Улонлэсь бере кылёно ӧвӧл

Ангелина Снигирева
By Ангелина Снигирева 7 марта, 2019 14:40

Эгра ёросысь гурт хозяйствоя управлениен 11-тӥ арзэ быгатыса кивалтэ Ольга СОЛОВЬЁВА. Туж яратэ вордскем палъёссэ, кемалы кошкылэмез ик ӧвӧл. Данъяське гурт удысын ужасьёсынызы, ёросысьтызы механизаторъёс но скал кыскисьёс котькинлэсь чебересь, визьмоесь, пе.

О. Соловьёва

Кыдан

— Пичи дыры мукет пиналъёслэнлэсь пӧртэм ӧй вал, — веранзэ мытӥз Ольга Соловьёва. — Со вакытэ сярысь малпаськисько ке, бадӟым эскерон пыр ортчи кадь потэ. Вордски мон Эгра ёросысь пичигес гинэ Правой Кушъя гуртын. Семьямы бадӟым вал, 5 пинал пӧлысь мон 4-тӥез луисько. Анае Мария Анисимовна вань улонзэ колхозын ужаз скал кыскись луыса. Бубымы Александр Терентьевич вазь кулӥз, сое мон син азям но пуктыны шугъяськисько. Бубытэк будӥмы бере, пичиысен котьма ужлы дышимы. Юртъер котырын бергам сяна, анаймылы фермае юрттӥськыны ветлӥмы.

Гуртмы зэмзэ но пичи — ог 40 корка гинэ, со понна дышетскыны ветлӥсьёс тачак кузя люкаськылӥмы. Нырысь ик дышетскимы артысь Левой Кушъя гуртысь покчиослы школаын. Отын ик тодон-валан люказы на Выселок Кушъя гуртысь пиналъёс. Гуртъёсмы пичиесь вал кадь, но котькуд классын 35-40 дышетскисез вал. Левой но Правой Кушъя гуртъёсты Лозо шур гинэ висъя. Левояз ик магазин но, ФАП но вал. Сӥзьыл нӧдэн уг луы вал ветлыны, нош тулыс — тудву вӧлскылӥз. Резина сапег йылтӥ ву пырылӥз. Шур вамен потыкумы, йӧ вылысь йӧ вылэ тэтчаллямы. Ярам, одӥг мурт но бырыны ӧз шедьы.

Левой Кушъяысь начальной школаез йылпумъям «правойёсты» Мазьги гуртэ дышетскыны ыстӥзы. Озьы ми одӥг классэ 15 кузя мынӥмы. Рейсовой автобусэн я пыдын дышетскыны ветлылӥмы. Дорысь вазь ӵукна потоно луэ вал бере, школае котькинлэсь вазь вуылӥмы. Интернатын улон инты висъязы ке но, милям гуртэ бертэммы потылӥз. Школаын ӟеч дышетски, тужгес гажалляй спортэз но суредаськонэз. Одӥг ӵошатскон но монтэк ӧз ортчы, школаын стенгазетаос лэсьтэм сяна, фермаысь Горд сэрегын скал кыскисьёс понна газет суредалляй.

Мазьги гуртысь 8 классъем школаез йылпумъяса, классмес 2-лы люкизы: мазьгиосты Чутыре дышетскыны келязы, Правой Кушъя гуртысь пиналъёсты — Эграысь 1 номеро школае. Ёрос центрысь школае мыныса, эшшо одӥг эскерон пыр ортчоно луиз кадь. Гуртысь лыктэм пиналъёсты эграослэн удмурт каремзы потылӥз, переменаос дыръя коридор шортӥ ортчыны ӧз лэзьылэ. Дышетӥсьёс сое адӟытэк ӧз улэ, дыр, но ми урттылӥськыса ӧм ветлэ.

Озьы, 10-тӥ классэз йылпумъятозям, 3 школаын дышетсконо луиз. Аръёс ортчемъя валаны кутсконо вылэм, ӵапак сыӵе эскеронъёс пыр потыса, удмурт сям кыда шуыса. Пичи гуртын вордскемын ке но, пӧлысьтымы тросэз дышетскем адямиос луизы. Нош Эграысь школаын милемды обидьыса воземъёс пӧлысь уноез дышетскытэк кылизы, юон вылэ чӧлскемъёсыз но вань.

Скал кыскись

Агроном

— Анаймы колхозлэсь палэнэ нокытчы потамын ӧй вал бере, милем но колхозын ужасьёс луоды шуылӥз. Эгра каргуртын улӥсь дядяймы лапак шуылоз вал: пиналъёсыдлэн котьма карыны быгатонлыкъёссы вань, дышетскыны ыстоно. Нош анаймы аслэсьтыз карылӥз: колхозын но ужасьёс кулэ. Пичиысен гурт ужлы дышетӥз. Соин, лэся, палэнэ кошкон сярысь одӥгмы но ӧм малпаськылэ. Вылаз ик, мон школаез йылпумъян аръёсы анаймы пенсие потыны дасяськиз, фермаысь скалъёссэ муртъёслы кельтэмез ӧз поты, монэ интыяз ужаны ӧтиз. Мон солы шумпотӥ. Школаын дышетскыкум, мынам туж потэ вал скал кыскись, физкультура урокъёсты нуись но эктӥсь луэме. Школаез йылпумъяса, дышетӥсе мыныны ӧй дӥсьты, нош эктон сярысь ке… Быгатонлыке вань шуыса ушъясьёс вал ке но, шонер сюрес возьматӥсьёс ӧз шеде. Озьы мон яратоно гуртам кыли, нош ужаны вамыштӥ фермае. Со вакытэ Надя, Галя сузэръёсы фермаын ужало вал ини, Игорь братмы мувӧй поттӥсьёс дӥньын тыршиз. Гурт улон со вакытэ туж шулдыр вал, комсомол огазеяськонмы котькинлы адӟем карымон ужаз.

Озьы мон «Россия» колхозысь Левой Кушъя гуртысь фермаын ужаны кутски. Пудо вордон удысын ужасьёс пӧлысь ӝыныез пала егитъёс вал, ӟеч ужам сяна, котькыӵе ужрадъёсы но мыло-кыдо пыриськимы. Колхозмы передовойын ветлӥз, ӵапак мон фермаын ужан вакытэ коллективмылэсь туспуктэмзэ элькунысь Данъян пул вылэ пыртӥзы. Соку дӥнямы туж трос калык ветлӥз ужан амалъёсынымы тодматскыны. Ваньмон дыръямы концертъёс но пуктыны вуиськомы вал. Гурт удысын ужасьёслэн капчи атлетикая но куасэн бызьылонъя ӵошатсконъёсазы пыриськылӥ. Вормонъёсы лыдъяса быдтонтэм люкаськизы.

Ӵапак ӵошатсконъёс дыръя монэ синйылтӥллям Ижысь гурт хозяйствоя институтын ужась тренеръёс. Одӥгаз вожвылъяськонын дорам лыктӥзы но городэ дышетскыны ӧтизы, ялан фермаын, пе, уд ужа, дышетскыны кулэ. Ма, районысь кивалтӥсьёс но шуизы: милемлы ӟеч специалист кулэ, дышетскод но бертод. Мон соку паймемын вал ма карыны, жаль потӥзы скалъёсы, кинлы соосты кельтод?

Озьы, 1 ар фермаын ужаса, выльысь дышетскон борды басьтӥськи. Экзаменъёсме умой сётӥ, студентъёслэн радазы шеди. Со вал бадӟым шумпотон. Гурт удысэз яратӥсько вал бере, агрономе дышетскон туж яраз. Татысен ик тодматски вуоно кузпалэным. Пичи Пурга ёросысь Сизяшур гуртысь Валера Соловьёвен одӥг группаын дышетскимы. Институтэз йылпумъямы но милемды Дэбес ёросысь Малыгин нимо колхозэ ужаны ыстӥзы. Мон экономист вал, мужике — агроном. Турнэс гуртын улӥсь калык капчи мылкыдо вал ке но, сюлэм вордскем палъёсам кыскиз. 4 ар ужаммы бере Эгра ёросэ вуимы.

Ёросысь спортсменъёсын

Эктӥсь, дышетӥсь

— Правой Кушъя гуртын егит специалистъёслы улон интызы но, ужзы но ӧй вал. «Россия» колхоз милемлы улон инты висъяз Сундур гуртэ, кӧня ке бригадирын ужай, отӥяз мон интые кузпалме пуктӥзы, нош монэ экономистэ выжтӥзы. 1990-тӥ аръёсы котькытын секыт вал, уждун ӧз тыре, нош ми корка пуктыны кутскимы. Ма карыны паймемысьтым, кӧня ке толэзьлы кошкылӥ ёросысь нылпи творчествоя юртэ пинал натуралистъёслэсь кружоксэс нуыны, озьы ке но сюлэмылы матын вал гурт улон.

Сундур гуртэ улыны интыяськыса, малпанъёсы быдэсмыны ӧдъязы. Гуртэ улыны бертэм егит кузпалъёсты шумпотыса пумитаз культура удысын со вакытэ ужась Анатолий Григорьевич Чирков. «Ӟардон» ансамбле ветлыны ӧтиз. Озьы мон 25 аресам выльысь эктыны дышетски. Коллективе шедиськод ке, палэнскыны уг луы ни вылэм, отын ик кырӟаны но дышетӥзы на. Мужикеным ӵош 15 ар ӵоже ансамбле ветлӥмы. Кырӟаны-вераны, калыкен огкыл шедьтон быгатонлыкъёсме шӧдыса, лэся, гуртоос монэ муниципал кылдытэтэн кивалтӥсе пуктӥзы.

Таиз уже котьмалэсь но зол яраз. Гурт калык капчи мылкыдо, котькыӵе уж борды гижысь-пиньысь басьтӥське. Соос дась вал гуртсэс эшшо шулдыргес, чебергес карыны, жуг-жаг утялтонэ но, ӧтемез витьытэк, пото вал. Быдӟым оже пыриськем ветеранъёсын ӵош писпу мерттылӥмы. Аръёс ортчизы, ветеранъёсмы улонысь кошкемын ни, нош мерттэм пужымъёссы калыкез шумпотто. Озьы ми нокыӵе грантъёстэк гуртмылэсь туссэ, улонзэ воштон сярысь сюлмаськылӥмы, нош куке шаерамы ялӥзы «Тужгес чылкытэз гурт» конкурс, соку ик вормон басьтӥмы. Жаляса верано, сельсоветэн кивалтыны 4 ар гинэ луонлык сётӥзы, трос малпанъёсы быдэсмытэк кылизы. Туж потэ на вал Сундур гуртысь валтӥсь ульчаез шулдыртэме, но монэ ёрос администрацие ужаны басьтӥзы.

Кивалтӥсь

— 10 ар талэсь азьло шаерысьтымы гурт хозяйствоосын кивалтӥсь нылкышноос гинэ но туж ичи вал ай, нош монэ ёросысь управлениен кивалтыны куризы, — веранзэ азинтэ Ольга Александровна. — Пумитъяськыны выри ке но, мынэсьтым верамме кылӥсь-марась ик ӧй вал кадь. Уже кутэмзы бере куд-ог воргорон кивалтӥсьёслэн, нылкышно шуыса, лэся, шорам учкемзы ик ӧз потылы. Гурт удысэз умой тодӥсько вал бере, котькудӥныз огкыл шедьтыны тырши. Со вакытэ 2-тӥ вылӥ образование но басьтӥ ни вал.

Улон котьмалы дышетэ, уждэ яратӥськод ке, ваньмыз умой пӧрме вылэм. Нырысетӥ юрттӥсьёсы вал ёросысь кивалтӥсьёс но кужмо гурт хозяйствоослэн председательёссы. Ужазинлыкез будэтон вылысь куд-ог колхоз председательёсты воштоно луиз. Огкылысь тыршеммылэн емышез ӝоген шӧдӥськиз, ёросысь гурт удыс син куспын вылӥегес ӝутскыны кутскиз. Валче ужаса, кужмо команда луимы, азьмынӥсь хозяйствоослэн ужан амалъёсынызы тодматскон вылысь семинаръёс я дышетсконъёс ортчытъямы, быгатэммыя ог-огмылы юрттӥськылӥмы. Озьы кужмоосыз лябгес хозяйствоослы вылӥегес ӝутскыны юрттӥзы.

Адями ужез борды гинэ медаз бурмы шуыса, гурт удысын ужасьёсты калыке поттыны, соослэсь быгатонлыкъёссэс шараяны выриськомы. Та вакытэ Эгра ёросысь «Рассвет» но «Мужбер» хозяйствоосын спортъя спартакиада ортче. Отчы пырисько пудо утисьёс, механизаторъёс но колхозысь специалистъёс, соос вӧзы итӥськоз на ёрос администрациысь гурт хозяйствоя управлениысь специалистъёслэн командазы но. Нош вазенгес ёросысь скал кыскисьёс понна «Бурёнка» вожвылъяськон ортчытъямы. Соос сцена вылын кырӟаны-эктыны, гур котырын пӧраськыны быгатэмзэс но возьматъязы.

Ужез тунсыкогес карон вылысь ялан маке выльзэ утчано луэ. Та вакытэ милемыз валтэ нылкышно министр Ольга Абрамова. Туннэ нуналлы, таӵе дырлы со туж тупа. Ужзэ вала, вылӥе ӝутскон вылысь бадӟым ужпумъёс пуктыны быгатэ. Бен, туала вакытэ гурт хозяйствоослы кун ласянь юрттэт туж кулэ, сое басьтон вылысь асьмелы но ӝегано ӧвӧл, ӝот-ӝотгес кариськоно. Коньдон ваньмызлы уз окмы, соин ик ӝожтӥськыса пукыны дыр ӧвӧл, котькуд минутэз дунъяны кулэ. Туала вакытэ улон туж тунсыко луэмын, кӧлэме уг яра кыльыны.

Ёросысьтымы кивалтӥсьёс туж умоесь, ваньзэс гажасько, куарето ке куарето, тыбыр сьӧрын супыльтыса уг ветло. Урод луэ бадӟым кенешонъёс дыръя, куке калык дол пуке: оло ужаммы уг кельшы, оло ваньмыз ӟеч…

Вань улонме общественной ужен вырисько. Удмуртлыкез туж гажасько, ог 10 ар «Удмурт Кенеш» огазеяськонлэн ужаз пыриськисько, пичи кенешлэн ёзчиез луисько. Калленэн-калленэн, быгатэмея удмуртъёсты котькытчы нуллыны тыршисько. Удмуртъёс керпотӥсесь, быгатонзы вань ке но, дӥсьтонзы уг окмы. Кемалась ик ӧвӧл шаерысьтымы гурт удысын ужась егит профессионалъёслэн вожвылъяськонзы ортчиз. Удмуртъёс котьма карыны быгато шуыса, соосты интыысьтызы гинэ вырӟытоно. Озьы со конкурсэ ёросысьтымы 2 егитъёсты, ветеринарной врачез но бухгалтерез, бульдозерен кадь донгыса, нуимы. Кыкназы ик вормонъёсын бертӥзы. Куд-ог дыръя аслэсьтым пичи дырме но тодам вайисько, монэ но дыраз валтӥсь адями шедьысал ке, улон сюресме капчиенгес но ӝоггес радъяны быгатысал, дыр.

Спортсмен

Ёрослэсь данзэ утьылэ Гурт шудонъёсын

— Тросэз верало, 50 арес бере, пе, выль улон кутске. Мон но озьы шуысал. Пичи дыръям кин луыса ужан малпанъёсме быдэстыны кылдӥз кадь. Физкультурая дышетӥсь мынэсьтым ӧз пӧрмы ке но, со понна мон асме спортсменкаен шӧдӥсько. Егит дыръям пыдын бызьылыны яратылӥ, берло аръёссэ ёросмылэн командаез понна Гурт шудонъёсы пыриськисько, очко люканы юрттӥсько. Туннэ нуналлы капчи атлетикая но дартсэн шудонъя спортъя 1-тӥ разрядэ вань, куаслы но синмаськемын. Арняяз 3-4 пол мужикеным ӵош куасэн бызьылыны потаськомы. Нимысьтыз тренеръёсмы но вань — Наталья но Виктор Копысов кузпалъёс. Быгатэммыя нылпиосмес, внукъёсмес но сьӧрамы валтыны тыршиськомы. Тазьы учкыса потоно ке, агай-вынъёсы пӧлысь ваньмы сямен спортсменъёс луиськомы. Тани сузэре Галина Клементьева вань улонзэ Чутырысь фермаын кунян сюдӥсь луыса ужамын, со но кужмо спортсмен. Табере солэн Владимир пиез ёросмылэсь данзэ Гурт шудонъёсын семьяеныз уте. Туэ соос, вормон басьтыса, Россиысь Гурт шудонъёсы мыныны дасясько.

Мужикеным Валерий Алексеевичен ӵош 2 пинал будэтӥмы. Пиналъёсмы ас понназы будӥзы кадь. Роман пимы Удмурт кун университетын дышетскиз, общественной ужен мыло-кыдо выре, ас вакытаз Удмуртиысь Егитъёслэн парламентэнызы кивалтӥз. Али Пермьысь мувӧй поттӥсьёс дорын ас специальностезъя ужа, отын но тэк пуконэз уг тоды. Нош Олеся нылмы медициная кун академиын дышетске, теннисэн умой шудэ.

Азинлыко кивалтӥсь луон понна улонлэсь бере кылёно ӧвӧл. Трактор руль сьӧры но пуксьыны косӥзы ке, ворттылом ай, дыр. Пенсие потыны вазь на шуизы кадь милемлы, озьыен, ужаса егитгес луомы. Азьланезлы нош ик ужпум пуктӥ ни, ӟеч вуриськыны дышетскеме потэ. Внукъёсылы чебер дӥсь вурысал.

Валентина Емельянова

Ангелина Снигирева
By Ангелина Снигирева 7 марта, 2019 14:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<