Егит анай шудо, ужа ке

Ангелина Снигирева
By Ангелина Снигирева Февраль 1, 2019 13:51

Туннэ улонмылэн огез тодметэз — егит анайёс доразы нылпиен кема уг пуко.

Туссэ вошъя

Алёна Тимерханова кырӟасьлэн Милана нылызлы 1 арес тырмиз. Но егит анай та арлэсь ортчемзэ валаса но ӧз вуы кадь. Табере муспотон Милана ачиз но «ужаны», йыртэманы, пӧрмытэ ни. Алигес анаез возьматӥз шунды кадь нылашсэ «ВКонтакте» бамаз. Вакчи видеоын адӟыны луэ, кызьы Милана сад горшокысь сюез бугыръя, веръя но.

А. Тимерханова

— Мон кӧня ке толэзь гинэ вис карылӥ кадь, кӧнязэ, ачим но лыдъяса ӧй вуы. Нылпи ваеме бере нырысь ӟечкыласа гожъязы, жингыръязы, собере «ку концертысь адӟом ни» шуыса юасьёс луизы. Озьы кемалы ик декретэ ӧй пега, — шуэ Алёна.

Нылызлы 2 но ӝыны толэзь дыръя Тимерханова выльысь потӥз сцена вылэ — пыриськиз «Аксионын» ортчем тулыс концертэ.

Ортчем ар ӵоже Алёна туссэ но вошъяса эскериз: йырсизэ ӵышкиз, буяз, сӥзьыллы нош ик кузь йырси будэтӥз. Нош ноябрь толэзе Ижысь «Аксион» дворецын кырӟасьлэн нимаз концертэз радъяськиз.

Алёна Тимерханова кузпалэныз Иван Котельниковен котькуд арняе кӧня ке ужрадъёсы пырисько, респуб-ликамылэн пӧртэм сэрегъёсаз концертъёсын вуыло.

— Мыным капчи вал со ласянь — нонтӥськонэз ӧй тоды. Милана дырызлэсь вазь вордскиз, мон наркоз бере кылли, соин нонтыны ӧз лэзе ини. Озьы нылмы смесь сиыса будӥз. Нырысь Ванялэн мамаез милемлы туж юрттӥськиз, собере аслам анае дорамы улӥз. Табере нылмес кельтӥськом утиськисен — гуртын (кырӟась кузпалъёс юрт басьтӥзы Пичи Пурга ёросысь Баграш-Биграын) туж умой эшмы вань. Солы зол оскиськом, нылмес со туж яратэ. Кемалы ум кошкиське ке, Данил пие — солы 12 арес — чакланы быгатэ ни, — шуэ Алёна Тимерханова.

Милана али ик, пе, крезьгурез вала ни. Диван кузя кемаласьгес ветлэ. Нош пельыз котьку ик сак — кырӟамез кылэ ке, пыдъёсыз экто ни.

— Со милям мугорын пичи ай, озьы ке но туж шаплы, ас ёзъёсызлэсь номырин уг висъяськы, — шуэ анаез.

Пал кияз — пиез, мукетаз — телефонэз

Настя Пушкина — удмурт чеберай (Анастасия Тутаева «Чеберай-2014» конкурсын вормиз), «Мынам Удмуртие» каналысь корреспондент. Петя Пушкин картэныз Мирон пизэс будэто. Тэшкылизылы январьлэн кутсконаз 1 арес тырмиз.Мон декретэ потэмелэсь азьло ик сюлмаськи, мар карыса дорын уло. Соин секытэн дыръям ветлӥ копирайтере дышетскыны. Зэм, нылпи ваеме бере нырысь ӝыны арзэ шокчыны но маза ӧй вал. Собере ужлэсь мӧзмыны кутски: вань нуналъёс огкадь ортчо, картэ котьку ужын. Соку малпай, вай али асме выль удысын эскеро, оло, семья бюджетамы пичи ке но юрттэт пырто. Аслам но пукись ву кадь луэме ӧз поты, — шуэ Настя.

Н. Пушкина

Озьы егит анай копирайтер луон семинаръёссэ тодаз вайиз но заказъя текстъёс гожъяны кутскиз. Егит кышномуртлы ӵемгес вазисько Москваын но Питерын улӥсьёс. Настя шуэ: али тросэз нылкышноос киужен выро, сое вузамзы потэ, нош реклама лэсьтыны, вуззэс ушъяны уг быгато. Озьы Настя соослы текст малпа.

— Маке сярысь гожтон понна мыным со югдурез пыр-поч валаны кулэ. Соку журналист луэмме тодам вайисько но куд-ог клиентъёсыным интервью лэсьтӥсько, ужзылэсь пуштроссэ валаны турттӥсько. Нош воргоронъёслы текст гожтыны шугъяськисько, соослэсь ужзэс туж валаны турттӥсько ке но, — вера Анастасия.

Настяез куддыръя удмурт текст но дасяны куро. Кылсярысь, огез клиентэз куриз научной статьязэ удмурт кылэ берыктыны. Кык кылын дасям ужзэ ушъяллям-дунъяллям. Солэн сыӵе шумпотонэз берыктӥсезлы но паласькиз.

Настя гожъяське, пиналыз кӧлыку. Куддыръя кыӵе ке ӟеч малпан йыраз лыктэ ке, соку ик телефонзэ кутэ — отын, пе, капчигес гожъяськыны, компьютерын сярысь. Нош Мирон пиез — мукет кияз.

— Табере трослы капчигес ни, со ас понназ шудыны пӧрмытэ. Кӧлэмез ке потэ, кыӵе ке гур нёжъяны кутске, собере мон сое веттасько ни, — шуэ егит анай.

Озьы Пушкин кузпалъёс пиналзэс будэтыны пӧрмыто песянайёстэк. Шер ке но вуыло Петялэн гуртаз — Алнаш ёросысь Ӟунняла но Настялэн вордскем палъёсаз — Дэбес ёросысь Зар-Медлое.

Театр ворме дорын пуконэз

Зэмос рекорд пуктӥз Удмурт театрысь актриса Наталия Буранова. Ужаны потыкуз, пиезлы толэзь но ӧй вал на.

Н. Буранова

— Нырысь ӧтизы «Гроза» спектакле. Татын мон огзэ валтӥсь ролез — Катеринаез — шудӥсько. Собере 9-тӥ Майлы сӥзем концертэ ӧтизы. Ужме мон туж яратӥсько но гажасько, кызьы сыӵе дыръя «уг» шуод? — вера Наталия.

Соин актриса кема тунаськыса ӧз улы — ужын сое возьмало бере, малы декретын пуконэз? Озьы егит анай быдэс ужан нуналлы театре берытскиз. Ярам, вань кинлы Марсель пизэ кельтыны — нуныез учко атаез но (Бурановалэн Дмитрий картэз — ужбергатӥсь), городын улӥсь огез песянаез но. Наташалэн Алнаш ёросысь Ӟатчалась анаез но Иже нуны утьыны вуылэ.

— Ужын пиелэсь мӧзмыны кутскисько ке, куддыръя жалясько: малы меда декретын гань-гань ӧй пукы. Нош сцена вылэ потӥсько ке, валасько: та мынам уже, та мынам интые, дорын мон куасьмо! — шуэ актриса.

Табере егит анайлэн улоназ бадӟым инты басьто театр но пинал. Нош кырӟан палэнэ кылемын. Геннадий Бекмановен дуэтсы но куашказ, лэся.

— Али Геннадий Ивановичен творчествомы пӧртэм сюресъёсъя кошкиз. Кин тодэ, оло, азьланьын ми нош кылдытом маке чеберзэ. Кырӟанме мон азьланьтыны малпасько, но со мукетгес луоз, дыр. Улон но азьлань мынэ ук, воштӥське, — вера Наталия.


Юнме уг шуо, нуны вайыса, нылкышнолэн кыкетӥ шокчонэз усьтӥське. Сыӵе дыръя анайёслэн, пе, куинетӥ синзы но кылдэ, кизы но ньыль луэ.

Алена Ионина

Ангелина Снигирева
By Ангелина Снигирева Февраль 1, 2019 13:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<