Калыкез югдыто, азьлане бурдъяло

Ангелина Снигирева
By Ангелина Снигирева Март 5, 2019 15:40

Калыкез югдыто, азьлане бурдъяло

Анай кыллэн нуналаз, 21-тӥ феврале, Ижын ортчизы 22-тӥ Герд лыдӟонъёс. Та сӥё-дано ужрад дыръя ик пусъемын вал ортчем ар понна К. Герд нимо премиен дунъям адямиос — Удмуртиысь калык суредась Семён Виноградов но Удмуртиысь гурт удысысь дано ужась Михаил Крестьянинов.

С. Виноградов

Суредаськыса гинэ улыны ӧз чида

Семён Николаевич Виноградов вордӥськемын Алнаш ёросысь Шайтангуртын. Йылпумъямын Можга педучилищеез, Казаньысь художественной училищеез, Москваысь В. И. Суриков нимо художественной институтэз. Кӧня ке ар ӵоже ужаз Россиысь Художественной фондлэн удмурт ёзаз. Мылкыдзэ суред пыр возьматэм сяна, наукаен вырыны кутскиз. УАССР-ысь Министръёслэн Советсы бордын ужась Научно-исследовательской институтын наукая сотрудник луыса тыршиз. Со дыре ик Семён Николаевич Удмурт кун университетын ужаны кутскиз, живописья кафедра кылдытӥз, 1992-тӥ арысен та кафедраен кивалтӥз.

Будӥз профессорозь. Тужгес тодмо суредъёсыз утисько Удмурт Республикаысь Изобразительной искусствоосъя музейын. «Гудыри» картиназэ Россиысь Культурая министерство басьтӥз. Семён Николаевичлэн трос суредъёсыз Россилэн палэназ кошкемын, отын нимаз адямиослэн, огазеяськонъёслэн коллекциосазы утисько: Венгриын, Франциын, Китайын, Америкаын, Саудовской Аравиын но трос мукет кунъёсын.

Аслаз ужъёсыз пыр со туж ӟеч возьматэ удмурт калыклэсь сям-йылолъёссэ, тунсыко солэн удмурт литератураысь классикъёслы сӥзем сериез, тужгес тодмо луэмын ӟуч азьветлӥсьёслэн, культура удысын ужасьёслэн удмурт калыкен кусыпъёссылы сӥзем сериез. Трос ужъёсыз пыремын учебникъёсы, Удмурт Элькунлэн энциклопедияз, удмурт калыклэн сям-йылолъёсыныз, шаертодонэн герӟаськем книгаосы.

1980-тӥ арын Семён Виноградовлы сётэмын УАССР-ысь дано суредась ним. Одӥгез бадӟым адӟытонэз радъяськиз 1985-тӥ арын Изобразительной искусствоосъя музейын, огдыре ик отын суредасьлэн 300 ужъёсыз возьматэмын вал.

Семён Виноградов трос тыршиз но тырше этнография бордын, калыклэсь вӧсяськон сямъёссэ, вашкала пужыоссэ, пусъёссэ чыры-пырыен люка, калыклы матын солэн «Удмурт вӧсь» книгаез. Аслаз наукаын но культура удысын ужъёсыныз со удмурт калыкезлы аспӧртэм синпелет пуктӥз. Вордӥськем Алнаш ёросысьтыз Азамат школалы солэн нимыз сётэмын.

— Удмурт калыклэн культураез котьку но сюлэмам улӥз, — шуэ ачиз Семён Николаевич. — Казаньын но Москваын дышетскыкум ай, малпаськылӥ: мукет калыкъёс асьсэ культуразылэсь уг возьдасько, ваньмызлы адӟымон возьмато доразы но, Москваын но, нош удмурт культура ватскыса кадь улэ. Туж потэ вал удмурт калыкез калык радозь ӝутэм, солэсь культуразэ ваньмызлы возьматэм. Озьы мон суредаськыса гинэ улыны ӧй чида ни. Адӟисько вал: вашкала удмурт дӥськут, киужъёс вуно, ваньзэ сое гожъяса, суредаса кельтэм потӥз, со сярысь статьяос гожъялляй, книга поттӥ. Али со материалъёсты куто вузъёсын но школаосын. Капчи ӧй вал ваньмаз вутскыны. Но ужам ужез адӟо ке, мылкыд бурдъяське. Озьы К. Герд нимо премиен пусъемзылы туж шумпотӥ.

Зэмос кузё

Михаил Арсентьевич Крестьянинов вордӥськемын Грак ёросысь Вуж Эгра гуртын, гурт удысъя академиез йылпумъямын. Вань улонзэ та адями сётӥз гурт хозяйстволы. Огшоры инженер бордысен кутскыса, будӥз «Родина» СПК-лэн кивалтӥсез дорозь, нош собере луиз Грак ёрослэн йырыз, Грак ёросысь Депутатъёслэн Кенешсылэн тӧроез. 1990-тӥ аръёсы со Удмуртиысь Вылӥ Кенешлэн депутатэз вал.

М. Крестьянинов

Михаил Арсентьевичлэн кивалтэмез улсын Грак ёросысь «Родина» хозяйство азинлыко но тодмо луиз Удмуртиын гинэ ӧвӧл — Россиын. Удмурт кивалтӥсь тыршиз гуртоослэсь но улон-вылонзэс ӝутыны. Озьы СПК-лэн коньдонэныз Вылӥ Эгра гуртын спортивной зал пуктэмын вал, Вуж Эгра, Мишкино гуртъёсын — ФАП-ёс, эшшо кӧня ке гуртын — нылпи садъёс, кылдӥз асфальт сюрес но трос мукетыз. Вакчи дыр куспын газ вуиз хозяйствое пырись вань 4 гуртъёсы. Шаерысьтымы тросэз гуртъёс бушало ке, «Родиналэн» бурд улаз улӥсь гуртъёс азинско гинэ, арлы быдэ 10-12 выль юртъёс пуктӥсько. Туннэ нуналлы та хозяйствоын выль корка пырон каризы ни 250 пала семьяос. Егитъёс палэнэ кошкыны уг дырто, асьсэ улонзэс вордӥськем гуртэнызы ик герӟало, асьсэ СПК-ын ужаны тыршо.

Михаил Крестьянинов — ас музъемзэ гажась, со понна вань сюлэмзэ сётыса ужась кузё. Но «Удмурт Кенеш» огазеяськонлэн К. Герд нимо премиеныз со та понна гинэ пусъемын ӧвӧл. Лыдэ басьтэмын Михаил Арсентьевичлэн общественной уже пыриськемез, та ласянь калыкез бурдъямез, ӝутэмез но.

  • Михаил Крестьяниновлы луыса ёросамы удмуртъёслэн асваланзы ӝутӥськиз. Удмурт кылэз ялан ӵемгес кылӥськомы предприятиосын, пӧртэм огазеяськонъёсын, гуртъёсын гинэ ӧвӧл, ёрос центрын, — шуэ «Удмурт Кенеш» огазеяськонлэн Грак ёросысь ёзэныз кивалтӥсь Александр Аблаев. — Михаил Арсентьевич котьку но юрттэ ёросысь «кенешчиослэсь» ужрадъёссэс ортчытыны. Гурт удысэз ӝутэменыз, солэн нимыз Удмуртиын, Россиын тодмо луиз, но зэмос кузё луэм сяна, со адӟе нимаз адямиосты но. Со ужаны быгатэ, анай кылзэ данъя, дунъя, та понна солэсь адӟем кароно. Вань ужез со лэсьтэ удмурт калыклэсь историзэ, кылзэ гажан пыр, югдытэ но азьлань валтэ.

Ачиз Михаил Арсентьевич паймемзэ уг ваты:

  • Чик чеберъяськытэк верасько, сыӵе бадӟым премиен пусъемзы туж шӧдтэк-шорысь луиз. Ас поннам валаны тырши: малы монэ пусйизы, сомында туж-туж дано удмуртъёсмы вань ук. Ёросамы трос пӧртэм калыкъёс уло, удмурт гуртъёс вӧзын бигер, крашин, пор гуртъёс. Но мон котьку тырши: асьме калык соос азьын ӟеч ласянь гинэ мед висъяськоз, йӧно, чебер мед адӟиськоз. СПК-ын ужаны кутски секыт аръёсы, калык юон пӧлы выемын вал, ӧз оскылы ӵуказе нуналлы, азинскыны мылкыдыз ӧй вал. Но аръёс ӵоже югдур воштӥськиз. Ачим но уг валаськы, кытысь со валан вуиз, но шӧдӥсько вал, адями, производствоен гинэ вырыса, ассэ шудоен уз шӧды. Соин ик тыршимы пӧртэм удмурт мероприятиос пыр но ӝутскыны, гуртъёсы школаос, клубъёс пуктыны. Тодӥськоды-а, азьвыл милям «Удмурт дунне» газетэз но басьтӥсь ӧй вал ук. Огаз кенешын та пумысен вераськи: тани, таӵе удмурт газет вань, сое асьмелы, удмуртъёслы, тодоно, лыдӟоно, улонлэсь бере кылёно ӧвӧл…
Ангелина Снигирева
By Ангелина Снигирева Март 5, 2019 15:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<