Мынам кылчинъёсы — анай-атае

Ангелина Снигирева
By Ангелина Снигирева 22 марта, 2019 15:38

Ирина САМИГУЛОВА — Башкортостанысь Эшъяськон юртысь удмуртъёслэн историяя но культурая центрысьтызы валтӥсь специалист, удмурт нылкышноослэн «Эшъяськон тугоко» клубенызы кивалтӥсь, кылбурчи, 4 пиналъёслэн анайзы.

И. Самигулова

— Ирина Муллаяновна, тӥ Удмурт шаерлэн палэназ, Башкортостанын, вордӥськемын но улӥськоды. Озьы ке но туж юн герӟаськемын удмуртлыкен, удмурт культураен. Дышетскыны гинэ но Удмурт кун университетысь удмурт филологияя факультетэ мынӥды. Мар кыскиз тӥледыз «чын удмуртъёс» доры?

— Удмурт университетысь удмурт филологияя факультетэ пырыкум, мынам 2 пиналы вал ни. Туж яратылӥ удмурт литератураез, туж потылӥз журналист луэме. Но озьы тупаз, мон дышетскыны пырон вакытэ УдГУ-ын журналистикая факультет ӧй вал ай. Кыкетӥ араз гинэ усьтӥзы сое. Но мыным удмурт филологиын но туж кельше ни вал. Кылбуръёс, 5-тӥ классын дышетскыкум ик, гожъяны кутски бере, университетын диплом уже но аслам кылбуръёсыя вал. Дышетсконме йылпумъякум, мон 3-тӥ пиналме ваёно вал ни. Дипломме басьтӥ гинэ, со ӝытэ ик нылме вайи. Озьы 3-ез пиналъёсы Башкортостанын вордӥськемын, одӥгез — Удмуртиын.

Мон пушкын трос пӧртэм калыкъёслэн виръёссы вань. Со мыным юрттэ, дыр, кытын ке дӥсьтӥсьгес, кышкасьтэм луыны, кытын ке малпанме меӵак вераны.

Нош удмурт калыкелэн лякыт, сабырлы, визьмо луэмез пыӵамын, удмурт гуртын улыса, анай-атаелэсь пичи дырысен сыӵе луэмзэс адӟыса. Соос мыным сыӵе мусоесь, сыӵе лякытэсь потылӥзы.

— «ВКонтакте» вотэс бамын асьтэ сярысь шуиськоды: «…Ачим кадь луыны яратӥсько. Атайме яратӥсько. Анае сярысь тодам вайисько…» Кыӵе вал тӥляд семьяды?

— Улон пичиысен ик ӧз эркия. Аслам анае монэ, одӥг толэзьем нуныез, больницае куштыса кельтэм. Озьы мон, 5 толэзь тырмытозям, вож нуныослэн юртазы улӥськем, туж ляб вылӥськем. Но огпол отчы лыктӥллям мынам вуоно анай-атае асьсэлы пинал утчаны. Атае кӧлоно инты дорам лыктэм, мон, шораз учкыса, пыньпотӥськем (пальпотӥськем). Атае шуэм: «Таиз мынам нылы!» Врачъёс анайме палэнэ, пе, кыско: кузпалды, пе, со ныллы кызыкем (синмаськем), но со пинал улӥсь уз луы, туж ляб, тани учке ай, татын таза нылпиос, пӧлазы пиос но. Но атае верамзэс кылзымтэ ни: «Инмар мыным со нылэз серекъятӥз». Тӥни озьы монэ, 5 толэзьем мае ке, Татышлы ёросысь Вылысь Балтач гуртэ вайиллям. 4 аресозь ми анаеным больницаысь потатэк улӥськеммы, мугорам но, йырам но урен тырмем пӧськыос, пе, вал, соосты вандылӥллям, урзэ шприцъёсын кыскаса потталлям, бурмыса уг вутто, выльёсыз пото. Монэ утён, пыд вылам султытон понна анае ужаны потаны быгатымтэ ни, трос лулсэрзэ быдтэм. Йыркуръяськисьёс но трос вылӥллям, укно ултӥ бадӟым кеськыса кошко, пе, вал: куштэм кучапиез утьыса улэ татын… Берлогес ни гуртысьтымы фельдшер, туж ӟеч бигер кышномурт, анаелы шуэм: нылдэ пыд йылаз султытон понна аслэсьтыд улондэ 10 арлы кемгес (вакчигес) карид…

Будэтэм анаеныз

Анае 11 ар талэсь азьло улонысь кошкиз ни. Туж секыт вал сое ыштыны.
Атае дышетӥсьын ужаз, анае — колхозын. Анае уж дурысь туж жадьыса бертылэ вал, туж жалялляй сое, юрттыны тырши. Со 1941-тӥ арын вордӥськемын вал, туж трос секытлыкез, война аръёсы будонэз адӟемын. Туж чебер кырӟалляз.

Атае али семьяеным ӵош улэ, со мыным котьку кужым сётэ, юрттэ. Атаелы 83 арес, ул ай, ул ай, шуисько, туж кышкасько сое ыштэмелэсь. Анае-атае — со мынам кылчинъёсы. Туж тау шуисько Инмарлы, мыным анай-атай сётӥз шуыса.

Али ужея (нылкышно клубен кивалтӥсько бере) нылпи приютэ но ветлоно луэ. Адӟисько мон, кыӵеесь синъёссы отчы кельтэм пиналъёслэн.

— Нош тӥледыз та дуннее ваем кышномуртэ тодӥськоды-а?

— Пичи дыры туж шудо вал, ӧй но малпалля, анай-атае аслам ӧвӧл шуыса. Соос монэ туж яратӥзы. Но гуртын отысь-татысь супыльтонъёсты кылоно вал. 16 арескам мыным веразы, басьтэм ныл шуыса. Малпай, аслэсьтым зэмос анайме шедьто. Монэ куштэмез сярысь заявленизэ шедьтӥм, отын пусъем адресъя атаеным гожтэт гожтӥм. Анае шедиз Казахстанысь. Монэ адӟыны лыктӥз. Туж секыт пумиськон вал со. Монэ со 16 аресказ ваем. Яратонэз семьяё мурт вылэм ни. Но анаелы та сярысь верамтэ, нылпи ваёнзэ тодэм но ышем. Сокугес ик анаелэн анаез кулэм. Соос атаеныз ӵош кылиллям, но атаез ӝоген 2 пиналын кышно ваем. Мынам кӧто анае соослы кулэ луымтэ ни, улляллям.

Монэ вордэм но приютэ кельтэм кышномуртэз адӟемпотостэм карисько вал. Нош ачим нырысетӥ пиналме вайи но, мылкыды воштӥськиз: со мыным улон сётӥз ук, быдтыны быгатысал ке но, со монэ быдэс толэзь ӵоже нонтыса возиз ук, кӧня малпаськиз, дыр, мар кароно… Казахстанысь ветлыкуз, со туж висе вал ини, мон сяна, солэн нылпиосыз вылӥллямтэ ни. Туж жаляй сое, но монэ будэтэм кышномуртэ эшшо юнгес жалялляй. Зэмос анаеным пумиськон со понна туж бадӟым шуккет вал. Со туж кышкалляз, мон кошко шуыса…

Монэ будэтэм анае ӧвӧл ни ке но, мон котьку шӧдӥсько соин герӟетме. Секыт дыръя, сюрес вылэ потыку, соин вераськисько. Ужея но трос сюлмаськонъёс шедё, анае юрттэ кадь потэ.

— Удмурт шаерысь удмурт интеллигенция одӥг-ог ассэ пыкылэ: Башкортостанын, Татарстанын улӥсь удмуртъёс дӥсьтӥсесьгес, удмуртлыксэс возьыны но юнэсьгес. Тӥ тае шӧдӥськоды-а? Кыӵе мылкыдын тӥ палась удмуртъёс учко Удмуртиын улӥсь выжыоссы шоры?

— «Башкортостанысь удмуртъёс — чын удмуртъёс» шуэмзэс трос пол кылылэме вань. Озьы, дыр, со: вашкала дырысен ми палась удмуртъёслы трос чидано, вормоно, пӧртэм шуг-секытъёс пыр потыса, кыдано луэм. Туала улонын но со озьы. Улӥськомы палэнын, асьме выжыосмес утьыны, возьыны тыршиськом. Капчи ӧвӧл, та уж трос кужымез кулэ каре. Но Удмурт шаер ми понна туж дуно, калыкмы гажа удмурт кылмес, кырӟан-веранъёсты, шумпотэ выль иворъёслы. Удмуртиен герӟаськем котькуд кыл, ивор, адями милемлы матын, отысь куноосты, артистъёсты, тодосчиосты чидатэк витиськом. Удмуртия — со милям лул-сюлэммы.

Егит дырыз

Удмурт кылмес, сямъёсмес утён понна ик Башкортостанын кылдытэмын вал удмурт национально-культурной центр. Удмурт калыкен пӧртэм пумиськонъёс, фестивальёс, ӝытъёс, Башкортостанысь удмурт нылпи садъёсын, школаосын анай кылмылы сӥзем мероприятиос ортчытъяськом. Милям зэмос удмурт крезен шудӥсьёслэн коллективзы но вань. Сцена вылэ пото ке, сюлэм шумпотэ. Нош егитъёс понна кӧня ке ар ӵоже Удмуртиысь «Шундыкар» выллем лагерьмы ортчылэ — «Усточикар» нимаське.

Историко-культурной центрмы 2016-тӥ арысен ини Башкортостанысь 17 пӧртэм калыкъёслэн та выллем центръёссы пӧлын нырысетӥ интыез возе. Башкортостанысь культурая министерстволэн таукаронэныз пусъемын.

— Кам сьӧрын улӥсь удмуртъёс пӧлын тӥ тодмо луиськоды кылбуръёсыныды. Чуръёсты туж шунытэсь, ненегесь. Туала вакытэ этнопедагогикаез, калык чеберлыкез пушкытӥз шӧдыса сыӵе лякыт гожъясьёс ик ӧвӧл ни кадь…

— Кылбур дунне — со шумпотон, буйгатскон, капчилык, асэныд вераськон.

Нырысетӥ кылбуръёсме школаын гожтӥ. Дышетӥсе адӟиз но эшшо гожъяськыны бурдъяз. Башкортостанысь удмуртъёслэсь «Ошмес» газетсэс кылдытӥсь, солэн нырысетӥ редакторез, писатель Андрей Гильмаев но ялан тыршылӥз творчество удысэ кыскыны, удмурт кылын гожъяськисьёсты со син азяз возиз, визьмалляз.

Туж яратӥсько Марина Цветаевалэсь, Анна Ахматовалэсь творчествозэс. Удмурт поэтъёс пӧлысь — Татьяна Черновалэсь, Михаил Федотовлэсь, Сергей Матвеевлэсь.

Студент дыръям ай, 1995-тӥ арын, «Чеберина» конкурсэз учкыны мынӥ. Сцена вылэ кырӟаса потӥз Валентина Пудова. Кылзӥсько но паймисько: мар тодмо кылъёс та? Собере веразы ни, кылъёсыз, пе, Ирина Самигуловалэн, крезьгурез Михаил Черновлэн. Пушкы ик бугырскиз, синвуаськоно кадь луи.

Кылбуръёсыя али 20-лэсь трос кырӟанъёс гожтэмын. Вань ӟучъёсыз но. Крезьгур гожтӥсьёс пӧлын — Марина Галичанина, Александр Галеев, Алёна Тимерханова, Николай Анисимов но мукетъёс.

Атаеныз

Мон уйин гожъяськисько. «Ошмес» газетын журналист луыса ужакум, дыры тросгес вал, али сокем ваньмоно ӧвӧл ни. Но куддыръя басьтӥсько ручкаме но, кылъёс асьсэос кисьтӥсько. Выль кырӟанъёсы пӧлын Алёна Тимерхановалы гожтэм «Крезьгур» кырӟанэ. Гожтыкум син азям пуксиз, кызьы Алёна та кырӟанэн йылпумъя аслэсьтыз творческой ӝытсэ. (Алёнаен ми эшъяськиськом.) Кылъёссэ келяй но, Алёна кесяськыса ик гожтэ ни: та, пе, мон сярысь ук!!! Кырӟан одно пӧрмоз! Озьы со творческой ӝытсэ та кырӟанэн йылпумъяз.

Нош анаелы сӥзем «Зангари» кылбуре пӧрмиз, со доры шайвылэ мыныкум. Анае туж яратэ вал зангари сяськаез. Эмезь, боры бичаса, бусыетӥ бертӥськомы но котьку зангари бичаськомы вал, талэсь чебер сяська ӧвӧл ни, нылы, шуылӥз.

Зангари сяська кемалась
кельше.
Туж мусо гинэ бусыын
будэ.
Зангари сяська тон кадь ик
ненег,
Со сяська бордын тынад
тусбуед.
Зангари сяська мон тыныд
вайи.
Шайгуэд вылэ усиз
синкыли…

Писатель Ульфат Бадретдинов котьку шуылӥз: Ирина, малпаськоно ни кылбуръёстэ «липет улэ» пыртон, книга поттон сярысь. Та нуналъёсы шумпоттӥзы: фин огазеяськон грант сётэ, книгае ӝоген потоз.

— Уждыя тӥ ялан калык син азьын, ӵем гинэ командировкаосы потано луиськоды. Кызьы трос нылпиё анай ужын но, семьяын но азинлыко луыны пӧрмытэ?

— Ӵем дыръя шуисько: жадьыны уг яра, тон сьӧрын удмурт калык. Ужакум туж юрттэ Башкортостанысь удмуртъёслэсь автономизэс кылдытӥсез, соин кема аръёс ӵоже кивалтэм Ренат Биктимирович Галямшинэз тодэме, солэсь адӟем карисько. Мон понна со зэмос удмурт — йӧно, визьмо.

Нылпиосмы удмурт кылэз тодо. Бадӟымез пимы — Влас — лэчыт визез кулэ карись наукаосты гажа. Со инженер-проектировщик, ужа «ЛУКОЙЛ-Инжиниринг» огазеяськонлэн инженерно-проектной отделаз. Анастасия но Алёна нылъёсмы — студентъёс. Настя азьланяз егитъёсын ужаны, психолог луыны малпа. Алёна — вуоно дизайнер. Нылпиосмы пичиысен творчество котырын будӥзы. Школаын пӧртэм кружокъёсы, лагерьёсы ветлӥзы, художественной школаез йылпумъязы. Пичиез пимы но соослэсь адӟем каре, туж тыршись пияш будэ.

— Алигес пичиез пиды Башкортостанын ортчем «Мой язык — язык дружбы» конкурсын вормисе потӥз. Настя нылды удмуртъёслэсь данзэс утиз Уфаын ортчем «Мисс Интернационал» конкурсын. Озьы тӥ асьтэ семьяды вылын но возьматӥськоды удмуртъёслэсь визьмо но чебер луэмзэс. Пиналъёсты асьсэ мылкыдзыя-а удмуртлык борды кыстӥсько яке анай-атайзы куремъя-а?

— Нылпиосмы пичи дырысенызы ик сётэм кылзэс быдэстыны тыршо, мытэм ужзэс пумозяз вутто. Ноку но юнме дырзэс уг быдто, весь маке но каро, маин ке но выро. Урокъёссы бере яке кружокъёсы бызё, яке спортэн выро, яке гожъясько, суредасько. Удмурт адями луэмед бере, яратоно ас кылдэ, выжыостэ, ас калыктэ данъяны тыршоно. Со сярысь валан семьяямы валтӥсь интыын луэ. Соин ик кужмысь мае ке карыны косонэз но ӧвӧл, асьсэлэн мылкыдзы бурдъяське.

Калык дӥсен

Тани, шуом, Уфаын «Мисс Интернационал» конкурс орт-чоз шуыса, мон Алёнаелы ивортӥ: пыриськемед уг поты-а? Со ӵапак Уфаысь университетын дышетске. Мылкыды, пе, вань, но али уггес ваньмиськы. Оло, пе, Настямы пыриськоз. Ижын дышетскись нылы шуиз: пырисько, уг кышка. Вожвылъяськон кӧня ке люкетэн мынӥз, Россиысь гинэ ӧвӧл, кунгож сьӧрысь но нылъёс пыриськизы: Индиысь, Нигериысь, Казахстанысь, Таджикистанысь, Египетысь, Грузиысь… Пӧртэм ка-лыкъёслэн чеберлыксылы, культуразылы сӥзем туж чебер ужрад пӧрмиз, финалэз Уфаысь конгресс-холлын ортчиз.

Настяе понна туж сюлмаськи, но со вань сюлэмзэ поныса дасяськиз, мукет конкурсантъёслы но юрттӥськиз ай. Бер ӝыт жингыртэ: анай, ӵуказелы, пе, калыкедлэсь пӧрамъёссэ возьматоно шуизы, нош мон ялан репетициын ай (соосты сцена вылтӥ чебер ветлыны дышетӥзы), пыжиськыны уг вуттӥськы… Мон соку ик перепеч пыжыны кутски, вазь ӵукна Уфае потӥ. Мукет дыръя жингыртэ: кулэ сыӵе-сыӵе сапег. Ма, шуисько, вань ук тынад. Мыным, пе, аслым ӧвӧл, ӟуч ныллы… Тросэз конкурсанткаос тау каремзэс веразы нылылэн сыӵе лякыт, вазиськись, юрттыны тыршись луэмез понна. Тӥни, пе, кыӵеесь вылӥллям удмуртъёс. Ми, зэм но, туж тыршим та ӵошатсконын калыкмылэсь вань чеберлыксэ возьматыны. Пӧрмиз. Настяе «Мисс Этно» луиз.

Нош «Мой язык — язык дружбы» акция Башкириын быдэс ар ӵоже мынӥз. Та акцие пыриськисьёс асьсэ анай кылынызы кылбуръёс лыдӟыны кулэ вал, лыдӟыкузы одно ик асьсэ калыклэн крезьгуро инструментэз мед шудоз, вылад но калык дӥсь мед луоз. Та акцие Башкортостанысь 500-лэсь трос адями пыриськиз. Тужгес пичиезлы 5 арес вал, бадӟымезлы — 85. Эмиль пиеным лыдӟимы «Вордскем кыл» кылбурме.

Сюлмын вордскем чуръёсме пие туж умой шӧдӥз, валаз, соин ик вормисе потӥз.

— Кузпалды туж йӧно, зэмос атай, дыр. Валамтэосты луыло-а?

— Марс — пӧртэм быгатонлыкен туж творческой адями. Висмы — 8 арес. Дышетскемезъя со физик-математик, Уфаысь университетэз йылпумъяса, школаын ужа ни вал. Тод-матскыкумы мон школаын дышетскисько на вал. Со возьмаз. Дышетсконме йыл-пумъяме бере УдГУ-э пыроно кариськи. Но баллъёсы ӧз тырме, гуртам бертоно луи. Ӝоген семья кылдытӥм. Ой, мыным соку 17 арес гинэ вал ай, сельсоветын мырдэм пусйизы. Собере вордӥськизы Влас пимы, Алёна нылмы. Нош ик УдГУ-э мынӥ, пыри. Дышетскытозям эшшо пиналы вордӥськиз на, академической отпуск огпол но ӧй басья. Али малпасько: кыӵе шузи вылӥськем, малы сыӵе шузимыса ваньзэ лэсьтыны, вуттыны тыршиськем. Но соку мон секытэз ӧй но вала кадь.

Семьяез

Марс школаын директор лу-ыса тыршиз, ужын пӧзиз. Али Татышлы ёросысь ДОСААФ-ын тырше. Нылпиосмес со ӝикыт луыны, кутскем ужез пумозяз лэсьтыны дышетэ. Нылпиосын шудыны, соосты юн яратыны быгатэмезлы мон котьку паймисько. Семьяямы котьку берлось кыл атаймы вера. Валамтэос луыло. Мон инметӥ лобаны яратӥсько, со мыным музъем бордын возиськыны юрттэ.

— Кык арня улыса, пусйиськоды 45 арестэс. Кыӵе кузьым возьмаськоды меда?

— Мон туж яратӥсько сяськаосты. Нылпиосы но се-рекъяло: тыныд сяська сётӥд ке, ваньзэ вунэтыны дась. Мынам коркаям туж трос сяськае, азбарам, бакчаям но мерттӥськыны яратӥсько. Жадён дыръёсы сяськаосы кужым сёто, соосты утялтӥсько, интызэс вошъясько. Эшшо яратӥсько на инкуазе потаны, узы-боры бичаны, турын вылэ выдыса, тӧдьы-тӧдьы пилемъёс шоры учкыны.

Вань вормонъёсы понна тау карисько анаелы. Солы вераме потэ: сомында пинал пӧлысь тужгес лябзэ тӥ юнме ӧд басьтэ, юнме ӧд веськатэ. Та малпанъёс ик выль но выль ужъёсты быдэстыны косо.

Елена Миннигараева

Фотоос басьтэмын И. Самигуловалэн архивысьтыз

Ангелина Снигирева
By Ангелина Снигирева 22 марта, 2019 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<