Буяськон Австралиозь вуттӥз

Ангелина Снигирева
By Ангелина Снигирева 24 апреля, 2019 11:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Грак ёросысь Вуж Эгра гуртысь Дмитрий Белов Австралиын ортчем Global Skills Challenge вожвылъяськонысь 3-тӥ интыен бертӥз. Со ужрадын быдэс дуннеысь егитъёс быгатонлыкъёссэс возьматӥзы. Дима, Россилэн огъя командаяз сюрыса, машина буяны быгатэмзэ возьматӥз.

Д. Белов машина буя

— Дима, кызьы ортче машинаез буянъя ӵошатскон?

— Ӵошатскон 4 нунал кыстӥське. Кыӵе ке деталь сёто ке, нырысь сое «кот вылтӥ кот» амалэн буяны 2 час висъяське, собере со деталез тупатыны — эшшо 2 час. Со сяна, быдэс ӧсэз но тупатӥськомы, буяськомы. Буёл бырйыны но трос дыр кошке, тупасьсэ шедьтоно уго. Машинаез буян азьын дасяськеммес но эскеро. Кортэз буям сяна, пластикез но буямы. Берпуметӥ этапаз сётэм чертёжъя ӧс вылэ графической амалъя суредаськимы. Ӵошатсконын милесьтым котькуд вамышмес дунъязы, соин пумозяз валаны уг луы, кинлы кӧня балл пуктӥзы.

— Кызьы тон машина буяны кутскид?

— Ми дадаеным (агаеным) пичи дырысенымы техникаен тунсыкъяськиськомы, дадае машинаослэсь но мотоциклъёслэсь пушсэс ӟеч вала, мон вылыз понна кыл кутӥсько. Быдэс гужем мотоциклъёсмы котырын бергаськомы вал бере, кытӥзэ но отӥзэ буяно но луэ вал. Огпол асьмеос быдэс мотоцикл бичамы, сое яркыт буяй. Та удысэн, Елабугаысь политехнической колледжын дышетскыкум, тодматски. Отын 2008-тӥ арын машина буян оборудование басьтэмын вылэм, мынэсьтым азьло 2 пияшъёс гинэ выриллям соин. 2-тӥ курсын дышетскыкум, дышетӥсьёс мынэсьтым тунсыкъяськемме шӧдӥзы, Татарстанын ортчись ӵо-шатсконъёсы дасяллязы.

— Австралие ветлэмедлэсь азьло кыӵе ӵошатсконъёсы пыриськылӥд?

— 2016-тӥ арын нырысьсэ Казане ветлӥ, соку 4-тӥ инты басьтӥ вал. Ар ортчыса, 1-тӥ луыны быгатӥ. Соку ик монэ российской ӵошатсконэ Краснодаре келязы, отын 2-тӥ инты басьтӥ. Со дырысен Россилэн огъя командаяз сюри, дунне ӵошатсконъёслы дасяськыса, Москваын, Екатеринбургын, Ульяновскын, Казаньын тренировкаос ортчытъямы. Машинаосыз буянэн сяна, ми отын буёл поттон заводъёсын, выль ужан оборудованиен тодматскылӥмы, пӧртэм мастер-классъёсы вуылӥмы. Англи кылэз тодонлы но трос саклык висъяськиз. Вотэс пыр кылэз дышетон понна быдэс арлы чаклам программае пыриськи, луэ вал нимысьтыз дышетӥсен вераськыны яке групповой занятиосты бырйыны. Гужем гуртын скал возьман вакытэ но дышетыны тырши ке но, Австралиын ӵошатсконын мурт кылэз валаны секыт вал, угось технической лексикаез уггес тодӥськы. Телефонысь переводчике учкылыны трос дыр быдтоно луиз.

— Елабугаын дышетскондэ йылпумъяд-а ини?

— О-о, кылем арын диплом басьтӥ, армие кошкыны кулэ вал. Но туэ дунне ӵошатсконэ мед ветлом шуыса, одӥг арлы бере кельтӥзы. Гуртысь эшъёсы бертыса вуозы ни, но мон уг жаляськы, ӝегатски шуыса, шумпотӥсько Австралие вуылэмелы. Адӟи Мельбурн карез, отын арня ортчытӥ. Нырысь изем потыса ветлӥ, дыр уго 6 часлы азьлань кошке. Собере 4 нунал ӵоже ӵошатскон ортчиз. Мае адӟыса вуттӥ, ваньмыз мыным кельшиз, туж чебер туала кар, сиён-юонъёс гинэ дуногес шуыса шӧдӥськиз.

Али Австралиын сӥзьыл, океанысь ву сӥямын ни ке но, пыласькыны дӥсьтӥ. Сокеме вуыса, кызьы вуэ пыратэк бертод? Огез пристань доры ӝытъёсы пингвинъёс вуо, пе. Мон отчы ӵукна гинэ мыныны быгатӥ, пингвинъёс ӧй вал ни. Но мылкыды ӧз усьы, планетамылэн мукет палаз куке но одно ик выльысь вуи ке, адӟо ай. Мыным кельше выль интыосы вуылыны.

Д. Белов

— Анай-атаед но шумпото, дыр, тынад вормонъёсыдлы?

— Шумпото, нош сюрес вылэ потӥсько ке, сюлмасько. Валля арын Краснодарын ӵошатсконын туж жади, ужрадысь автобусэн гостиницае нуыкузы, умме усиськем. Сайкасько но, автобусэ стоянкаын сылэ, пеймыт ни. Автобуслэн укноетӥз потэменым охранникез курдатӥ, со ик вераз мыным, автобус Адыгеяе вуэмын шуыса. Такси кутыса, берен Краснодаре шонтоно луиз.

Туэ Австралие лобӟыкум, ӵыжы-выжыосме нош ик сюлмаськытӥ. Ӵукна Бегишево аэропортысь лобӟыса, нуназе Москваын Абу-Дабие вуттӥсь самолётэ пуксьыны кулэ вал ини. Нош ӵапак со нуналэ бус лэзиськиз, самолётъёс 6 часлы ӝегазы. Эшъёсы Абу-Дабие вырӟизы ини, нош мон — Москвае гинэ. Билетъёсме воштӥзы ке но, сокем кыдёкысь шаере огнам лобӟоно луи. Анае уйзэ изьымтэ, лэся, мон кытчы ке нош кылё шуыса. Ачим мон соослы туспуктэмъёс вотэс пыр келяны тыршисько — медаз сюлмаське. Семьяе мыным котьку юрттэ, ноку верамзы ӧвӧл, кулэтэм ужен вырисько шуыса, соос адӟо уго, мыным краскаен вырыны тунсыко потэ шуыса. Атае мыным тренировкаос ортчытъян понна бадӟым шуныт гараж но пуктӥз. Табере ӝытъёсме отын ортчытъясько, гуртоос машинаоссэс тупатыны мыным ваё.

— Табере кыӵе ӵошатсконъёс возьмало тонэ?

— Туж оскисько, туэ гудырикошконэ Казаньын ортчоно дуннелэн чемпионатаз пырисько шуыса. Отчы сюрон понна трос дышетсконо на, тренироваться кариськемысь дугдоно ӧвӧл. Пӧрмиз ке, оштолэзь пумын Германиысь заводэ мыно. Собере мукет пиосын Ульяновске ӵошатсконэ люкаськомы, отын ужаммес дунъялозы но быръёзы, кин Россиез возьматоз Казаньын.

Алина КРЕСТЬЯНИНОВА

«World Skills Russia» огинлэн «ВКонтакте» бамысьтыз


Ангелина Снигирева
By Ангелина Снигирева 24 апреля, 2019 11:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<