«Дангыр»

Ангелина Снигирева
By Ангелина Снигирева Апрель 3, 2019 10:16

Шаркан ёросысь Тюар гуртысь кибашлы Николай Трефилов ас киыныз лэсьтэм тракторзэ калык син азе поттӥз 1990-тӥ арын. Туннэ нуналозь ялан умоятъя техниказэ. «Дангыр» нимо тракторез МТЗ-52-лэсь но кужмогес, шуэ.

«Дангыр» трактор

— Ӟезьыетӥ но, тэльысь писпуос пӧлтӥ но кенӟали кадь ӝог ортче, — тракторез сярысь вера конструктор. — Азбарамы МТЗ-52 но сылэ, но турын ворттоно-а, нюлэс ваёно-а — «Дангырез» поттӥськомы. Со угось топливо но ичигес сие, юнгес, оскымонгес но. МТЗ-52-лэн скоростез 35 иськем гинэ, нош асламез часкын 46 иськеме ширтэ.

Николай Тимофеевич Иван пиеныз ӵош «Дангырзэс» ялан умоято. Нырысь-валысь тракторзылэн кабинаез но ӧй вал. Кемалась ӧвӧл Т-25 куштӥськем тракторлэсь кабиназэ вандылӥзы, тупатъязы, буязы но «Дангыразы» юнматӥзы. Табере нокыӵе кезьытъёс кышкыт ӧвӧл. Тракторзы азьвыл переднеприводной вал, табере — полноприводной. Ворттылӥз но со нырысь бензинэн гинэ. Нош кӧня ке ар талэсь азьло Трефиловъёс дизелен ужась генератор басьтӥзы, моторзэ поттӥзы но тракторе пуктӥзы. Табере техниказы дизелен ужа. Бензинэн ужась мотор сярысь, таиз 2,5 поллы кужмогес — вал кужымез — 20.

Тюарын со нырысьсэ ас киын бичам техника вал бере, калык воксё паймиз. Атаез Тимофей Игнатьевич ӧз оскы вал, моторез ужалоз шуыса. Соин но Николай Трефилов нырысь ик ворттылытӥз атайзэ. Отӥяз трактор семьязылы гинэ ӧз — калыклы но юрттӥсь луиз. Турын гинэ но бускельёссылы ворттыны кӧня юрттӥськиз. Пумен воргорон уробо но, косилка но бордаз ачиз ик лэсьтӥз. Отысь ик ним но потӥз кадь: «Дангыр» — «дан» но «гырыны» кылъёсты малпаса. Трефиловлэсь тракторзэ Вотка ёросысь Бадӟым Кивар гуртын ортчем тракторен биатлон дыръя самодельной техникалы сӥзем вожвылъяськонын-адӟытонын вылӥ дунъязы.

— Вордэм пие кадь потэ. Егит дыръям самолёт но бичаны малпалляй. Но кузпалы шуиз: инмын пазьгиськон понна, пе, шат семья кылдытӥд. Соин но, лэся, тракторлы вань мылкыдме сётӥ. Маке пӧрме ке, выльысь но выльысь вордскиськод кадь. Толалтэосы весь коркан уд пукы ук, — шуэ кибашлы.

Николай Трефиловлэн киыз котьмалы мынэ. Гур но, корка но пуктэ. Соин но лымы бырем бере сое отчы-татчы ӧтчало. Пермь пала но лэсьтӥськыны вуылэ. Гуртоосты но ялан бурдъя. Егитъёсты люкаса, Тюарысь клубзэс юнматӥз. Озьы сое пытсанлэсь утизы. Табере клублы ачиз ик пу кораса сётэ — гуртын газзы ӧвӧл. Колхозысь зерноскладэ кидыс ворттыны транспортёр лэсьтӥз — отчыозь мешокен пырталлязы. Гуртлы бырыны ум сётэ ай, шуэ пиосмурт.

Иван пиез пичиысен атаез вӧзын гаражын будӥз бере, ачиз но техника бичаны быгатэ ни. Ижысь гурт удысъя академиез йылпумъяса, гуртысьтызы «Нива» хозяйствое берытскиз, гаражен кивалтэ. — Табере вань оскон пиелы, со конструктор сямен ассэ мед усьтоз ни, — шуэ атаез.

Иван Трефилов али тракторзылы геры лэсьтон бордын ужа. Со но котьмае ӟечгес, калыклэсь умойгес лэсьтыны тырше.

Елена Сараматова

Ангелина Снигирева
By Ангелина Снигирева Апрель 3, 2019 10:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<