Шуныт-а зор?

Ангелина Снигирева
By Ангелина Снигирева Март 5, 2019 15:27

21-тӥ тулыспалэ Ижкарысь Кузебай Герд нимо гимназиын 22-тӥ Герд лыдӟонъёс ортчизы. Таиз научно-практической конференция сӥземын вал Кузебай Гердлэн выль удмурт интеллигенциез будэтон удысын тыршемезлы.

К. Гердлэсь патретсэ суредаз Валентин Белых художник

Будэтытэк уз пушъе

Ужрадэ пыриськизы шаерысьтымы тодосчиос, литератураез эскерисьёс, удмурт кылъя но литературая дышетӥсьёс, студентъёс, дышетскисьёс, удмурт азьветлӥсьёс.

Ужрад ортчиз ӵапак Анай кыллэн калыккуспо нуналаз — 21-тӥ тулыспалэ. «Удмурт Кенеш» огазеяськонлэн тӧроез, Кун Кенешысь ялан ужась комиссилэн кивалтӥсез Татьяна Ишматова вераз, конференцилэсь ортчон дырзэ но, интызэ но огазеяськон юромо та нуналлы тупатӥз. Туэ удмурт гимназилы 25 ар тырме, ӵап татын кылдэ вуоно удмурт интеллигенцилэн пушъетэз.

— Берло дыре асьмеос трос кылӥськом, пӧртэм удысъёсъя кадръёсты дасяны кулэ шуыса. 20-тӥ тулыспалэ Федерал Собранилы вазиськоназ Россилэн Президентэз Владимир Путин нимысьтыз саклык висъяз кадръёсын ужанлы но. Удмурт калыклэсь улонзэ чаклано ке, вуоно интеллигенциез будэтон понна тужгес но трос лэсьтӥз, дыр, Кузебай Герд. Соин ик туэ бырйим та темаез, — шуиз Т. Ишматова.

«Удмурт Кенеш» огазеяськон быгатэмезъя озьы ик тырше кадръёсын ужаны, егит муртъёслы ас кужымзылы оскон пыӵатыны, визь-нод сётыны.

Удмуртиысь йӧскалык политикая министр Лариса Буранова озьы ик вераз: калык мед улоз шуыса, луыны кулэ солэн кылыз. Нош таиз ини потэ котькудмы бордысь.

Тырмоз милем соин?

Конференциын котьку сямен тунсыко доклад лэсьтӥз тодосчи Александр Шкляев. Егитъёс паймыса кылзӥзы, кызьы К. Герд 20-22 аресказ ини малпаськиз нимаз государственность кылдытон сярысь! Со басьтӥське удмурт кылын дышетон книгаос гожтон борды, сюлмаське мукетъёссэ ӝутканы, котькудӥзлы нимаз-нимаз вазиське.

Кивалтӥсьёс шуылӥзы, нырысь калыклэсь улон-вылонзэ тупатом, собере ини кыл борды басьтӥськом. К. Герд лыдъялляз, сыӵе юанъёсты берлолы кельтыны уг яра, малы ке шуоно ӵапак анай кылэз тодэм, сое санэ басьтэм ӝутэ адямилэсь асваланзэ. Соин сое пыртоно котькыӵе удысэ, гуртын гинэ ӧвӧл, городын но.

Трос ужпумъёс, кудъёсыз пумысен малпаськылӥз К. Герд, туннэ но быдэстэмын ӧвӧл, нош куд-огъёсыз уката но лэчытгес луэмын. Туннэ шуг шедьтыны сыӵе интыез, кытын быдэсак удмурт кылын вераськыны луысал. «Оптимизациен» сэрен ичиёмо удмурт кылын передачаос, ыше ёрос радио, куд-ог изданиос пото ини 2 кылын, удмурт кыллэсь интызэ шымыртыса.

Огез гинэ оскон пыӵатэ — улыса-вылыса калык быгатӥз дунъяны аслэсьтыз азьветлӥсьёссэ.

Александр Григорьевичез азинтыса, туала удмуртъёсты пыкылӥз писатель-историк Николай Кузнецов.

УдГУ-ысь студентка К. Хохрякова

— К. Гердэз реабилитировать карем бере сомында дыр ортчиз ни, нош выль исследованиос уг кылдо! Ас вакытаз ми мырдэм шедьылӥм архивъёсы, ас мылкыдмыя, коньдонтэк, кыӵе ке кун заказъёстэк вырылӥм информация шедьтыны-копаны, нош туннэ, куке ваньмыз усьтэмын, куке кылдытэмын синмаськымон луонлыкъёс, туала технологиос, тодосчиослы но, студентъёслы но со тунсыко ӧвӧл. Кожаськоды, номыре эскерыны ни? Вань! К. Герд сярысь ми туж троссэ ум тодӥське на. Та дырозь шараямын ӧвӧл солэн эшъёсызлэн нимъёссы — литератураын туннэ ке но сётӥсько фамилиоссы гинэ. Нимтэм геройёс луыны кулэ ӧвӧл! Уг яра буйгатскыны, эскеронъёсты азьланьтоно, — шуиз Н. Кузнецов.

Можга педколледжысь дышетӥсь Татьяна Иванова мадиз К. Гердлэн Можга педколледже вуылэмез сярысь. К. Герд отын дышетскемын но, ужамын но ӧвӧл, но огпол вуылэмаз но сомында лэсьтыса кельтӥз, сое отын кема тодазы вайылӥллям на.

— Ас вакытаз Можга педколледжен оградын сылӥз Ува ёросысь педтехникум. Солы миым 100 ар тырмиз. Техникум кемалась уг ужа ни, но удмурт интеллигенциез будэтонын солэсь интызэ чылкак вунэтыны уг яра вылэм, — шуиз Ува ёросысь дышетӥсь, шаерчи Евгений Эжбаев. — Мултан педтехникумез озьы ик кылдытӥз вал К. Герд. Со отын арня ӵоже гинэ улӥз, дышетӥсьёсты визьнодаса, но со дыр куспын но туж трос лэсьтыса вуттӥз.

«Удмурт Кенешлэн» Ижысь Октябрь ёросысь ёзэзлэн тӧроез, педагогика наукаосъя кандидат Валентина Ившина мадиз К. Гердлэн нылпи юртъёслы ужасьёсты дасямез сярысь.

Нош егитъёслы тунсыко К. Гердлэн литература творчествоез. Удмурт кун университетын дышетскись Ксения Хохрякова эскере солэсь «Шуныт зор» но «Выль сюрес» книгаоссэ, К. Герд нимо гимназиысь 11-тӥ классын дышетскись Люба Михайлова эскерем К. Гердлэн но С. Есенинлэн творчествоязы кутӥськылӥсь бусылэсь кылсуредзэ (образзэ).

Удмуртлык — виразы

Удмурт калык пӧлын одӥгеныз тужгес бадӟым данъетэн лыдъяське К. Герд нимо национальной премия. Арлы быдэ сое удмуртлык удысын адӟем карымон адямиослы сёто. Туэ соин пусъемын 2 мурт: Удмуртиысь калык художник Семён Виноградов но Грак ёросысь Депутатъёслэн Кенешенызы кивалтӥсь Михаил Крестьянинов.

К. Герд гимназиысь дышетскись Л. Михайлова

— Зэмзэ вераса, таӵе данъетъёсын мон эркиямын ӧвӧл, — шуиз С. Виноградов. — Нош удмуртъёсылэн таӵе сӥлы каремзы дунолэсь но дуно. Мынам быдэс улонэ удмуртлыкен пӧлэстӥськыса радъяськиз. Туж яратыса удмурт гуртъёсы экспедициосы поталляй, арлыдоослэсь юалляськылӥ, гожъяса, суредаса ветлӥ. Мынам удмурт калыклэсь лулчеберетсэ котыр ласянь тодэме потылӥз: кызьы сюан ортчыто, кызьы адямиез вато, праздникъёсы быдэско но мукет. Удмурт котькуд йылолэз сӥлы карылӥз, вашкалаослэсь верамзэс туж чаклалляз.

«Удмурт Кенеш» огазеяськонлэн Индустриальной ёросысь ёзэзлэн кивалтӥсез Елена Ленцова (ӵапак та ёз ӵектӥз С. Виноградовез лауреатэ) вера:

— Таӵе йӧно адями кемалась пусъемын луыны кулэ ни вылэм. Дыраз верам шуныт кыл, дунъян адямиез уката бурдъяло уго. Семён Николаевич егитъёс понна туж адӟем карымон адями луэ, ас удысаз усточи луэм сяна, со пыр-поч выремын этнографиен, общественной ужен. Ай али но куд-ог егитъёслэсь шаплыгес ужамы пыриське.

Михаил Крестьянинов понна но та премия туж дуно луиз.

— Чиновникъёсыз ӵемгес пыкыло, тышкасько, нош монэ данъяськоды тани, — котьку сямен востэмак шуиз со. — Зэм, котькыӵе ужын мед луом, мон котьку аслам калыкеным. Ми улӥськом туж тунсыко интыын, котыр уло пӧртэм калыкъёс — бигеръёс, поръёс, ӟучъёс, чувашъёс, крашинъёс… Соос пӧлын удмуртъёс чик но бездыт уг адӟисько — асьме калык йӧно, визьмо, быгатӥсь. Мед быгатоз со ассэ возьматыны, мукетъёслы адӟем карымон луыны. Ёросамы улӥсь удмурт калык котыр ласянь азьпал радын: со ассэ ӟечен возьматэ гурт удысын но, культураын но, тросэз верасько удмурт сямен.

Лауреатэз ӟечкыланы юромо лыктӥллям ас пал адямиосыз — Грак ёросысь Пуклё гуртысь коллектив. Шуныт кылъёс верам сяна, кырӟаса но лэзизы.

Зинаида Рябинина

Ангелина Снигирева
By Ангелина Снигирева Март 5, 2019 15:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<