Сюдӥсьсы сик вал

Ангелина Снигирева
By Ангелина Снигирева Март 18, 2019 17:12

Али уж сётэ пересьёслэн юртсы

Эгра ёросысь Малягурт кылдытэмын вал Калмез шур дурысь сикез поттон понна. Ас вакытаз отын ог 2 сюрс пала адями улӥз, ужазы участковой больница, школа но нылпи сад. Но та вакытэ гуртэ 153 адями кылиз. Вань на клубзы, почтазы, библиотеказы, медпунктсы. Ог 10 ар талэсь азьло татын усьтӥзы пересьёслы юрт.

Малягурт ульча

90 ар
Сикен вырись гуртъёслэн улон сюрессылы огкадьгес: тэль бырем бере соослэн но бервылзы ышылӥз, угось ужась мукет интые кошкылӥз. Сыӵе адӟонзы вал Эгра ёросысь Красная Горка, Устье Пестеря, Арлеть, Берёзовая Грива гуртъёслэн. Малягурт но соос сямен ик бырысал, дыр, но гурт бадӟым сюреслы матын луэменыз утиськиз. Татысь Красногорьее, Тылое, Эграла шедьыны луэ.

Ку, кыӵе арын кылдытэмын вал Малягурт, нокыӵе документъёсысь шедьтыны ӧм быгатэ, — верало гурт библиотекаын ужасьёс Елена Завалина но Мунира Фефилова. — Арлыдоос но рос-прос вераны уг тодо ни, кин ке 1928-тӥ арын шуэ, мукетъёсыз — 1932-тӥ арын. Озьы гуртоосын кенешимы кылдэмзэ 1928-тӥ арысен лыдъяны. Кылем арын Малягуртлэсь 90 ар тырмонзэ пусйимы.
Архивъёсысь тодмо луиз, Калмез шур котырысь тэль поттон сярысь документын гуртмы «Молегуртский мост» шуыса гожтэмын. Со вакытэ Калмез шур дурын пуктэмын вал ужасьёслы 2-3 баракъёс. Отчы интыяськизы на контора, медпункт, покчиослы школа. Берлогес усьтэмын вал магазин но вал возён лапасъёс.
Коръёсты поттӥзы толалтэ, валъёсын, шур дуре люкаллязы. Нош тулыс, шур тудӟыку, соосты шур кузя келяллязы Сьӧлтала. Адямиос 2 сменаен вошъяськыса суткаяз 18 час тыршизы.
Быдӟым ожмаськон вакытэ но секыт вал. Со вакыт сярысь тодэ ваёнъёссэ вералляз гуртысьтымы Леонид Кренин. Со Малягуртэ 1940-тӥ арын ужаны лыктэм, улӥллям шур дурысь баракын. Тэлез потылӥллям толалтэ валъёсын, йӧ сюрес лэсьтыса. Со понна вышкые 300-400 ведра ву витьыса, 4 кыткем валэн сюрес вылэ ву кисьтазы. Йӧ вылтӥ коръёс капчиен гылӟылӥзы.

Тазьы кор келяло вал 1960-тӥ аръёсы

Война бере нюлэс поттон борды выль кужымен басьтӥськизы — угось куашкам хозяйствоез ӝутоно вал. Котькуд толалтэ татчы Глазов, Кизнер, Красногорск ёросъёсысь адямиос ужаны лыктылӥзы. Куд-огез та интыосы ик, семья кылдытыса, кылиз. Нош 1952-тӥ арын татын узкоколейка кылдӥз, со дырысен нюлэс поттӥзы техникаен ар ӵоже. Валъёс интые тракторъёс вуизы. Сикын воргоронъёсын оградын ужазы нылкышноос но — соос писпуэз погыръязы, вандылӥзы, вайёссэс коразы, тракторез гинэ нуллыны соослы ӧз оскылэ.
Малягуртэ улыны лыктылӥзы секыт ужлэсь кышкасьтэм адямиос, шуыны луоз. Мыло-кыдо тыршемзы понна уноез гуртоос данъямын: Пётр Темников — Социалистической Ужысь Герой нимын, тракторист Леонид Мохов — Ленинлэн орденэныз. Улэп на Аркадий Трофимович Торохов, со Ленин орденэз, Ужысь Горд Знамя орденэз вань.

Кор поттылӥзы пу Т-40 тракторен

Малягуртэ адямиос мед кылёзы шуыса, татын улон коркаос ӝутыны кутскизы. Нырысь посёлок шурлэн огпал дураз кылдӥз, нош война бере, 1950-тӥ аръёсы, мукет палаз — азьвылгес отын быдэс тэль. 1954-тӥ арын 8 классъем школа усьтӥськиз, вал больницазы но — отын 20 койкаен стационар, роддом, пинь эмъян кабинет вал. Но 1990-тӥ аръёсы тросэз адямиос кошкылӥзы, производство пытсаськиз.

Ужтэк пукисьёс ӧвӧл
Малягурт пыре Ӟатча гурт поселение. Солэн йырыз, отчы пыре Малягурт но, Надежда Сентебова верамъя, гуртын али 150 адями улэ, тросэз пенсионеръёс ни. Выль Ӟатча школае 2-3 пиналэз нулло на, вань кӧня ке нылпи садэ ветлоноосыз кадь, но соос доразы песянай-песятайёсынызы пуко. Малягуртын нокыӵе гурт хозяйство ӧвӧл, палэнэ ужаны ветлэ 1 мурт, озьы ке но ужтэк пукисьёс но ӧвӧл.

Нылпи сад вемаласькгес пытсаськиз, но юртэз умой вал на. Озьы 2008-тӥ арын отын пересьёслы юрт усьтӥськиз, — вера Н. Сентебова. — Табере отчы Удмуртилэн пӧртэм сэрегъёсысьтыз огназы кылем пересьёс улыны лыкто. Гуртоослы но умой — выль ужан интыос кылдӥзы. Отӥосыз клубын, библиотекаын, почтаын, магазинын тыршо, куд-огез сик поттонэн вырись ужбергатӥсь дорын ужа.
Гуртоослэн бадӟым сюлмаськонзы — Ӟатчае сюрес. Отӥ тулыс, сӥзьыл пичи машинаос потыны шугъясько. Угось тэль, луо поттӥсь бадӟым машинаос ворттылыса, сюрес зол сӧриське. Нош татӥ рейсовой автобус ветлэ, нылпиосты школае нуо-ваё. 2015-тӥ арын сюресэз тупатон понна проект но дась вал ини, но сое коньдон ӧвӧлэн берлолы кельтӥзы, кулы — тодмо ӧвӧл.
Но озьы ке но гуртын улон ас пӧраз мынэ. Азьвыл школалэн спортзалаз выжизы клуб, библиотека, почта. Кылемын на шудон интыез но, отчы дырын-дырын гуртоос волейбол шудыны вуыло. Эгра ёрослэсь Кун Кенеше быръем депутат Рашид Абашев юрттэмъя кӧня ке спорт тӥрлык басьтэмын вал. Арлыдоослы мӧзмыны уг сёто библиотекаын, клубын ужасьёс. Соос пӧртэм ужрадъёсын вуыло пересьёслэн юртазы улӥсьёс доры но.

Анай кыллэн нуналаз диктант гожто

— Феврале гуртоосын ӝӧк сьӧры люкаським. Пельняньлы сӥзем фестиваль борды итӥськыса, асьмеос пельнянь кутӥм, пӧзьтыса сиим, — вера библиотекарь Мунира Фефилова. — Малягуртын пӧртэм выжы калыкъёс уло бере — удмуртъёс, ӟучъёс, бигеръёс — соос асьсэ пӧраськон амалъёсынызы тодматӥзы. Анай кыллэн нуналыз дыръя диктант гожъямы. Кылем шутэтскон нуналъёсы гинэ быдэс гуртэн толэз келямы. Али черк праздникъёслы сӥзем ужрад дасяськом.

Ангелина Снигирёва

Ангелина Снигирева
By Ангелина Снигирева Март 18, 2019 17:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<