Лыдӟисеныз али но вераське

Ангелина Снигирева
By Ангелина Снигирева 19 февраля, 2019 17:19

Удмуртиын буре ваё быдӟым удмурт кылбурчиез — 19-тӥ феврале Флор Васильевлы тырмысал 85 арес.

Ф. Васильев

Флор Васильев вордскиз 1934-тӥ арын 15-тӥ феврале Яр ёросысь Бердыш гуртын. Но паспортаз гожтэмын вал, 19-тӥ феврале вордскиз шуыса. Ф. Васильев тодон-валан басьтӥз Глазовысь пединститутын. Улонзэ журналистикаен герӟаз — институтэз йылпумъямез бере ёрос газетлэн редакторез вал, бӧрысь «Комсомолец Удмуртии», «Советской Удмуртия» газетъёсын тыршиз, «Молот» журналын редактор вал. Со сяна, трос выриз общественной ужен.
Озьы ке но со нырысь ик кылбурчи вал. Улытозяз Ф. Васильевлэн кылбуръёсын 12 книгаез печатласькиз, 7-ез — удмурт кылын, 5-ез — ӟуч кылын. Ф. Васильевез мукет кылъёсы но трос берыкъязы. Удмурт кылбуретэз Ф. Васильевтэк син азе пуктыны уг луы — чуръёсыз удмурт кыллэн, калык визьлэн но инкуазьлэн пушкысьтызы потэмын. Чылкыт но мур пуштросо кылбуръёссэ со гольтыръяськытэк, мода сьӧры уйиськытэк, гожъяз — озьы, кызьы сюлмыз куре вал. Со дыре ик Ф. Васильев азинтӥз удмурт кылбурлэсь туссэ, узырмытӥз солэсь рифмазэ но ритмиказэ.
Ф. Васильевлэсь ужзэ вылӥ дунъязы — 1967-тӥ арын «Тон сярысь» но «Лирика» книгаосыз понна Удмуртиысь комсомоллэн премиеныз пусйизы. 1978-тӥ арын «Времена жизни» но «Куар усён толэзе» бичетъёсыз понна Удмуртилэсь Кун премизэ сётӥзы.
Поэт улонысь кошкиз 1978-тӥ арын, сюрес вылын аварие шедьыса. Но кылбуръёссэ калык али но яратыса лыдӟе, угось, А. Ермолаев критик верамъя, Ф. Васильев огшоры вераськон, лабыртон гурен вазиськиз лыдӟисезлы, кенешиз соин. Нош адямилы улоназ лулысь-сюлмысь вераськыны, кылзыны быгатӥсь эш кулэ.

Кылбуръёс

Флор ВАСИЛЬЕВ
Мон быро-а, мон куло-а —
Нокинлы секыт
уз пот.
Адями кема улоз шат?
Сое ӝог воштоз
вож пот.
Пот потоз яке йӧны-а,
Со но ӝог сисьмоз, быроз.
Нош кин ке но вералоз,
дыр,
Куректӥсь, жалясь
кылъёс.
Бер ке но, секыт нимме но
Со тодаз, оло, ваёз.
Нош кулэм бере
кулэ шат
Чебересь верам кылъёс?
Со кылъёс улэп дыръя ук
Дун омыр кадь юн кулэ.
Адями нош весь ӧжыт на
Лякытэсь кылъёс кылэ.
Куректон яке шудбур-а —
Уз, уз лу мултэс
ӟеч кыл.
Мылкыдыд урод дыръя но
Верано сое ӟечкын.


Котькытчы тон мын но
лык,
Азьпалан котьку инвис.
Матэктӥд кадь инвислы,
Учкиськод — со нош
кошкиз.
Мар меда инвис сьӧрын?
Мар меда отын адске?
Ӵук шунды кӧлэ отын,
Выль нунал отын
вордске.
Выль нунал отын
вордске,
Выль нунал вае выль шуд.
Шудбуре мынам, иське,
Инвислэн сьӧраз на, шу.
Мон мыно отчы, дырто.
Инвисэз уё одно.
Шудбурме но мон басьто,
Со понна нош
тыршоно.


Писпулэн гольыкесь вайёсыз
Юг пурысь пилемез пасяллям.
Пилемъёс вайёсы кугӟаллям,
Весь кирдэ ни тӧдьы пырызы.
Лабыртӥсь куаръёслэсь мӧзмыса,
Писпуос шонало вайёссэс.
Сьӧд вайёс, инбаме ӝутскыса,
Утчало, дыр, выльзэ тулысэз.
Шонасько каньылэн, шонасько,
Лэйкато кадь сайкыт малпанзэс.
Нош лымы пырыос вешало,
Верало кадь умой мылкыдзэс.
Буйгато кадь соос вайёсты,
Нуныясь пырыен йӧтскыса.
Возьмато, дыр, тулыс дыръёсты,
Уйвӧтэ но лушкем пырыса.


Куректыны ӧвӧл кулэ,
Кулэ ӧвӧл куректыны.
Пельы ӟечсэ гинэ кылэ,
Ӟечлы гинэ вордскиськомы.
Кайгу шедиз ке улонын,
Тулыс лымы кадь шуналоз.
Ӟечез понна вордскиськомы,
Мед со гинэ ӟечкылалоз.
Ненег тӧлэн мед вешалоз
Вордскись сяська кадь улонэз.
Шуныт зорен мед чупалоз
Быгыльскыны кутскем тысез.
Ӧвӧл кулэ куректыны,
Я, тон но ӵушы синвудэ.
Ӟардон тусъем шумпотонлы
Я, сёт ни, сёты ни кидэ.

Ангелина Снигирева
By Ангелина Снигирева 19 февраля, 2019 17:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<