Юрттозы-а урокъёс?

Ангелина Снигирева
By Ангелина Снигирева Февраль 1, 2019 09:19

Кылем арня шорын Удмуртие вуылӥз «Сазь Россия» федерал проектлэн кивалтӥсез, Россиысь Общественной палаталэн ёзчиез Султан Хамзаев. Проектлэн кылем ар ӵоже быдэстэм но туэ быдэстоно ужпумъёсыз сярысь ивортӥз.

С. Хамзаев «Сазь Россия» проект сярысь вераз

Султан Хамзаев пумиськылӥз Удмуртиысь кивалтӥсьёсын, кенешиз Удмуртиын ортчись Тазалыклэн арез сярысь. Озьы ик Удмурт кун университетын дышетскись студентъёслы «Сазь Россия — таза улонэз азинтон» темая лекциос лыдӟиз но журналистъёслэн юанъёссылы валэктон сётӥз.

Кызьы тодмо, кылем арын сӥзьыл Удмуртиысь сазь улонэн эшъяськись гуртын — Пичи Пурга ёросысь Улын Юриын — «Сазь Россия» федерал проект чотын аспӧртэмлыко выль спортплощадка кылдӥз. Мугорез урамын кыдатон интыез усьтонэ вуылӥз Султан Хамзаев, соку со шуиз вал, ӟеч уж лэсьтонлэн та нырысетӥ вамышъёсыз гинэ, азьланяз вань ёросъёсын таӵе интыос кылдытыны луоз. Озьы ик та программа чотын кылем арын Ижын выльдӥськиз дзюдоя школа. Туэ Удмуртиын нырысьсэ ортчытыны чакламын 23 аресозь егитъёс пӧлын дзюдоя Европалэсь чемпионатсэ.

Таяз учыре но Москваысь куно Удмуртиын воркаут площадкаос лэсьтон сярысь ивортӥз. Соос кылдыны кулэ сазь улон понна нюръяськись, спортэн эшъяськись гуртъёсын, ёрос центръёсын. Трос вераськиз сазь улон сярысь. Тросэзлэсь, пе, егитъёслэсь йырзэс поромытэ тамак кыскон, вина юон, йырез усыкмытӥсь суретъёсын кушласькон. Шуге-леке вуэм пиналъёсын психологъёс, югдурез утисьёс кенешо. Жаляса верано, ӵем дыръя визьнодан уж борды укыр бер кутскиськомы. Покчи классъёсын ик та борды басьтӥськоно ни.

Та вакытэ шаерысьтымы школаосын урод сямъёсын нюръяськонлы сӥзем «Сазь урокъёс» ортчытонлы дасясько. Таӵе урокъёс луозы кварталлы одӥг пол, 1-тӥ классысен кутскыса.

«Сазь Россия» федерал проектлэн кивалтӥсез кылем арын Россилэн Правительствоезлы ӵектӥз куд-ӟытӥсь юонэз 21 ареслэсь бадӟымъёслы гинэ вузаны (али 18 аресысен). Кылем ар куспын Россиын улӥсьёс 8 миллиард литр сур юиллям. Выль ар шутэтскон нуналъёс куспын гинэ, 1-тӥ-12-тӥ январе, Россиысь 12 сюрс пала адямиос кудӟытӥсь юонлы луыса улонысь кошкизы. Со пӧлысь 78 процентэз воргоронъёс луо, тросэз соос ужан арлыдазы вал. Берло аръёсы шорлыдын 17 процентлы йылӥз кудӟыса кулэмъёслэн лыдзы, тросэз соос быро суррогатъёслы луыса. Султан Хамзаев ӵектэ кудӟытӥсь юонэз лушкем вузасьёсын золгес нюръяськыны.

Валентина Емельянова

Ангелина Снигирева
By Ангелина Снигирева Февраль 1, 2019 09:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<