Сэрего Эмгак

Ангелина Снигирева
By Ангелина Снигирева Февраль 20, 2019 10:09

Шаерысьтымы Национальной библиотекаын Марий Элысь калык писательлы Вячеслав Абукаев-Эмгаклы (1959-2008) сӥзем ӝыт ортчиз. Та ужрадын ик Удмуртиысь кӧня ке адями Абукаев нимо медален пусъемын вал.

Эшъяськон вал

Меӵак верасько, та ӝытозь Вячеслав Абукаевлэсь нимзэ кылылӥ, но ужъёссэ ӧй лыдӟылы. Соин ик В. Абукаевлэн творчествоеныз тодматсконо кариськи. Кӧня ке чуръёссэ лыдӟеме бере ик валай, малы сокем дунъяло поръёс асьсэ писательзэс, малы солы сӥзем медаль но малпазы. Мыным потӥз, Вячеслав Абукаев — со пор калыклэн Михаил Федотовез, дырез но вакытэз лул-сюлмыныз туж зол шӧдӥсь.

В. Абукаев сярысь трос тодэ ваёнъёсыз Удмуртиысь калык писательлэн Вячеслав Ар-Сергилэн. Соос матысь эшъёс вылӥллям.

В. Абукаев паллянысез 5-тӥез

— Ми соин нянь сукыримес гинэ но ваче люкиськом вал. 1982-тӥ арын монэ келязы Марий Элысь университетэ пор кыллы дышетскыны, мон луи историко-филологической факультетлэн студентэз, — тодаз вае В. Ар-Серги. — Отчыозь поръёсты адӟылэме ик ӧй вал, пал кыл но пор сямен ӧй тодылы. Кылбурчи Владимир Романов дэмлаз поръёслэн «Ямдэ лий» газетсылэн редакциязы вуылыны. Отысен нырысетӥ нуналаз ик пумитай Вячеслав Абукаевез: пичи гинэ мугоро, син шоры сокем йӧтӥсьтэм. Пайми солэн, огласянь, туж востэм, мукет ласянь, туж шаплы луэмезлы. Ми эшъяським. Пор гожъяськись — со сыӵе адями: потэ ке бӧрдэмез, бӧрдэ, потэ ке кесяськемез, кесяське, малпанъёссэ ватыса уг улы. В. Абукаев куддыръя сэрего луылӥз. Но со сэрегъёс адямиос пала берыктэмын ӧй вал, аслаз пушказ, аслаз сюлэмыз шоры учкылӥзы.

— Азьвыл пӧртэм калыкъёслэн писательёссы ог-огенызы юн кусып возизы, ог-огзылэсь дышетскизы, — тодаз вайиз радиожурналист Владимир Михайлов но. — Жаль, тросэз со вакытысь кужмо гожъясьёс улэпэсь ӧвӧл ни. Вячеслав Абукаевлэн тыршеменыз, пор газет-журналъёсын потӥзы мынам но пор кылэ берыктэм кылбуръёсы. Озьы калыкъёс ог-огзылэсь литератураоссэс тодӥзы…

В. Абукаевлы сӥзем ӝытэ пыриськизы Удмуртиын улӥсь поръёс но. Поръёслэн огазеяськонэнызы кивалтӥсь Николай Ямаков тау кариз, кылбурчилэсь нимзэ Удмуртиын но тодазы возё шуыса.

Нош Пичи Пурга ёросысь Иж-Бобья пор гуртысь Зоя Князева ватсаз:

— Мон школаын пор кылэз дышетэмын ӧвӧл, но пор кырӟанъёсты туж яратӥсько. Малпасько вал, калык кырӟанъёсты быдэстӥсько шуыса, нош соослэн авторзы В. Абукаев вылэм.

Юромо та ӝытлы шуыса, Иж-Бобьяысь поръёс яратоно калык кырӟанзэс быдэстоно кариськиллям, дасяськонъязы тодӥллям, солэсь кылъёссэ В. Абукаев ик гожтӥз шуыса.

— Калык писатель — со понна ик калык писатель. В. Абукаевлэн чуръёсыз адямиослэн сюлэмъёсазы сокем пыӵазы, асьсэлэн шӧдонъёссы, верано кылъёссы кадь, — пусйиз Национальной библиотекалэн директорез Татьяна Тенсина.
Т. Тенсина тау кариз Вячеслав Ар-Сергилы но:

— Мон малпасько, Удмуртиысь калык писательлы В. Ар-Сергилы луыса но Марий Элын сокем гажало удмурт литератураез. В. Ар-Серги туж трос лэсьтӥз но лэсьтэ эшлыко кусыпъёсмес возён понна. Пор кылын эркын вераськемез но гожъяськемез, Марий Элысь театръёслы сценарийёс гожъямез, удмурт калыклы ӵыжы-выжы луись пор гожъясьёсты усьтэмез понна солы йыбырттыны кулэ.

Дышетскись ӝутӥз дышетӥсьсэ

Огпол Вячеслав Абукаев доры лыктэм пичи пияш. Писатель учкем солэсь гожъямъёссэ, визь-кенешъёс сётэм, азьланяз но гожъяськыны бурдъям. Пияш гожъяськемысь дугдымтэ, Севастопольысь военно-морской училищее пырыса но, аслаз дышетӥсеныз ялан кусып возем. Али Василий Краснов — 2-тӥ ранген капитан, улэ Североморскын, тодмо пор гожъяськись луиз. Тӥни со Василий Краснов ик кылдытэм пор культуралы юрттонъя фонд, нош та фонд — Вячеслав Абукаев нимо медаль. Та медален пусйисько пор но фин-угор литератураослы бадӟым саклык висъясь адямиос.

Вячеслав Абукаевлы сӥзем ӝыт дыръя сыӵе медальёсын пусъемын шаерысьтымы 12 адями. Соос туж пӧртэмесь — бадӟым кивалтӥсьёс но нуналмысь адскисьтэм ужез лэсьтӥсьёс, писательёс но соослэсь гожъямъёссэс калык пӧлы вӧлмытыны тыршисьёс, удмуртъёслэсь но поръёслэсь кусыпъёссэс юнматӥсьёс. Куд-огез понна поръёслэн сыӵе вылӥ дунъямзы воксё витёнтэм луиз.

— Ужаку тон уд малпаськы кыӵе ке наградаос сярысь, тыршиськод тросгес но тунсыкогес лэсьтыны, вань сюлэмдэ поныса ужаськод, нош собере, аръёс ортчыса, награда тонэ шедьтэ вылэм. Мон тау шуисько командамылы, тау шуисько адямиослы, кинэн ӵош ужамы, — пусйиз Национальной библиотекаысь отделэн кивалтӥсь Надежда Лимонова но тодаз вайиз пор-удмурт кусыпъёслы сӥзем ужъёссэс, «Народы Удмуртии» проектэз пыӵатэмзэс но трос мукетсэ.

Ӟуч гожъяськись Сергей Жилин тодаз вайиз Граховолы сӥзем книга бордын ужамзэ, та ёросысь пор гуртъёс сярысь материалъёс люкамзэ.
Пусъемъёс пӧлын ик — Удмуртиысь калык писатель Вячеслав Ар-Серги. Алигес Марий Элын потӥз солэн пор кылын книгаез. Национальной библиотекалэн ужрадаз пыриськем поръёслы со бадӟым кузьым луиз.

Та ӝыт мон понна В. Абукаевез усьтон выллем вал бере, йырысь ӧз кошкылы юан: малы писатель аслыз псевдонимлы «эмгак» кылэз быръем? Эмгак — пор кылысь берыктыса, «шудтэм» шуэмез возьматэ ук. Бен, улонэз солэн капчи вылымтэ, тужгес но берло аръёссэ. Кулон азяз В. Ар-Сергиен вераськиллям.

— Маке мон туж жади… — шуэм Эмгак.

Нош кӧня ке нунал орчыса, В. Абукаев улонысь кошкем, 50 аресозяз но вуытэк…

Ангелина Снигирева
By Ангелина Снигирева Февраль 20, 2019 10:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<