Огинтыын лёгаськыны дыр ӧвӧл!

Ангелина Снигирева
By Ангелина Снигирева Март 4, 2019 11:22

20-тӥ феврале Россилэн Президентэз Владимир Путин вазиськонэн потӥз Федерал Собранилы. Пусйиз, марлы матысь дыре кунамы нимысьтыз саклык висъяськоз.

В. Путин

Пиналъёс тросгес, вытъёс ичигес

Россиын улӥсьёс сак кылзӥзы Президентлэсь вераськемзэ. Котькудӥз кылӥз: огинтыын сылыны дыр ӧвӧл — калыклэсь улон-вылонзэ ӟечомытыны кулэ. Валтӥсь интыын: тросгес пиналъёс мед вордскозы, ӧжытгес налогъёс мед луозы. Озьы вазиськонэзлэн нырысетӥ минутъёсаз ик ӵектӥз: 3 но солэсь тросгес нылпи вордӥсь семьяослы ватсаса 450 сюрс манет сётоно ипотекая тыриськонъёссэс пытсаны. Трос нылпи будэтӥсьёс озьы ик 6 сотка сад-бакчазылы выт уз тыре ни. Кин банкысь пунэмаськонъёссэ тырыны уг вормы, «ипотекая каникул» басьтыны быгатоз но трос мукет.

Калыкез улон-вылонын утёнлы сяна, В. Путин озьы ик нимысьтыз саклык висъяз тазалыкез утён, дышетон удысъёслы. Кылсярысь, «Гуртысь эмчи» программае табере гуртын ужаны мылкыд карись вань эмчиос пыриськыны быгатозы, арлыдзы лыдэ уз басьтӥськы. Со сяна, ужаны кутскоз «Гуртысь дышетӥсь» программа но.

А. Муталенко

Анастасия Муталенко, Правительстволэн Тӧроезлэн воштӥсез:

— В. Путин верамъя, матысь аръёсы вань школаосы вуоз ӝог Интернет. Та туж бадӟым ужез улосъёслы быдэстыны юрттоз федерация. Посланиын верам троссэ ӵектонъёсты Удмуртия пыӵатыны выре ни. Кылсярысь, кылем арын усьтӥм Усточи нылпиослы центр, сое азинтонлы туэ арлы бюджетын 200 миллион манет чакламын.

Президент нимысьтыз вераз яслиослэн кулэлыксы сярысь. Удмуртия — Россиысь 10 улосъёс пӧлын, кудъёсаз та ужпум быдэсъяське ни. Матысь дыре асьмеос эшшо 12 ясли пуктыны чакласьком.

Мон туж шумпотӥ, семьяын 1-тӥ но 2-тӥ пинал вордскыку, нимысьтыз юрттэт луоз шуыса. Табере семьяысь котькуд адямилэн доходэз улыны чаклам минимумлэсь 2 поллы тросгес луыны кулэ. Озьы ӧвӧл ке, ватсаса уксё сётӥськоз.

Азьтэмсконо ӧвӧл — эмъяськоно

Федеральной собранилы вазиськоназ В. Путин нимысьтыз саклык висъяз тазалыкез утёнлы. Президент верамъя, Россиын диспансеризация ортче, висёнъёсты алонъя нимысьтыз эскеронъёс радъяськыло. Кыказ но одно ик пыртэмын луыны кулэ онкологиен герӟаськем эскеронъёс. Адями мед быгатоз врач доры дистанционно амалэн гожтӥськыны, поликлиникае аслыз тупась дыре вуыны — ӝыт но, шутэтскон нуналъёсы но.

Н. Свирин

Никита СВИРИН, онкологияя элькун диспансерысь валтӥсь врач:

— Ракез дырыз дыръя шараян понна 2 амал тупа: поликлиникаысь смотровой кабинетэ ӵемгес ветлоно, диспансеризация ортчоно.

Лек пыктосэз шараян но эскерон ортчытон сярысь сюлмаськыны кулэ участковой терапевтъёс. Ӵапак соос кие нырысь ик сюро больницае вуэм адямиос. Пыктос шедьтэмын ке, сое бурмытон борды басьтӥське ини мукетыз врач — онколог.

Но луылэ озьы: адямиез йӧнатыса пайдаез ӧвӧл ни, улонзэ утьыны, кузёмытыны уз пӧрмы ни. Угось висёнэз вазь шараян нырысь ик ачиз адями бордысь потэ. Кулэ поликлиникаяды лыктыны но эскериськыны.

Спорт сётэ мылкыд

Азьланезлы пуктэм ужпумъёс пӧлысь одӥгез — таза улонэн эшъяськон но спортэз азинтон. Котькуд адями ас улонэз, тазалыкез понна кыл кутыны кулэ, шуэ В. Путин. Со понна нимысьтыз система малпано, тазалыкез ӵемгес эскерыны луонлыкъёс кылдытоно, спортэн эшъяськисьёслэсь лыдзэс йылэтоно.

Т. Тихонова

Тамара ТИХОНОВА, олимпийской чемпионка:

— Быдэс Россиын но Удмуртиын спортэз азинтонлы бадӟым саклык висъяське. Арлы быдэ выль стадионъёс, спортзалъёс но куас базаос лэсьтӥсько. Физкультураез калыке вӧлмытонлы бадӟым саклык висъяське. Спортъя бадӟым праздникъёс радъясько. Россиын ваньмыз ортче ни, шуыны луоз: Олимпиада бордысен кутскыса Гурт тол шудонъёс дорозь. Удмуртиын но пӧртэм ӵошатсконъёс ортчо. Со борды капчи мылкыдэз ватсаса, ваньмылы матысь стадионэ вамыштыны гинэ на кыле. Жаляса верано, ӵемгес спорт понна «висиськомы», диван вылын кылльыса, вырӟыны укыр секыт. Нош калыкын юнме уг шуо: таза улонэн эшъяськон — со капчи мылкыдын улон.

Сергей Захаров

Ангелина Снигирева
By Ангелина Снигирева Март 4, 2019 11:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<