Ижкаръёсты ӧжытгес жагдӥськыны дышетозы

Ангелина Снигирева
By Ангелина Снигирева Март 20, 2019 16:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиысь жаг поттонъя «Спецавтохозяйство» улос оператор но Общественной палата жаген нюръяськон понна огъя проект малпазы — «Люкылон=шыръян». Со асьме адямиез жагез нимаз висъяны дышетоз.

И. Маринин выль проект сярысь вераз

Лыдъяськон
Та нуналъёсы выль проектэз улонэ пыӵатон сярысь кенешыны котырес ӝӧк пуксизы улос оператор, Лэсьтӥськонъя, ЖКХ-я но энергетикая министерство, управляющей компаниос, ТСЖ-осысь адямиос, Общественной палата, мыло-кыдо ижкаръёс но журналистъёс.
Туннэ Удмуртиын жагез поттон выль амалъя пыӵатӥське — квартираын, нимаз юртын прописать карем адямилы быдэ дун тупатэмын. Россиысь Правительстволэн 354 номеро постановлениея ужез мукет сямен но нуыны луэ: кӧня люкад — сомында тырод. Но таяз учыре жагез нимаз бичан радъямын луыны кулэ, вера Общественной палатаысь экологияя, ЖКХ-я но улосэз азинтонъя комиссилэн тӧроез, выль проектэз одӥгез радъясь Александр Евсеев.

— Но законын гожтэмын ӧвӧл, мар со сыӵе жагез нимаз люкылон, кызьы сое шонер радъяно, — шуэ А. Евсеев. — Соин экспериментэз улонэ пыӵатыса, законлэсь тырмымтэоссэ шараяны быгатомы. Выль системаез «Люкылон=шыръян» нимамы, озьы возьматэммы потэ, отходъёсты нимаз висъяса, шыръяны луонлыкъёс кылдо шуыса.
Жагез нимаз люкылыса, пайда поттыны луэ шуиз «Спецавтохозяйстволэн» кивалтӥсез Иван Маринин но:

— Кылем арысен Ижын жагез нимаз бичан понна 52 контейнеръёс пуктылэмын ни. 2018-тӥ арын сентябрь толэзьысен туэ март толэзёзь отысь 37 сюрс тонна жаг поттэмын. Но со пӧлысь 11 сюрс тоннаез гинэ выль вузъёс лэсьтыны яраз, кылемез полигонэ согиськиз. Угось контейнеръёсы калык вань жагез тырыны кутскем. Жагез нимаз карон сям пыӵаз ке, котыр инкуазьмы чылкытгес луоз — полигонъёсы ӧжытгес жаг согиськоз, со асьме экономикалы но пайдаен берыктӥськоз — отходъёсты выль вузъёс лэсьтонэ кутыны луэ ук.
Туэ улос оператор жагез нимаз бичан понна тросгес контейнеръёс пуктыны дась. Соос гуртъёсы но вуыны быгатозы. Та ужез нырысь ик радъяны луоз Ува ёрос котырын, угось татысь полигонын жагез нимаз люкылонъя станция ужа.
И. Маринин верамъя, туннэ юанъёс кылдо адямилы быдэ люкаськись жаглэн нормаез пумысен но, угось со бордысь потӥз тарифлэн быдӟалаез. Кылсярысь, чакламын, городын улӥсь толэзь ӵоже 17 килограмм жаг люка шуыса. Но одӥгез понна та лыдпус укыр ичи, мукетыз понна — трос. Лыдъяно ке, нормая одӥг адями нуналаз 500 граммлэсь кӧня ке тросгес жаг люка. Но, кылсярысь, жаге куштэм нылпи памперс гинэ 300 пала грамм кыске, нош шампанскойлэн ӟенеликез — ог 700 грамм. Улос оператор юри эскерыса потэм, адями кӧня жаг люка толэзь ӵоже. Озьы, кылсярысь, Ижысь Берш нимо выль ульчаосын улӥсьёс нормалэсь 2 поллы тросгес жаг люкаллям, со вакытэ ик Эгра, Якшур-Бӧдья ёросын улӥсьёс нормалэсь 2 поллы ичигес жагдӥськиллям. Соин валче выль проект жаген нюръяськон системаез ӟечгес радъяны юрттоз, пе.

Эксперимент сярысь кылзыны трос калык люкаськиз

Кин пыриське?
Экспериментэ пыриськозы Ижысь трос квартираем 10 юртъёс. Кыӵеосыз, али тодмо ӧвӧл на. Экспериментэ пыриськон понна коркаос азе нимысьтыз куронъёс пуктэмын: контейнерной площадка ворсаськись яке нимаз луыны кулэ, экспериментэ пырисьтэм юртъёсын улӥсьёс отчы жагзэс куяны медаз быгатэ шуыса. Озьы ик быръемын луыны кулэ отход поттонэз нуналлы быдэ чаклась мурт. Та сяна, жаг куян интые видеокамера пуктэмын медло, лыдъяса потоно, кӧня улӥсьёс коркан, угось жагез поттэм понна дун адямилы быдэ лыдъямын луоз.
Но та ласянь соку ик юан кылдӥз:

Коркан улӥсьёслэн лыдӟы ӵемысь вошъяське: кин ке гужемзэ сад-бакчаяз улэ, мукетыз кемалы командировкае кошке, студентъёс палэнэ дышетскыны пыро.
Та ласянь общественникъёс но экспериментэз радъясьёс огкылэ вуизы: кварталлы одӥг пол квартираостӥ ортчозы — кӧня мурт улэ, лыдъялозы.
Ужрадэз ортчытӥсьёс али вераны уг тодо на, кӧня тыр усёз таӵе амалъя жаген нюръяськон. Но валэкто, кызьы шыръяны луонлык кылдоз. Кылсярысь, улос оператор кылем-мылем сиён-юонэн контейнеръёсты нуналлы быдэ бушатъялоз, нош мукет жаген (кылсярысь, пластикен) контейнеръёсты шӧдскымон шергес — тырмемзы бере гинэ. Нош улос операторлэн ужамез понна дун тырон жаг нуллон машиналэн лыктэмез, отходъёсты полигонэ ваемез бордысь потэ. Собере, экспериментэз ортчытӥсьёс оско, нимаз контейнеръёсы олокыӵе но жаг уз сюры, сое ватсаса люкылыны кулэ уз лу ни шуыса. Угось со понна полигонлы эшшо нимаз дун тыроно на. Та сяна, адямиос ӧжытгес полиэтилен пакетъёсты, переработкалы ярасьтэм вузъёсты басьяны ӧдъялозы, озьы музъеме ӧжытгес кырсь согиськоз, пе.
Экспериментэ пыриськись адямиослэн азбаръёсазы бумагалы, пластиклы, пияла-кортлы 3 контейнеръёс пуктӥськозы, эшшо 4 мукетъёсаз огъя жаг тырыны луоз. Кызьы эксперимент радъяськоз, рос прос валамон ӧвӧл на ке но, таӵе эскеронэн тунсыкъяськисьёс вань ни. Тани Удмуртской урамысь 267 номеро юртысь мыло-кыдо кышномурт Гульнара Варакина верамъя, улӥсьёссы таӵе проектэ пыриськыны дась, угось озьы шыръяны но луоз, инкуазь но ӧжытгес сӧриськоз. Озьы ик выль амал тунсыко потӥз Дэри ёросысь Постол черкогуртысь кышноослы Галина Фёдоровалы но Светлана Камашевалы.
Эскеронэ пыриськон сярысь мылкыдэз вераны луоз https://goo.gl/forms/NiBMKznGano8LY1t1 адресъя. Куронъёсын но проектэн пыр-почгес тодматскыны луоз Общественной палаталэн но улос операторлэн сайтъёссы пыр.

Ангелина Снигирёва

Фото басьтэмын улос операторлэн «ВКонтакте» вотэсбамысьтыз

Ангелина Снигирева
By Ангелина Снигирева Март 20, 2019 16:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<