Ужась мурт — кужмо кун

Ангелина Снигирева
By Ангелина Снигирева Март 6, 2019 14:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиын ортчись «Егит профессионалъёс» 4-тӥ чемпионатлэн элькун этапез йылпумъяськиз. Ужасьёс азе дуннеын пуктэм куронъёслы тупамзэс туэ 300 пала егитъёс возьматӥзы.

Егитъёс тракторен ужаны быгатэмзэс возьмато

Данэз будэ

Арысь аре чемпионат паськытгес ортче: кылем арын кужымзэ эскериз вал 234 мурт. Туэ егитъёс тодон-валанзэс, ужаны быгатэмзэс возьматӥзы 26 удысъёсъя: нянь пыжон, беспилотникъёсын вырон, покчи классъёсты дышетон, дуно металлъёсын ужан, гурт удыс техникаез тупатон, пудо эмъян но трос мукетыз. Туэ нырысьсэ егитъёс эшшо 3 выль удысъёсъя — корка пушкын лэсьтӥськон, мода, фотография — быгатонлыксэс эскеризы. 9 удысъя нимаз вожвылъяськон радъямын вал 16-18 аресъем нылпиос пӧлын.

Чемпионатэз сӥё-дано усьтонэ пыриськизы дышетонъя но наукая министр Светлана Болотникова, ужъя но калыкез улон-вылонын утён политикая министрлэн воштӥсез Ольга Лубнина.

— Ужась адямилэсь данзэ будэтон — чемпионатлэн валтӥсь ужпумез. Пӧртэм удысъёсын ӟеч кивоштӥсьёсты будэтон — со шаермылэсь экономиказэ азинтон, угось туннэ ссузъёсын, вузъёсын дышетскисьёс ӵуказе предприятиосын тыршозы. Соос дуннеын пуктэм куронъёсъя ужаны быгатӥзы ке, Удмуртия но, Россия но кужмо луозы, — ужрадэз усьтыса, шуизы кивалтӥсьёс.

Эмъя шуныт кыл но

Чемпионатлэн одӥгез площадкаез радъямын вал Ф. Пушина нимо медициная элькун колледжын. Эмъяны быгатэмзэс возьматӥзы вуоно медсестраос.

— Мон 2014-тӥ арысен чемпионатэ вуылӥсько ни эксперт сямен. Арысь аре егитъёс кужмогес дасяськыса лыкто, соослэн быгатонлыксы но тодон-валанзы арысь аре тросгес луэ, — вера Казаньысь вуэм дунъясь Лилия Рызванова.

Висисьёсты чаклан удысъя 10 мурт вожвылъяськиз. Соос вуизы Ижысь, Можгаысь, Воткинскысь — ваньзы медицинской колледжъёсын, гимназиос бордын кылдытэм медицинской классъёсын дышетско.

— Конкурсэ лыктэмъёслэсь, медициная тодон-валанзэс сяна, учкиськомы адямиен кусып тупатыны, огкыл шедьтыны быгатэмзэс, — азинтэ Л. Рызванова. — Угось висись ӝоггес бурме шуныт кыллэсь гинэ но. Чемпионат егитъёслэсь быгатонлыксэс волятон понна чакламын, соин соослы куронъёс но, конкурсной ужъёс но улонлы матын каремын.

Куронъёс но быгатонлык вылӥын

Уваысь профессиональной колледжын егитъёслэсь гурт удыс техникаен ужаны, сое тупатыны быгатэмзэс учкизы. Чемпионатэ лыктӥзы Алнаш, Сюмси, Эгра, Можга, Ува ёросъёсысь гурт удысъя специалистъёсты дасясь колледжъёсысь студентъёс. Пияшъёсын пумиськылӥз но вормонъёс сӥзиз гурт удысъя но сиён-юонъя министр Ольга Абрамова.

Вуоно механизаторъёслы туала тӥрлыкез но валано

— Шумпотӥсько, татчы люкаськизы музъемез гажась, ужаны гурт удысэз быръем муртъёс, — вераз министр. — Оскисько, котькудӥз азьланяз ӟеч уж шедьтыны быгатоз. Музъем вылын ужась мурт — со асьмелэн ӵуказе нуналлы осконмы.

Ужрадэ учкисьёс сямен вуылӥзы Ува ёросысь пӧртэм школаосысь дышетскисьёс, Вавож ёросысь Ӟамбайысь нылпиос. Соос Уваысь профессиональной колледжен тодматскизы, пӧртэм мастер-классъёсы пыриськизы. Чемпионатэ лыктӥз азьвыл та вожвылъяськонлэн улос этапаз вормем Денис Хоробров. Но таяз радэ пияш дунъясь чотын вал.

— Арысь аре чемпионатлэн куронъёсыз секытгес луо, но со вакытэ ик егитъёслэн быгатонлыксы но будэ, — вера вожвылъяськонлэн одӥгез дунъясез Александр Корнев. — Студентъёслэсь трактор двигателез, электрон системаез тодэмзэс, техникаез ӝог тупатыны быгатэмзэс эскерим. Туэ нырысьсэ конкурслэн куронъёсыз пӧлы пыртэмын вал агронавигаторен ужаны быгатон. Жаляса верано, та выль техника Уваысь колледжын гинэ вань. Соин мукет техникумъёсын сое книгаос вылын, Интернет пыр гинэ валаны дышетскизы. Озьы ке но вожвылъяськонлэсь куронъёссэ урод быдэстӥзы шуыны уг луы. Собере, студентъёс кунгож сьӧрысь техникаез но тодыны кулэ. Таиз но тросаз колледжъёсын ӧвӧл. Соин егитъёс чемпионатлы, кужмо хозяйствоосы потаса, дасясько.

Пӧртэм удысъёсын вормисьёс шараямын, табере соос Удмурт шаерлэсь данзэ утёзы «Егит профессионалъёс» чемпионатлэн Россиын ортчоно люкетаз. Со август толэзе Казаньын радъяськоз.

Ангелина Снигирёва

Туспуктӥз О. Шульмина

Ангелина Снигирева
By Ангелина Снигирева Март 6, 2019 14:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<