Калык доры сюрес

Ангелина Снигирева
By Ангелина Снигирева 4 марта, 2019 12:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яр ёросын Флор Васильевлэсь нимзэ уг вунэто. Быдэс ар ӵоже татын ортчиз «Звени над Яром, песня Флора!» бадӟым литературной марафон. Солы йылпумъянъёс лэсьтӥзы 19-тӥ тулыспалэ, кылбурчилэн вордскем нуналаз, «Дорога к людям начинается от сердца» элькун фестивальын.

Флор Васильевлэн Сергей Васильев пиез яръёсын ӵош

Улонэз адӟытон

Фестивале трос калык люкаськиз, пӧлазы — Удмуртиысь писательёс, художникъёс, композиторъёс. Ӟеч кылъёсын куноосты пумитаз Яр ёрослэн йырыз Тамара Уткина.

Ужрад кутскиз Ф. Васильевлэн кинюртэменыз книгаосты, поэтлэсь туспуктэмъёссэ, куд-ог арбериоссэ адӟытонысен. Адӟытонэ вуэмъёс Ф. Васильевлэсь кылбуръёссэ лыдӟизы. Кылбурчиен 2 пол пумиськемез сярысь тодаз вайиз Людмила Яковлева.

— Ф. Васильев вуылӥз Ярысь педучилищее 1974-тӥ арын. Ёрос газетмы юнкоръёсыз понна со пумиськонэз радъяз, — вера Л. Яковлева. — Мон соку кылбурчилэн бордаз кыскись кужымезлы, шунытэзлы пайми. Ми ваньмы солэн кылбуръёсызлы синмаським, автографсэ курим. Книгаосы кинюртэмзэ пуктылыкуз, со милесьтым нимтулъёсмес юалляз. Мынам Нелюбина фамилие солы тунсыко потӥз, вылды, — йырзэ ӝутӥз но мыным пальпотӥз, ӟеч кылъёс книгае гожтӥз. 2-тӥзэ мон сое адӟи 1976-тӥ арын Ижкарын ортчем пумиськонын. Ф. Васильев мукет адями кадь потӥз мыным. Со малпанъёсаз выемын вал, сое ушъясь кылъёс кылбурчилы ӧз яралэ кадь. Мон сыӵе востэм муртэ улонам ӧй ни пумиталля.

Кылбурчилэн пиез Сергей Васильев возьматӥз архивъёсысь люкам материалъёсты. Соос Флор Васильевлэн егит дырыныз — Глазовысь педучилищеын но пединститутын дышетскем вакытэныз — тодмато.

Усьтоноез трос на

Фестивальлэн гала-концертаз ӟечкылазы кибашлыослэн, шара лыдӟисьёслэн, суредаськисьёслэн, композиторъёслэн но кырӟасьёслэн конкурсъёсазы вормисьёсты.

2014-тӥ арысен Ярын «Тюрагай» литературая премия сётӥське. Быдэ вуэмъёс пӧлын премиен пусйизы Ӟанкагуртысь Екатерина Болтачеваез.

Премиосын озьы ик пусйизы конкурсэ пыриськем кибашлыосты. Ярысь 2-тӥ школаын дышетскись Дарья Петухова трос аръёс ӵоже киужен выре, пӧртэм кружокъёсы пыриське. Ярысь Марина Данилова 25 ар киужен выре ини: туала шӧмо удмурт дэремъёс вуре, мунёос лэсья, ёросын куиськон но пужыятскон удысъёсты азинтэ.

Суредаськисьёслэн вожвылъяськоназы вормиз Эгралась искусствоосъя нылпи школаын дышетскись Алёна Корепанова.

Шара лыдӟисьёслэн конкурсазы вормизы Ярысь Антон Дюкин, Балезино ёросысь Ольга Першина, Глазов ёросысь Марина Суворова. Озьы ик нимысьтыз кузьымен пусъемын Глазов ёросысь Октябрьской черкогуртысь культурая юртысь драмкружоке ветлӥсь Екатерина Мышкина но Руслан Князев. Вормисьёсты ӟечкылаз кылбурчи, драматург, Удмуртиысь Писательёслэн союзэнызы кивалтӥсь Пётр Захаров. Со яръёслы тау кариз Флор Васильевлэсь нимзэ утемзы понна.

Ижкарысь ик вуиз кылбурчи, критик, литератураез эскерись Виктор Шибанов.

— Ф. Васильевлэн тодмо чуръёсыз сцена вылын ӵем чузъясько, — вераз ужрадын В. Шибанов, — но солэн туж трос мукет, сокем тодмо луисьтэм, кылбуръёсыз. Солэн кылбуретысьтыз трос выльзэ усьтыны луоз на. Шумпотымон, Ярын улон уртче шуыса, творчествоен пӧртэм арлыдо адямиос выро. Писательёсты татын котьку шуныт пумитало. Куазь сярысь верано ке, туннэ со зэм но флоровской — жобаське, зэмос кион сюан толэзь, кызьы февралез ниманы яратэ вал Ф. Васильев.

Крезьгуръя конкурсэ пыриськизы ёросысь коллективъёс. Соос возьматӥзы Ф. Васильевлэн кылбуретэзлы но Удмурт шаерлы сӥзем номеръёссэс. Премия сётэмын Укан гуртысь «Зареница» ансамбльлы.

Крезьгурчиослэн но кыр-ӟасьёслэн конкурсазы вормисьёсты жюри ӧз бырйы, вань пыриськисьёсты дипломъёсын но кузьымъёсын пусйизы. Удмуртиысь Композиторъёслэн союзэнызы кивалтӥсь Марина Ходырева верамъя, самодеятельной композиторъёслэсь кырӟанъёссэс дунъяны секыт. Соосты калык но дыр гинэ дунъяны быгато, кырӟан калыке вӧлме ке — со валтӥсь вормон, пусйиз М. Хо-
дырева.

Крезьгурчиосты но кырӟасьёсты ӟечкылаз Удмуртиысь Йӧскалык библиотекалэн директорез Татьяна Тенсина.

— Ф. Васильевлэн творчествоез ӟеч возьматэ, литературалэн кунгожъёсыз ӧвӧл шуыса, — малпанзэ усьтӥз Т. Тенсина. — 2016-тӥ арын Дагестанын ортчем «Многоцветье культуры русского мира» фестивальын мон Удмуртия сярысь верай, презентацилэн пумаз чузъяськизы Ф. Васильевлэн «Хватает Волге широты и сини…» тодмо чуръёсыз. Ачим но пайми, макем соос калыкез бугыртӥзы! Кыӵе матын соос вылэм котькуд адямилы, угось котькудӥз понна Россия вордскем гуртысеныз, аулысеныз, карысеныз кутске.

Любовь Куртеева

Туспуктэм басьтэмын «Сельская правда» газетлэн «ВКонтакте» бамысьтыз

Ангелина Снигирева
By Ангелина Снигирева 4 марта, 2019 12:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<