Кырӟась семья шудбурен пачыла

Ангелина Снигирева
By Ангелина Снигирева Февраль 8, 2019 14:48

Шаермылэн пӧртэм ёросъёсысьтыз кырӟаны-вераны устоесь анай-атайёс но нылпиоссы, кузпалъёс но вын-агайёс пыриськизы «Аксион» культурая юртын ортчем «Кырӟась семья» концертэ.

Эгралась Лекомцевъёс

Та нуналэ тодмо артистъёсты учкисьёс выль сямен адӟыны быгатӥзы. Тани Геннадий Бекмановлэн Дэри ёросысь Ожмос гуртын улэ Ирина Ниязова сузэрез. Татчыозь Геннадий Ивановичлэн агай-вынъёсыз сярысь гинэ тодылӥмы. Нош Ирина Ниязовалэн но Геннадий Бекмановлэн атайзы одӥг вылэм.

— Ми одӥг гуртын будэмын бере, мон пичиысен ик тодӥ, Гена агае вань шуыса. Пинал дыръямы сокем матысь ӧм улэ. Нош бадӟым будыса, семьяосынымы ӵош эшъяськиськом, ог-огмы доры куное вуылӥськом, — шуэ Ирина Ниязова.

Ирина Ивановна кырӟаны яратэ, но ас понназгес гинэ. Мон культураын уг ужаськы ук, огшоры фармацевт, шуэ. Геннадий Бекмановлэн ӵош кырӟаны ӧтемезлы со нырысь ӧз оскы. Нош собере куалектӥз: Ожмосын улӥсьёс, пе, юало, зэм ик-а Бекмановен ӵош кырӟалод? Озьы Ириналэн пумитъяськемез ӧз ни луы.

— Ми сцена вылэ ӵошен поталлямы ни, — пальпотэ Геннадий Иванович, — только со школаын дышетскон вакытамы вал ай. Соку Ирина кырӟаз, нош мон солы баянэн шудӥ.

Концерт азьын репетициоссы кӧня ке пол ортчылӥзы. Я Геннадий Иванович Ирина доры аптекае мынэ, ужысь пумита но, ӵош кырӟало. Я сузэрез Г. Бекманов доры театре лыктылӥз. Тӥни озьы кисьмаз ӵош кырӟанзы.

— Учкисьёслэсь мылкыдзэс бугыртӥз Кияса ёросысь Бочкарёвъёслэн семьязы но. Сцена вылэ Вуж Салья гуртысь быдэс семья потӥз.

Концертэ кырӟаны ӧтизы но, мон соку ик соглаш кариськи, — шуэ Бочкарёвъёслэн Маша нылзы. — Собере йырме тӥяны кутски — кинэн сцена вылэ потоно. Нош быдэс семьяме вайи ке, юасько. Туж умой луоз, шуизы.

Соин Владимир но Надежда Бочкарёвъёс сцена вылэ 3 пиналъёсынызы потӥзы: Мария но Елена нылъёсынызы но Евгений пиенызы. Тазьы соос Саранскын ортчем фин-угор конкурсэ но, шаерамы радъяськись «Анчане» фестивале но вуылӥзы ни.

Киясаослэн нырысетӥ кырӟанзы «Гирга гур» нимаськиз. Со кырӟанэз Владимир Бочкарёвлэн ӵужатаез гожтэм.

— Сирота кыльыса, ӵужатай секыт улонэз ортчем. Ӵужапайёсы верало вал, та кырӟанэз со, пыдзэ лёгыса ик, кырӟа вылэм, — тодаз вайиз Владимир Леонидович.

Соин, дыр, вашкала гур бадӟым концерт залысь борддоръёсы зол шуккиськыса кошкиз, учкисьёслэн сюлэмъёсазы пыриз. Пӧсь кичабонъёсын келязы Бочкарёвъёсты.

Сценаез котьку сямен ик шулдырто кизили семьяос: Наталья Ушакова но Андрей Камалтдинов, Алёна Тимерханова но Иван Котельников. Табере таос вӧзы ватсаны луоз Эгра каргуртысь Лия но Дмитрий Лекомцевъёсты. Эгралась кузпалъёс — кыкназы но арганчиос, Лиялэн куараез жингрес, сайкатэ, вырӟытэ учкисез. Вот кырӟазы ке кырӟазы, возьматӥзы ке возьматӥзы!

— Ӧтьыкузы мыноно, келякузы кошконо, — вера Лия Лекомцева. — Мылкыдмы вал бере, лыктӥмы. Деревняын весь улоно ӧвӧл ук, бадӟым сцена вылэ но потано. Мон Эгралась Эшъяськон юртын хормейстер луыса ужасько, Дмитрий — Эшъяськон юртын ик валтӥсь методист. Ми быдэс семьяен но — эшшо 3 пиосмы вань — сцена вылэ потаськомы.

Зэмзэ но, концерт туж аспӧртэмлыко но яркыт пӧрмиз. Учкисьёслэн кӧтсы ӧз тыры, Ури-бери Оринаез серекъяса. Нош котькуд кырӟась семья сярысь нимаз гожтыны луоно. Шумпотоно, асьме шаермы узыр быгатӥсь адямиосын. Кырӟанэн валче соос быдэс Удмуртилы тодмо луо, кылзӥсьёслы выль гуръёс кузьмало.

Анна Васильева, Ижын улӥсь

Туспуктӥз Григорий Степанов

Ангелина Снигирева
By Ангелина Снигирева Февраль 8, 2019 14:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<