Кунянъёсмы ярало 9 улослы

Ангелина Снигирева
By Ангелина Снигирева 29 марта, 2019 12:41

Ижысь «Аксион» культурая юртын Гурт удысъя но сиён-юонъя министерство 2018-тӥ арын пудо вордонлы йылпумъянъёс лэсьтӥз, устооссэ ужасьёсты сӥлы кариз.

А. Абрамова но Я. Семёнов З. Харлампиваез ӟечкылало

Миым шаерамы кыскемын 781,4 сюрс тонна йӧл. Россиын асьмеос трос йӧл поттонъя 8-тӥ интыын, нош Приволжск федерал округын 3-тӥ интыын — азьпалан Татарстан но Башкортостан гинэ. Котькуд скаллэсь 6 сюрс 59 килограмм йӧл басьтыны быгатӥмы. Кылем арын сярысь, со 176 килограммлы уногес. Нош Россиын 223 килограммлы уногес кыскемын. Соин ик будыны луонлыкъёс вань, шуэ гурт удысъя но сиён-юонъя министр Ольга Абрамова. Озьыен, туэ гуртоос азе пуктэм ужпумъёс пӧлысь валтӥсез — кунян будэтон бордын умойгес ужан, ветылъёсты вазьгес бызьылытыны дасян. Туэ нуналлы быдэ 118 тонналы уногес цӧл кыскиськом (миым 50-90 котыр вал). Азьпалан Вавож, Можга но Шаркан ёросъёс. Та 3 ёросъёс миым оглом 166 сюрс тонналэсь трос йӧл кыскизы. Кылсярысь, кылем арысь та вакытэн ӵошатыса, Шаркан ёросысь хозяйствоос котькуд скаллэсь 4 килограммлы уногес йӧл сёто, воткаос — 2,3 килограммлы, эграос — 1,3 килограммлы. Зэм, Балезино, Сьӧлта но Яр ёросъёс арзэс миымлэсь уродгес кутскизы вал, но пумен соос но ӧраз пыро ини.

Племенной хозяйствоос котькуд скаллэсь 6 сюрс 700 килограмм йӧл кыскизы. Таос шаерамы вань кыскем йӧл пӧлысь 30 процентсэ сёто. Пудоен но вуз каро. Удмуртие сяна, 3 сюрс 118 йыр вузамын Москва, Иркутск, Ростов, Ставрополь пала — оглом 9 улосэ. Азинскеменызы шумпотто фермеръёс но. Синмаськымон ужа Шаркан ёросысь Николай Собин — 7 сюрс 435,8 тонна йӧл кыскиз.

— Йӧлэз йылтон сьӧры уйиськон сямен ӟечлыкез сярысь но сюлмаськоно, — сӥё-дано ужрадэз усьтыкуз, гуртоослы вазиськиз Правительстволэн Тӧроез Ярослав Семёнов. — 2018-тӥ арын продуктивностез йылтон понна 751,5 миллион манет висъяськиз, 341 миллион манет — племенной ужен вырыны. Туэ гурт удыслы висъяськоз 2 миллиард 385 миллион манет. Ватсаса 20 миллион манет вуоз фермеръёслы. Калыклэсь улон-вылонзэ капчиятон но ӝутон понна тыршыны кулэ. Туннэ Удмуртия гуртъёсты азинтонъя программая федерал бюджетысь коньдон кысконъя огез азьмынӥсез луэ.

Пудо вордон удысын тыршо 15 сюрс адямиос. Соос азинто мукет ӧръёсты но. Кылсярысь, шаерамы 76 сюрс 597 йыр кеч вордо, 232 сюрс 355 йыр — парсь, 7 миллион 650 сюрс — курег. 175 сюрс тонна сӥль поттэмын, матысь дыре йылтыны чакламын эшшо 2 сюрс тонналы. Та ваньмыз пӧрмоз гуртоослэн тыршеменызы гинэ.

Удмуртилэн Тӧроезлэн Таукаронэныз 49 мурт пусъемын. Пӧлазы Пичи Пурга ёросысь «Восход» хозяйствоысь Зоя Харлампиева. Абдэс-Урдэс гуртысь нылкышно ог 20 арзэ ни кунян будэтэ. Миым 104 кунянэз пыд йылаз султытӥз, быдэс гидын огназ тыршиз. Пудоосты яратэмез шӧдӥськиз, 6 толэзьем кунянъёс син куспын чеберскылӥзы. Уй-нунал куспын шорлыдын 1 килограмм 100 граммлы будылӥзы. Удмуртиын та устоез лыдпус. Соин ик пудо вордӥсьёс пӧлын вожвылъяськонын Зоя Сергеевна 1-тӥ инты басьтӥз. Будэтоно кунянъёсыз пӧлын бырисьёсыз но ӧвӧл, шуыны луоз. Котьку капчи мылкыдо, ужзэ гажась, адӟем карымон, шуо со сярысь хозяйствоын. Семьяез но бадӟым: 3 пиналыз.

Егит скал кыскисьёс пӧлын висъяськиз Шаркан ёросысь Собинлэн фермер хозяйствоысьтыз Людмила Лещёва, 36 ареслэсь бадӟымъёс пӧлын — Глазов ёросысь «Коммунар» хозяйствоысь Татьяна Некрасова. 

Елена Сараматова

Фото: udmurt.ru

Ангелина Снигирева
By Ангелина Снигирева 29 марта, 2019 12:41