Бигер шаерын — удмурт шӧмын

Ангелина Снигирева
By Ангелина Снигирева Март 7, 2019 15:58

Кылем арня пумын Казаньысь Эшъяськон юртын ортчиз Татарстанысь удмуртъёслэн национально-культурной автономизылэн йылпумъянъёсъя но быръёнъёсъя кенешез.

Котыр ласянь адӟем карымон

Ужрадэ пыриськизы Татарстанысь удмурт азьветлӥсьёс, Татарстанлэн Президентэз бордын ужась департаментысь нациосын ужан политикая управленилэн кивалтӥсез Данил Мустафин, Эшъяськон юртлэн директорез Ирек Шарипов, Татарстанысь калыкъёслэн ассамблеязылэн тӧроез Николай Владимиров но Удмуртиысь куноос: нациосын ужан политикая министр Лариса Буранова, Кун Кенешысь ялан ужась комиссилэн кивалтӥсез, «Удмурт Кенеш» огазеяськонлэн тӧроез Татьяна Ишматова.

Татарстанысь удмуртъёслэн автономизылы 15 ар ини. Солэн ёзъёсыз вань Агрыз, Бавлы, Балтаси, Кукмор, Сабы, Мамадыш, Менделеевск ёросъёсын, Казань, Набережные Челны, Нижнекамск, Елабуга городъёсын. Ваньмыз соос мыло-кыдо ужало удмуртлыкез утён но азинтон бордын, туж трос тунсыко, яркыт ужрадъёс ортчытъяло. Но «удмуртлык» валатон шоры паськытгес учкыны кулэ, дыр.

Та ласянь туж ӟеч вераз Д. Мустафин:

— Татарстанын улӥсь удмуртъёс котьку ӟеч ласянь гинэ висъясько. Котькыӵе удыс мед луоз со — культура-а, гурт удыс-а. Юри чакласа потӥ: азьветлӥсь хозяйствоосмылэн кивалтӥсьёссы — удмурт воргоронъёс. Удмуртъёс быгато ас куспазы но эшъяськыса-шулдыръяськыса улыны, мукетъёсыныз но тупаны. Татарстанын ортчылӥсь одӥг ужрадэ но пыриськытэк уг кылё, вань бигер ужрадъёсамы но асьсэды туж яркыт возьматыны быгато.

3 ар ӵоже автономия сюлэсь трос ужрад ортчытӥз! Соос спонсоръёс чотын но грант коньдонэн радъясько — 3 ар ӵоже уже кутэмын 3 миллион манет. Сое поттыны нимысьтыз быгатонлык кулэ.

Бурдо егитъёс

Нимысьтыз пусйыны кулэ егитъёслэсь огазеяськонзэс. Солэн ужаз мыло-кыдо пырисько бигер шаерын улӥсьёс но татчы дышетскыны лыктэмъёс. Кивалтэ соосын Казаньысь искусствоосъя институтысь студентка Аня Самсонова, ачиз со Кияса ёросысь Уддяди гуртысь. Но ассэ со мурт шаерын кадь чик но уг шӧды — удмурт егитъёс ӵем огазе люкаськыло, пӧртэм ужрадъёс ортчытъяло.

2016-тӥ арын Павел Александров кичӧлтэмъя усьтӥськиз «Бурдомурт» фольклор коллектив, со мыло-кыдо пыриське Татарстанын, Россиын, кунгож сьӧрын ортчылӥсь конкурсъёсы, котькудысьтыз сямен вормонъёсын берытске.

Удмурт егитъёс Татарстанын ортчылӥсь одӥг ужрадэз но уг кельто. Лулчеберет ужрадъёсы сяна, пырисько спортъя ӵошатсконъёсы, Атыкай музъемез гажан мылкыд пыӵатӥсь проектъёсы («Вунонтэм полк», Свияжск шормуӵысь археологияя музеез усьтон но трос мукет).

Берло аръёсы вормонъёс пӧлысь пусйыны кулэ студентъёслэн радиозы пыр удмурт программаос кылдытонэз — сое егитъёс быдэсак асьсэос дасяло но нуо.

Татарстанысь калыкъёслэн ассамблеязылэн бурд улаз кылдытӥзы арнянуналъёсы ужась школа — табере Казаньын улӥсь вань мыдкыд карисьёс удмурт кылэз дышетыны быгато. Озьы ӵош кенешыса пукыкузы ик, кылдӥз удмурт егитъёс понна «БиГерд» форум радъяны малпан. Со табере сяме пыӵаз ини, шуыны луоз. 2017-тӥ арен ӵошатыса, кылем арын отчы тросгес калык пыриськиз. Удысъёсъя ке верано, егитъёс быгатӥзы тодон-валанзэс будэтыны вашкала лулчеберетъя, туризмъя, блог нуонъя, дизайнъя, спортъя. Форум юромо ортчытӥське Гыронбыдтон азьын — та шулдыръяськонын егитъёс асьсэлэсь быгатонлыксэс возьмато.

Соин ӵош Казаньысь егит азьветлӥсьёс уг вунэто гуртын улӥсь эшъёссы сярысь. Тужгес трос удмуртъёс уло Кукмор, Агрыз, Балтаси, Бавлы ёросъёсын но Елабуга городын, отчы нимысьтыз ужрадъёс ортчытъяны потало. 2017-тӥ арын кылдӥз эшшо одӥг группа — со ЭКНЭ шуыса нимаське.

Уж кутске йыр бордысен

— Та вакыт ӵоже тӥ туж зол будӥды, — шуиз Л. Буранова. — Шонер верало — тросэз потэ кивалтӥсь бордысь. 3 ар талэсь азьло кивалтӥсе быръемын вал шаплы, егит ужбергатӥсь Андрей Герасимов. Котыраз со люканы быгатӥз зол юрттӥсьёсты: Марина Ивановаез, Павел Александровез но мукетъёссэ. Ужды ӟеч радъямын, но будыны кужымды вань на. 2020-тӥ арын Удмуртия пусъе кунлык басьтэмез дырысен 100 ар тырмонзэ, малпасько, бигер шаерын улӥсь удмуртъёс понна но со ӟеч лыдпус. Соин али малпаськиськом Татарстанын Удмурт культурая нуналъёс радъян сярысь — берлозэ сыӵе ужрад ортчиз 10 ар талэсь азьло.

А. Герасимов

Т. Ишматова тау кариз Татарстанын улӥсь бӧлякъёсмылы ас музъемзы вылын удмуртлыкез азинтэмзы понна. Кылем арын май толэзе Елабугаын ортчиз нырысетӥ удмурт ӧтчамлы 100 ар тырмонлы сӥзем конференция — сое радъян быдэсак сямен усиз татысь автономилэн пельпум вылаз. Конференцие пыриськемъёс ужрадэз туж вылӥ дунъязы.

Татарстанысь удмурт азьветлӥсьёслэн кивалтӥсьсылэсь Андрей Герасимовлэсь ужзэ вылӥ дунъяса, «Удмурт Кенеш» огазеяськонлэн тӧроез ӵектӥз солы Татарстанысь Кун Кенешысь депутат луон понна нюръяськонэ пыриськыны. Люкаськемъёс та малпанэз чабыса пумитазы. Нош автономилы вуоно 3 арлы кинэ тӧро быръён сярысь малпаськонэз ик ӧй вал — ваньмыз 41 делегатъёс Андрей Сергеевичлы ик дурбасьтӥзы.

Яратоно… бырйыса

Татарстанэз мукетъёс азьын котьку примере пукто анай кылэз дышетэмзыя. Ма, татын но Д. Мустафин ӧз ваты: бырйиськом ас мылкыдмыя, дышетӥськом — одно ик!

Но пусйиз: адямиез кужмысь карыны уг яра, тыршоно калыкез тунсыкъяськытыны — со ачиз мылкыд мед кароз калыклэн культураеныз тодматскыны, солэсь кылзэ дышетыны. Со понна ик кулэ пӧртэм тунсыко ужрадъёс, праздникъёс.

Нялтас вераса, Татарстанын улӥсь бӧлякъёсмы азьын сыӵе юан уг ик сылы — дышетоно-а бигер кылэз, ӧвӧл-а, угось соос валало: бускеледлэсь кылзэ тодӥськод ке, соин огкыл шедьтыны лякытгес.

Нош удмурт кылэз дышетон берло аръёсы татын но чутыны ӧдъяз. Али удмурт кылэз дышето Татарстанысь 25 школаын но 11 нылпи садын. Нош кӧня ке ар талэсь азьло гинэ 27-аз школаын дышето вал ай…

Кенешын пукись Д. Мустафин сыӵе ивортонлы паймиз но соку ик югдурез эскерон борды басьтӥськиз, шӧдске. Кӧня ке минут улыса, кенешон мыныку ик, солэн телефоназ та югдуръя ивор вуиз ни — зэмзэ но, дышетон сярысь закон дышетон кылэз бырйыны луонлык сётӥз но, куд-огез школаос капчияк выжизы ӟуче но бигере. Озьы удмурт кылэз дышетонлэсь куштӥськизы Кукмор ёросысь Кучук но Куркино школаос.

— Татарстанысь кивал-тӥсьёс котьку дурбасьтозы анай кылзэс дышетыны мылкыд карисьёслы, — шуиз Д. Мустафин. — Школаын 1-2 ке но пинал мылкыд кариз ке, ми одно ик луонлыкъёс утчалом, но тӥ юрттыны кулэ асьтэ калыкты пӧлын валэктон уж нуыны.

Аслаз ӵектонэныз потӥз Казаньысь тодосчи Валентина Хазиахметова. Со куриз Удмуртиысь кивалтӥсьёслы вазиськыны Ижысь кыӵе ке ульчалы удмурт югдытӥсьлэсь Максим Прокопьевлэсь нимзэ поныны, угось та дырозь Максим Прокопьевез сӥлы каро Татарстанын гинэ, нош со трос кужымзэ сётӥз Удмурт кунлык понна.

Нош Татарстанысь калыкъёслэн ассамблеязылэн тӧроез Николай Владимиров удмурт азьветлӥсьёс азе ужпум пуктӥз: тросгес грантъёс кыскон бордын тыршоно но автономилэсь ёзъёссэ мукет ёросъёсын но кылдытоно, ужаз тросгес калыкез кысконо.

Зинаида Рябинина

Туспуктэмъёс сётӥз Татарстанысь Эшъяськон юртлэн информационной центрез

Ангелина Снигирева
By Ангелина Снигирева Март 7, 2019 15:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<