Лэчыт визь кыльылӥз вужере

Ангелина Снигирева
By Ангелина Снигирева Март 20, 2019 16:34

Критикатэк литература ӧвӧл — тае валало писательёс но, литературоведъёс но, лыдӟисьёс но, но со дыре ик критиклэн ужез ӵемысь вужере кыле. Сое валано А. Ермолаевлэн улэм-вылэмезъя но.

А. Ермолаев

Нимъёсты усьтӥсь

Тросэзлэн дано удмурт писательёслэн, поэтъёслэн талантсы юнмаз, ужъёссы лыдӟись доры вуизы Алексей Ермолаев критиклы, текстологлы, литературоведлы луыса. А. Ермолаев юрттӥз Ф. Васильевлы, Г. Красильниковлы, Р. Валишинлы, В. Романовлы гожъяськон сюрессэс мытыны. Репрессиос улэ шедем писательёсты — К. Гердэз, А. Окиез, К. Митреез — лыдӟисьлы берыктӥз. Удмурт литературалэсь азинскемзэ, историзэ, аспӧртэмлыко сюрессэ возьматӥз А. Ермолаевлэн лэчыт пероез. Со гожъяськиз литератураен тодматскисьёс, сое эскерисьёс, соин вырисьёс, пичиос но быдэ вуэмъёс понна.

Алексей Афанасьевич Ермолаев вордскиз 1934-тӥ арын 5-тӥ толшоре Татарстанысь Кукмор ёросысь Киня гуртын. Тодон-валан басьтӥз Можга педучилищеын, МГУ-ысь журналистикая факультетын. Ужаз Удмуртиысь издательствоын, УдНИИ-ын, «Молот» журналын, бӧрысь литератураен гинэ выриз.

Критик улонысь кошкиз 2006-тӥ арын, туэ солы 85 арес тырмысал. А. Ермолаевлэн юбилеезлы сӥзьыса, Удмуртиысь Национальной библиотекаын 12-тӥ южтолэзе ортчиз «Удмурт литературалэн ингожысьтыз» электронной изданилэн презентациез. А. Ермолаевлэн ужъёсыз 3 томе люкамын. 1-тӥез том сӥземын удмурт литератураез кылдытӥсьёслы, 2-тӥяз книгаын усьтэмын критиклэн удмурт литература удысысь азинсконъёс шоры учконэз, 3-тӥ томын Алексей Афанасьевичлэн ӟуч кылын ужъёсыз люкамын. Изданиез люказ но дасяз А. Ермолаевлэн кузпалыз Нина Георгиевна Ермолаева — Россиысь Журналистъёслэн но Писательёслэн огазеяськонъёссылэн члензы. Жаляса верано, коньдон ӧвӧлэн книгаез ӧз печатлалэ — со интыямын Национальной библиотекалэн электронной «ӝажыосаз».

Буре ваён ӝытэ люкаськизы критикъёс, писательёс, удумрт литератураен ваньмыз тунсыкъяськисьёс

Пумиськонын А. Ермолаевез буре вайизы критик но журналист Александр Шкляев, писатель но литературовед Василий Ванюшев но Нина Ермолаева.

Зэмлыкез утись

Александр Шкляев верамъя, А. Ермолаев удмурт литератураын нырысетӥез бадӟым критик луэ. Критикез ӵемысь уг валало, премиосын уг эркияло, уг зарнияло вал — А. Ермолаев, тае валаса, вань шуг-секытъёсты чидаз, соосын кыдаз. А. Ермолаевлэн одӥг кылыз но мултэс ӧвӧл, ужъёсыз мур пуштросоесь, критической жанръёсты со быгатыса уже кутылӥз. Со быдэс удмурт литератураез синйылтыса улӥз, шуиз Александр Григорьевич. А. Ермолаев Флор Васильевлэсь кылбуръёссэ одӥг книгае люкаса поттӥз. Котькуд кылбурлэсь ку гожтэмзэ, кытын печатламзэ пусйыса кельтӥз, вераз А. Шкляев. Со быдӟым уж, но калык сое ӵемысь уг адӟы, уг дунъя.

Василий Ванюшев А. Ермолаевен, Можга педучилищеын дышетскыкузы, тодматскем. Соос Екатерина Алексеевна Коноваловалэн литературной кружоказ ветлӥллям. А. Ермолаев ачиз гожъяськымтэ, но мукетъёсызлэсь ужъёссэс сэрттыку-пертчыкузы, котьку туж шонер чакланъёссэ шарая, ӟеч дэмланъёс сётъя вал, пе. Е. Коновалова одӥг пол шуэм А. Ермолаевлы: тон критик луод. Можга педучилищеез йылпумъямез бере А. Ермолаевез Москвае дышетскыны келяллям. Удмуртие бертылыкуз, со педучилищее пыралля вал, пе, эшъёсызлы вера дышетскемез сярысь.

Эшезлэн сюрестӥз мынэм Василий Ванюшев но — Москваысь кун университетэ дышетскыны пырем. Василий Михайлович тодэ вайытӥз А. Ермолаевлы сӥзем «Незамеченный подвиг исследователя» статьязэ. Алексей Афанасьевич Ф. Васильевлэсь кылбуретсэ «сӥсъяса-поръяса сётэм», 2004-тӥ арын аслаз коньдонэныз печатлам Ф. Васильевлэн кылбуръёсызлэн изданиосызлы удмурт оригиналъёсызъя радъям указатель. Солы луыса кылбуръёсызлэсь мукет кылъёсы берыктэмъёссэ туж капчи шедьтыны. Туж жаль, та книга 100 экземплярен гинэ потэмын — со котькуд библиотекаын луыны кулэ, асьмелы одно тыршоно А. Ермолаевлэсь ужзэ вӧлмытыны, шуиз В. Ванюшев.

Библиотекаын радъямын А. Ермолаевлы сӥзем адӟытон

Педучилищеын дышетскыкузы — В. Ванюшев 1-тӥ курсын вылэм, А. Ермолаев — 3-тӥ курсын — В. Ванюшев огпол мукет студентъёсын волейболэн шудэ вылэм. «Пичи» первокурсникез бадӟым курсъёсын дышетскисьёс палэнтӥллям. А. Ермолаевлэн вожез потэм, со В. Ванюшевез шудонэ берыктэм но шуэм: сыл, нокытчы эн кошкы. Соку В. Ванюшев нырысьсэ адӟем А. Ермолаевлэсь зэмлыкез утьыны выремзэ.

Со сямзэ шунытэн тодаз вайиз Нина Ермолаева но. А. Ермолаевен соос, МГУ-ын 3-тӥ курсын дышетскыкузы, тодматскиллям.

Одӥг пала учкыса…

— Антуан де Сент-Экзюпери «Планета людей» книгаяз гожтӥз: яратӥсь адямиос ог-огзы шоры уг учко, соос огпала учко, — вера Н. Ермолаева. — Озьы ми ог 50 ар ӵоже одӥг сюрестӥ вамышъям ӵошен, одӥг пала учкыса, одӥг ужез лэсьтыса. Алексей Афанасьевич туж оскымон мурт вал — яратонын, эшъяськонын, котьку кылзэ кутӥз ужез но удмурт кылыкез понна. Студент дыръяз ик со удмуртъёс понна тыршыны кутскиз, ваньмон дырзэ Ленин нимо библиотекалэн архивъёсаз ортчытъяз, репрессиос улэ шедем писательёслэсь гожъямъёссэс утчаз, эскериз.

Алексей Афанасьевич коньдон поттон сярысь ноку ӧз сюлмаськылы, ачиз понна ӧз вырылы. Игнатий Гаврилов кулэм бере А. Ермолаев солэсь «Гвардеецъёс» повестезлэсь черновикъёссэ, фронтысь дневникъёссэ шедьтӥз, радъяса книгаосын поттӥз. Мон юасько: кыӵе гонорар со понна басьтод? Со шуэ, мон, пе, уг быгатӥськы со гонорарез аслым кельтыны, мынам сое Клавдия Кузьминичналы — И. Гавриловлэн кышноезлы — сётэме потэ. Монэн кенешемез бере озьы ик кариз. Пётр Чернов, Геннадий Красильников но мукетъёсыз солы вазиськылӥзы, кенеш курыса. Со ваньмызлы юрттыны дась вал, со понна номыр ӧз курылы, ӧз возьмалля. Алексей Афанасьевич котьку озьы улӥз — удмурт калыкеныз огкылысь.

Пумиськонлэн пумаз куноослы возьматӥзы Нина Георгиевналэн архивысьтыз Алексей Афанасьевичен видеокадръёсты. Со вакчи видеоосты учкыса гинэ но, синмаськоно критиклэн лэчыт визезлы, шуныт юморен пачылам вераськемезлы.

Анастасия Шумилова

Ангелина Снигирева
By Ангелина Снигирева Март 20, 2019 16:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<