Данын водительёс

Ангелина Снигирева
By Ангелина Снигирева Апрель 12, 2019 09:51

Россиын 1-тӥ апрельысен пиосты армие басьто. Кызьы ортче таиз призыв, кыӵе воштӥськонъёс пыртэмын, вераз Удмуртиысь военной комиссар Александр Комлев.

Тросэз пиос военной службазэс ортчыны дась.

— Туэ тулыс сурон сапег кутчалоз ог 1 сюрс 200 пала егит мурт, — шуиз А. Комлев. — Кылем арынлэсь та лыдпус ӧжытгес, угось арысь аре йыло службазэс контрактъя ортчыны мылкыд карисьёс. Асьме пияшъёс кошкозы Шор, Шундыпуксён, Лымшор но Уйпал военной округъёсы. Бадӟым люкетэз шедёз музъемвыл войскоосы, котькуд 10-тӥ-ез — воздушно-космической, озьы ик асьме пияшъёс службазэс нуозы ракетной, военно-морской, воздушно-десантной, Нацгвардилэн войскоосаз. 3 мурт службазэ ортчытоз альтернативной амалэн, соос ужалозы больницаосын, калыклы улон-вылонын юрттэт сётонъя центръёсын.

А. Комлев верамъя, берло дыре армия туж кулэяське «С», «Д», «Е» категориосын водительёслы. Соин валче туэ шаерысьтымы 200 пала егит водительёс сурон сапег кутчалозы, ог 90 процентэзлэн грузовой машина нуллыны правозы вань. Со сяна, службазы дыръя вань мылкыд карисьёслы луонлык сётӥськоз «С» категорияя праволы дышетскыны.

Егитъёслэн тазалыксы пумысен вераз военкоматысь военно-врачебной комиссилэн кивалтӥсез Николай Артемьев. Арлыдзыя армие мыныны вуэм пиосъёс пӧлысь 65 процентэз гинэ тазалыксыя сурон сапег кутчаны тупало. Н. Артемьев пусъемъя, тросэзлэн сюлэм, сэр висёнъёссы шараясько. 15-17 аресъемъёс бадӟым вирзӥбетэн курадӟо. Бускель улосъёсын ӵошатыса, та ласянь элькунамы югдур уродгес. Озьы ик пиосмылэн ляб лулсэрзы, лыоссы, ӝуш-сюлзы.

Армилэсь огдырлы мозмытэмын луозы школа бере ссузъёсы, вузъёсы пырем дышетскисьёс. Но пияш школа бере техникумын дышетскыны шуыса армилэсь отсрочка одӥг пол басьтылӥз ке, кыкетӥзэ, университетэ пырыны мылкыдыз вань ке но, со уз ни сётӥськы. Нош специалитет, бакалавриат бере егит муртлы магистратураын, аспирантураын, ординатураын очно амалэн тодон-валан люканы луонлык сётӥськоз, пияш огзэ дышетскон учреждениез йылпумъям араз ик мукетаз дышетскыны пыриз ке.

Озьы ик туэысен воинской учёт ласянь вош-тӥськонъёс пыӵало. Азьвыл пияш пропискаезъя яке временной регистрациезъя военкоматэ учётэ султэ вал. Табере палэнэ ужаны, дышетскыны кошкем пияшъёс ялан ужан, дышетскон интыысьтызы военкоматын пусйиськыны быгатозы.

Ожгар частьёсы воргоронъёсты келяны кутскозы ни 19-тӥ апрельысен. Уноез пияшъёс келямын луозы июнь толэзьлэн пумаз но июль толэзе, соку тросэз экзаменъёссэс сётозы, дипломъёс басьтозы ни. Азьвыл сямен ик, егит солдатлы дӥськут, банковской карта сётӥськоз, толэзяз 2 сюрс манет тыриськоз.

Призыв ласянь юанъёсын вазиськыны луоз военкоматлэн «пӧсь телефоназ» — 8 (3412) 78-19-24, 68-54-11 номеръёсъя. Озьы ик сюлмаськытӥсь юанъёслы валэктон сётозы военной прокуратуралэн Ижысь гарнизоназ 8 (3412) 43-17-01 номеръя.

Ангелина Снигирёва

Фото: «Удмурт дуннелэн» архивысьтыз

Ангелина Снигирева
By Ангелина Снигирева Апрель 12, 2019 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<