Данъяно ке — рос-прос

Ангелина Снигирева
By Ангелина Снигирева Апрель 26, 2019 12:16

26-тӥ апреле сӥлы кариськомы но буре вайиськомы атомной авариослэсь бервылзэс утялтонэ пыриськемъёсты. Ужрад ортчытонэз быдэсак ас вылаз басьтэ Удмуртиысь «Чернобыль» огазеяськон, но общественникъёс та данъян нуналэз радъяны арысь аре курадӟо. Малы?

С. Сармакеев

Нимысьтыз радъясь кулэ

Чернобыльысь атомной станциын, Челябинск палась «Маяк» комбинатын пуштэм бервылъёсты утялтонэ пыриськемъёсты буре ваён но данъян нунал «О днях воинской славы» федеральной законэн юнматэмын. Соя ик данъян нуналъёсын лыдъясько 23-тӥ февраль, 9-тӥ Май праздникъёс. Берлооссэ паськыт пусйиськом, угось таоссэ радъян понна кыл куто министерствоос, бюджетысь коньдон висъяське. Но тазьы вераны уг улы Чернобыле ветлэмъёсты данъян сярысь.

— Жаляса верано, ужрадэз ортчытон понна Удмурт Тӧролы уксё курыса, арлы быдэ вазиськон гожтоно луиськомы, — вера радиационной авариосысь инвалидъёслэн но ветеранъёслэн «Чернобыль» огазеяськонзылэн кивалтӥсез Семён Сармакеев. — Синпелет доры сяська басьтоно, пичи ке но концерт дасяно… Пуштэм бервылэз утялтыны ветлэм ветеранъёс но кун понна трос лэсьтӥзы ук. Соослы луыса кышкыт радиация кортнамын вал, нош соос кӧня тазалыксэс быдтӥзы. Бен, огазеяськонысь ветеранъёс нокыӵе бадӟым ужрадъёс уг возьмало. Уноез соос пӧлысь арлыдоесь ни — пичи ке но шуныт кыл но сюлэмзэс шунтысал. Чернобыле ветлэмъёс пӧлысь ӝыныез ветеранъёс улонысь кошкизы ни. Но Ижысь буре ваён синпелет доры лыктозы соослэн семьяоссы. Кузпалзы, атайзы юнме шорысь улонзэ ӧз сёты, Атыкай музъемзэ утиз шуыса, соослэн но тау карон кылъёсты кылэмзы потэ. Туж потэ вылэм тазэ но ужрадэз ас вылаз кыӵе ке министерство мед басьтысал, соку со рос-просгес ортчысал. Ми, общественникъёс, кыл кутонлэсь, ужрадэз ортчытонлэсь ум кышкаське, но милям сое радъян понна сомында кужыммы но, уксёмы но ӧвӧл. Собере туннэ огазеяськонмы вань ке, ӵуказе нуналмы тодмо ӧвӧл.

Тазалык но синпелет

Семён Сармакеев верамъя, Чернобылез чылкытатонэ шаерысьтымы 2 сюрс 500 адями пыриськиз. Туннэ нуналлы ӝыныез гинэ — ог 1 сюрс 350-эз — улэп кылемын. Уноезлэн ветеранъёслэн тазалыксы чутэ — соослы врачъёс дорын ялан эскериськыны кулэ. Зэм, ветеранъёслы йӧнатскыны луонлык сётэмын Ожысь ветеранъёслэн элькун госпиталязы. Но татын но тырмымтэосыз вань.

— Одӥг лыктэмен адями пӧртэм специалистъёс дорын тазалыксэ эскерыны, юнматыны мед быгатысал, — азинтэ веранзэ С. Сармакеев. — Уката сюлмаськоно пыдлось гуртъёсысь ветеранъёс понна, угось ёросъёсын врачъёсын эшшо но шуггес. Кылсярысь, адями тазалыксэ тупатыны лыктэ, нош госпитальын хирург но, уролог но ӧвӧл. Приволжск федерал округез учконо ке, асьме госпиталямы эмъяськон процедураос но лэсьтӥсько тужгес ӧжыт.

С. Сармакеев радиационной пуштэм бервылэз утялтонэ пыриськисьёсты данъясь выль синпелет пуктон сярысь но сюлмаське. Алиез, пе, пуштэм бервылын быремъёсты буре ваёнлы сӥземын. Нош уноез асьме шаерысь воргоронъёс, кылсярысь, Чернобылез чылкытатэмзы бере доразы трос бадӟым данъетъёсын бертӥзы. Озьы общественникъёс Иж город администрацилы вазиськизы, пӧсь интыосын ожмаськем ветеранъёслы сӥзем синпелет вӧзы эшшо одӥгзэ пуктыны курыса. Та ӵектон туж интыяз, угось али Нылпиослэн но егитъёслэн творчествозыя юрт вӧзы «Патриот» сквер лэсьтон сярысь вераськон мынэ. Солы проект но дасямын ни.

Туэ но люкаськозы

Но номыр шоры учкытэк, огазеяськонысь азьветлӥсьёс данъян ужрадэз ас кужыменызы ортчытыны туэ но дасясько. Та нуналъёсы ветеранъёс но Монтажной техникумысь студентъёс радиационной авариосын быремъёсты буре ваёнлы сӥзем синпелет котырез утялтӥзы. Та сяна, арлы быдэ Ижысь Дун чылкыт Михаиллэн собораз быремъёсты буре вайыса, ветеранъёслэн тазалыксы понна вӧсяськон ужрад ортчылэ. Сое радъяны огазеяськон юромо черклы «Чернобыльский спас» мудор кузьмаз. Та бӧрсьы синпелет дорын пумиськон ортчоз, ветеранъёс но соослэн семьяоссы, общественникъёс сяська керттэтъёс понозы, Нылпиослэн но егитъёслэн творчествозыя юртысь пиналъёс крезьгуро концерт возьматозы.

Ангелина Снигирёва

Ангелина Снигирева
By Ангелина Снигирева Апрель 26, 2019 12:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<