Ляб адями йӧ вылын уг сылы

Ангелина Снигирева
By Ангелина Снигирева Февраль 18, 2019 12:43

Олег БОБРОВ — Уваысь «Ягуар» автотехцентрлэн кузёез. Ужбергатӥсь сямен кыдаз 1990-тӥ аръёсы, со вакытэ ик пыриськыны ӧдъяз политикае.

О. Бобров

15 ар ӵоже вал ёрос Кенешысь депутат, 2017-тӥ арын 29 номеро округын мукет кандидатъёсты капчиен вормыса, Кун Кенешлэн депутатэз луиз. Вордӥськемын 1969-тӥ арын 11-тӥ феврале Ува посёлокын. Кузпалъяськемын, 2 нылпиосыз.

Улон ачиз дышетэ

Олег Юрьевичен пумиськон азьын со сярысь тросгес тодон вылысь Интернетын бугыръяськыны малпай — ӵемысь уго тодмо адямилэсь нимтулзэ поисковике бичаськод но — ваньмыз син азьын ни. Но таиныз героеным озьы ӧз пӧрмы. Кун Кенешлэн депутатэз, тодмо ужбергатӥсь 50 арессэ пусъе, нош ивор бусыын одӥг материал но ӧвӧл!

— Солы паймонэз ӧвӧл, — шуэ Олег Юрьевич. — Мон — эрико адями, интыысь кивалтӥсьёс азьын йыбыртъянэз ӧвӧл, мар малпасько, ваньзэ меӵак верасько. Валамон ини, ёрос кивалтӥсьёслы со уг яра, нош газет соос киулын — кин монэ ушъялоз? Нош элькун изданиосын данъямзы мыным кулэ но ӧвӧл кадь — мон Уваын улӥсько ук, татысь калык мед гажалоз.

Зэм, огвакытэ мон, дышетскеме ӧвӧл ке но, Уваын ачим газет поттылӥ, «Тайный советник» нимаськиз. Соку валай, мар со — газет уж. Палэнысен учкыса капчи потэ, нош ачид гожъяськыны кутскиськод ке… Азьвыл мон ӧй малпаськылы, валамон-а калыклы мылкыдъёсме-малпанъёсме усьтӥсько, нош татын амалтэк ас бордам тыршоно луиз.

Егит солдат

Улонам мон ваньмызлы ачим дышетскисько. Нялтас вераса, уг возьдаськиськы вераны, вылӥ образование ӧвӧл шуыса. Со понна мынам тодон-валанэ институт дипломен адямиослэсь тросгес. Мон пырай Кировысь сельхозинститутэ, «Биолог-охотовед» специальностез бырйи вал. Экзаменъёс азьын толэзь ӵоже подготовительной курсъёсын дышетски, «Охота» журнал лыдӟи. Пӧйшуран сярысь сомында тодӥ, выль тодмоосы малпало вал, мон зэмос пӧйшурась. Но дорелэсь туж мӧзмылӥ, озьы, толэзь чидаса, Увае берытски но татысь 37 номеро училищее кариськи.

Уд оскелэ, но мон туж мӧзмылӥ анаелэсь. Со святой кышномурт вал — пичиысен ож мышкын тыршемын, ветеран. Сыӵе секытэз адӟыса, курадӟонъёс пыр потыса но, со ӧз лекомы — ваньместы милемыз туж яратылӥз, жалялляз, 5 пиналэз огназ пыд выламы ӝутӥз. Мон 12 арескам атайтэк кыли, адӟылӥ, макем секыт вал мамамылы, мынам потӥз солы матын луэме, юрттэме.

1987-тӥ арын басьтӥзы армие. Милемыз дасяло вал Афганистанэ келяны, но Инмар утиз — сюри Германие. Отын мон дыши чылкытлыклы, порядоклы. Со вал чылкак мукет дунне. Мынам потылӥз ас котырам но сыӵе «дунне» кылдытэме. Армия бере странаямы улон югдур воштӥське ни вал, пумен ваньмыз куашканы ӧдъяз, кин маин выриз, шаплыосызгес асьсэос уксё поттыны кутскизы. Азьвыл дышетӥсе кыскиз монэ бизнесэ — ӵектӥз мыным машинаослы запчасть вузанъя магазиназ директор луыны. Мон эскерыны малпай. Но отын кема ужаса ӧй вутты, кузёе кинэн ке мазэ ке люкыны ӧз быгаты, керетон потӥз, ужасьёсты мозмытӥзы… Али со вакытъёсты тодэ вайиськод ке, кӧшкемыт луэ. Кӧня адями Уваын гинэ но виемын… Но кутскем ужез аналтэм ӧз поты ни, лэся. Мон малпай аслэсьтым магазинме усьтыны. Уй ӵоже вуттӥсько вал Тольяттие запчастьлы ветлыны, ӵукна вуисько но прилавок сьӧры султӥсько. Озьы пичи гинэ «Ягуар» лавка будӥз туала бадӟым автотехцентрозь — туннэ со запчастьёсын вуз каронъя ёросысь тужгес бадӟымез поставщик луэ. Али ваньмыз радъямын ни, ваньмыз умой, но мон туннэ ке но дась, прилавок сьӧры султыса, ачим вуз карыны, басьяськисьёсын вераськыны, соослы визь-нод сётыны. Мон вань басьяськисьёсме нимтулзыя тодӥсько — соос 2 сюрс мында, котькудзэс нимын-тулын тодӥсько, вордскем нуналазы одно ӟечкыласа жингыръясько.

Кужым — зэмлыкын

«Зэмлыко Россия» партилэн кивалтӥсеныз С. Мироновен

Олег Бобровлэн кузпалызлэн — Елена Николаевналэн — озьы ик аслаз бизнесэз — Уваын солэн кӧня ке магазинэз. Со выре лэсьтӥськон материалъёсын.

— Тросэз паймо, — шуэ нылкышно. — Малпало, картэ сыӵе удысэз ӵектӥз — ӧз, мон ачим чакласа потӥ, мар уг тырмы милям ёросамы. Мон ваньзэ ачим лэсьтӥсько, картэ мынам ужам уг пыриськы, мон — солэназ. Зэм, ужме мытыны юрттӥз — магазин усьтыны инты басьтӥз, отӥзэ мон ваньзэ ачим…

Уж сярысь семья куспазы трос уг верасько ке но, нылкышно котьку дурбасьтэ кузпалызлы. Озьы вал, политикае пыриськыкуз но. Олег Юрьевич 15 ар ӵоже ёрос Кенешлэн депутатэз вал. Собере ассэ эскеремез потӥз элькун парламентын. 2012-тӥ арын 5-тӥ ӧтчаме быръёнъёсын вожвылъяськон зол вал — мукет кандидатлы со 57 куара гинэ келяз. Али ке но уг оскиськы, куараосты ӧз суралэ шуыса, вера Олег Юрьевич. 2007-тӥ арын, со кандидатэз ик 2000-лы тросгес куара люкаса, О. Бобров вормиз! Со туж шӧдскымон вормон. О, кӧня пож ву кисьтазы со аръёс ӵоже мон вылэ, но зэмлык вормиз, шуэ Олег Юрьевич.

Нялтас вераса, быръёнын со вормиз «Зэмлыко Россия» партилэн ёзчиез сямен. Тросэз понна солэн одӥг мандатъем округын вормемез туж возьмантэм луиз.

— Тон азинлыко адями, ваньмыз вань, мар уг тырмы, малы политикае мынӥськод? — юало мынэсьтым куд-огез. Мон, зэмзэ вераса, паймисько сыӵе юанъёслы. Кин ке, оло, зэмзэ но политикае мынэ аслэсьтыз ужъёссэ бергатон понна, мынам сыӵе малпанъёсы ӧй вал. Мон тодӥсько, калыклы пайда вайыны быгато, улон-вылонэз зэмлыкогес карон вылысь ӵектонъёс сётыны, мае ке воштыны быгато. Шӧдӥсько, мынам трос кужыме, малы мон сое тымыса возьыны кулэ? Зэм, Кун Кенешысь фракциямы ми Ф. Юнусовен 2 кузя гинэ. Соин, законъёс кутыку, куарамы, оло, сокем шӧдскымон ӧвӧл — данакез — «Огъя Россиысь» депутатъёс. Но депутатлэн валтӥсь ужез радъяське фракциосын, комиссиосын, законъёс отын кисьманы кулэ ни! Но калыклэн сое, жаляса верано, валамез уг поты — со малпа, депутат — со аспӧртэм Тол бабай, уксё мед висъялоз, кузьым сётоз, нимаз адямилы мед юрттоз… Бырйисез сӧризы 1990-тӥ аръёсы — соку куара люкан понна кутӥськылӥз бюджетысь коньдон, сое лыдъясь-чотась ӧй вал — кандидатъёс ас тодэмзыя быдтылӥзы. Мон сое лыдъясько бырйисьёслы кузьмаськонэн (подкупен). Социальной удыслы коньдон мыныны кулэ меӵак бюджетысь — озьы, кызьы гожтэмын законын. 2018-тӥ арын декабре Кун Кенешын кутэмын «Депутат наказъёс сярысь» выль закон. Со чакла бырйисьёслэсь куронъёссэс быдэсъянлы коньдон висъян радлыкез. Депутат рос-прос возьматыны-валэктыны кулэ, кытчы, малы кулэ коньдон — солэсь азьло аслаз бырйисьёсыныз но интыысь кивалтӥсьёсын кенешыса.

Егит хоккеистъёсын

— Пӧрме-а озьы кенешыса ужаны?

Ёрос кивалтӥсьёсын шуг, калыкен огкыл шедьтыны капчигес. Но мон дышемын ни ваньзэ ас кужыменым лэсьтыны. Мыным юрттэт кулэ но ӧвӧл, но воже потэ, мыным тушмонаменызы йырин калык курадӟе ке. Бобров ке нялтас ӧвӧл — маин калык янгыш?

Али дасяське шаерысьтымы ву гумыосты воштонъя элькун программа. Та ужпум туж лэчыт сылэ гуртъёсын но. Туннэ нуналлы мон бичай ини округысьтым 1 сюрс 800 кинюртэм.

Сётӥсь ки уг купырмы

— Туж потэ Увалы кузьым лэсьтэм, — азьланьтэ О. Бобров. — Тодӥськоды на, луоз, берло быръён кампания дыръя шаерамы вуылӥз «Зэмлыко Россия» партилэн азьветлӥсез Сергей Миронов. Мон вазиськи солы, Уваын йӧ дворец пуктыны курыса. Ува котьку данъяськылӥз шӧртчи пиналъёсыныз, татын спортэн котьку трос калык вырылӥз, быдэс Россилы тодмоесь милям пинал хоккеистъёсмы. Гуртысь командаос пӧлын Уваысь «Ягуар» хоккей клуб 3 пол луылӥз Россилэн чемпионэз! Нокинлэн сомында вормонэз ӧвӧл. Нош асьмелэн йӧмы ӧвӧл… Азьвыл тренировкаосы пиналъёсты воксё Татарстанэ нуллоно луэ вал, али матынгес йӧ вань — арняяз 3 пол Вавоже ветлӥськом. Но отын милемлы дыр ӝытазе гинэ висъяло, соин сьӧрлось уйшор котыр гинэ берытско, нош ӵукна школае мыноно. Нош кӧня уксё кошке транспортлы! Соин Уваын асьмелэн йӧ дворецмы мед луысал.

Соку мыным дурбасьтӥзы С. Миронов но, Удмуртилэн Тӧроез А. Бречалов но. Мон шумпотыса басьтӥськи проектэз эскерыны, бизнес-план гожтыны, но маке но нош ик могӟиз. Мыным шуизы, бичалэ 100-150 миллион манет асьтэос, мон ортчи предприятиостӥ, тодмо ужбергатӥсь эшъёсыным вераськи, ваньзы соглаш луизы, но кин ке бадӟым кивалтӥсьёслы верам, Уваын йӧ дворец пуктыны луонлык ӧвӧл шуыса. Озьы ӧвӧл со! Мон тодэмъя, али луэ на 2021-тӥ арлы титульной планэ сюрыны, но со потэ ёрос кивалтӥсьёс бордысь. Мон азьланяз но выро та ужен.

Нылыныз

— 18 ар ӵоже тӥ юрттӥськоды ни хоккей клублы, шуо, ӝынызэ расходъёссэ ас вылады басьтӥськоды. Малы? Тӥляд со пичи дыр малпанды?

— Ӧвӧл, пичи дыръям мон капчи атлетикаен выри. Нош хоккеез гажаны кутски эшелы Александр Анастасинлы луыса. Со та клублэн тренерез. Одӥг пол ӧтиз монэ пиналъёслэсь шудэмзэс учкыны. Мон, пиосты адӟыса, ачим со вакытам уси кадь. Мыным туж кельшиз соослэн нюръяськемзы, вормон дартсы. Но клуб туж кулэяськиз юрттэтлы, ма, ваньмызлэн конькиоссы, формаоссы гинэ но ӧй вал, ӵошатсконъёсы но ветлыны ӧз быгатэ, малы ке шуоно тросэз ёрмыса улӥсь семьяосысь. Али улон ӟечгес луиз ни, ёрмон но сокем ӧвӧл ни, анай-атайёс уксёзэс уг жаляло, тыршо пиналъёссылы ватсаса тодон-валан сётыны, кружокъёсы, секциосы нуллыны, со туж шумпотымон. Огкылын вераса, соку мон малпай: юртто! Нош пиос, мыным тау карыса, клубзэс «Ягуар» нимазы.

Мон туж паймисько: ёросэз данъяно, ушъяно ке, хоккей клубмес «Увадрев», «Ува» санаторий кадь бадӟым предприятиосын оградэ пукто, нош юрттоно ке — вунэто… Нош со туж кулэ уж ук — спортэн вырись пиналъёс уг шаянъясько, уг йыртэмало, соос компьютер сьӧрын «ыбылӥськыса» уг пуко — зэмос арена вылын нюръясько! Вылаз ик, хоккей сямез кыдатэ, азинлыко луыны дышетэ. Хоккей но ужбергатон туж матын ог-огзылы.

— Асьтэос йӧ вылын сылӥськоды-а?

— Туж ик уг ваньмиськы, но султылӥсько, Кун Кенешлэн сборнояз пырисько.

Нош льӧль малпанъёс котьку луыны кулэ: пичи-а тон, бадӟым-а. Но ас понназы соос уз быдэсме, со понна зол пӧсятэк ӧвӧл. Пинал дыръям мон туж синмаськыса учкылӥ мушкетёръёс шоры. Мон ӵемысь асме Д,Артаньян интыын адӟылӥ. Кин оскысал соку, куке но мон сое шудӥсь актёрен ӟыгыръясько шуыса? Но 2006-тӥ арын мон малпай аслым сыӵе кузьым лэсьтыны — Увае ӧти Михаил Боярскиез! Калык ӧз оскы, кызьы, пе, сыӵе кизили деревняе лыктоз, кыӵе ке Уваын концерт возьматоз? Ӧжытак кисырес вал Михаил Сергеевич азьын, ӝыныё залын концерт возьматоно луиз шуыса, но ма карод… Та ужрад мыным дуно усиз, но коньдон жаль ӧвӧл, со, аслыд сяна, кинлы ке шумпотон кузьма ке. Вань сыӵе валан — «коньдонлэн законэз» — 10 процентсэ барыштэ ӟеч ужъёслы (благотворительностьлы) висъяно, сотэк коньдон шур пытсаськоз.

Шутэтскон сэрег

— Нош аслыд?

— Аслыд но 10-эн тырмоз. Отӥзэ бергатоно.

— Тодӥськоды на-а нырысетӥ манет поттэмдэс? Ку тӥ шӧдӥды уж-бергатӥсь сямдэс?

— Туж ӟеч тодӥсько. Нырысетӥ копейка поттӥ, сюрес дурысь ӟенелик бичаса, соку 7-тӥ классын дышетскисько вал, дыр. Малы ке соку буш ӟенелик няньлэсь дуно сылӥз. Кытчы со уксёез быдтӥ, уг тодӥськы ни.

— Асьтэлэн пиналъёсты номырлы ёрмытэк будэмын ни, соос валало-а уксёлэсь дунзэ?

— Мон чурыт адями. Анайзы, оло, жаля, нош мон уг эркияськы. Пимы кышнояськемын ни, алигес монэ песятай кариз, соос городын уло. Табере солэн аслаз семьяез, сое сюдон-вордон сярысь ачиз сюлмаськыны кулэ, мынэсьтым уг куры ни. Нылмы школаын дышетске ай, солы пичиен коньдон сётъяськом, но тус-тас уг кары, люка.

Инкуазьлэн пиез

Олег Юрьевичен ми пумиськылӥм… «монастыряз». Озьы со шуэ аслэсьтыз юртъерзэ. Интыяськемын со Ува сьӧрысь бырем гурт бервылын. Бусы шорын — дол-дол одӥг корка. Ай отчы озьы гинэ уд но вуы — милемыз со снегоходэн пумитаз.

— Кӧня ке ар талэсь азьло татӥ фотокамераен «пӧйшураса» ветлӥ, — шуэ со. — Та палъёслы туж синмаськи. Азьвыл татын Беризьгурт сылэ вылэм. Но «неперспективной» каремзы бере калык кин кытчы пазьгиськиз. Со сярысь тодэ вайытылӥзы на арлыдо топольёс но беризьёс гинэ. Одӥг адями татын пасека возе вал но, кынарыз быремен, мыным басьтыны ӵектӥз. Мон, кема малпатэк, басьтӥ.

— Малпады гуртэз выльысь улӟытыны?

— Уз пӧрмы, дыр: та музъемез пуктӥськон улэ кутыны уг луы, татын уго сюрес но, тыл но, ву но ӧвӧл. Ас поннамлы гинэ генератор тырме. Тани тымет дуре корка, мунчо пуктӥ, сад мерттӥ… Табере та интыез Бобровлэн усадьбаез шуыса нимасько. Но муртъёс татын туж ик уг улыло, матысь адямиос гинэ. Ӵемысь мон татын арняосын огнам улӥсько. Туж яра мыным шыпытын. Мон инкуазьлэн адямиез ук. Пукиськод, малпаськиськод, йыре маке но вылез, тунсыкоез лыктэ. Татын котьку туж шулдыр: тулыс яблокпу сяська усыкмытэ, гужем зарни италмасъёс гыало, сӥзьыл тылын ӝуало топольёс, нош толалтэ мыным уката зол яра — шыпыт, гань-гань — усись лымы пырылэсь куаразэ кылӥськод кадь. Выжыкыл но тӥни!

Зинаида Рябинина

Ангелина Снигирева
By Ангелина Снигирева Февраль 18, 2019 12:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<