Валаса-а, валатэк-а…

Ангелина Снигирева
By Ангелина Снигирева Апрель 30, 2019 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Маин висъяське удмурт но «а ля удмурт» дӥсь?

19-тӥ оштолэзе Пичи Пургалан ортчиз Калык дӥськутъя 3-тӥ элькун фестиваль.

Фото: Л. Леонтьева

Ужрадын Пичи Пурга ёрослэн йырыз Сергей Юрин ёросэз «калык дӥськутлэн шоркарез» нимаз. Шоркарлэсь шорсюлэмзэ утчано ке — со, дыр, интыяськемын калык дэремъёсты тупатъясь-выльдӥсьлэн Татьяна Москвиналэн «Дэрем» студияз. Татьяна Никитична кема аръёс ӵоже удмурт дӥсьлэсь данзэ ӝутон бордын тырше, со ик ужрадлэн одӥгез кичӧлтӥсез луэ.

— Котькуд ар фестивальлэн кутсконаз вашкала Пичи пурга дэремъёсты возьматӥськом, — вера Т. Москвина. — Культурая юртъёсысь ужасьёс ваё гуртъёсысьтызы шедьтэм дэремъёсты. Туэ малпай вал, ваньзэ шедьтӥм-возьматӥм ини шуыса, но та адӟытон нош ик паймытыны быгатӥз.
Фестивальлэн пуштросэз арлы быдэ воштӥське. Таяз арын удмурт фольклорез бугыръязы: кызьы меда отын возьматэмын калык дӥсь? Конференциын та сярысь вераськиз филология наукаосъя доктор Татьяна Владыкина. Фольклоръя экспедициосы со ӵемысь Пичи Пурга ёросэ поталлям. Нош калык дӥськутлэн мукет культураосын сэрен воштӥськемез сярысь мадиз УдГУ-ысь Искусствоосъя но дизайнъя институтысь история наукаосъя кандидат Людмила Молчанова.
Фестивале коллекциоссэс, Пичи пургаос сяна, вайизы Алнаш, Вавож, Грак, Дэри, Шаркан, Ува, Якшур-Бӧдья ёросъёсысь, Ижысь но Сарапулысь дӥсь вурисьёс. Удмурт модельеръёслэсь дӥсьсэс адӟыны луэ вал калык дӥськутъя «Учке мынэсьтым дэремме» конкурсын но «Подиум» шоу-фестивальын. «Учке мынэсьтым дэремме» конкурсэ пыриськись кибашлыослэсь ужъёссэс дунъяз калык жюри — пӧртэм удысъёсын тыршись адямиос.

Конкурсын возьматэм дэремъёсты учкыса-дунъяса, куд-ог дыръя чурыт кылмес но верам, — шуэ Татьяна Никитична. — Берло дыре куд-огез валаса-а, валатэк-а, эсэпсэ чаклатэк, вуриське но удмурт дэрем лэсьтӥсько шуэ. Пӧртэм районъёсын дӥсьлэн аслаз аспӧртэмлыкъёсыз шуыса, уг чаклало. Озьы ваньмыз сураське-пожаське, номыр удмуртэз уг кыльы — «а ля удмурт» дӥсь мон сое нимасал. Адямиез вӧсь карем уг поты, но критикатэк уг лу — со янгышъёсты тупатыны, калык культураез утьыны юрттэ.
«Подиум» шоу-фестивальын коллекциосты пӧртэм номинациосын возьматӥзы. Керттэм дӥськут, выл дӥсь, ӝыт нуллон дэремъёс, котькуд нуналлы тупась но творческой коллективъёслы чаклам дӥсь, этномода — ма гинэ ӧз дӥсяллялэ сцена вылэ потась модельёс! Со сяна, йӧспӧртэм арбериослэсь: пакетъёслэсь, пластиклэсь, газетлэсь — лэсьтэм дӥськутэн калыкез тодматӥзы. «Подиуме» оглом 300-лэсь уно адями пыриськиз. Модельеръёс но модалиос сяна, сцена вылэ удмурт кырӟасьёс потазы: Пичи пургалась Богдан Анфиногенов, Андрей Корнилов, Воткаысь «Забава» ансамбль но мукетъёсыз.
Фестивале котькуд ар мукет улосъёсысь яке кунъёсысь вуэм куноос пырисько. Таяз аре шундыӝужанпал культураен тодматыны лыктӥз Узбекистанын вордскем Фатима Арифджанова. Узбек кышномурт Москваын «Тюбетейка» нимо восточной базаръёс радъя. Отчы Грузиысь, Башкортостанысь, Татарстанысь, Дагестанысь но мукет интыосысь кибашлыос пырисько, ужъёссэс возьмато. Ф. Арифджанова тырше аслаз калыкез сярысь малпанэз воштыны. Узбек ке — со одно ик гастарбайтер ӧвӧл, узбекъёслэн чебер искусствозы. Пичи Пургала кышномурт «Когда цветёт гранат…» пичи адӟытон вайиз. Ӵапак али, пе, гранатлэн сяськаяськон вакытэз.

Виктория Крамова

Ангелина Снигирева
By Ангелина Снигирева Апрель 30, 2019 13:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<