Пери поръя…

Ангелина Снигирева
By Ангелина Снигирева Март 13, 2019 11:09

Кызьы инсультлэсь утиськоно?

Лыдпусъёс возьмато: арлы быдэ Россиын ог 500 сюрс муртэ пери шукке. Со пӧлысь ог 80 процентэз инвалид кыле, оло нош, улонэн но люкиське. Нырысетӥ элькун больницаысь невролог Юрий Куликов вера: таӵе учыръёс ӧжытгес луысалзы, висёнэз дыраз алысалмы но юрттэт сётысалмы ке.

Макем тросгес пыдын ветлод — сокем тазагес луод

— Юрий Владимирович, оло, пыр-почгес валэктоды, мар луэ мугорын инсульт дыръя?

— Йырвиымлы кулэ вир. Угось вирын вань кислородэз. Кислород уг тырмы ке, йырвиым бырыны кутске. Пери шуккон герӟаськемын йырысь вир ветлонлэн сураськеменыз.

Инсульт 2 пӧртэм луэ — ишемической но геморрагической.

Нырысетӥ учыре вирсэр орсмем вирен яке ӵакмем холестерин «колӟоен» (бляшка) пытсаське, вир со пыр потыны уг вормы ни.

Кыкетӥ учыре адямилэн вирсэрез пӧсьтэ, вир йырвиыме кисьтӥське. Ӵемгес пумиське геморрагической инсульт. Секытэнгес ортче но. Йыре кин ке молотэн шуак шукке кадь — сокем вӧсь луэ. Шугектэм муртлэн йыр висёнэз уг ортчы, йырсазьзэ ыштыны кутске.

Кызьы периез тодманы луэ на? Адямиез киоссэ ӝутыны куроно — огез киыз туж секытэн ӝутӥське яке воксё уг ке — эмъясьёсты ӝегатскытэк ӧтёно. Озьы ик эмъясьёстэк уз луы, адямилэн ымнырыз кырыжтӥське, мыняны уг быгаты ке.

Троссэ инсульт шуккемъёсты пыд вылазы султытыны луэ на, юрттэт дыраз сётыны вуиськод ке — юнметэк-а нырысетӥ 4 часэз зарниен ӵошатыны луоно. Но жаляса верано, уноез туж бер вазисько эмъясьёс дӥне. Юаськод: малы беромиды? Нош соос: малпай вал, ортчоз шуыса. Уз ортчы. Вылаз ик, куд-огез вералоз на: давление 180-озь ӝуткаськылэ, но мон сое уг шӧдӥськы. Таӵе дыръя озьы но луыны быгатоз: давлениен валлин сэр пилиськыны уг вормы ке но, бордаз туп кадь потос кылдэ. Мултэс вир отчы люкаське. Но пыр озьы уз луы. Озьы-а, тазьы-а, но сэръёс весь уз чидалэ — вазь-а, бер-а, пилиськозы яке ӵакмозы.

— Тунсыко, мае воштыны быгато нырысетӥ часъёс?

— Адями мугор — туж тунсыко маке. Йырысь одӥгъёсыз сэръёс ужамысь дугдо ке, солы юрттӥськыны кутско мукетъёсыз. Озьы соос ог 4 час ӵоже одӥг кыткетын ужаны быгато. Зэм, куд-ог специалистъёс верало: сэръёс, ог-огзылы юрттӥськыса, суткаозь но чидало. Но мон шуысал: пери шуккиз ке, ӵукналэсь вуэмзэ возьмано ӧвӧл. Бен, врачъёс, оло, ӟукыртозы ик, со понна адямилэсь тазалыксэ утьыны луоз.

— Куддыр суй-пыд ог ӝыны часлы зубектэм кадь луэ, но бӧрысь ортче…

Таӵе учыръёсы шуо: микроинсульт луиз. Но эмъян удысын таӵе валан ӧвӧл. Суй-пыдъёс выльысь ужаны кутскизы ик ке но, талы укыр шумпотоно, ганяк кариськоно ӧвӧл. Малы? Малы ке шуоно суй-пыдъёс юнме шорысь ӧз лябӟылэ. Озьыен, орсмем вир яке сэр бордысь холестеринэн ӵакмем «колӟо» вирсэрез пытсазы — вир со пыр потыны ӧз быгаты ни. Но мугор со «колӟоен» вань кужмысьтыз нюръяськыны кутске. Пыргытыны быгатӥз ке, иське, зубектэм ортче, ваньмыз азьло сямен ик ас интыяз пуксе кадь.

Но эмъясьёс доры одно вазиськыны кулэ. Туннэ мугорлэн кужымез ассэ утьыны тырмиз ке, ӵуказе, оло, уз но тырмы. Угось сэръёс ӵакмемын, вир напчемын ке, нош ик таӵе учыр луыны быгатоз, кызьы со ортчоз — шуг вераны. Соин ик одно йӧнатӥськоно.

— Кинэ «быръе» пери?

— Инсульт — со ангина, пыэд выллем гинэ висён ӧвӧл. Со кылдэ мугорын мукет висёнъёс вань дыръя, шуом, мугорысь веществоослэн воштӥськонзы сӧриськемын ке — сакыр диабет кырмиськемын, вирын холестеринэз мултэс, вирзӥбет ӝуткаське но мукет.

Со сяна, перилэсь уката чакласьконо мӧйымыса. 50-60 аресъемъёс пӧлын инсульт ӵемгес луэ воргоронъёслэн.

Туж чакласькыны кулэ, выжыяды инсультлэсь, инфарктлэсь быремъёс вань ке. Кызьы? Нырысь ик, валаса сиськоно — ӝӧк вылады тросгес бакча емышъёс мед луозы, кӧё-вӧё пӧрамъёслэсь возиськыны турттоно. Мугор ёзвиосты кыдатон — одӥгез оскымон амал: нуналлы быдэ ӝыны час ке но пыдын поръяно, зарядка лэсьтон но туж пайдаё луэ.

Тазалыкез туж лябӟыто тамак кыскон но вина юон. Тамак кыскисьёс пӧлын 60 процентлы тросгес инсульт шуккон учыръёс. Но пурккетонлэсь куштӥськем бере 5 ар ортчыса, адямилэн тазалыкез шӧдскымон юнма ни. Вина юыны чик уг яра! Ӵемысь озьы луэ: адями 2-3 нунал ӵоже дугдылытэк юэ, нош сайкиськемез бере больницае вуэ. Малы? Кудӟытӥсь юонъёс сэръёссэ лябӟытӥзы, холестерин бляшкаос со бордысь ишкалскизы, вирен ӵош быдэс мугоретӥ берганы кутскизы. Кытчы но ку соос кугӟалозы — шуг вераны: пыдэ (шергес), йыре, сюлэме (ӵемгес).

Эшшо ватсасал на: диспансеризация юнме малпамын ӧвӧл, эмъясьёс дӥне возьматъяськыны вунэтоно ӧвӧл. Нош эмъюм юыны косэмын ке — юоно. Вирзӥбетэз зӥбломытӥсь эмъюмъёсын ӵош пайдаё луозы вирез кизермытыны юрттӥсьёсыз но, кылсярысь, тромбо АСС, аспирин. Эмъюмъёслэн дунзы шоры учконо ӧвӧл. Улонлэсь дуногес ӧвӧл соос.

Эшшо ке туж паймисько, кызьы адямиос утялтытэк возё эмъян картаоссэс. Машиналы, квартиралы документъёссы лач-лач тыремын. Нош пӧртэм обследованиосын, анализъёсын бумагаоссы пазямын. Шуак кулэ луэ ке, уг шедьто ни. Нош врачлы умой-умой диагноз пуктон, эмъян понна вань висёнъёс сярысь тодыны кулэ.

Жаляса верано, пери шуккем мурт, оло, уз бурмы ни. Но со дыре ик осконэз ыштыны кулэ ӧвӧл. Угось йырвиым ассэ ачиз бурмытыны тырше. Луэ озьы но: больницаысь выписать кариськом султылыны быгатӥсьтэм муртэ. Нош ар ортчыса, пумитаськод но — ветлэ ни!

Элина Кумачёва

Ангелина Снигирева
By Ангелина Снигирева Март 13, 2019 11:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<