Ижысь К. Герд нимо гимназиын ортчиз удмурт кылъя но литературая олимпиада

Удмурт Дунне
By Удмурт Дунне Февраль 20, 2019 18:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерысьтымы сяна, тодон-валанзэс эскерыны вуизы Татарстанысь но Башкортостанысь удмурт кылэз дышетӥсь пиналъёс — ваньмыз 150-лэсь ятыр.

Нылпиос олимпиада гожто

— Туннэ одӥг липет улын 3 олимпиада ортче, шуыны луэ. Лыктэмын 9-тӥ, 10-тӥ но 11-тӥ классъёсын дышетскисьёс. Нимаз дунъяськомы удмурт кылэз тодӥсьёсты, удмурт литератураез гажасьёсты но удмурт кылэз тодӥсьтэм нылпиослы чаклам программая дышетскисьёсты, — вера Дышетонъя но наукая министерствоысь отделлэн кивалтӥсезлэн воштӥсез Валентина Корепанова.

Удмурт кылъя но литературая олимпиадае лыктӥсьёслэн лыдзы уг усьы. Но, шуом, туэ Яр ёросысь одӥг гинэ пинал вуиз — жаляса верано, удмурт кылэз татын 2 школаын гинэ дышето на. Со понна Татарстанысь нылпиосты быдэс автобусэн вуттӥзы.

Куд-огезлы олимпиадае лыктыны люкетӥз куазь: Дэбес ёросысь огез пиналзы гуртысьтыз потыны ӧз быгаты — сюресъёссы, пе, сузямын ӧвӧл. Кыкез пиналъёсы пыэдэн висьыны усизы, пыр-поч дасяськыса вылысь но лыктыны ӧз быгатэ, шуэ Дэбесысь удмурт кылъя дышетӥсь Галина Образцова.

Пиналъёслы олимпиада юанъёслы валэктон утчаны 4 час висъяське. Соин валче гимназиысь коридоръёсын туж шыпыт. Татын урокъёс кыкетӥ сменаын радъяськизы.

— Юанъёс пӧртэм удысъёсысь басьтэмын — со фонетика но, морфология но, орфография но. Тужгес трос балл люканы луэ творческой юанын. Туэ, кылсярысь, газетын потэм заметкая верос гожтоно, — шуиз филология наукаосъя кандидат Ольга Стрелкова.

Удмурт кун университетысь Удмурт филологияя, финно-угроведениея но журналистикая институтлэн директорез Наталья Кондратьева верамъя, олимпиадаын вормись нылпиослы, та институтэ дышетскыны пырыкузы, ватсаса 10 балл сётӥськоз.

— Олимпиадае лыктэм нылпиос пӧлысь ог 10 процентэз азьланяз ми доры дышетскыны куриськозы. Куд-ог пиналъёс тодон-валанзэс эскерыны, 9-тӥ классысен кутскыса, арысь аре ветло. Таӵе мылкыдзы милемыз шумпоттэ, — вера Наталья Кондратьева.

Удмурт кылъя олимпиадаын вормисьёслэн нимтулъёссы тодмо луозы арня пумын.

Елена Скворцова

Туспуктӥз М. Егоров

Удмурт Дунне
By Удмурт Дунне Февраль 20, 2019 18:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<