Пеймыт, ӝокыт, кышкыт…

Ангелина Снигирева
By Ангелина Снигирева Февраль 8, 2019 11:46

Шаерысьтымы ивор вӧлмытӥсьёс спасательёслэсь ужзэс ас вылазы эскеризы. Ручка-микрофон интые киямы тылпу кысӥсьёслэсь рукавзэс басьтӥмы.

Журналистъёс теплодымокамерае пырыны дасясько

Ижысь 10 пала журналистъёсты вуттӥзы спасательёслэсь быгатонлыкъёссэс будэтонъя центре. Отын 2 теплодымокамераоссы: стационар амалэн но питранъёс вылын ужась. Ӵапак отчы, пе, журналистъёсты пыртозы. Нош со понна нырысь ик ваньмылы пыр-поч инструктаж ортчытӥзы. Угось ӵынэн тырмытэм камераын огнын йыромыны но луоно.

Ваньзэ рос-прос кылзэммы, 2 группалы люкиськеммы бере ми спасательёс кариськимы. Тылпу кысӥсьёслэсь дӥсьсэс дӥсяса, тыбырамы ог 20 килограмм кыскись баллонъёсты ныпъяса, 5 кузя теплодымокамерае вамыштӥмы. Азямы — зэмос профессионал, тылпулэсь утиськонъя нимысьтыз частьын ужась Андрей Багишев. Камерае пыреммылэсь азьло милемыз, нылъёсты, черодэ султытӥз но одӥгзэ — тужгес сэзьзэ — бераз пуктӥз, ваньмыз понна, пе, кыл кутӥсь луод. Озьы ваньзэс чаклась луи мон. Командирмы будэтӥз на: ог-огдылэсь эн кыле, ваньмызлы пожарной рукавез кысконо, нош кинлы ке секыт луиз ке, азьпалады сылӥсьлы кыӵе ке пусэн соку ик ивортэ.

Камераын ӵын, тём-тём пеймыт, азьпалан сылӥсь эшъёсмес киосын гинэ кутылыса шӧдыны луэ. Азьпалам мынӥсьёсты ӧй адӟы ке но, эшъёсылэсь кылтыр-колтыр вамышъямзэс, камераосын шок-пуль шокамзэс туж ӟеч кылӥ, но мар верамзэс валаны туж секыт вал. Соин ик куд-ог дыръя киосын валэктоно луылӥз. Читыр-чутыр сюресъёстӥ лаптӥськыса, пыдесъяськыса ортчимы, пагӟа кузя васькимы, гумыетӥ нюжтӥськимы.

Озьы вамышъян сяменымы камералэн одӥг висъетысьтыз сӧсырмыны шедем «муртэ» (адямилы кельшись муляжез) шедьтӥмы, юрттэт сётыса, сое но сьӧрамы кутӥмы.

Камераысь читыр-чутыр сюресэз кӧня минут ӵоже ортчимы, шуг вераны. Ураме потыса, шундыез адӟыса, мылкыдмы капчи луиз. Нош учконо ке, пожарнойёслэсь быдэстоно ужзылэсь туж пичи люкетсэ гинэ ас выламы эскерыса оскалтӥмы. Нимысьтыз дасяськымтэ муртъёс понна чиданлыкез эскерон выллем вал со.

Кызьы ивортӥз Ижысь тылпулэсь утиськонъя нимысьтыз частен ки-валтӥсьлэн воштӥсез Дмитрий Глебов, пожарнойёс 21 секунд куспын дӥсяськыны, 1 минут ӵоже частьлэн капка сьӧраз луыны кулэ ни. Нош ми дӥсяськыны гинэ ӝыны час пала тяпайтӥмы. Тылпу кысонъя частьёсын ужасьёс теплодымокамераосын кварталлы быдэ быгатонлыкъёссэс кыдато, сӧсырмыны шедем адямиез утчаны, газ колонкаез, электроприборез кысыны, тылпуэз вормыны дышетско.

Валентина Емельянова

Туспуктэм сётӥз МЧС-лэн Удмурт Республикая Валтӥсь управлениезлэн пресс-службаез

Ангелина Снигирева
By Ангелина Снигирева Февраль 8, 2019 11:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<