Пуктоно 16 сюрс контейнер

Ангелина Снигирева
By Ангелина Снигирева Февраль 18, 2019 12:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кыкетӥ толэзьзэ шаерамы жаген выль сямен нюръясько. Кызьы со уж быдэсъяське? Кыӵе льготаос кинлы сётӥсько? Та юанъёс пумысен журналистъёсын пумиськылӥзы лэсьтӥськонъя, ЖКХ-я но энергетикая министрлэсь ужзэ быдэсъясь Дмитрий Сурнин, «Спецавтохозяйство» улос операторлэн кивалтӥсезлэн воштӥсез Надежда Васильева но мукетъёсыз.

60 процент учыръёсы жаг поттӥське на мешокъёсын

Тӧлъя-буръя уз кошкы ни

— Та нуналлы вань ёросъёсын жагез поттон понна кыл кутӥсь предприятиос быръемын. Кызьы соос ужзэс быдэсъяло, нуналмысь эскерыса возё министерство но, улос оператор но, — вераз Д. Сурнин. — Зэм, кылем-мылемез поттон куд-ог дыръя ӝега, но специалистъёсмы муниципал кылдытэтъёсын, жагез поттӥсь предприятиосын кусып возё, тырмымтэосты тупатыны куро.

Удмуртиын юнматэм тариф Россиысь шоро-куспо тыриськон дунлэсь улӥынгес. Куд-ог улосъёсын со эшшо пичигес, угось отын полигонъёссы тросгес, валэктӥз министрлэсь ужзэ быдэсъясь. Но тыриськонлэсь быдӟалазэ эшшо но кулэстыны ужпум пуктэмын. Кун реестре пырымтэ полигонъёсты усьтоно, асьме дорын сыӵеосыз 3. Али жаг шаерысьтымы 5 полигонъёсы вуэ.

Быдэс Удмуртиын оглом 16 сюрс пала жаг куян интыос лэсьтоно, ивортӥз Надежда Васильева. Та вакытлы шаерамы ог 9 сюрс пала контейнеръёс, жаг люканъёс пуктылэмын. Но ог 60 процентаз учыръёсы кылем-мылемъёсты поттэ на чаклам дырлы вуэм машина. Таӵе амал тросэзлы уг кельшы. Угось машиналэсь вуэмзэ кырын возьмано. Нош тросэз уг ик витё, мешокен жагзэс ульчае кельто, озьы жаг ӵемысь тӧлъя-буръя кошке.

— Югдурез воштон понна улос оператор, муниципал кылдытэтъёс, калык куремъя городъёсысь микрорайонъёсы, гуртъёсы контейнеръёс пуктылэ, — вера Н. Васильева. — Та уж борды рос-прос басьтӥськизы Дэри ёросын — отын 700-лэсь ятыр таӵе жаг возён интыос кылдытӥзы ни. Можга ёросын 100-лэсь трос контейнеръёс пуктылэмын. Та ужез 2 ар куспын йылозяз-пумозяз вуттоно шуыса вераськизы Ува ёросын но.

Жаген выль сямен нюръяськон нырысетӥ толэзяз ик пайдаё луэмзэ возьматӥз ни, кылем арын сярысь, полигонъёсы ог 40 процентлы тросгес жаг вуттэмын.

Бадӟым саклык висъяське жаглэсь выль вуз лэсьтонлы. Уваысь полигонын кылем-мылемъёсты нимаз бичанъя станция ужа ни.

— Сыӵе комплексъёс азьланяз ваньмаз полигонъёсын луыны кулэ. Матысь дырлы ужпум пуктӥськом люкаськись жаглэсь 30 процентсэ переработкае кутыны, — шуиз инкуазез утёнъя но инкуазь узырлыкъя министр Денис Удалов.

Кин ӧжытгес тыриськоз?

Жагез поттон табере коммунальной услугаен лыдъяське бере, со понна компенсациос чакламын. Сое басьтыны быгато федерал но улос льготникъёс. Та юан али туж сюлмаськытэ калыкез.

Туннэ Удмуртилэн бюджетаз коммунальной услугаосъя нимысьтыз субсидиос чакламын, шуиз Д. Сурнин. Со понна 500 миллион манетлэсь ятыр коньдон чакламын. Кылсярысь, сое басьтыны быгато начар улӥсь семьяос. Соослэн доходзы 19 сюрслэсь ичигес ке (та лыдпус пӧрме, улыны тупатэм минимумез 2 пол ватсаса), семья коммунальной тыриськонъёсызлэсь кӧня ке процентсэ берыктыны быгатоз. Та вакытэ Удмуртиысь ог 25 сюрс семья таӵе льгота басьтыны быгатоз.

Кыӵе льготаос чакламын но кинлы, нимысьтыз вераз ужъя но калыкез улон-вылонын утён политикая министрлэн воштӥсез Ольга Лубнина.

— 50 процентъем льгота чакламын Быдӟым ожысь ветеранъёслы, ужысь ветеранъёслы, инвалидъёслы, радиационной авариосысь ветеранъёслы но мукетъёсызлы. Трос нылпиё семьяосын жаг понна тыриськонзы 30 процентлы кулэстэмын. Пӧсь интыосын ожмаськемлы, радиация пуштон бервылэз утялтэмъёслэн семьяоссылы но мукетъёсызлы 15 процентъем льгота тупатэмын, — вераз О. Лубнина.

Озьы ик шаерамы улӥсьёс жилищной субсидия басьтыны быгатозы, ЖКХ-я тыриськонъёссы семьязылэн огъя доходзылэсь 22 яке уногес процент люкаське ке. Сое басьтон понна вазиськоно МФЦ-е. Субсидилэн быдӟалаез котькуд адямилы, семьялы пӧртэм луэ.

Квитанциын жаген нюръяськон понна дун льготатэк пусъемын луоз. Нырысь-валысь сое быдэсак тыроно. Бӧрысь компенсация берыктӥськоз пенсиен яке мукет выплатаен валче.

Ангелина Снигирёва

Туспуктэмез М. Векшиналэн

Ангелина Снигирева
By Ангелина Снигирева Февраль 18, 2019 12:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<