун университетысь студентъёс ӟуч кыллэсь данзэ ӝутон вылысь. Ӟуч кылын гожъяськыны капчи ӧвӧл — со понна ик сое дышетыны но тунсыко, пусъё «Тотальный диктантэз» радъясьёс. Ӟуч кылын шонер гожъяськыны быгатэмзэс эскерыны мылкыд карисьёслэн лыдзы арысь аре йылэ. Кылем арын акцие пыриськиз 76 кунысь 22 сюрслэсь ятыр адями. Диктантэз гожто акцилэн вотэс бамаз но — со понна totaldict.ru сайтын регистрация ортчоно.
Диктантлэсь текстэ дасяло тодмо писательёс. Текстъёсты пӧрмытъязы ни Гузель Яхина, Евгений Водолазкин, Леонид Юзефович, Алексей Иванов но мукет гожъяськисьёс. Туэ асьмемыз малпаськытоз Павел Басинский писательлэн, литературоведлэн, сценаристлэн но критиклэн текстэз. Диктант 4 люкетлэсь пӧрмытэмын. П. Басинскийлэн гожтэмезлы инъет луизы ӟуч классикъёслэн произведениоссы: А. Пушкинлэн «Моцарт и Сальери» пьесаез, Н. Гогольлэн «Мёртвые души» поэмаез, М. Горькийлэн «На дне» пьесаез. П. Басинский ӧз вунэты яратоно авторезлэсь — Л. Толстойлэсь — произведениоссэ но. Диктантлэсь кыӵе люкетсэ гожтозы Удмуртиын, тодмо луоз 13-тӥ оштолэзе гинэ.
Ольга Кедысь — «Тотальной диктантлэн» Ижкарысь экспертной комиссилэн кивалтӥсез, ӟуч кылъя но литературая дышетӥсь — верамъя, ӟуч классикаез гажась муртъёслы диктант гожтыны капчигес луоз. Кылсярысь, Н. Гоголез яратӥсьёс тодо: солэн произведениосаз трос деепричастной оборотъёсыз, озьыен, соосты висъян правилоосты тодэ ваёно. Л. Толстойя стилизация ӟудытыны быгатоз: солэн стилез секыт, предложениосыз кузесь. Нош А. Пушкинлэн стилез вольыт, капчи, со дыре ик кылыз туж чебер.
О. Кедысь верамъя, адямиос знакъёс пуктылыны котьку шугомо. Ольга Владимировна ӵектэ тодэ вайыны, ку скобкаос кутӥсько, кызьы прямой речез висъяно. Ӟуч кылэз тодазы вайыны мылкыд карисьёс диктантлы дасяськизы, «Русский по средам» курсэ ветлыса. О. Кедысь верамъя, диктантэз туж сак эскеро. «Тотальный диктант» понна басьтэм «3» отметка но алама ӧвӧл. Угось текстъёс ӵемысь секытэсь луо, куд-ог правилоос школаын вылтӥз гинэ дышетэмын. Баллъёсты тодэм бӧрсьы янгышъёсты учкыны но филологен кенешыны луоз.

Кутчано кроссовки

Ижкарын диктантэз гожто 2010-тӥ арысен. Кылем арын городын акцие пыриськиз ог 2 сюрс адями. Арлы быдэ шоркарамы площадкаослэн лыдзы будэ. Таяз арын 60-лэсь уно интыос — библиотекаос, школаос, вузъёс — ӧсъёссэс усьтозы. Ижлэн администрациезлэн йырызлэн воштӥсез Дмитрий Чистяков верамъя, акциез радъясьёс котькуд ар паймытыны тыршо. Кылсярысь, И. Наговицын нимо библиотекаын ужрад егитъёслы тунсыко луоз — татчы лыктӥсьёслы кроссовки кутчаны дэмлало. 22-тӥ номеро библиотекаын диктантэз лыдӟоз комиксъёсысь Бэтмен. Озьы ик диктантэз гожтозы Ижкарысь аэропортын, эскурсиослы чаклам трамвайын, пельнянь сиён кафеын. «Площадка для блондинок» интые чорто югыт йырсиё нылашъёсты. Ляб адӟисьёс понна диктант лыдӟозы Духовно-нравственной воспитаниея элькун колледжын. Куд-ог площадкаосын диктант гожтэмлэсь азьвыл нырысь регистрация ортчоно диктантлэн сайтаз. Мукетъёсаз — школаосы, вузъёсы — регистрацитэк лыктыны луэ.
«Тотальный диктантэз» радъяны юртто волонтёръёс. Котькудӥзлэн пыриськемез но аслаз гуртаз яке караз диктант гожтон интыез усьтэмез луэ. Со понна акцилэн вотэс бамез пыр диктантэз радъясьёсын герӟаськоно. Туэ Удмуртиын, Ижкарын сяна, площадкаос ужалозы Воткинскын, Сарапулын, Шарканын но Эгралан.

Анастасия Шумилова

Ангелина Снигирева
By Ангелина Снигирева Апрель 9, 2019 15:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<