Яслие черод быроз

«Тополёк» но «Колокольчик» яслиосын кемалась ӧвӧл куаш! мынӥзы лэсьтӥськон ужъёс. Нош табере соосты усьтонэ люкаськизы воспитательёс, анай-атайёс, асьсэос тэшкылиос.
Дуно куноос пӧлын — Правительстволэн Тӧроезлэн воштӥсез Анастасия Муталенко, дышетонъя но наукая министр Светлана Болотникова но Ува ёрослэн йырыз Владимир Головин.

— Нылпи садъёс лэсьтэмын Удмуртиысь Правительство но Россиысь Просвещениея министерство куспын гожтэм огкылъя но «Демография» нацпроектлы луыса, — шуиз Анастасия Муталенко. — Котькуд нылпи садлэн дуныз 90 миллион манет, уксё висъяське Россилэн но Удмуртилэн бюджетъёсысьтызы. Элькунамы лэсьтыны чаклам нылпи садъёс ваньзы та проектъя ик луозы. Котькудӥз 80 нылпилы чакламын.
Уваысь выль усьтӥськем нылпи садъёсы ветлозы 2 толэзьысен 3 аресозь тэшкылиос.
1 арес но 3 толэзьем Катялэн анаез, Алевтина Вахрушева, шумпотэмзэ вера:

— Пиналме «Колокольчике» сётыны чакласько. Мыным садын ваньмыз кельше — чылкыт, югыт! Малпасько, мон кадь шумпотӥсьёс Уваямы ӧжыт ӧвӧл. Угось тросэзлэн анайёслэн, пиналзылы 1 но ӝыны арес тырмыса, уже потэмзы потэ ни.
«Колокольчик» нылпи садлэн кивалтӥсез Светлана Тратканова но пусйиз выль яслилэсь туала куронъёслы тупамзэ. Группаос туж яркытэсь, СанПиН-лэн вань куронъёсызъя лэсьтэмын. Со сяна, котькудаз пуктэмын омырез сузясь рецикуляторъёс, шуныт выж вӧлдэмын. Шугъяськонъёс, пе, уз кылдэ воспитательёсын, воспитательёслы юрттӥсьёсын — коллектив тырмытэмын, ог 30 кузя ужасез луоз.
Матысь дыре Ува каргуртын эшшо одӥг ясли пуктӥськоз — 80 интылы ик. Озьы ёрос центрысь вань пиналъёс 1 но ӝыны аресысен садэ ветлыны быгатозы ни — черод быроз.

Россилэн Президентэз Владимир Путин туэ феврале Федерал Собранилы вазиськоназ ужпум пуктӥз: 2019-тӥ арын покчиосты школалэсь азьло визьноданъя организациосын ватсаса 90 сюрс интыос кылдытоно, нош 3 ар ӵоже та лыдпус 270 сюрсозь вуыны кулэ. Отчы ветлыны быгатозы 2 толэзьысен 3 аресозь нылъёс но пиос.
Удмуртия туэ 25 ясли усьтӥз ке, 2 сюрс 100 тэшкылилы инты луоз. Талы Удмуртилэн но Россилэн бюджетъёсысьтызы оглом 1,3 миллиард манет висъяськоз. Нош 2020-тӥ — 2021-тӥ аръёсы эшшо 24 ясли пуктыны чакламын на — 2 сюрс 190 интылы. Озьыен, оглом элькунысьтымы яслиос 4 сюрслэсь ятыр покчиос вамыштыны быгатозы. Владимир Путинлэсь косонзэ шаермы быдэстоз.
Уваын нылпи садъёсты усьтыса, дышетонъя но наукая министр Светлана Болотникова ватсаз на: матысь дыре яслиос усьтӥськыны кулэ ни Можгалан, Якшур-Бӧдьялан. Кадръёсын шугъяськонъёс кылдыны кулэ ӧвӧл, пе. Угось элькунысьтымы вылӥ дышетскон заведениос, колледжъёс арлы быдэ 200-300 егит специалистъёсты потто. Со сяна, 3 ареслэсь пичиосын ужасьёсты дасянъя али нимысьтыз программаос кылдытэмын — соос пыӵатӥсько ни.

Сергей Захаров

Туспуктэм басьтэмын http://www.udmurt.ru сайтысь