Культуралэн узырлыкез мукет

Ангелина Снигирева
By Ангелина Снигирева Март 25, 2019 16:02

20-тӥ мартэ, люкаськылӥзы «Удмурт Кенеш» огазеяськонлэн исполкомез но экспертно-консультативной советэз. Ужрадэз нуизы огазеяськонлэн тӧроез Татьяна Ишматова но советлэн кивалтӥсез Игорь Семёнов.

И. Семёнов, Т. Ишматова

Эскерем юанъёс пӧлын: Герберлы дасяськон, Калык киужъёсъя юрт котырын югдур, А. Оки нимо премиен данъян но мукет.

— Кӧня ке ар ӵоже ини элькун Гербер ортчылӥз июнь шорын, но туэ сое толэзь пумлы выжтоно луиз, угось солэсь вазьгес шутэтскон нуналъёсы я Тройча поминка, я Буре ваён нунал (22-тӥ июнь) тупало, — вераз нациосын ужан политикая министрлэн воштӥсез Людмила Соковикова.

Та рад Кылдысин куноосты возьмалоз Эгра ёросысь Мазьги гурт котырын. Ёрос та ужрадлы далайгес дасяське ни, туэлы бюджетаз нимысьтыз 500 сюрс манет чакламын. 1 миллион 125 сюрс манет висъяськоз элькун бюджетысь. Азьвыл аръёсы та ужрадлы 2 миллион манет пала висъяське вылэм, но туэ вань шулдыръяськонъёслы уксё кулэстэмын. Но эграос уг юскисько, спонсоръёслэсь но юрттэтсэс лыдэ басьтыса, огъя коньдон сомындагес ик люкаськоз. Ми тыршом ужрадэз ӟеч но тунсыко ортчытыны, — шуиз Эгра ёрос администрацилэн кивалтӥсезлэн воштӥсез Александр Шамшурин.

Экспертно-консультативной советэ трос удмурт азьветлӥсьёс люкаськизы

Праздниклэсь пуштроссэ эграос али уг шараяло на, но со герӟаськемын луоз Улон питранэн. Уз вунэ воршудъёс но, Лӧпшо Педунь но, пельнянь йылолъёс но…


Ӟырдыт вераськон ӝут-скиз Калык киужъёсъя элькун центр пумысен. Толэзь талэсь азьло уго распоряжение кутэмын вал сое Культурая министерстволэн бурд улысьтыз Экономикая министерство кивалтэм улсы — туризмъя управление — выжтыны. Нош наукаен вырисьёсты, методистъёсты — 8 муртэ — Калык творчествоя корка. Культурая министр Владимир Соловьёв верамъя, сыӵе адӟон чакламын элькун центрлы гинэ, ёросъёсысь киужъёсъя 22 юртъёс кызьы ужазы, озьы ик кылёзы. Но элькун юртэн югдур нокинлы уг кельшы, соин кемалась ӧвӧл декоративно-прикладной искусствоя мастеръёс, тодосчиос вазиськизы Кивалтэтэ, Общественной палатае, «Удмурт Кенеш» огазеяськонэ. Кибашлыослэсь юртсэс утьыны курыса, вераськизы тодмо удмурт азьветлӥсьёс Игорь Семёнов, Пётр Ёлкин, Владимир Владыкин но мукетъёс. Малы сыӵе решение кутэмын вал, кыӵе экономия луоз та ужрадлэсь, Владимир Михайлович рос-прос ӧз вера, но шуиз, та юан эскериськоз на Правительстволэн Тӧроез Ярослав Семёнов дорын. Герӟаськемын ке со коньдон поттыны тыршонэн, культураен экономикаез уд тупаты, шуизы экспертъёс. «Удмурт Кенеш» огазеяськон куриз аслэсьтыз мылкыдзэ кивалтӥсьлы вуттыны.


Огазеяськон арлы быдэ Ашальчи Оки нимо премиен данъя азинлыко удмурт нылкышноосты. Туэ ӵектэмын вал 4 мурт, но комиссия ӵектӥз дунъяны кыксэ: тодмо удмурт кылбурчиез Татьяна Черноваез но Балезино ёросысь Исак школаысь удмурт кылъя дышетӥсез Татьяна Захароваез. Исполком комиссилэн решениеныз соглаш луиз. Та синмаськымон нылкышноосты данъялозы 18-тӥ апреле Пичи кенешлэн ужрадаз.

Пичи кенешын эскероно юанъёс пӧлын валтӥсез луоз Удмуртилэн кунлык басьтэмез дырысен 100 ар тырмонлы сӥзем ужрадъёслы дасяськон, чакламын нациосын ужан политикая министрез Л. Бурановаез ӧтьыны.

Зинаида Рябинина

Фото: басьтэмын Т. Ишматовалэн «ВКонтакте» вотэсбамысьтыз

Ангелина Снигирева
By Ангелина Снигирева Март 25, 2019 16:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<