Бусы шулдыр гырисен

Ангелина Снигирева
By Ангелина Снигирева Март 21, 2019 14:07

16-тӥ мартэ Вотка ёросысь Бадӟым Кивар гуртын ортчиз тракторен калыккуспо биатлон. Со огазеяз 30 трактористъёсты но ог 5 сюрс учкисьёсты.

О. Абрамова

Воргоронъёс пӧлын 3 нылкышно

Гуртэ выль омыр шокчон, семьяен шутэтскон, трактористлэсь данзэ ӝутон вылысь радъяськиз биатлон.

— Механизатор луэменызы данъяськисьёс асьмелы туж кулэ, — шуэ гурт удысъя но сиён-юонъя министр О. Абрамова. — Ужзэс яратӥсьёслэн техниказы но котьку тупатэмын луэ. Тани Вавож ёрос туннэ ик кизьыны потыны дась. Отысь устоосыз механизаторъёс Россиын гыронъя чемпионатъёсын но вормыло. Утялтоно муосмы трос — умой но оскымон ужасьёс кулэ.

Зэмен ик, биатлонэ трос егит механизаторъёс кыстӥськизы. Татчы кин ке аслаз техникаеныз вуиз, кыдёкысь ёросъёсысь механизаторъёс, воткинскъёслэсь тракторзэс арендае кутыса, вожвылъяськизы. Нош Белоруссиысь Минскысь трактор поттонъя заводысь воксё но ӵыж-выль 4 «Беларус» вайизы. Соосты «кыткизы» Белоруссиысь тракторен ӵошатсконъёсын чемпионъёс луэм воргоронъёс — Денис Артюх но Павел Сайко. Мастер-класс возьматом ай, шуо вал. Соос палан угось тракторен олокыӵе но вожвылъяськонъёс арлы быдэ ортчыло. Но выль тракторзы но, опытсы но асьме гуртоосты вормыны ӧз юрттэ. Белоруссиысь заводысь тракторъёсты эскерись-испытатель Елена Орлова гинэ нылкышноос пӧлын вормиз. Кезьыт омыр ик шуназ, пыд улысь йӧ ик вырӟиз — сокем мылкыд сётӥз биатлон.

6 минут но 54 секунд

Заводын али гинэ ӵыжатэмъёсыз тракторъёс шунды шорын чильк-вальк ворекъяло. Бусыосты олокӧня ар гыремъёсыз вӧзазы ик сыло. Палэнысен шоразы учкыло ас киын бичам пичиесь тракторъёс. Нырысь-валысь вераськизы угось, самодельнойёссэ но ӵошатсконэ потыны лэзёзы шуыса. Соин ик Вотка, Шаркан ёросъёсысь кибашлыос биатлонэ «юлтошъёссэс» вуттӥзы.

Биатлон азьын

— Ми но вожвылъяськыны пӧрмытысалмы, тракторе часкын 46 иськеме вуэ, — шуиз Шаркан ёросысь Тюар гуртысь конструктор Иван Трефилов, полной приводэн «Дангыр» тракторез шоры возьматыса.

Но ӵошатскизы МТЗ-82 тракторъёс гинэ. Та биатлонэз радъяз Бадӟым Киварысь фермер Павел Кузнецов. Солэн мылкыдыз вал эшшо кужмогес техникаез бусые поттыны. Но Т-25 тракторен нюръяськыны дась луисьёс трос ӧз шеде.

Тани тракторъёс гурето — думем чуньыос озьы гырдалляло. Нош судьяос ялан правилоосты валэкто на. Дистанциез вольыт но ӝог ортчем сяна, «гараже», нокытчы мырӟиськытэк, пыроно, «змейка» пыр потоно, 5 мишене винтовкаысь 8 патронэн йӧттоно, ӧд быгаты ке, штрафной круг ортчоно.

Ӵошатсконэз усьтыса, МТЗ сьӧры нырысь ик пуксизы гурт удысъя но сиён-юонъя министр Ольга Абрамова но Вотка ёрослэн йырыз Илья Прозоров. Ольга Викторовналэн тракторлы правоез 2011-тӥ арын басьтэмын ке но, секыт техника сьӧры ӵем пуксьылыны уг кылды. Илья Прозоров тракторен рос-прос ужалляз: ог 2 ар талэсь азьло Бадӟым Кивар гуртын фермер вал. Кызьы ай кышномуртлы келялод кадь. Но старт ялӥзы но, Илья Петрович огдырлы интыяз кугӟаз, скоростьсэ лэзьыны соку ик ӧз вормы. Со куспын Ольга Викторовна интыысьтыз шуак ишкалскиз. Тракторез сюрес вылын солань-талань сэзъяське: котыр йӧвалег.

На старт! Внимание! Марш!

— Валэн ворттылэм кадь, ӧжыт гинэ янгыш лэсьтӥд — техникаед тонэ сэрпалтоз, ачиз но кымалскоз, — кабинаысь потыса, шок-пуль вазиз Ольга Викторовна.

Погылянъёс ӧжыт ке но лэземын луысалзы ке, трассаез ортчыны ваньзылы трослы каньылгес луысал. Но ӵапак та ик экстрим мылкыд но пыӵатӥз. Зэм, сыӵе экстрим бере киос дыр-р-р куалекъяло. Винтовка уг кылзӥськы. Эшшо ке шонер ыбылӥськыны тӧл люкетэ, винтовкалэсь «нырзэ» сэзъя. Котьма ке но министр ёрос йырлэсь чальгес дистанциез ортчиз.

— Сопернике кужмо вылэм — сьӧраз вуттӥськеме ӧз луы, — вазиз Илья Прозоров. — Но мылкыды вылтӥз уртче.

Зэм, куд-огезлэн куалекъяны тодаз ик ӧз лыктылы кадь. Белоруссиысь «МТЗ» заводысь техникаез эскерись Елена Орлова соку ик шуиз: мон асьме трактормылы юн оскисько, ачим сое котьку котыр ласянь эскерисько ук. Е. Орловалэн ужан стажез 30 ар ни. Зэм, таӵе ӵошатсконъёсы со нырысьсэ пыриське. Но уг кышкаськы, пе, милям Белоруссиын трассаосмы трослы секытэсь. Соин ик, кабинае пуксьыса, Вотка ёросысь Гавриловка гуртысь Марина Паньковаен ӵошатскыны со чик сюлмаськытэк кадь потӥз. Оло, гань-гань кариськемез ик юрттӥз, лэся, Марина Паньковаез капчиен азьпалтыны. Марина Ивановна трактор сьӧрысь васькемез бере лулӟыса ик шуиз: йӧвалеген йырин тракторме «змейкаетӥ» олокытчы кыскиз. Озьы зарни медаль Белоруссие кошкиз. Марина Панькова нылкышноос пӧлын 2-тӥ луиз, нош Ольга Абрамова — 3-тӥ. Ваньзэсты кузьымъёсын пусйизы.

Ожмаськон кадь

Эшшо задоргес вожвылъяськон пуромиз пиосъёс куспын. Нылкышноос трассаез колёсаосын паньырӟытъязы бере, пыд улысь йӧ шунамын ни вал. Озьыен, дэриез пазяса ик, стартэ потылӥзы, тракторъёссы сокем ӧз сэзъяське ни. Но гурезь бамал пасьталае губи мында кисьтӥськем учкисьёслэн сюлэмъёссы дырын-дырын путӥськылӥзы. Ӝог ортчись тракторъёс тани-тани ваче шуккиськозы кадь. МТЗ-зэс оло дугдытыса вутто, оло уг — кабинаысь тэтчо но киязы винтовка куто. Кытӥ-мар ыбылӥсько — выльысь азьлань. Тусъёссы ожмаськонэ мынӥсьёслэн кадь.

— Туэ ке но вормоно вал, — стартэ потон азяз, вӧсяськем кадь сипыртэ Бадӟым Кивар гуртысь тракторист Алексей Широбоков.

— Малы туэ ке но шуиськоды? — выжыятӥсько.

Ыбылӥськон

— Кылем арын тракторен биатлон гурт праздник кадь гинэ ортчиз. Мон но отчы пыриськоно кариськи. 20 кузя нюръяськимы. 4-тӥ интые кылиськиз. Соин ик вордэм музъеме туннэ вормыны мед юрттоз вал. Аслэсьтым тракторме гаражысь поттӥ. Вӧйёссэ вошъяй. Кабинаысь вань кулэтэм арбериосты поттай — тракторме капчиятыны выри. Белорусъёслы келяме воксё но уг поты.

Алексей Широбоковлэн сюлмаськемез юнме ӧз луы — таяз радэ со 3-тӥ интые потӥз. Вуоно арын эшшо но умойгес тыршо, шуиз. 20 литр вӧй кузьмазы, со толбыт дасяськыны тырмоз, пе. 2-тӥ интыез басьтӥз Шаркан ёросысь Ляльшур гуртысь Владислав Нарин, солы, 20 литр вӧй сяна, автозапчасть басьтыны сертификат сётӥзы. Нош 1-тӥ луиз но телевизор утӥз Удмуртиысь Гостехнадзоръя инспекциысь валтӥсь инспектор Алексей Марков. Одӥг но янгыштэк ог 300 метрез со 6 минут но 54 секунд куспын ортчиз. Ӵошатон вылысь: куд-огез 12 минутэ но ӧз тэрылы.

— Ӧй вормысал ке, калык азьын возьыт луысал, — шуиз 32 аресъем Алексей Марков. — Мон дышетскисьёслэсь правилоосты тодэмзэс, ворттылыны быгатэмзэс эскерисько ук, экзамензэс кутӥсько.

Таӵе вожвылъяськонъёс бере, кин тодэ, гуртысь будӥсь пиос но, оло, ӵемгес учкылыны ӧдъялозы гараж шоры, уногес будозы механизаторъёс. Туннэ тани егит механизаторъёслы гуртэ ужаны кутскемзы бере 50 сюрс манет подъёмной сёто. Та лыдпусэз азьланяз будэтыны медо.

Нош Бадӟым Киварын, биатлон сяна, учкисьёс понна пӧртэм ужрадъёс радъямын вал. Мылкыд карисез УАЗ машина сьӧры пуксьылӥз, тест-драйв ортчытӥз, винтовкаысь ыбылӥськиз, гурезь бамалъёсысь нискылаз. Нылпиос но семьяос понна пӧртэм площадкаос ужазы, концерт возьматӥзы Удмуртиысь но Белоруссиысь коллективъёс. Белоруссиысь «МТЗ» заводлэн директорезлэн воштӥсез Андрей Сусленков пусйиз: табере Бадӟым Кивар гуртэз быдэс Россия тодэ. Азьланяз но валче ужаны соглаш луэмзэ вераз. Таӵе вожвылъяськонъёс гуртъёсты утьыны но хозяйствоосты азинтыны юртто, шуиз со. 

Елена Сараматова

Туспуктӥз М. Егоров

Ангелина Снигирева
By Ангелина Снигирева Март 21, 2019 14:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<