Гуртсэс возё дэмен

Ангелина Снигирева
By Ангелина Снигирева Март 11, 2019 14:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кияса ёросысь Первомайское гурт поселение районын огез бадӟымез луэ. Соин но, лэся, татын шумпотонъёссы но, сюлмаськонъёссы но котькинлэсь тросгес. Соосын тодматскыны вуылӥз Удмуртилэн Тӧроез А. Бречалов.

Гуртын таза улон сярысь сюлмасько

Дӥсь вуро

Гурт поселение 5 гурт пыре, татын 820 улӥсез. Та пӧлысь ог 300-эз уже интыяськемын. Ог 5 ар талэсь азьло гуртазы ужан интыос тросгес вал. Татысь хозяйство угось парсь но вордылӥз, тросгес бусыосты но кизьылӥз. Но отӥяз шуг-секытъёс кылдӥзы. Парсь гидзэс воксё быдтӥзы. Ужасьёсты кулэстӥзы. Зэм, тулыс, бусыосты гырыны-утялтыны шуыса, ог 30 муртэ уже куто. Но сӥзьыл вань бусы ужъёс бырем бере сомында адями нош ик ужтэк кыле. Гурт поселениен кивалтӥсь Ирина Косолапова верамъя, кулэстэмъёс пӧлысь кин ке уже интыянъя центре учётэ султэ, кин ке дораз пуке, кин ке вахта амалэн ужаны ёрослэн палэназ кутске.

Соин ик ар талэсь азьло школалэсь пристройзэ вуриськон цехлы сётон пумысен вераськонъёс ӝутӥськем бере калык бурдъяськиз. Озьы «Сактон» огазеяськон юрттоно кариськиз. Табере цехын 12 нылкышноос ужало. Шоро-куспо уждунзы 15 сюрс манет. Вуриськон машина сьӧрын кемагес ужамъёслэн кизы умойгес мынэ бере, дӥсь но ӝоггес пӧрмыто, соин ик уждунзы 20 сюрс манетлэсь ортче. Талы нылкышноос туж шумпото. Кытысь гуртамы уж но таӵе уждун шедьтысалмы ай, шуо. Эшшо ке нылпиоссылы лагерьёсы кулэстэм дунын путёвкаос, юбилейёслы премиос люкыло.

Нялтас вераса, ёросын берло дыре эшшо 3 гуртъёсын вуриськон цехъёс усьтӥськизы. Кияса черкогуртын, Калашурын, Нӧднюкпочинкаын ужан интыос кылдытэмын. Оглом 60 нылкышноос семьязэс сюдӥсьёс луэмын. Азьланяз медо на Подгорной гуртын сыӵе ик цех усьтыны, али юрт но ужасьёс утчало. 2018-тӥ арын вань цехъёс 5,06 миллион манет тыр барыш поттыны быгатӥзы.

Гуртын вуриськон цехъёс усьтӥськизы

Ирина Косолапова гурт поселенизэ вырӟытон, калыклэсь мылкыдзэ бурдъян понна ачиз но трос тырше. 2 ар талэсь азьло кивалтыны кутскиз, со дырысен гуртъёсын спортэн но эшъяськыны ӧдъязы, калык ачиз но гуртлэсь улон-вылонзэ умоятон борды басьтӥськиз. Кылсярысь, 2017-тӥ арын, аналтэм бусыосты вузаса, 100 сюрс манет тыр басьтэмын теннисэн шудонъя 2 ӝӧк, 5 пар куас, дартс, шашки, шахмат, штанга. Гуртъёсты азинтон программая грант утӥзы. Первомайское черкогуртэ соин валче басьтэмын карусель, ӟечыран, лэсьтэмын тренажёръёсын 2 площадка. Талы нылпиос но егитъёс туж шумпотэмын. Школаын 95 дышетскисез. Табере мугорзэс кыдатыны луонлыкъёс паськытазы.

Спортэн эшъясько

Первомайское гуртын зол азинске скандинав амалэн ветлон. Котькуд 3-тӥез гуртысь пенсионер кияз боды кутэ но инкуазетӥ поръя. Соосты котыраз бинялтыны быгатӥз гурт поселениысь ветеранъёслэн огазеяськонэнызы кивалтӥсь Любовь Глухова. Пӧлазы 84 аресъемез но вань. Куд-огез огшоры ваез кутэ но азьлань вамыштэ.

— Милемыз ветлыны нокин ӧз дышеты, — шуэ Любовь Глухова. — ГТО-лэсь нормаоссэ сётыны Иже вуылӥ. Отын специалистъёс возьматӥзы ик, кызьы бодыез кие кутоно. Ми но озьы ик ветлӥськомы кадь. Соин ик эшъёсмес но нимысьтыз ӧй дышеты. 2 час котырын люкаськиськом но пужым посадкае дыртӥськом.

Пужым пӧлтӥ арлыдоос нимысьтыз сюрес но лёгизы ни. Любовь Глухова вань гуртоосты ӝутъяны быгатӥз: посадкалэн паськыт просекаяз кузянак будӥсь бадярез ваньзы дэмен коразы, мотоблокъёсын поттазы. Пиосъёс ӟус лэсьтӥзы. Туэ сюрессы кузя палэзьпу мерттыны малпало.

— Учкисько но, бодыен вамыштыны каньылгес кадь. 78 арес ни ук. Пиос пӧламы ичигес ик. Но коркан пукем уг поты. Мон ачим волейболист, ас вакытаз Удмуртилэн сборнояз но пырылӥ. Ыбылӥськи, куасэн бызьылӥ. Табере скандинав амалэн ветлонэз эскерисько, — шуэ Анатолий Бараневских.

Воргорон ёросысьтызы школаын дышетскисьёс но ветеранъёс понна волейболэн ӵошатсконъёс но радъялля. Приз басьтыны аслэсьтыз пенсизэ висъя. Гуртоосын пумиськон дыръя Удмуртилэн Тӧроез Александр Бречалов Анатолий Бараневскихлэсь та мылкыдъёссэ умоен лыдъяз, призъёс сярысь сюлмаськомы, шуиз.

Азьланяз шаерамы чаклало скандинав амалэн ветлӥсьёслы тросгес юрттэт сётыны. Та спорт угось калыкез огазея. Котыраз тросгес кыстӥсько арлыдоос, озьыен, улон даурзэс кузёмыто. Зэм, котькуд ёросын туннэ активистъёс ӧвӧл на. Тросгес группаос луизы ке, бодыос но басьтомы, дышетон но ортчытомы, шуиз Александр Бречалов.

— ФАП-мес но тупатъяно вал. Отчы пырыны йӧныз ӧвӧл, — шуизы гуртоос.

Первомайское гуртысь фельдшер-акушер пунктсылы 35 ар ни. Та дыр ӵоже со огпол но рос-прос тупатъямтэ.

— Пуктэмзы дырысен татын ужасько, — шуэ ФАП-ен кивалтӥсь, фельдшер Татьяна Каргашина. — 670 муртэ учкиськомы. Первомайскоеысь сяна, Аксарино но Шихостанка гуртъёсысь калыкез чакласькомы. Аслым 57 арес ни. Пенсие потон вакыт вуэмын. Егит муртэ татчы ӧтёно ке, улон инты кулэ. ФАП-мы бадӟым. Солэсь ӝынызэ улон квартиралы висъяны, газ пыртыны луысал ке, специалистэз но ӧтьыны луысал. Калыкез фельдшертэк уд кельты ук.

ФАП-лэсь вӧлдэтсэ, вия шуыса, интыен-интыен кышъязы. Но кышъямзы сыӵегес ортчиз, лэся: отысь шунам ву али ке но тёп-тёп вия. Эшшо ке электропроводка вадьсытӥ ик. Туэ та ФАП-ез тупатъяны, квартиралы висъет лэсьтыны коньдон висъямын ни. Александр Бречалов верамъя, уксё татчы уногес кулэ луоз. Липет тазьы ик вияз ке, со гуртоослы но кышкытлык кылдытоз, тупатъямлэн толыкез но уз луы. Александр Бречалов ФАП-лы сётӥз электрокардиограф басьтыны сертификат.

Елена САРАМАТОВА

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Март 11, 2019 14:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<