80 арлэсь ичи ум улэ

Ангелина Снигирева
By Ангелина Снигирева Февраль 8, 2019 12:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кызьы калык пыриське диспансеризацие? Кыӵе анализъёс лэсьтыны луэ черодъёстэк но дунтэк? Та но мукетыз сярысь журналистъёслы вераз Удмуртиысь тазалыкез утёнъя министрлэн воштӥсез Георгий Щербак.

Таза луон понна мугорез кыдатоно

Кулэ паспорт но полис

Диспансеризация улонэ пыӵаны кутскиз 2013-тӥ арысен. Та дыр куспын солэн валтӥсь куронъёсыз ӧз воштӥське: котькуд адями 3 арлы одӥг пол тазалыксэ пыр-поч эскерыны быгатэ. Радлык тупатэмын аръёсъя. Кылсярысь, эмъясьёс туэ витё 1914-тӥ, 1917-тӥ, 1920-тӥ, 1923-тӥ, 1926-тӥ, 1929-тӥ, 1932-тӥ, 1935-тӥ, 1938-тӥ, 1941-тӥ, 1944-тӥ, 1947-тӥ, 1950-тӥ, 1953-тӥ, 1956-тӥ, 1959-тӥ, 1962-тӥ, 1965-тӥ, 1968-тӥ, 1971-тӥ, 1974-тӥ, 1977-тӥ, 1980-тӥ, 1983-тӥ, 1986-тӥ, 1989-тӥ, 1992-тӥ, 1995-тӥ, 1998-тӥ аръёсы вордскемъёсты.

— Диспансеризацие нырысьсэ пырисько соос, кинъёслы туэ 21 арес тырме, — вераз министрлэн воштӥсез. — Со понна вазиськоно улон интыя поликлиникае. Куд-огаз эмъяськон учреждениосын диспансеризация понна кыл кутӥсь нимысьтыз специалист вань. Но данаказ та уж оскемын участокысь терапевтъёслы. Кулэ луозы паспорт но медицина страхованиея полис.

Диспансеризация ортче 2 люкетэн. 2-тӥ люкетаз пырисько соос, кинлэсь тазалыксэ уката мур эскероно, кылсярысь, анализъёсыз туж ик умоесь ӧвӧл.

Нош 1-тӥ этапаз диспансеризация понна кыл кутӥсь специалист (яке терапевт) юалляське, вань-а адямилэн кема кыстӥськись висёнъёсыз. Мерта вирзӥбетэз (давление), секталаез, ӝуждалаез. Диспансеризациез ортчись мурт нимысьтыз анкетаысь юанъёслы валэктон сётыны кулэ. Собере ини специалист сое келя анализъёс сётыны, ЭКГ, флюорография но мукетсэ ортчыны.

Сюлэм но вирсэр

Кылем арын шаерысьтымы 247 сюрс мурт потыны кулэ вал эмъясьёс пыр. Та пӧлысь 97 процентэз, яке 240 сюрс мурт, вуылӥз поликлиникаосы.

Георгий Щербак верамъя, тазалыксы сярысь умойгес сюлмасько нылкышноос (диспансеризация ортчемъёс пӧлын соос 61 процент), эмъясьёс доры вуылыны дыр шедьтэ ужась калык — эскериськемъёс пӧлын 42 процентэз, 39 аресозь егитъёс — 30 процентэз.

— Гуртоос озьы ик диспансеризацие пырисько, — пусйиз министрлэн воштӥсез. — Кылем арын эмъясьёс дӥне вуылэмъёс пӧлын соос 37 процентэз вал. Но лыдэ басьтоно, городын улӥсьёсын ӵошатыса, гуртоослэн лыдзы ичигес. Ёрос центръёсын поликлиникаос диспансеризациез умой ортчыто. Кинлы лыктоно эскериськыны — телефон пыр СМС-ёс келяло. Со сяна, элькунамы ужало питранъёс вылын ворттылӥсь эмъян центръёс — пичи гуртъёсы соос ӵем потало. Озьы 2017-тӥ арын та центръёсын диспансеризациез ог 5 сюрс мурт ортчиз ке вал, 2018-тӥ арын — ог 10 сюрсэз ни.

Специалистъёс ало: диспансеризация ньӧмыз пӧнна гинэ ӧвӧл. Со кулэ висёнъёсты дыраз шараян понна. Эмчиос озьы эшшо одӥг пол тодэ вайыто таза улонэн эшъяськонлэн кулэлыкез сярысь.

— Кунамы ужпум пуктэмын 2030-тӥ арозь адямиослэсь шоро-куспо улонзэс 80 аресозь вуттыны, — азинтӥз веранзэ Георгий Щербак. — Соин ик али нимысьтыз саклык висъяське нуныослэсь но анайёслэсь тазалыксэс утёнлы. Улон вапуммес кузёмытыны кулэ диспансеризация но.

Кылем арын 28 сюрс муртлэн кыӵе ке висёнэз нырысьсэ шараямын.

Специалистъёс верамъя, тросаз учыръёсы — соку-соку гинэ кырмиськыкуз. Озьыен, адями бурмоз шуыса оскон пичи ӧвӧл. Кылсярысь, ог 4 сюрс муртэз мургес эскеронэ келямын вал, лек пыктос кырмиськемын ӧвӧл-а шуыса. 373-езлы кышкыт диагноз пуктэмын. Со пӧлысь 72 процентэзлэн висёнэз 1-тӥ-2-тӥ стадиын дыръяз шараямын. Жаляса верано, ӵемысь сюлэм но вирсэр висёнъёс одолё, мугорын веществоослэн воштӥськонзы сӧриське. Котькуд 2-тӥез мултэс килограммъёс люканы кутскемын, нош котькуд 5-тӥез куаемын ни, ог 40 процентэзлэн холестеринэз мултэс — кӧё-вӧё сиське, нуналаз 400-600 грамм бакча емышъёс уг сиы, котькуд 5-тӥез мугор ёзвиоссэ уг кыдаты, нуналаз 30 минут но пыдын уг ветлы.

Озьы оглом эскериськемъёс пӧлысь 34 процентэз гинэ тазаен лыдъямын. 46 процентэзлэн шараямын кема кыстӥськись висёнъёссы, кылемъёсыз, али ик тазалыксэс чакланы ӧз кутске ке, черланы быгатозы.

9-тӥ феврале — поликлиникае

2019-тӥ ар шаерамы сӥземын тазалыкез утёнлы. Таин валче уно пӧртэм ужрадъёс ортчозы. Уката юн чакласькоз, кызьы радъяське диспансеризация.

Быдэс ар ӵоже котькуд толэзьлы быдэ одӥгаз субботае элькунысьтымы вань городъёсысь но ёросъёсысь поликлиникаосын диспансеризация нуналъёс радъяськылозы. Нырысетӥез чакламын ни таяз суббота нуналлы — 9-тӥ февральлы. Эмъясьёс доры вазиськыны луоз 8 часысен 14 часозь.

— Куд-ог поликлиникаосын диспансеризация ортчыны 2-3 нунал кулэ луэ, — ватсаз Георгий Щербак. — Но азьланьын тыршомы вань эскеронъёсты нуналскын радъяны.

Министрлэн воштӥсез тодэ вайытӥз на: диспансеризация ортчыны адями быдэс нуналлы ужысь кошкыны быгатэ, уждунэз тыриське. Нош пенсие потон дыразы вуэм муртъёслы араз 2 нунал сётӥське, та понна соосты озьы ик уждунтэк кельтыны уг луы.

— Вуоз сыӵе вакыт, куке уж сётӥсьёс кыл кутозы ужасьёссылэн тазалыксы понна, — ватсаз кивалтӥсь.

Диспансеризация сярысь пыр-поч тодыны луоз medprof18.ru сайтысь. Юанъёсты кылдыку, вазиське dispans@inbox.ruэлектрон адресъя.

Элина Кумачёва

Туспуктӥз М. Егоров

Ангелина Снигирева
By Ангелина Снигирева Февраль 8, 2019 12:55 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<