Ыж кадь бабля

Ангелина Снигирева
By Ангелина Снигирева Март 13, 2019 11:18

Вавож ёросын будэто турын сиись парсьёсты

Кузь но баблес гоно парсьёсты адӟылэмды вань-а? Вавож ёросысь Иван Рябов 4-тӥ арзэ ни йӧспӧртэм животъёсты вордэ. Будэтонын таӵе каньыл пудоез уг тодӥськы, шуэ.

Мангалица

Палэнысен венгерская мангалица выжыысь парсьёс зэмен ик ыжъёс кадь адӟисько, тужгес но — возь вылын турын ишкыкузы. Кырпарсен бызьылытыса выжы уськытэмын бере, та нурскетӥсьёс куроез но, турынэз но котьку туж ческытэн сиё.

Та выжыысь парсьёс калык понна выль ӧвӧл ни. Венгриын соосты трос вордо. Отын ик соосты 19-тӥ даурын поттӥзы но. Отӥяз мукет кунъёсы но вӧлмиз. Но кӧй парсьлы кулэяськисьёс кулэсмемен, мангалица сярысь вунэтыны кутскизы. Нялтас вераса, сьӧд но горд буёлоосыз бырисьёсыз радэ пыртэмын ни. Тӧдьыосыз но куӵоосыз гинэ на кылемын. Шаерамы мангалицаез вордӥсьёс воксё но чиньыен лыдъямон.

— Парсьёс олокыӵеосыз но вань, — шуэ 27 аресъем Иван Рябов. — Котькудӥзлэн аслаз сямыз, аслаз пӧртэмлыкез. Кылсярысь, сӥльлы шуыса, туж тупало пьетрен, ландрас выжыысь парсьёс. Нош мангалицаос ӝог будо, мугорзылэн ӝыныез — кӧй. Но кӧйызлы луыса ик будэтод: нӧкы вӧй кадь небыт, ымын сылмись но ческыт. Нош сӥльыз мрамор кадь: кӧйын сӥен-сӥен пӧлэстӥськемын. Эшелэсь мангалица выжыысь парсьёссэ адӟи но синмаськи. Котыразы берганэз трос ӧвӧл ук. Озьы 4 ар талэсь азьло кузь гоно парсьёсты вордон борды басьтӥськи. Нырысь-валысь семьяосы шуылӥзы: олокинэ но шедьтӥськод, калыкез паймытӥськод. Табере мангалицаосмы азбарын 20 кузя ни.

Мангалицаослы гид кулэ ӧвӧл. Гидын соос улыны но уг быгато — мылкыдзы куашка, ӝоканы ӧдъяло. Эрикын гинэ соос ӟеч но таза будо. Оло, кырпарсьлэн вирыз вирсэръёсазы быземен, сокем инкуазез ярато. Зӧк но кузь гонзылы луыса соос ӟырт кезьытъёсы уг кынмо. Гужем пӧсь куазен гонзы кӧня ке усе, «шубазы» векчигес кыле, соин ик шунды шуккемлэсь кышканэз ӧвӧл. Эсьма, гонзы нымы-кибылэсь, шуккиськыса вӧсь луэмлэсь уте. Соин ик егит фермер юртъер котыраз парсьёслы пулэсь котыртэм шуккиз, животъёс зор-котлэсь, сӥсъясь толлэсь утиськыны мед быгатозы шуыса, лапас нерге пуктӥз. Нурскетӥсьёс кенерез кесялозы шуыса, кышканэз ӧвӧл. Сюез гинэ но уг гудӟо. Куспазы ноку уг жугисько, сиён понна уг вожмасько. Мумы парсьёс пиоссэс уг кесяло — туж умоесь анайёс, пиоссэс ӟеч утялто, нонтон сярысь сюлмасько. Йӧлзы но котьку ваньзылы тырме.

Зэм, мангалицаос бызьылытыны, мукет парсьёсын ӵошатыса, бер вуо — 12 толэзьскын гинэ. Иван Рябов пусъемъя, 2 арлы 3 пол пи потто. Нырысетӥ ваемазы ог 5 парсьпиос сяна уг вордӥсько. Но кыкетӥяз 12-озь но лыдзы луэ. Пичи парсьпиос кырпарсьёслы укшало — гонзы гожмо-гожмо. Будэмъязы гинэ со бабыльскыны кутске. Аръем парсьёс 140-170 килограмм кыско. Бадӟымъёсыз 300 килограммозь будо, шуо. Мынам парсьёсы 250 килограмм кыско, пусъе фермер.

Вордскем парсьпиос кынмыны медаз шедьтэ шуыса, Иван Рябов котыртэме кӧлано интыязы куро поттэ. Парсьпи вайыны дасяськись мумы парсьлы но куро кулэ — со отчы кар нерге лэсьтэ.

— Куротэк пудоез уд но кельты — сиёнзы со, — шуэ пиосмурт. — Мангалицаослы угось сиён пӧзьтыса курадӟонэз ӧвӧл. Огпол но ӝук но, суралтэм но лэсьтэммы ӧвӧл. Картошкаез гинэ но ум пӧзьтӥське — гырезен ик сиё. Турын, бакча сиён, ю тысь тусе понӥськомы но — ужез быре. Бырйиськыса уг уло. Ю-няньлэсь отходзэ но мылес уг каро. Нош гужем пастуханы поттаськомы я азязы турын турнаса понӥськомы. Туж ярато люцернаез: белокез но, кальциез но татын трос угось. Куддыр лыосты но, чорыг бервылъёсты но сётӥськомы, ческыт сиемзы потэ, дыр, шуыса. Огез сярысь гинэ сюлмаськоно: тусязы котьку чылкыт юон ву медло. Та соослы таза улыны юрттэ. Нокыӵе висёнъёслы так-то уг сётӥсько. Иммунитетсы юн. Котьма ке но кӧлъёслэсь эмъюм сётъяськомы — утиськем кинлы люкетэм ни.

Пегӟемзылэсь Рябовъёс уг кышкало. Пастухе поттэм парсьёс угось кузёзытэк но, пуныос сямен, доразы котьку сюрес шедьто. Татын угось соосты сюдо, утялто.

Елена Сараматова

Ангелина Снигирева
By Ангелина Снигирева Март 13, 2019 11:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<