Арлы быдэ — ӟеч кузьым

Ангелина Снигирева
By Ангелина Снигирева Март 4, 2019 10:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арня пумын Алнаш черкогурт турлы буёлъёсын ворекъяз. Гурт спортсменъёслэн 25-тӥ тол шудонъёсазы вань ёросъёсысь командаос люкаськылӥзы. Соос куасэн бызьылӥзы, полиатлонын кужымзэс эскеризы, баскетболэн, хоккеен, шашкиен но шахматэн шудӥзы. Медаль понна нюръяськизы спортэз яратӥсь семьяос но ёросъёсын кивалтӥсьёс.

Эгра нылъёс эстафетаын вормизы

Паймытӥзы

Гурт шудонъёслы луыса шаерамы 24 стадион, 14 куас база, хоккеен шудон 11 коробка кылдэмын ни. Алнашын ортчоно ӵошатсконлы шуыса пуктэм выль база азьвылъёсызлэсь висъяське, угось со модульной, пуктӥзы но сое вакчи дыр куспын. Декабрь толэзь пумын гинэ юртлэсь инъетсэ лэсьтыны кутскизы. Но объект дыраз быдэстэмын вал.

Выль базаез усьтонэ шаерысьтымы нимо-дано спортсменъёс: Галина Кулакова, Тамара Тихонова, Нина Парамонова, Владислав Лекомцев — пыриськизы. Куд-ог ёросъёсысь кивалтӥсьёслэн базаез пичигес шуэмзы потӥз ке но, Алнаш ёрослэн йырыз Алексей Семенов буйгатӥз: шуныт интыын кылиськон-дӥсяськон интыез ваньмызлы тырмоз, спортэн эшъяськыны мылкыд карисьёс гинэ медаз кулэсме. Нош таӵе куас база пинал спортсменъёсыз но гочатоз, дыр.

Выль пуктэм базалэсь ӟечлыксэ эскерыны вуылӥз Удмуртилэн Тӧроез Александр Бречалов. Ас синъёсызлы ӧз оскы кадь, паймытъяськоды, пе. Та дырозь ялан ӝожтӥськылӥды, лэсьтӥськон ужъёс ӝегаса мыно шуыса, нош туннэ шумпоттӥды. База вӧзын ик югдытӥськись куас сюрес лэсьтэмын на, юбоосысь лампаосыз пеймыт луэмъя асьсэос ӝуатӥсько. Ёрослэн йырыз ватсаз на, лэсьтӥськон ужъёс мытэмын гинэ ай, шуыны луоз, пе, азьланяз та база котыре асфальтэн кисьтэм сюрес кылдыны кулэ, гужемзэ отӥ питрано куасъёсын бызьылыны мед луоз.

Александр Бречалов одӥгысьтыз выль объектысь мукетаз вамыштӥз. Алнаш черкогуртысь дышетскисьёс понна выль школа пуктэмын, лэсьтӥськон ужъёс йылаз-пумаз вуттэмын ни. Пиналъёс отын уг дышетско на ке но, Гурт шудонъёсы лыктэм куд-ог командаослы удалтӥз ини выль школаын улыны. Отӥяз Александр Бречалов тодматскиз на Каракулиноысь лыктэм Наговицынъёслэн семьяенызы. Елена но Павел кузпалъёс ярато гужем шудонъёсты, угось Елена пыриськемын 2012-тӥ арын Лондонын ортчем гужем Олимпиадае. Нош ма но уд кары яратоно ёросэд понна! Наговицынъёс кӧня ке ар ӵоже тол ӵошатсконъёсы но пырисько, берло аръёссэ семьяос пӧлын вожвылъясько. Вылӥ кивалтӥсьёс, спортсменъёслэн улэм-вылэменызы тодматскем сяна, та семьялэн сюлмаськытӥсь ужпумъёсыз сярысь но тодӥзы.

Эшъяськизы тыл но ву

Арысь аре Гурт шудонъёсыз усьтон дыръя куно пумитась ёрос маин ке паймытыны выре. Таяз учыре но алнашъёслэн ар пала дасяськемзы юнме ӧз ортчы. Усьтон ужрадэ пиналъёс но бадӟымъёс, ваньмыз-ӧвӧлэз 600 пала адямиос, пыриськизы. Гурт шудонъёслэсь тылзэс ӝуатӥз Паралимпиадалэн 2 пол чемпионэз, дуннеысь паралимпиецъёс пӧлын 4 пол кубок но «Хрусталь глобус» утэм спортсмен Владислав Лекомцев.

Ужрадэз усьтон дыръя ёрослэн йырыз А. Семенов куноослы но вань спортсменъёслы выль вормонъёс сӥзиз. Спортъя праздниклэн шорсюлмыз герӟаськемын вал дано конструкторлэн М. Калашниковлэн вордскемез дырысен 100 ар тырмонэн но Тазалыклэн ареныз. Удмуртилэн Тӧроез А. Бречалов ватсаз: странамы йылол-сямъёсын кужмо, асьме шаерын но соос трос. Вунэтоно ӧвӧл Гурт шудонъёслы кутскон сётӥсез, Удмуртилэсь азьвыл кивалтӥсьсэ Александр Волковез но. Солэн мытэм ужъёсыз 25 ар ӵоже кыстӥсько ни, азьланяз но та ужез ум аналтэ, шуиз Александр Бречалов.

1-тӥ подгруппаын вормисьёс: Эгра, Ува но Пичи Пурга ёросъёс

Алнашысь стадион яркыт буёлъёсын пиштӥз. Кызьы тодмо, тыл но ву улонын эшъёс луыны уг быгато, но 25-тӥ Гурт шудонъёс дыръя соос эшъяськизы: ӵошатсконъёслэн талисманъёссы — Олимпик тыл но Варзинка ву — яркыт вормонъёс сӥзизы.

Быдэс ужрад дасямын, шуыны луоз, ёрослэн кужыменыз. Режиссёрез вал Александр Вихарев, солы юрттӥзы культура удысын ужасьёс. Талисманъёслы но пичи йӧ пырыослы (льдинкаослы) — соос 40 кузя вал — 200 сюрс манет тыр дӥсь вуриллям.

Ужрадэз сӥё-дано усьтон дыръя ёрос командаос парадэн ортчо, ёросъёсысь нимо-дано спортсменъёсыз верало. Со сяна, та ужрад адӟытон выллем луэ на. Командаослэн дӥсьсыя ик шӧдыны луэ ёросысь кивалтӥсьёслэсь спорт шоры учконзэс но. Таяз учыре тросэз синмаськизы алнашъёслэн чебер но шуныт дӥсьсылы. Выль дӥсьсы 500 сюрс манетлэсь ятырлы усем.

Гурт шудонъёсыз усьтон нуналэ, 21-тӥ феврале, Алнашысь культурая юртын тазалыклы сӥзем урам кылдытэмын вал. Ёросысь фельдшеръёс доразы пырасьёслэсь тазалыксэс эскеризы. Та нуналэ мылкыд карисьёс вирзӥбетсэс мертазы, вирысьтызы сакырзэ но холестеринзэ, синзэс эскеризы. Озьы ик мылкыд карисьёс скандинав амалъя шонер вамышъяны дышетскизы.

Семьяен ӵош

Куно пумитась ёрос ӵем дыръя Гурт шудонъёслэн чемпионзы луэ. Таяз учыре алнашъёс 2-тӥ инты басьтӥзы, но соос мукет удысъя чемпион луо. Та ёросын туэ 4-тӥ ползэ Гурт шудонъёс ортчизы ни! Ӵошатон вылысь: Сьӧлта ёросын гурт спортсменъёсыз туэ нырысьсэ пумиталозы.

Алнашысь агай-вынъёс Владимир Но Владислав Лекомцевъёс

Алнаш куас сюрес вылын спортсменъёс вылӥ лыдпусъёс ӧз возьматэ. Нуналлы быдэ усись лымы куас сюрес дасясьёсты но, куас зырасьёсты но шугомытӥз. Куд-ог спортсменъёс дась вал бызён куспазы куасъёссы улысь лымы комокъёсты куяны. Вылаз ик, спортсменъёслэсь чиданлыксэс эскериз на 180 метръем меӵ гурезь. Нимысьтыз дасяськымтэ адямиос понна со туж секытэн сётскиз. Алнашысь трос лымылы паймизы уйпал ёросъёсысь вуэм командаос но.

Со понна мукет рекордъёс вал. Кылсярысь, командаен спринтын 2 спортсмен бызьылэ. Учконо ке, вакчи сюресэз ӝоггес ортчыны кулэ кадь егитъёс — 18-25 аресъемъёс. Таяз учыре ваньзэс паймытӥзы Ярысь нылкышноос: кыкназы азьысь арлыдзы 92 арес люкаське, нош ӵошатсконын соос 14-тӥ инты басьтӥзы.

Нимысьтыз шуныт кылъёс верано семьяос сярысь. Туэ но Гурт шудонъёсы 7 аресъем пиналъёсынызы пыриськизы но огъя зачётын шоро-куспо интыос басьтӥзы Глазовысь Дзюинъёс-Салтыковъёс Аня нылынызы но Вавожысь Чучалинъёс Даниил пиенызы. Семья бордысен ик кутске спортэз яратон.

Куасэн бызьылӥсьёс пӧлын туэ котькулэсь трос вал агай-вынъёс, анай-атайёс но пиналъёссы. Кылсярысь, Якшур-Бӧдья ёросысь Виталий но Владимир Дьяконовъёс но Пичи Пурга ёросысь Дмитрий но Евгений Ерохинъёс кыкто пиос, Алнаш ёросысь Владислав но Владимир Лекомцевъёс, Можга ёросысь Юрий но Виктор Семёновъёс, Якшур-Бӧдья ёрослэсь данзэ утизы Ларина Михайлова Никита пиеныз, Пичи Пурга ёрослэсь — Николай Семёнов Елена нылыныз.

Спортэз яратон мылкыд пичиысен ик пыӵа ке, бадӟым будыса но, та «висёнлэсь» куштӥськыны уг луы вылэм. Озьы верало Шаркан ёросын улӥсьёс. Спортэз яратӥсьёс понна ёрос администрация нимысьтыз автобус висъялля. Таяз учыре но шарканъёс Алнаше быдэс автобусэн вуылӥзы. Куасэн бызьылонъя ӵошатсконъёсыз учкизы, асьсэ ёросысьтызы спортсменъёс понна висизы.

Алнашысь — Тюмене

Тол шудонъёслэн флагзы сӥё-дано сётэмын Дэри ёрослы. Озьы ке но куд-ог спортсменъёслы куасъёссэс куштыны вазь на. 19-тӥ — 23-тӥ мартэ Тюмень городын ортчозы Россиысь Гурт тол шудонъёс. Шаермылэсь данзэ отын утёзы Алнашын вормон басьтэм спортсменъёс но: Эграысь Клементьевъёслэн семьязы, Шаркан ёросысь куасэн бызьылӥсьёс, Юкаменск ёросысь полиатлонистъёс. Шаерысьтымы спортсменъёслэсь быгатонлыксэс будэтонъя центрын ужась специалист Радик Мамаев верамъя, соос борды итӥськозы на Юкаменск ёросысь механизаторъёс, скал кыскисьёс, Можга ёросысь гира ӝуткасьёс. Озьы огъя командае 25 спортсмен кутэмын.

Нош гуртъёсысь мукет спортсменъёс табере гужем шудонъёслы дасяськонзэс мытозы. Таяз учыре куноосты пумиталозы Сьӧлта ёросын улӥсьёс.

Валентина Емельянова

Ангелина Снигирева
By Ангелина Снигирева Март 4, 2019 10:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<