Буйганы сётӥсьтэм мылкыд

Ангелина Снигирева
By Ангелина Снигирева Март 27, 2019 15:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

27-тӥ мартэ 70 арессэ пусйиз Валентина Ившина — педагогика наукаосъя кандидат, Россиысь дышетон удысысь отличник, Удмурт Республикаысь дышетон удысысь дано ужась, Кузебай Герд нимо премилэн лауреатэз, Ижысь Октябрь ёрослэн дано гражданинэз.

В. Ившина

Мӧзмон
1968-тӥ ар. Сарапулысь педучилищеез йылпумъясьёс ӟуч кылъя экзамен сёто. Людмила Александровна Сутягина дышетӥсь вадьсы ӝӧк сьӧры пуксиз тоӵколё мугоро Валя Серебрякова. Кузь суд йырси пунэтэз пельпум вылтӥз ваське, курень синъёсыз сак учко.
Билетысь юанъёслы нылмурт рос-прос валэктон сётӥз, темазэ усьтӥз, примеръёс вераз, удмурт синтаксисысь предложениосын но ӵошатӥз. Студенткаез кылзонъяз дышетӥсьлэн синъёсыз паськытгес но паськытгес усьтӥсько.

— Тӥ удмурт кылэз но таӵе ик ӟеч тодӥськоды-а? — юа Валялэсь.

— Конечно, ма акцентме уд шӧдӥське шат? — пумитаз юанэн ик вазе нылмурт.

— Тӥледлы дышетскондэс одно ик азьланьтоно, мон ӵектӥсько удмурт кылдылы но тазьы ик саклык висъяны, — вераз дышетӥсь.
Э, тодысал ке, Людмила Александровна, кыӵе шугъяськыса дышетскиз Дэри ёросысь Шабердӥ гуртысь Валя Серебрякова нырысетӥ курсъёсын. Ӟучъёс пӧлын со ассэ вуэ куштэм кучапи кадь шӧдылӥз. Лыдӟиськемез но трос, верано малпанъёсыз но йыраз бергало, нош кылыз сьӧлтаське. 3-тӥ курсын дышетскыкуз гинэ Валя тодӥз, Можгалан но педучилище вань шуыса, отын ӵапак удмурт группаос люкало вылэм. Но берло мар карод на. Тыршись нылмуртлэн ӟучъёс пӧлын ик кылыз но воляз, дӥсьтонэз но кыдаз, троссэ эшъёссэ дышетсконын азьпалтыны но быгатӥз.
Педучилищеысь устооссэ дышетскисьёсты кутӥзы Удмурт пединститутысь филология факультетысь ӟуч отделение. Дышетсконо, пе, заочно, уго педучилище бере одно 2 арзэ школаын ужано на. Валентинаез келязы Сюмси ёросысь Берёзовка ӟуч гуртэ. Татын дышетӥсьёслэн коллективазы удмуртъёс но, ӟучъёс но вал, озьы ке но Валентиналэн сюлэмыз нокызьы ӧз буйга. Гужем каникулъёс вакытэ гинэ эркын шокче — Шабердӥяз бертыса, со агитбригадае пыриськылэ, пиос баян куто, нош Валя гитараен шудэ, эшшо пиналъёсын производственной бригадаын ужа.
Егит дышетӥсь школаын ужанзэ йылпумъяз но, выльысь экзаменъёс сётыса, филология факультетлэн удмурт отделенияз пыриз. Со аре одӥг интые 5 мурт куриськиз. Валентина быгатысал, дыр, ӟуч отделениысь удмуртаз воштӥськыны гинэ, нош солэн тодаз но ӧз лыктылы.
Удмурт кылэз дышетонын вис карем студентлы нош ик сюлмаськон сюриз. Диктант гожто но, Валентиналэн правилоос вунэмын ни, тетрадез горд-горд пиштэ — янгышъёсыз тырмыт. Сыӵе дыръя Валя сокем возьдаськылӥз Рудольф Фёдорович Березин дышетӥсезлэсь. Со понна Серебрякова сямен нокин ӧз дӥсьтылы гожъяськон правилоос пумысен споръяськыны, юанъёс сётъяны.

Будон
Университетэз йылпумъясь Валентинаез Дышетӥсьёслэсь тодон-валанзэс будэтонъя институтлэн кивалтӥсез Р. Березин ӧтиз ужаны. Татын егит специалист 7 ар пала ужаз учебникъёс, дышетон пособиос, программаос дасян бордын. Отӥяз улон сюрес вуттӥз УдНИИ-ысь удмурт кыллы, литературалы дышетон методикая секторе. Та институтлэн директорез К. Куликов, дышетонъя министрен И. П. Тукаевен вераськыса, ӵектӥз мыныны Москваысь аспирантурае.
Валентина Михайловналэн соку семьяез, 6 аресъем Алёша пиез вал ни. Кызьы шуак ишкалскод но кошкод кадь? Но кузпалыз Вениамин Ившин нокыӵе могӟетъёс ӧз пукты, бурдъяз:

— Мын, Валентина, ми кызьы ке озьы быгатомы улыны, ӵыжы-выжыосмы но юрттозы висказ.
Нылкышно паймиз: маке укыр вольыт радъяське ваньмыз. Зэм, берло тодӥз, министр Иван Тукаев азьвыл ик ӧтьылэм Ившин кузпалзэ кенешыны.
Валамон, капчи ӧй вал со аръёс: кыклы люкиськыны вырон, пичияк вис шеде ке, Иже лобон яке семьядэ Москваын пумитан вакытъёс. Валентина Михайловналы шуд усиз дышетскыны педагогика наукаосъя доктор, профессор Глафира Николаевна Никольская дорын. 3 ар ортчыса, Валентина Ившина Ижевске берытскиз, педагогика наукаосъя кандидат луыса.
Нош азьланяз уката синмальдымон карьера но секыт ныпъет — 1989-тӥ арын аспирантураысь вуэм специалистлы ӵектӥзы дышетонъя министрлэн воштӥсез луыны, оскизы национальной ужпумъёсты. Нырысь Валентина Михайловна пумитъяськыны выриз: уг пӧрмыты, пе. Нош министр Антонина Лисина кулэ кылъёс но шедьтӥз, оскон но пыӵатӥз, удмурт кылын вазиськыса, возьытэ но уськытӥз:

— Тон ке ӧд мыны, мукетыз ке пумит луиз, кин удмурт школаосты ӝутоз?
1990-тӥ аръёслэн кутсконазы вал удмурт кыллы дышетон методика но, программаос но, пособиос но. Учебникъёсын но шугъяськонъёс ӧз кылдылэ. Нош быдэс Удмуртиын анай кылзэс дышетыны мылкыд каризы 300 пала школаын гинэ.
Со али гинэ вал кадь. Нош кӧня уж вырӟытэмын: кылдытэмын Дышетон удысын национальной ужпумъёсты эскеронъя институт, дышетӥсьёс понна потыны кутскиз «Вордскем кыл» журнал, городъёсысь школаосын удмурт классъёс усьтэмын, нылпи садъёсын — удмурт группаос. Удмурт кун университетын нимаз луиз удмурт филологияя факультет. Ижысь, Дэбесысь, Уваысь педучилищеосын усьтӥськизы удмурт кылъя отделениос. Тани шаерамы 40-лэсь ятыр профтехучилищеос вал, ваньмаз ик удмурт кылэз дышетӥзы, кытын урок карыны ӧз быгатэ — отын шаертодонъя занятиос мынӥзы. Туннэ лыдъясь-чотась но уз ни луы, кӧня иськемъёсты ортчиз Валентина Михайловна ачиз кадь ик удмурт кыл понна сюлмынызы висись эшъёсыныз: тодмо удмурт артистъёсын, журналистъёсын, тодосчиосын, «Удмурт Кенешысь» азьветлӥсьёсын ӵош. Кӧня кенешонъёс вал директоръёсын но дышетӥсьёсын, удмурт кыл школаын кулэ шуыса. Со ужамлэн емышез кисьмаз: 1998-тӥ арын удмурт кылэз предмет чотын дышетӥзы 425 школаын. Но туннэ, жаляса верано, та школаослэн лыдзы 200-озь усемын.
Дано адями

Аслэсьтым пукон вайме мон куддыръя ачим ик коралтӥсько, укыр шара луэменым. Кулэ, шуо, ымез ворсаны, малпандэ ватыны. Нош мынам озьы уг пӧрмы. Тушмонъёсы пайдаё ужан вакытам пыдзэс пуктӥзы. Юнме уг шуо вылэм: сюдэм пуныед астэ куртчоз. Мынам улонам но озьы ик тупаз, — вера Валентина Ившина.
2004-тӥ арысен Валентина Михайловна пенсие кошкиз. Соку шуак сомында дырыз кылдӥз. Малпаз: тазьы пенсия вуэ вылэм. Но арня гинэ шутэтскыса вуиз — УдГУ-лэн ректорез Виктор Журавлёв университетэ ужаны ӧтиз.
Со дыре ик нылкышно басьтӥськиз лэсьтӥськон борды. Шабердӥ гуртлэн дано адямиез шуыса, Ившиналы вордскем палъёсаз музъем сётӥзы вал. Зэм, кузпалзэ но пизэ Валентина Михайловна соку вырӟытыны ӧз быгаты. Но музъемез буш уд возьы ук. Озьы кышномурт кыштыр гинэ ужасьёсты утчаз, брус но мукет материал басьтытӥз. Фундамент кисьтэм бере мунчо пуксиз. Соку гинэ Валентина Михайловна воргоронъёссэ Шабердӥе ӧтиз но паймытӥз. Сад-бакчаен ӵошатыса, интыез но вӧл-вӧл, вӧзаз шур но бызе, ошмес но жильыртэ.
Кышномуртлэсь таӵе тыршемзэ адӟыса, воргоронъёсыз но уж борды басьтӥськизы, озьы мунчо вӧзы корка но ӝутскиз. Табере Валентина Михайловнаен Вениамин Никонорович татчы улыны выжизы ни. Эшшо Ившинъёслэн семьязы будӥз: Алексей пизы кышнояськиз но Настя внучкаен шумпоттӥз.

— Насьтокмылы 5 арес тырмоз ни. Со быдӟа шумпотон вылэм — нокыӵе мертэтъёсын, нокыӵе кылъёсын сое вераны уг луы, — пальпотэ Валентина Михайловна.
Буйганы сётӥсьтэм мылкыдыз сое нош но нош нуэ калык пӧлы. 2008-тӥ арын ӧтизы «Удмурт Кенешлэн» исполкомаз. 2012-тӥ арысен Валентина Ившина кивалтэ «Удмурт Кенеш» огазеяськонлэн Ижысь Октябрь ёросысь ёзэныз. Арлы быдэ дасяське Кузебай Гердлы сӥзем лыдӟонъёслы, шедьтэ выль тема, дася доклад, юрттӥське материалъёс радъяны. Озьы ик А. Оки но К. Герд нимо премиосты сётонъя комиссие пыре.
Валентина Ившина ӵем вуылэ школаосы но нылпи садъёсы. «Удмурт Кенеш» пыр кыстӥське школа улонэ, радъя татын удмуртлыкез азинтонъя «Лёгетъёс» проектсэ. Озьы дышетонэн герӟам улонэз азинске.

Елена Сквоцова

Туспуктӥз М. Егоров

Ангелина Снигирева
By Ангелина Снигирева Март 27, 2019 15:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<