Оскымон кивоштӥсьёсты будэтэ

Ангелина Снигирева
By Ангелина Снигирева 22 февраля, 2019 14:10

Кияса ёросысь Уддяди (Карамас-Пельга) гуртысь Владимир Наумович ТУКАЕВ шуэ: уж котьмалы дышетэ. Бордаз ватса на: улон ачиз сюрес возьматэ. Афганистан ож пыр ортчем воргорон 30 арлэсь кема ужа ни школаын — нылпиосты тракторен ветлыны дышетэ, технологияя урокъёсты нуэ. Солэсь кибашлы луэмзэ быдэс ёросын тодо. Ожын кышкасьтэм луэмез, ужын тыршемез пусъемын уно данъян грамотаосын, гадь бордаз бырттэмын юбилейной медальёс.

В. Тукаев

Армилы ярамон будӥз!

Афган ожысь ваем туспуктэмъёссэ Владимир Наумович возе уж дурысьтыз ӝӧкез пушкын. Лачмытак понэмын. Мурт адямиос отчы уг пырало, альбомез уг кутыло. Азьвыл ожгарчи ачиз гинэ сое дырын-дырын поттоз но котькуд бамзэ кема-кема учкыса пукоз. Отын — Афган пыр ортчем эшъёсызлэн туспуктэмъёссы. Ежесь на. Но сомында улонэз адӟемын кадь…

— 1982-тӥ арын август толэзе 18 аресме тырмытӥ, октябре армие басьтӥзы, — тодаз вае Владимир Наумович. — Быдэс гуртэн келязы, вань эшъёсы, ӵыжы-выжыосы люкаськизы. Сурон сапег кутчай ӟеч мылкыдын — со вакытэ армие ветлымтэ пиос шоры умойтэмгес учкыло вал ук. Нош мон Атыкай музъемме утьыны ярамон будӥ!

Владимир Тукаевез Забайкальеысь пограничной войскоосы басьтӥзы. Отын службазэ быдэс ар пала нуэ ни вал. Огпол шуизы: келяськом командировкае. Кытчызэ ӧз вералэ ке но, пограничникъёс валазы. Забайкальской но Дальневосточной погранвойскоосысь 200 муртэ люказы Читае.

— Милям частямы ик шаерысьтымы пиос трос вал, — азинтэ Владимир Наумович.

Читаысь пограничникъёсты самолётэн нуизы Узбекистанэ, отын учебка ортчытыса, куштӥзы Уйпал Афганистанысь Мазари-Шариф город доры. Азязы ужпум пуктэмын вал: Афганистанысь душманъёсты Россилэн кунгожъёсыз дорозь лэзёно ӧвӧл.

Тросэз азьвыл ожгарчиос сямен ик, Владимир Наумов но трос уг вера ожын адӟемъёсыз сярысь. Шуэ гинэ: боевой заданиостэк ӧз луылы, милемлы косэмын — потэ-а, уг-а — уг юало. Аръёс ортчемъя, пе, тросэз адӟемъёс бусэн шобыртӥсько кадь. Но куд-ог учыръёс туннэ кадь син азяз.

Армиын

— Уката секыт вал отысь пӧсез чиданы, — лулӟе азьвыл ожгарчи. — Саюлын — 50 градус ӝокыт. Корт борды йӧтӥськыны уг луы, сокем ӟырдамын. Броня вылэ ватной штанитэк уд пуксьы. Нырысь паймисько вал, малы отын улӥсьёс пу пыдкутчанъёсын ветло шуыса. Бӧрысь ини валай: пу пыртӥ пӧсь уг пыӵа. Нош ми кирза сапег-а кутчаськом, берцы-а — огкадь пӧсь.

Владимир Тукаев Афганистанэз водитель луыса ортчем — сапёръёслэн взводазы вылэм. Уй-а, нунал-а — задание сёто ке, потоно. Трос ветлӥллям кишлакъёстӥ, аулъёстӥ но. Отын улӥсьёс нуназе асьме солдатъёсын туж умой асьсэдыз возё вылэм, нош уй вуэ ке, душманъёслы пӧрмо, пе, вал.

— Улӥм землянкаын, — тодаз вае Владимир Наумович. — Толэзь ортчыса, тодӥ, пӧламы Кияса ёросысь пияш но вань шуыса. Лёня Камашев Афганистанэ мынэсьтым ог толэзьлы азьлогес вуэм. Бӧрысь ини эшъяським, кӧлон интыосмы но артэ вал. 1984-тӥ арын монэ дорам лэзизы, нош Лёня эшшо отчы кылиз на. Самой секыт вал сое кельтыны… Ярамон, ваньмыз умой вылэм, берытскиз. Али но кызьы уд эшъяськы! Афган ож Владимир Тукаевез Россилэн трос сэрегъёсысьтыз пиосын тодматӥз, эшъяськытӥз. Нимтулъёссы уг вуно. Нош куд-огеныз кусыпъёссэ али но уг ышты. Интернетысь социальной сетьёс пыр верасько-гожъясько. Пӧлазы вань котькыӵеосыз, кылсярысь, одӥгез Ставрополь крайын бадӟым кивалтӥсь луэмын — кӧня ке ар талэсь азьло Владимир Наумович дораз куное но ветлӥз.

Кияса ёросысьтымы Афган оже пыриськемъёсын но табере ваньмынызы ик адӟиськылӥськом — армилэсь азьло ог-огмес ум но тодӥське вал, — азинтэ веранзэ В. Тукаев. — Арлы быдэ 15-тӥ феврале, асьме войскоосты Афганистанысь поттэм нуналэ, Кияса ёросамы милемыз люкалляло, Иже но ветлӥськом — синпелет доры сяськаос тыриськом, бырем эшъёсмес буре вайиськом. Туэ но бадӟым программа дасямын вал. Таӵе ужрадъёс туж кулэ будӥсь пиналъёсмылы патриотизм мылкыд пыӵатон понна.

Афганистанын

Кунояськиз Михаил Калашников

Аслэсьтыз пичи дырзэ Владимир Наумович туж шунытэн тодаз вае. Кытын вордски, отын ярай, лэся, шуэ.

— Городэ кошкон сярысь ноку ӧй малпаськылы — сомында адями пӧлын туж ӝокыт кадь потэ, 4 сэрегын ноку ӧй улысал, — ватса со. — Пичи вакытам, вань пиналъёс сямен ик, кыр адями вал мон. Ульчаысь, нюлэскысь ӧм пыраллялэ. Атаелэн выжыез Старое Зайчиковоысь, удмурт сямен Купча шуылӥмы. Отын куке-соку Анна нимо купеч кышнолэн имениез вылэм. Мон но со гуртын вордски — али быремын ни.

Семьяямы 4 пинал будӥм, мон — бадӟымез. Вань на выны но 2 сузэръёсы. Ваньмы дор палъёсамы кылимы, ваньмылэн ужмы озьы-а, тазьы-а дышетон удысэн герӟаськемын.

Анай-атаймы быдэс улонзэс сӥзизы колхоз ужлы. Папамы, Наум Никифорович, бригадирын ужамын — дорысь оло адӟылӥськом, оло ум вал. Жаляса верано, улонысь со вазь кошкиз, мон ог 13 аресъем кыли.

Мамамы, Мария Кузьмовна, передовой дояркаын ветлӥз. СССР-ысь Верховной Советлэн депутатэз но вал. Дорамы, депутатлы шуыса, телефон но пуктылӥзы. Одӥг-ог жингыръязы бадӟым адямиос. Туж тодӥсько на, кызьы дорамы пыралляз тодмо конструктор Михаил Тимофеевич Калашников. Соос анаеным огвакытэ депутатъёс вылӥллям. Нош Уддядие М. Калашников вуылӥз ни берлогес, мон армиысь бертэмын ни вал. Бордаз вал водителез, эшшо кыӵе ке эшез. Чай юизы, вераськыса пукизы. Туж огшоры, вераськись потӥз со мыным — пичигес гинэ мугоро, йӧнъяськон сямыз воксё ӧвӧл…

М. Калашниковен пумиськон

Нош аслыз Владимир Тукаевлы депутатлэн пиез луыны ӧзгес, пе, кельшылы. Мар ке йӧнтэмаз ке, соку ик чиньыенызы шораз возьматозы кадь потылэм. Зэм, йыртэманы виссэ шедьтылэм ик.

— «5»-ёстэк но ӧй дышетскы, «2»-ёсы, «3»-ёсы но кылдылӥзы. Кызьы сотэк? Пи манер луоно ук! — серектэ Владимир Наумович.

Вуко лэсьтӥзы

Армиысь бертыса, Владимир Тукаев кема ӧз малпаськы — трактористэ кутскиз, 4 ар пала ужаз. Та вискын колхоз солы нимаз корка висъяса вуттӥз — котыраз лапасъёсыз, мунчоез гинэ ӧй вал.

— Ӵапак со вакытэ школаысь трактор ужлы дышетӥсь Иже кошконо кариськем, интыез бушаз, — тодаз вае Владимир Наумович. — Монэ отчы ӧтьыны кутскизы. Колхоз предмы Максим Николаевич Пилоян — зол кивалтӥсь вал, колхозмы со вакытэ туж умой улӥз — мыным шуиз: 1 арлы гинэ лэзё. Мон малпаськи: корка котырам маин ке пуктӥськоно — уксё мултэс уз луы. Трактористын 80 манет басьтӥсько ке вал, школаын 150 манет сётом, шуизы.

Озьы 1 арлы школае лыктэм мурт 30 арлы кугӟаз ни. Уддяди школаын пиналъёсты трактор ужлы али но озьы ик дышетэ. Урокъёсаз арнялы быдэ ветло Подгорнойысь, Мушакысь нылпиос но.

— Пиналъёс туж мыло-кыдо дышетско, — шуэ Владимир Наумович. — Эсьма, пиослэсь бере уг кылё нылъёс но. Табере гуртын тросэзлэн доразы тракторзы вань ни — соин ужаны быгатоно. Эшшо ке егитъёс пӧлын машиналы правотэк кылисьёс али ӧвӧл ни кадь. Нош тракторлы дышетскемед вань ке, машиналы право басьтыны капчигес, сюрес вылын мынон-ветлон правилоосты школаысен ик тодӥськод.

Владимир Наумович быгатыса нуэ на технологияя урокъёсты.

— Ӵужатае, Кузьма Константинович, туж кибашлы вал, — тодаз вае дышетӥсь. — Со олома но лэсьтылӥз — пу вышкыос, корт листэз куасалляса, ведраос пӧрмытъяз. Мон, конешно, пичи дыръям бордаз ӧй дышетскылы — кулэлыксэ уг валаськы вал, дыр. Но сямъёс, быгатонлыкъёс выжыя кылё, шуо…

Школаысь мастерскойын ваньмыз лач-лач тыремын: инструментъёс — инструментъёсын, пу — пуэн, корт — кортэн… Маиз но ӧвӧл! Адямиос куддыр вужмем, сыномем арбериоссэс кушто. Нош дышетӥсь соосты басьтэ, сузя, утялтэ… Уже кутыны уг яра ни ке, нылпиослы возьматыны туж умой. Вужзэ тодытэк, вылез тунсыко луыны уг быгаты, шуэ.

Озьы кемалась ӧвӧл Уддядиысь пиналъёс дышетӥсенызы ӵош гуртысьтызы вашкала тӧл вукозылэсь макетсэ лэсьтоно кариськизы. Кизы мынэ бере, чаляк пӧрмытӥзы.

— Гурт шорысьтымы вырйылысь вуко вазенгес тэк сылэ ни вал, — шуиз Владимир Наумович. — Соин ик вылтуссэ тодӥськом ке, пушкыз кызьы ужаз — ум ни. Туж юрттӥськиз милемлы гуртысьтымы ик Роман Фёдорович Бигбашев. Вукоын со ужаса вуттэмын ай, механизмзэ умой тодэ. Ваньзэ милемлы валэктӥз. Табере пичи вукомы берга но, изыны но быгатэ…

Вуко сяна, пиналъёс мукет но трос арбериос лэсьтыло. Ӝӧк-пуконъёссэс, косяк наличникъёссэс вузаны курисьёс но сюро. Эшшо Владимир Наумовичлэн дышетэм пиналъёсыз мыло-кыдо пыриськыло технологияя олимпиадаосы. Кылем арын, кылсярысь, Андрей Рябов отрезной станокеныз элькун олимпиадаын 5 устоосыз пӧлы шедиз. Туэ но 3-ез пиналъёсыз ёросын олимпиадае пыриськизы — пичи дӧдьы, пукон лэсьтӥзы. 1-тӥ интые ӧз потэ ке но, 2-тӥ, 3-тӥ интыосты басьтӥзы.

Нылпиослэн но дышетӥсьлэн ужез

— Куд-огез юнме вера: туала егитъёслы оскыны уг луы. Городысь нылпиос сярысь вераны уг быгатӥськы — уг тодӥськы. Но гуртын оскымон кивоштӥсьёсмы будо. — Дышетско но рос-прос — ЕГЭ-оссэс умой сёто, таза улонэн но эшъясько, киужен выронлэсь но уг палэнтӥсько, — шуэ дышетӥсь.

Кыл мед тупалоз

Ачиз Владимир Наумович дышетскиз агрономлы заочно амалэн, Сигаевоысь совхоз-техникуме пыриз ини школаын ужаны кутскемез бере. Агрономлы дышетскемез но улоназ туж кулэ луэ. Толалтэзэ со школае ышылэ ке, тулысысен потэ ни бусые. Одӥгеныз матысь ӵыжы-выжыеныз возё музъем — кылем арын 80 гектарез кизизы-утялтӥзы. Будэто чабей, йыды, сезьы. Пудо сиёнлы туж яра, вузаны но сюре.

Нош юрт котырын, пе, котьку но юрттӥське Раиса Геннадьевна кузпалыз.

— Кышнояськыкум 22 арес вал мыным, — вера воргорон. — Трос-а, ичи-а — ӧйтӧд. Но кылмы тупаз бере, малы семья кылдытонтэмез? Нылкышноез кыӵе кылъёсын ушъяны луэ — ваньмыз тупалоз кышноелы. Кема аръёс ӵоже со ужаз нылпи садын пӧраськись луыса. Туж ческыт сиёнэз пӧрме! Мон плита котырын уг бергаськы — толыке ӧвӧл. Но малпасько, воргоронлы одно пӧраськыны быгатыны но кулэ ӧвӧл, пиосмурт ужъёс сотэк но трос.

Тукаевъёс 4 пинал будэ-тӥзы: 2 пи но 2 ныл. Толя но Сергей пиоссы кыксы но югдурез утён удысын ужало, одӥгез Дэрие, мукетыз Агрызэ интыяськизы. Семьяосын уло — анай-атайзылы 3 нунокъёс но кузьмаса вуттӥзы ни. Бадӟымезлэн, Толя пизылэн, эсьма, кыкто пиосыз вордскизы.

— Ма, асьмелэн но нылъёсмы, Катяен Таня, кыктоос, — данъяське воргорон. — Таосыз Удмурт кун университетын но гурт удысъя кун академиын дышетскизы. Кыксы но Ижын уло.

Владимир Тукаев верамъя, воргоронлэн шудэз, нылкышнолэн кадь ик — семья бордын. Жадемын-а, мылкыд-а ӧвӧл — семьяын кужым басьтӥськод. Шумпотондэ но нырысь ик матысь адямиосыдлы верамед потэ.

Элина Кумачёва

Ӟеч кыл

Татьяна Габитова, Карамас-Пельга шор ёзо школалэн директорез:

— Владимир Наумовичез нылпиос туж ярато. Дышетӥсь куаӵ-куаӵ валэктэ сюрес вылын ветлон правилоосты — пиналъёс машиноведениея экзаменъёссэс котьку умой сёто.

Нош киужъёсъя урокъёсазы мар но уг даурто! Уката пусйымонэз, Владимир Наумович котьку лыдэ басьтэ, мар пиналъёслэн асьсэлэн лэсьтэмзы потэ — кресло ке кресло, ӝажыос ке ӝажыос… Урокъёс бере но В. Тукаев мастерскойысьтыз кошкыны уг дырты. Тае, эсьма, пиналъёс но туж умой тодо — олимпиадалы дасяськоно-а я озьы гинэ но-а — дораз пырало на.

Со сяна, Владимир Наумовичмылэн лэсьтэм ужъёсыз шулдырто школа азбармес но. Кылсярысь, пырон дорын ик пуктэмын курег кукъёс вылын корка — куноосмы сое синйылтытэк уг кельто. Школа азбарамы ик со лэсьтӥз беседка — ма но со тырыны но отчы туж умой. Нюлэскы потыса, кылсярысь, чебер, аспӧртэм ваез синйылтӥз ке, одно школае ваёз ни, кытчы ке но пайдаен кутоз. Куддыр пиналъёслы вандылыны пулъёс гинэ но дорысьтыз вуттэ. Владимир Наумовичмы пиналъёслы дырзэ но, мылкыдзэ но уг жаля.

Киясаысь Анатолий Широких, Афган оже пыриськем мурт:

— Владимир Тукаевен берло тодматским ни — Афган оже ветлэмъёслы сӥзем ужрадъёсын. Службамес пӧртэм интыосын ортчытӥм. Но туж ӝог огкыл шедьтӥм. Тани куное но ӧтиз ай — одно ик ветло. Паймисько Владимир Наумовичлэн котьмалы мыло-кыдо луэмезлы. Туж ужась со, тэк улон дырыз, малпасько, воксё но уг луылы. Но уж сярысь гинэ ӧвӧл, соин котьма сярысь вераськыны луэ, мылкыдзэ вералоз, визь-кенеш одно сётоз.

Ангелина Снигирева
By Ангелина Снигирева 22 февраля, 2019 14:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<