Шара, лякыт но кышкасьтэм

Ангелина Снигирева
By Ангелина Снигирева 1 февраля, 2019 13:59

Туэ 5-тӥ январе 85 арессэ тырмытысал тодмо удмурт критик но литературовед Алексей Ермолаев. Со 12 книгалэн авторез, чеберлыко произведениослы 44 азькыл гожтӥсь. Удмурт критиклэн юбилеезлы сӥзем выставка усьтӥськиз Туала документацияя центрын.

В. Ермолаев

Алексей Афанасьевичлэсь будэм но ужам сюрессэ адӟыны луэ пӧртэм документъёс пыр. Татчыозь утиськемын Данъян грамотаез — 1947-тӥ арын Татарстанысь Ныръя черкогуртысь 5-тӥ классэз со «витьёслы» гинэ йылпумъяз. Семилетка бере дышетскиз Можгалась педучилищеын. Сое йылпумъяса, егит муртлы сюрес усьтӥськиз Москваысь кун университетэ журналистикая факультетэ мыныны. Нош гуртэ кылем анаезлы та малпанэз ӧз кельшы — солэн пизэ гуртысь дышетӥсен адӟемез потӥз, тырмоз ни дышетскыны, шуиз, уксёен юрттыны тодаз но ӧз лыкты. Соин А. Ермолаев — туж куанер улӥсь но начар дӥсяськем студент — Москваетӥ толбыт ветлэ векчи костюмен, пыдаз кулэсь вурем капчи тапочкиосын.

— Али сыӵе алама дӥсяськем муртэ бомж шуысалзы, дыр, но со вакытэ нокин но шораз чиньыен ӧз возьматъя, угось тросэз куанер улӥзы. Мон но солэн визьмызлы, сабырлы луэмезлы синмаськи, — шуэ А. Ермолаевен ӵош дышетскем студент, матысь эш но кузпал луэм ӟуч ныл Нина Георгиевна.

Ӵапак Москваын дышетскон вакытаз егит студент А. Ермолаев репрессие шедем удмурт гожъясьёслэсь ужъёссэс утчаны кутскиз. Со МГУ-лэн ректорезлэсь гожтэт куриз, Ленинской библиотекаысь ворсам фондъёсын ужаны мед лэзёзы шуыса. Отын Кузебай Гердлэсь ужъёссэ, Ашальчи Окилэсь кылбуръёссэ шедьтӥз, Кедра Митрейлэсь «Дитя больного века» автобиографизэ аслыз кельтон вылысь киын гожъяса пукиз. Бӧрысьгес со озьы ик курыны быгатӥз, та фондъёсы сое фотоаппаратэн мед лэзёзы шуыса.

Озьы ик студент вакытаз Алексей Афанасьевич кусып тупатӥз «Дружба народов» литературая журналэн. Татын печатласькизы удмурт литератураысь произведениослы сӥзем нырысетӥ рецензиосыз. МГУ-ын «Тема исторического прошлого в удмуртской литературе» диплом ужзэ вылӥ дунъязы. Нош Удмуртиын «Молот» журналын поттэмзы бере А. Ермолаевен тросэз учёнойёс тушмонъяськыны кутскизы.

Алексей Ермолаевен МГУ-ын огвакытэ ик дышетскем мурт, филология наукаосъя доктор Василий Ванюшев пусъе:

— Москваын соку оттепель вакыт шӧдӥськиз ни. Площадьёсын калык яратылӥз кылзыны Р. Рождественскиез, Е. Евтушенкоез, Б. Ахмадулинаез, отын кыӵе ке эрико омыр вал. Нош Удмуртиын — воксё мукет улон. Соин капчи ӧй вал Москваысь вуэм Алексей Ермолаевлы но, Пётр Чернов писательлы но. Алигес Пётр Черновлэн архивысьтыз шедиз чагиськон гожтэт. Москваысь вуэм 3 егит ужасьёс дӥсьтӥллям, пе, асьсэ мылкыдзэс вераны туала удмурт литература сярысь. Таӵе чагиськон пӧрам со вакытэ шаерысьтымы радиовещаниея комитетлэн тӧроезлэн воштӥсез Гнедин, курем опровержение дасяны «Советской Удмуртия» газетэ.

Соин шара вераськись, кышкасьтэм критиклы Алексей Ермолаевлы Ижын капчи ӧз йӧты. Издательствоын ужаны ӧз сётэ, та удысэз со яратӥз ке но, шуэ Нина Георгиевна.

Алексей Ермолаев кема аръёс ӵоже тыршиз УдНИИ-ын. Татын со мур пытьы кельтӥз удмурт литератураез эскерон удысын. Та аръёсы Пётр Поздеевен ӵош кылдытӥзы бадӟым классъёсын дышетскисьёслы удмурт литературая учебник. Со 5 пол тупатъяса-выльдыса потылӥз на.

Озьы ке но удмурт литературалэн историяз Алексей Ермолаев пыриз устоез критик сямен. Соин ӵош ужаса вуттэм литературоведъёс пусъё: А. Ермолаев лякыт но со дыре ик вылӥ куронъёс пуктӥсь критик вал.

— Мынам улонам А. Ермолаевлэн «Счёт предъявляет время» книгаеныз герӟаськем учыр вань, — вера филология наукаосъя доктор Татьяна Зайцева. — Аспирантураын дышетскон вакытам, Иже бертылыкум, басьтӥ та сборникез, но лыдӟыса ӧй вутты. Малпай, ӵош дышетскем эшъёсылы кузьмало. 3 экземпляр сьӧрам нуи. Огзэ Москваысь эшелы кузьмай, мукетсэ — Прибалтикаысь эшелы, огез аслым кылиз. Кӧня ке улыса, дорам Прибалтикаысь мукет юлтошъёсы лыкто: вай, пе, лыдӟыны со удмурт критиктылэсь книгазэ. Та сборник киысь кие кошкем. Учкы ай, пе, кыӵе тубатын сылэ ни тӥляд туала критикады. Ми произведенилэсь пуштроссэ мадьыны выриськомы, нош удмурт критикъёс произведенилы художественно-эстетической дунъет пуктыны пӧрмыто ни. «Счёт предъявляет время» али но мынам ӝӧк вылам. Мон берло валай: сое гожтӥз литератураез туж ӟеч тодӥсь-валась адями, ӟеч редактор — быгатӥз одӥг сборнике сомында пумо малпанъёсты, куддыръя ваче вуись мылкыдъёсты огазеяны.

Алексей Ермолаев улонысь кошкиз 2006-тӥ арын. Солэсь трос аръёс ӵоже быдэстэм ужъёссэ 3 томен поттымон люказ кузпалыз Нина Георгиевна. Туннэ та сборникез («На фоне удмуртской литературы»/«Удмурт литературалэн ингожысьтыз») шедьтыны луэ Национальной библиотекалэн сайтысьтыз, нош нимаз книгаен печатланы юрттӥсьёс уг шедё.

Елена Скворцова

Ангелина Снигирева
By Ангелина Снигирева 1 февраля, 2019 13:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<