Ужам ужзы — дауръёслы

Ангелина Снигирева
By Ангелина Снигирева Март 4, 2019 13:06

«Удмурт дунне» газетлэн «Гурт адями — 2018» конкурсэзлэн «Выжыоссэ утись» номинацияз вормиз Пичи Пурга ёросысь Баграш-Бигра гуртысь адӟем карымон воргорон Владимир Ботников. Сое данъян ужрадэ быдэс клуб тыр калык люкаськиз. Кызьы сотэк: гуртозы понна быдэс гуртэн, бӧлякен-эшъёсын куара бичазы, данъяны но быдэс гуртэн вуизы.

Бигралан ог 50 выжы улэ

Шаплыесь, визьмоесь

Баграш-биграос удмурт сям-йылолъёсты утё, пересьёссэс, вашкалазэ данъяло шуыса, гуртэ пырыку ик, адӟиське. Выль клубзы вӧзын туала коттеджлы укшась юрт ӝужа. Со вуоно музей-корка. Биграос сое веме карыса ӝуто.

Клуб сцена вылын гуртлэн кылдэмез сярысь аспӧртэмлыко возьматон радъямын вал. Гуртоос ог 400 ар талэсь азьло луэм суредъёсты улӟытӥзы. Кызьы та палъёсы Баграш воргорон но Бигра нылмурт лыктӥзы, гурт кылдытӥзы. Со паськытаз, нылпиос вор-дӥськизы, Баграшлэн но Бигралэн выжызы пушйиз. Али но тупаса, эшъяськыса, ог-огзылы юрттӥськыса уло татысь потэм туала выжы-бӧлякъёс: ушак, ботё, юда, шумбрей, курбат. Туннэ Бигралан ог 50 выжы улэ.

Клублэн фойеаз адӟытон радъямын. Отчы поттэмын бигра воршудлэн пус-кышетэз (флаг) но утись бодыез (тотем). Кыксэ но Владимир Федосеевич Ботников ачиз малпаз-лэсьтӥз. Флаг вылын гуртысьтызы кӧня ке выжыослэн пусъёссы пуктылэмын ни. Но утчаськон мынэ на, эшшо выльёсыз кылдозы, оско гуртоос. Со сяна, адӟытонэ поттэмын самовар, вашкала арбериос, куэм шобретъёс, чильпам ӵушконъёс, вашкала но туала туспуктэмъёс. Ваньзэ сое утьыса возе Владимир Федосеевич. Та узырлыксэс арлы быдэ ботё выжыысь бӧлякъёс, соос али 200-лэсь уно ни, возь вылэ поттало. Отын аръян шукко, нылпиез кӧкыын веттало, кырӟало, ӝук пӧзьто. Ӵапак выжызэ утемез, огинэ бичамез, песянай-песятайёсызлэсь пыӵам сям-йылолъёссэс утемез понна гуртоосыз Владимир Федосеевичез «Гурт адями» конкурсамы ӵектӥзы вал.

— Ми Бигралан ботё выжыос тужгес трос — 8 семья улӥськом на. Туала вакытэ бӧлякен ветлӥсьёс трос ӧвӧл ни. Нош ми Владимир Федосеевичлы луыса бӧлякъёсын пумиськиськомы, кырӟаськомы, сям-йылолъёсты тодамы вайиськомы, — верало Зоя Ботникова, Екатерина Иютина, Екатерина Фролова ботё кенакъёс.

Владимир Ботников понна 4 сюрс 19 адями куаразэ сётӥз. Владимир Федосеевич гурт калыкезлы йыбырттыса вазиськиз:

— Ку табере мон понна дурбасьтэм адямиослы тау карыса вутто на! Бадӟым тау шуэме потэ ваньдылы дунъямды понна.

Биграысь воргорон понна дурбасьтыны, быдэс шаерысьтымы сяна, кунгож сьӧрысь калык но ӝутӥськиз. Бигра клубе вуизы Владимир Федосеевичлэн бӧлякъёсыз. Котькудӥз бадӟым уж нуиз куара люкан понна. Кылсярысь, Пичи Пурга ёросысь Эдэйгуртын улӥсь Екатерина Фролова аслаз гуртаз дурбасьтон ужрадэз радъяз.

— Магазинэ яке почтае мынэмелы быдэ отысь калыклэсь куара бичалляй, — шуиз со. — Берло, вань калыклы тау карыса, магазинмы, почтамы борды гожтэтъёс ошылӥ.

— Котьку синмаськыса учкылӥ биграос шоры, — гуртоослэн веранзы борды итӥськиз «Удмурт дуннелэн» валтӥсь редакторезлэн воштӥсез, Пичи Пурга ёросысь Сосновка гуртын будэм Елена Миннигараева. — Соос котьку но висъясько вал: шаплыесь, визьмоесь, соос сыӵе удмуртэсь, ас данзэс, дунзэс тодо, кыӵе зол татын возиське сям-йылолъёсты утён, пересьёсты гажан. Паймиськод но вожъяськиськод соослы. Тӥледын пумиськыса, ӟеч валай, малы со озьы, малы ке шуоно тӥляд сыӵе зол адямиосты, выжыдэс утён мылкыдды. Со кышномуртъёс бордысь гинэ уг поты, татысь улонэз бугырто воргоронъёс но.

Трос ӟеч кылъёс веразы эшшо одӥг бигра воргоронлы — 80 аресъем Николай Соколовлы. Со тыршемъя, сюлмаськемъя гуртын музей ӝутӥське. Николай Павлович «Гурт адями» конкурслэн «Ӟеч сюлэм» номинацияз ӵектэмын вал, люказ 4 сюрс 600 пала куара, вормыны ог 100 куара гинэ ӧз окмы.

Тодон-валанзы — книга тыр

Владимир Ботников гурт калыкен пумиськонэ пичи дырысьтыз горд дэремзэ ваем. Сое анаез, шунытсэ поныса, ас киыныз вурем. Горд дэрем али ке но выль кадь адӟиське. Владимир Федосеевич Бигралан вордӥськемын, татчы ик улыны кылиз.

— Ми 7 кузя — 6 агай-вынъёс но 1 сузэрмы. Мон пичиез. Семьяямы атай юрт покчиезлы кыле. Озьы пичиысен тодӥсько вал ини, Биграла кылё, анай-атаймес бордам утё шуыса, — вера В. Ботников.

Владимир Федосеевич дышетскемезъя — инженер-лэсьтӥськись, Ижысь техникая кун университетэз йылпумъяз. Егит дыръяз ёросысь комсомольской организациен кивалтӥз, райкомлэн нырысетӥ секретарез вал. Али тырше чугун сюрес вылын эскерись-возьмась луыса. Но ваньмон дырзэ выжызэ, гуртэзлэсь историзэ утчан-люканлы сӥзе.

Вашкалазэ, песянай-песятайёсты гажан пичи дыръяз ик солы пыӵам. Кенсазы трос пӧртэм вашкала арбериос утиськиллям. Пичи дырысен соос пияшез паймытъязы. Со бордысь ик вашкалаеныз тунсыкъяськон потӥз, вылды.

— Мон соку библиотекаын ужасько вал. 2015-тӥ арын Бигралан гуртлэн историезлы, калыкезлы сӥзем ужрад ортчиз. Отын выжыос сярысь кыл потӥз, — тодаз вае муниципал кылдытэтлэн йырыз Светлана Баграшова. — Понедельнике ӵукна ик дорам бӧрсьысь бӧрсе лыктӥзы Владимир Федосеевич но Анатолий Яковлевич, выжызы сярысь трос веранзы вань шуыса. Соку куиньнамылэн шуак йырамы малпан вордӥськиз: ойдолэ М. Атамановез — воршудъёсын вырись тодосчиез — ӧтёмы но выжыослы сӥзем ужрад ортчытомы. Озьы тодосчиен пумиськон ортчиз, отын ботё выжы сярысь верамы-адӟытӥмы.

Та бордысен Владимир Федосеевичлэн ужез паськытаз. Кузпалыныз Нина Ботниковаен соос ӵошен пӧртэм ужрадъёс дасялляло. Кылсярысь, Владимир Ботников школаысь дышетскисьёсын пумиськылэ, соос пӧлын выжыдэ утён сярысь валэктон уж нуэ.

— Туала егитъёс выжызэс тодытэк будо, озьы луыны кулэ ӧвӧл кадь потэ. Соин ик ми, бадӟымъёс, соосты визьманы, дышетыны кулэ, — шуэ В. Ботников.

Асьсэос сярысь ботёос Глазов ёросысь Дондыкар гуртын ортчем «Моя малая родина: воршуды Дондыдора» научно-практической конференциын возьматӥзы. Отчы пӧртэм ёросъёсысь делегациос вуэмын вал.

— Милесьтым юазы, ёрос администрациды косэмъя-а лыктӥды, пе? Нош ми асьмеос автобус кутӥм но вуим, нокин косӥсь-курись ӧй вал, — вера Владимир Федосеевич.

Владимир Федосеевичлэн уно малпанъёсыз на. Али гуртысьтызы Быдӟым оже ветлэм адямиос сярысь материал бича — стенд лэсьтыны малпа. Сое 9-тӥ Май азьын гуртысьтызы синпелетсы азе поттыны чакла. Нылпиос но гуртоос утисьёссэс мед тодозы. Собере, гуртазы трос нимо-дано адямиос вордӥськемын. Кылсярысь, Социалистической Ужысь Герой Михаил Орлов та дырозь умой-умой данъямтэ. Озьы луыны кулэ ӧвӧл, шуэ В. Ботников.

Ботёослэн гондыр но воргорон сярысь выжыкылзы вань. Со дышетэ: уждэс кутскиськоды ке, пумозяз быдэстэ. Пустэс шуккиськоды ке, шукке озьы, нокыӵе даур но, гондыр но сое медаз быдтэ. Мыным потэ, та кылъёсты санэ басьтыса, аслэсьтыз улонзэ радъя Владимир Федосеевич.

Биграосын 1 час ӵоже вераськыса, быдэс газет поттымон материал бичаськиз кадь — сомында веразы гуртоос. Одӥг кутскемен ваньзэ гожтыса-вераса но уд быдты. Котькуд адями сярысь нимаз зарисовка, бадӟым статья дасяны луысал. Котькудӥз сюлмыныз висе сям-йылолъёсты утён, гуртсэ азинтон понна. Кызьы шуиз библиотекарьзы Яна Зайцева: бигра калык ачиз музей выллем, отын улӥсь котькудӥз адями аспӧртэмлыко.

Ангелина СНИГИРЁВА

Туспуктэмез авторлэн

Ангелина Снигирева
By Ангелина Снигирева Март 4, 2019 13:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<