Йӧл борды — вӧй

Ангелина Снигирева
By Ангелина Снигирева Февраль 8, 2019 11:07

Вавож ёросысь «Колос» хозяйство арлы быдэ паймытэ выль объект ӝутэменыз. Кылем арня пумын рапслэсь вӧй пызьыртонъя но кыд (жмых) лэсьтонъя завод усьтӥз — нырысьсэ Удмуртиын.

Вавож ёросысь «Колос» хозяйствоын рапс вӧй поттыны кутскизы

Шаерамы берло дыре рапс будэтӥсьёс тросгес но тросгес луо. Но та культураез туннэ вавожъёс кадь зол гажасез ӧвӧл на. Кылем арын 11 сюрс гектар вылэ Удмуртиын рапс киземын вал ке, та пӧлысь 1 сюрс 418 гектарез — Вавож ёросын. Гурт удысъя но сиён-юонъя министр Ольга Абрамова пусъемъя, туэ рапс бусыосты 13 сюрс 517 гектарозь паськытатыны план пуктэмын. Вавожъёс медо эшшо 200 гектарлы бусыоссэс йылтыны. Шаерамы миым шорлыдын 6-7 сюрс тонна рапс тысь люкамын. Татын но вавожъёслэн 30 процентэз люкетсы. Урожай люкаське бере, сое рос-прос утялтон борды но басьтӥськоно. Одӥг культуралэсь ик кӧня ке пумо пайда поттыны луоно. Кылсярысь, рапслэсь вӧйзэ вузало, кыдзэ пудолы сюдо. 1 килограмм кыд йӧлэз 2 килограмм йылтыны юрттэ.

«Колос» хозяйствоын рапсэз 7 ар будэто ни. Валтӥсь агроном Андрей Родионов та культураез кышномурт кадь вог шуэ. Огкадь утялтэм вылысь арен-арен урожайзэ воксё уг сёты, пе. Но со понна рапс бервылын котькыӵе будос туж умой будэ.

— Асьме янгышъёсмы вылын асьмеос дышетскиськом, — шуэ Андрей Родионов. — 3 ар талэсь азьло рапс вӧй поттонъя цех усьтӥмы ни вал. Палэнысь кыд басьтӥськод ке, ӟечлыкез котьку умой уг луы угось. Асьме рапсэн асьмеос пудо сиён лэсьтомы шуыса, кутскимы вал. Но кыдын вӧйыз пушказ тросгес кыле, та скалъёслы сокем кельышлы ӧвӧл. Соин ик малпаськыны кутскимы, кыд лэсьтонъя кыӵе эшшо оборудование вань на. Озьы Чехиын поттэм тӥрлык вылэ дугдӥмы: таиз кужмогес, вӧй тросгес пызьыртэ, пудо сиён умоя.

Хозяйствоен кивалтӥсь Владимир Красильников пусъемъя, кема малпаськизы, бадӟым я пичи завод пуктоно шуыса. Кылем арын октябрь пумын лэсьтӥськон борды басьтӥськизы. Борддоръёс но липет кылдэм бере Чехиысь оборудование вуттӥзы. Оглом ог 30 миллион манет тыр усиз. Липет улын инты вань на бере, вӧзаз эшшо огзэ пуктыны луоно. Али часкын 700 килограмм рапс тысьлэсь вӧй но кыд пӧрмыто.

— Асьме азе валтӥсь ужпум пуктӥмы: пудомес сюдыны вормоно, — шуэ Владимир Красильников. — Али фермаосамы 3,5 сюрс кысконо скалъёсмы. Матысь дыре 4 сюрс луозы. 1 сюрс 712 интылы чакласа комплекс ӝутӥськомы — ӝоген усьтомы. Соин ик завод но пуктӥмы. Сое уен-нуналэн ужатӥд ке, 14 сюрс тонна рапсэз изыны вормоз. Зэм, сомында рапс асьме коже поттыны ум ворме — милям сомында бусыосмы ӧвӧл.

Но «Колос» мукет хозяйствоослэсь но рапссэс кутыны дась. Министр Ольга Абрамова пусъемъя, асьме дорын будэтэм культуралэсь асьме дорын ик маке поттоно. Сырьёен шуг-секытъёс уз кылдэ, шуо. Татчыозь асьмелэн переработкаен вырисьёс ӧй вал на, озьыен, завод хозяйстволэсь экономиказэ ӝутыны юрттоз, шуэ министр.

— Туннэ рапс вӧй келянъя юанъёс гинэ пумозяз эскерымтэ на, — шуэ Владимир Красильников. — Ми вӧймес Удмуртиысь тылобурдо вордонъя фабрикаосы, Киров улосэ, Татарстанэ келяськом. Кытын ке со мувӧй поттон аппаратура вӧяны, кытын ке пудо сиён дасяны кутӥське. Рынокез паськытатыны луысал ке, вӧй поттыса-вузаса гинэ, ми киземмылэсь но переработкаен выреммылэсь асдунзэ берыктысалмы.

Нялтас вераса, вӧйзэс гуртазы ик нянь пыжонэ куто. Лицензизы вань, эскеронъёс возьмато: вӧйзы чылкыт. Формаосты зыраськод ке, нянь ӧжытгес сутӥське, шуо. Сылалтэм кубистаен но ческыт кошке.

Нош Белоруссиын рапс вӧен биотопливо лэсьто ни. Туэ асьме бусыосын но сое эскерыны медо. Алнаш ёросысь фермер, «Палэп» хозяйствоен кивалтӥсь Пётр Степанов технологиен тодматскыны Белоруссие вуылӥз.

— Отын топливозэс рапс вӧйын сурало, эсьма, эс-тӥськонлэн дуныз 1,5 поллы ичигес кыле, — шуэ Пётр Геннадьевич. — Номыр секытэз ӧвӧл. Кулэ 30 процент вӧй, 70 процент топливо. Огмындаен но сураны луэ. Эсьма, двигатель но кемагес ужа. Соин ик туэ оборудование басьтомы. Сотэк уг луы. Аслыд ачид пыд пуктыса, уд ужа ук. Кылсярысь, миым 130 гектар вылэ рапс кизимы, котькуд гектарысь 60 центнер урожай басьтӥмы. Вузамы 1 килограммзэ 21 манетэн, нош сое отысь ик кыдэн басьтӥмы 20 манетэн. Кытын экономика? Капчигес аслыд будэтыны, аслыд пызьыртыны, эшшо ке топливоен суралтыны. Рапс вӧйлэн луонлыкъёсыз туж бадӟымесь — улон возьматоз ай.

Соин но Вавож ёросысь Выль Бия гуртысь рапс заводэз усьтонэ пӧртэм ёросъёсысь хозяйствоосын кивалтӥсьёс вуизы. «Колослэн» ужаны быгатэменыз матысьгес тодматскизы, рапс вӧйын пыжем табань, пӧзьтэм ӝук веръязы.

Елена Сараматова

Ангелина Снигирева
By Ангелина Снигирева Февраль 8, 2019 11:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<