Кызьы эмъяно калыкез?

Ангелина Снигирева
By Ангелина Снигирева Март 12, 2019 09:46

Бусыос пашмо, эмъясьёс уг тырмо… Та но трос мукетыз сярысь ӝожтӥськизы каракулиноос Удмуртилэн Тӧроезлы А. Бречаловлы Арзамасцевоын калыкен пумиськон дыръя.

Каракулино калык трос юанъёс сётъяз

Больницае черод

Каракулино ёросын 10 сюрс 646 адями улэ. Та пӧлысь 2 сюрс 484-ез — нылпиос. 2017-тӥ арын сярысь, кылем арын ёросын 22 пиналлы ӧжытгес вордӥськиз. Кулӥсьёслэн лыдзы вордскемъёслэсь уногес. Ёросысь валтӥсь врач Елена Бабикова пусъемъя, вазь кулӥсьёс пӧлысь ӝыныез — со ужтэк пукисьёс, аракы юисьёс. Тужгес трос сюлэм висёнъёсын, лек пыктосъёсын сэрен кулӥсьёс. Эмчиос уг тырмо. Кылсярысь, ёросын ёрмо офтальмологлы, педиатрлы, неврологлы, терапевтлы, травматологлы.

Гуртъёс кыдёкын. Кылсярысь, пыдлось гуртъёсы сюрон вылысь Каракулиноысен «скоройлы» ог 40 иськемез ортчоно луэ. Валамон ни, таӵе дыръя быдэс час сюрес вылэ быре. ФАП-ёс вужесь. Кылсярысь, воксё начар югдур Боярка, Котово, Малые Калмаши, Арзамасцево, Колесниковское но Кулюшево гуртъёсын.

Арзамасцевоысь культурая юртын калыкен пумиськон дыръя Александр Бречалов оскытӥз, та фельдшер-акушер пунктъёс туэ тупатъямын луозы шуыса. Соослы оглом 5 миллион манет котыр висъямын. Но гуртоос пусъемъя, куд-ог ФАП-ёс куашкан калэ вуэмын ни, кылсярысь, Гремячево, Усть-Сакла, Черново но Сухарево гуртъёсы выль ФАП пуктыны кулэ. Та 4 гуртъёсын 708 адямиос уло. Артысь фельдшер-акушер пунктъёслэсь но, ёрос больницалэсь но соос кыдёкын. Соин ик татчы ФАП-ёс ӝутыны чакламын 2019-тӥ-2020-тӥ аръёсы. Ёросысь тупатэмез кулэ карись вань соцобъектъёсты выльдыны туэ висъяськоз ог 65 миллион манет, шуиз Тӧро.

Гуртоос пусъемъя, ёрос больницаысь койкае выдыны берло дыре секыт луиз. Толэзьлэсь кема но черодын сылоно, пе. Ёрос йыр Сергей Русинов верамъя, больницаын воштӥськонъёс луизы угось. Азьвыл огез отделение вашкала купеч юртын интыяськылӥз. Но сое пытсазы, интыяз ЦСО-лэсь ёззэ усьтӥзы. Вылаз ик, больницаын инфекционной но терапевтической отделениосты огазеязы. Али хирургияя, нылпиосты чакланъя ёзъёс ужало на. Вань отделениослы оглом 34 койка кылемын. Соин ик больницае сюрыны секыт. Зэм, ёрос больницаын нуназе ужась стационар вань на — со 24 койкалы. Азьвыл отын эмъяськон понна гуртоос гостиницаын кӧлаллязы. Но со калык понна дуно усе. Галаново, Боярка, Ныргында кемысь татчы ӵем уд но ветлы. Автобус арняяз 2 пол сяна уг вуылы. Отчы но сюрыны шуг — калык лачак люкаське. Дырыз но умойтэм: берен гуртазы берытскон вылысь висисьёслы больницаысь 11 час котырын потоно ни — эмъяськыса но, эскериськыса но уд вуы. Александр Бречалов автобуслэсь маршрутъёссэ но ветлон дырзэ эшшо огпол эскерыны, калыкен кенешыса, тупатыны куриз.

Ӝожтӥськонъёс вуизы диабетэн курадӟисьёслэсь но, эмъюм уксёен басьтоно луо шуыса. Александр Бречалов ӧз ваты: 4 ар ӵоже дунтэк сётӥськись эмъюмъёслы бюджетысь коньдон ӧжыт висъяськиз. Али инфарктэн, диабетэн но мукет секыт висёнъёсын курадӟисьёслы дунтэк эмъюм висъяны 2,5 миллиард манет уг тырмы. Ужпум пуктэмын: коньдон утчано.

Сюрес луоз 2020-тӥ арын

Гуртоослэн сюлэмзы туж висе пашмись бусыоссы пумысен но. Котырысьтызы тужгес умой музъемъёс — ог 4,5 сюрс гектар бусыос — Дмитрий Кулишов киын. Уг но гыры, выт но уг тыры, штрафъёсты санэ уг басьты. 3 ар утялтытэк возем бусыосты законъя гурт поселенилы сётоно. Но кескич кузё амал шедьтэ: предприятизэ мукет сямен нима, выль огазеяськон кариське но — ужез быре. Котьма ке но сыӵе кескич ужасьёсты син шорамы возиськомы, та юан бордын ужаськомы, шуиз Александр Бречалов.

Секыт югдур Арзамасцево черкогуртысь Оска шур вамен выжен но. Со 1977-тӥ арын ӝутэмын. 2007-тӥ арын аварийноен лыдъямын. Али со вылтӥ бадӟым машинаослы потаны алэмын. Кык полоса пӧлысь огез гинэ ужа. Дуръёсыз ялан куашкало, шуо гуртоос. Шур черкогуртэз шори люке. Лымшораз 200 мурт улэ, уйпалаз — 460, татын ик нылпи сад, школа, магазинъёс, культурая юрт, почта, банк, тылпу кысӥсьёслэн постсы но мукет объектъёс. Выжез тупатъяны ог 700 сюрс манет кулэ. Транспортъя но сюрес хозяйствоя министерство пусъемъя, туэ сое выльдыны чакламын ӧвӧл. Но кӧня со чидалоз на? Александр Бречалов куриз выжез эшшо огпол эскерыны.

Ёросын оглом 199 иськем сюресъёс тупатэмез кулэ каро. 8 гуртын сюрессы воксё начар. Та гуртъёсысь сюресъёсты лэсьтыны чакламын 2020-тӥ арозь. Со дыре ик вунэтэмын уз луы гуртъёсы газ кыскон но. Каракулиноысен Галаново гуртозь 76 иськем газ гумыос кыскемын ни. Матысь дыре чагыр эстӥськон 520 корка вуоз.

— Пумиськонъёс дыръя адямиос лэчыт юанъёс ӝуто. Котькудзэ кылыны но сэрттыны-пертчыны кулэ. Азямы пуктэм ужпумъёсты быдэстоно, — пумиськон бере шуиз Удмуртилэн Тӧроез.

Елена Сараматова

Ангелина Снигирева
By Ангелина Снигирева Март 12, 2019 09:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<