Корка уз пачкаты ни кузёзэ

Ангелина Снигирева
By Ангелина Снигирева Март 15, 2019 14:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы потоно кушкан калэ вуэм юртысь?

Ижысь Люлли микрорайонын быдэс ульча тыр куашкано кадь баракъёс. 30 номеро юртысь удмурт семьяослы миым удалтӥз — шуныт квартираосы потӥзы. Юрист Эдуард Шиляев ӧй юрттысал ке, али ке но отын ик улысалмы, шуо. Угось 2025-тӥ арын гинэ выль сэрег сётыны сӥзьылӥзы.

Ижысь Люлли микрорайонын таӵе баракъёс трос на

Фуфайкаен кышъяськон

Ас вакытаз Люлли лыдъяськылӥз Дэри ёросысь гуртэн. «Ижсталь» заводлэн татын «Металлург» нимо подсобной хозяйствоез вал. Совхозэз азинтоно шуыса, ужасьёслы корка висъян сярысь вераськыны кутскизы. Со понна Ижысь Т. Барамзиналэн ульчаысьтыз баракъёсты сэрттыса Люллие вуттӥзы. Озьы 8 юртлэсь кылдӥз быдэс урам. Сьӧрос педлон, эстӥськоно пуэн, юртэ ву пыртыны алэмын. Та шуг-секытъёс нокинэ ик ӧз сюлмаськытэ — гуртоос шумпотыса отчы пыризы.

— Барак — огдырлы гинэ, ӝоген блокъёслэсь выль коркаос пуктомы, ваньдылы отчы быдэн квартира висъяломы шуыса, оскытъяз совхозэн кивалтӥсь Алевтин Сафронов, — тодаз вае «Металлург» совхозын быдэс даурзэ скал кыскисьын ужам нылкышно Лидия Малинина. — Соин ик ӧм куректэ. Бускельёс но умоесь тупазы — 8 квартираен баракын удмуртъёс люкаськимы угось. Одӥг семьяен кадь улӥмы. Пудо вордыны, бакча возьыны кутскимы, совхоз пудо сиёнэн юрттылӥз. Отӥяз выль юртэ выжонмылы оскон уката юнманы ӧдъяз. Совхоз угось блокъёслэсь 3 этажъем юрт ӝутӥз, ужасьёслы квартираос люкылӥз. Ми доры но черод вуоз шуыса возьмаллямы. Но перестройка вакытэ пуктӥськон уж гуньдӥз, совхоз но лябӟыны кутскиз. Кӧня пол реорганизация ортчиз отын — валаса ӧм вуттылэ ни. 2008-тӥ арын мынам пенсие потэме бере хозяйство воксё быриз. Оскон ӧз кенжылы ни шуныт квартиралы. Уката ик 1993-тӥ арын Люлли гуртэз Иж городлы сётӥзы. Первомай ёрослы ми секыт ныпъет кадь луимы: кинлэн потоз сисьмем баракъёсты воземез?

40 ар ӵоже баракын улытозяз, Лидия Малинина мае но ӧз адӟы. Толалтэ гурзэс рос-прос эстылӥзы ке но, ӵукна коркан 12 градус сяна ӧз кыльылы. Сисьмем борддорез маин кышъяны паймемысьтыз, Лидия Филипповна вуж фуфайказэ адями тэрымон пасе донгаз, сое педпалтӥз но, пушпалтӥз но пенопластэн ӵоксаз на.

— Милям квартирамылэн «кӧтыз» ик потыны кутскиз, — вера бускелез Нина Егорова. — Коръёсыз, секыт липетэз вормытэк, кыре потыны ӧдъязы. Квартираын мускыт. Коркамы угось нюке пуксемын вал. Тулыс бусыосысь вань шунам ву ми доры васькылӥз — канава кырыса, толыкез ӧз луылы. Гужембыт гулбечын ву пукылӥз. Шкап но, дӥськут но пурысьталлязы.

Укнооссы тросэзлэн ӧз чидаллялэ: позыръяськем коръёс улын пильы-лӥськылӥзы. Йӧнгес материал утчатэк ӧз луы — котькудзы сямен укнооссэс пластиклы вошъязы. Но пумен липетсы вияны кутскиз. Ёросысьтызы спецдомоуправление вазиськылӥзы ик, но отын шуизы: коркады вуж, капремонтлы трос уксё кулэ луоз. Огпол но ӧз тупатъялэ. Соин ик воргоронъёс, дэмен кариськыса, липетсэс асьсэос кышъязы.

7 ар нюръяськон

— Депутатъёс дортӥ но, ёрос администрациетӥ но, кытӥ но ӧм ветлэ, куашкаськомы ни шуыса, — лулӟе Лидия Малинина. — Нокин кылэм-адӟем ӧз карылы. Куд-огез кабинетаз ик пыраны ӧз лэзьылы. Кыдёкысен монэ тодмало ни вал угось. Шудмы вылэм на — юрист Эдуард Шиляев шедиз. Удмурт пиосмуртлы югдурмес ми кадьёслы валэктыны но капчигес вал. Эдуард Вячеславович кузпалыныз Елена Васильевнаен — со но юрист — ӵош милемлы юрттоно кариськизы. Кытчы мыныны, мар бордысен кутскыны — ваньзэ тупен-тупен валэктӥзы.

Зэм, 30 номеро юртын улӥсь семьяос пӧлысь куд-огез выль юртэ потыны быгатозы шуыса ӧз ик оскылэ. Со понна угось корказэс аварийноен лыдъяно вал. Экспертиза лэсьтыны уксё люкано луиз: котькуд коркалэсь 3 сюрс манет котыр.

— Кин-о тӥледлы 3 сюрс манетэн квартира сётоз — нокин. Тазьы оскытэк вераллязы гуртоос. Мукет баракъёсысь адямиос но шуо вал, юнме бызьылӥськоды, юнме уксё кисьтӥськоды — номыр уд басьтэ. Эдуард Шиляев калыкез буйгатыны но сьӧраз валтыны быгатӥз. Со валлин корка басьтыны быгатӥмы, со угось судын но вераськыны быгатӥз, ми кыл но ӧй шедьтысалмы ай, куалекъяны кутскыса, — шуэ Лидия Филипповна.

Озьы 2012-тӥ арын квартира аварийной лыдъямын, сое куашкатыны косэмын вал. Зэм, судъёсын вормем бере но гуртоослы мае но чидано ӧз луылы. Корказэс тачак эскерисьёс люкаськизы угось.

— Коркады улыны тупамон ай шуисез но сюрылӥз, — тодаз вае Лидия Малинина. — Буржуйка сылэ, ӧсты воштэмын, улондэ ул, шуылӥзы. Нош ӧм тупатэ ке, выламы куашкалоз ук. Изьыны выдон азьын асьмемыз асьмеос буйгатыны вырылӥмы: корка ноку уз пачкаты кузёзэ. Сыӵе калык веран вань.

Эдуард Шиляев верамъя, гуртоослы квартира висъяны вырон 7 ар кыстӥськиз. Иж город администрация судлэсь решенизэ 2 ар кылэм-адӟем ӧз карылы. Та понна штраф но тырылӥз. Судъя приставъёс Иж город администрацилэн йырызлы предупреждение но сётъязы, уголовной кыл кутон улэ кыскыны быгатозы шуыса. Администрациысь муниципальной юртъёсъя управлениен кивалтӥсь Н. Буторин ялан таӵе валэктон сётъялляз: 30 номеро юртын улӥсьёсты выль квартираосы выжтыны чакламын 2025-тӥ арозь. Пусйылӥз созэ но: аварийной коркаосысь адямиослы квартира висъянъя 2013-тӥ-2017-тӥ аръёслы чаклам программая черодын 78 корка.

Судлэн решениез мед быдэсмоз шуыса, Эдуард Шиляев Президентлы но, Удмуртилэн Тӧроезлы но вазиськылӥз. Калык жаль потӥз, бакаос, кузьылиос пӧлын нылпиоссы но будӥзы, соослэн нылпиоссы но будо ни вал ук, шуэ со.

Шудзылы али но уг оско

Кылем арын май толэзе Нина Егоровалы нырысьёсыз радын выль квартиралэсь усьтонзэ сётӥзы.

— Киям ключ вуэм бере но ӧй оскы. Туж кема утчамы Ижысь Петров ульчаысь 47а номеро юртэз. Пыримы но, синъёсмы палёмизы: югыт, чылкыт, шуныт. Та асьмелэн шуыса оскытэк, ӧсэз ӵогамы но баракамы бертӥмы.

Пумен мукетъёсызлы но усьтон сётъязы. Самой бер — октябре — сое басьтӥз Сергей Постовой.

— Али гань-гань улӥсь-комы, — шуэ баракысь выжем Татьяна Скворцова. — Бертӥськод но, ву но нуллоно ӧвӧл, коркаез эстон сярысь но сюлмаськоно ӧвӧл. Огез ласянь гинэ ке шат сюлэм шуг: азьвыл, азбаре потыса, эшъёсын адӟиськыны, музъемен ужаны луэ вал. Нош городысь квартираын коть кӧттэ урдылыса пук.

Люллиысь мукет баракъёсын улӥсьёс но, та шудоос шоры учкыса, Эдуард Шиляевлы вазиськизы ни. Эдуард Вячеславович пусъемъя, туннэ нуналлы эшшо 2 баракез аварийнойёс радэ пыртыны луиз. Шиляевлэн компаниез Люллиысь мукет баракъёсысь но адямиослы юрттон ласянь сюлмаське. Кин тодэ, татын, оло, матысь дыре выль чебересь юртъёс ӝужалозы. Тани 30 номеро барак бервылын школа пуктыны чаклало ни шуыса верасько.

Елена Сараматова

Туспуктэм басьтэмны геройёслэн архивысьтызы

Ангелина Снигирева
By Ангелина Снигирева Март 15, 2019 14:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<