Дунтэк юрттэт

Ангелина Снигирева
By Ангелина Снигирева 19 февраля, 2019 16:57
Алнашысь калыклы дунттэк юрттэт сёто адвокатъёс

Арлыдоос но, нылпиос но

Юристъёс дунтэк но юрттэт сётыны быгато шуыса кылӥськиз. Кин дунтэк юрттэт басьтыны быгатэ?

Олег П. Ижкар

Котькуд адямилэн улоназ юрист кулэ луылэ. Кин ке музъем люке, кин ке ваньбурзэ ӵыжы-выжыослы кельтэ, кинэ ке ужысь мозмыто… Юристлэн юрттэмез дуно усе. Но Удмуртиын улӥсьёс пӧлысь оглюкетэз юрттэт басьтыны быгато воксё дунтэк.

2012-тӥ арын 17-тӥ декабре шаерамы кутэмын Удмуртиын дунтэк юрттэт сётон сярысь 70-РЗ номеро закон. Соя юристъёслэсь дунтэк юрттэт басьтыны быгато:

  • начар улӥсь адямиос;
  • 1-тӥ, 2-тӥ группаысь инвалидъёс;
  • Быдӟым ожысь ветеранъёс, Россия Федерациысь Геройёс, Совето Союзысь Геройёс, Социалистической Ужысь Геройёс, Россия Федерациысь Ужъя Геройёс, Слава орденлэн быдэс кавалеръёсыз, Ужъя Слава орденлэн 3 степеньёсыныз пусъемъёс;
  • пичи вакытазы концлагерьёсы, геттоосы но фашистъёсын но соослэн союзникъёсынызы кылдытэм мукет кышкыт интыосы шедьылэмъёс;
  • Быдӟым ожын быремъёслэн кузпалъёссы;
  • инвалид нылпиос, сиротаос, анай-атайлэн юрттэтэзтэк кылемъёс;
  • семьяязы анай-атайтэк кылем пиналэз будэтыны басьтыны малпасьёс;
  • мурт нылпиез усыновить каремъёс, нылпилэсь правооссэ утёнъя юанъёсын вырыкузы;
  • интернатъёсы, улон-вылонын юрттэт сётонъя учреждениосы сюрем инвалидъёс но арлыдоос;
  • пытсэт сьӧры я йыртэмамзы понна профилактика ортчонъя ёзъёсы шедем нылпиос но соослэн оскем муртъёссы (представительёссы);
  • 1992-тӥ арын 2-тӥ июле кутэм психиатрияя юрттэт басьтон сярысь 3185-1 федерал законъя юрттэтлы право басьтэмъёс;
  • судэн недееспособной лыдъямъёс но соослэн оскем муртъёссы;
  • шуак кылдэм кышкыт (чрезвычайной) югдурын шуге-леке вуэмъёс.

Дунтэк юрттэт сётӥське кун учреждениосын но, озьы ик частной контораосын но. Кун системае пырись учреждениос:

  • министерствоос но ведомствоос;
  • Медицинаын страхованиея улос фонд;
  • ёросъёсысь юридической юрттэт сётонъя консультациос;
  • адвокатъёс;
  • нотариусъёс.

Нодъяло 47 адвокатъёс

Кыӵе учыръёсы сётӥське дунтэк юрттэт?

Мария В. Ижкар

Дунтэк юрттэт басьтон понна адвокатъёслы меӵак вазиськыны луэ. Туннэ нуналлы Удмуртиын дунтэк юрттэт сёто 47 адвокатъёс. Соос визь-кенеш сёто, куриськонъёс, ӝожтӥськонъёс, ходатайствоос но мукет документъёс гожтыны юртто, судын, кун но муниципал организациосын но мукет учреждениосын адямилэсь правооссэ утьыны юртто. Но юрттэтсы дунтэк луэ таӵе учыръёсы гинэ:

  • ваньбуръя сделкаосты кутон, воштон, умойтэмен лыдъян, кун регистрация лэсьтон;
  • сирота нылпиослэсь улон интылы правозэс юнматон, соослы соцнаймлэн договорезъя улон инты сётон, наймлэн договорезъя нимысьтыз улон инты сётон;
  • музъемлы правоез, сое ялан кутыны (бессрочное пользование) правоез, улытозь соин кузёяськыны правоез юнматон но утён (споръяськон музъем вылын корка сылэ ке но со адямилэн одӥг гинэ улон интыез луэ ке);
  • коммунальной услугаосъя потребительёслэсь правоссэс утён;
  • уж сётӥсьлэн ужасеныз огкыл юнматыны пумит луэмез, ужъя законодательствоез тӥян, выльысь уже интыяськон, уждун берыктон, лулсэрез таркам понна (моральный вред) компенсация басьтон;
  • адямиез ужтэк кылемен лыдъян, пособие юнматон;
  • ужын я шуак кылдэм кышкыт учырын тазалыклы изъян, сӧсырмон но кулон учыръёсы сюдӥсь адямиез ыштэм понна пособие басьтон;
  • калыклы улон-вылонын юрттон, начар улӥсьёслы улон-вылонын юрттэт сётон, коммунальной услугаос понна субсидия висъян;
  • арлыд вуэмъя, инвалид кылён учыръёсы, сюдӥсь-вордӥсез ыштэм понна пенсиосты юнматон, лыдъян, берыктон, озьы ик огдыре ужтэк кылем, секытэн луэм, нылпи ваем понна, висемен я ужын шуге-леке вуэмен сэрен ужаны быгатымтэ понна пособиез юнматон, лыдъян но берыктон, озьы ик нылпи вордэм понна огпол сётӥськись пособиез, нылпиен пукем понна толэзьлы быдэ сётӥськись пособиез но кулэм адямиез ватыны сётӥськись пособиез лыдъян, юнматон, берыктон;
  • алимент тырытон, атай я анай луэмез юнматон, эскерон;
  • анай-атайтэк кылем нылпиосты ас вылад гожтон, опека я попечительство юнматон, пиналъёслэсь правооссэс утён;
  • политической репрессиос улэ сюремъёслы реабилитация ортчыны юрттон;
  • дееспособностез сюбегатон;
  • психиатрической юрттэт сётыку, правоосты но эрикез тӥян ужпумъёсты эскерон;
  • инвалидъёслы медико-социальной экспертиза но реабилитация ортчонэн юрттэт;
  • кун кивалтон ёзъёслэсь, интыысь аскивалтон ёзъёслэсь но нимысьтыз кивалтӥсьёслэсь актъёссэс суд ортчемлэсь азьвыл эскерон-тупатон (обжалование);
  • льготаосты но субсидиосты тыронэз тӥян учыръёс;
  • шуак кылдэм шимес учыръёс дыръя ваньбурлы ыштэм правоосты, адямилэсь аслэсьтыз правооссэ берыктон, ыштон адӟем понна компенсация басьтон;
  • Быдӟым ожысь ветеранъёслэсь, Россия Федерациысь Геройёслэсь, Совето Союзысь Геройёслэсь, Слава орденлэн быдэс кавалеръёсызлэсь, Социалистической Ужысь Геройёслэсь, Россия Федерациысь Ужъя Геройёслэсь, Ужъя Слава орденлэн быдэс кавалеръёсызлэсь, пичи дыръязы концлагерьёсы шедьылэмъёслэсь, Быдӟым ожын быремъёслэн кузпалъёссылэсь правооссэс утён (ужбергатонэн герӟаськемын ӧвӧл ке);
  • улон интылы правоосты юнматыку, музъемлы правоосты юнматыку но утьыку, арлыдъя пенсилэсь страховой люкетсэ, инвалид кылёнъя но сюдӥсь-вордӥсез ыштонъя пенсиез юнматыку, выльысь лыдъяку но берыктыку юридической учыръёсты утчан-шараян.

Котькуд ёросын кылозы

Дунтэк юрттэт басьтон понна одно ик-а Иже лыктоно?

О. Корепанова. Шаркан ёрос

Ижын улӥсьёслы дунтэк юрттэт сёто Удмуртиысь Адвокатъёслэн палатаысьтызы адвокатъёс. Со понна азьвыл ик гожтӥськоно 8(3412) 43-00-85 телефон номеръя яке асьтэлы палатае лыктоно: Ижкар, Родниковой ульча, 62-тӥ юрт.

Ёросъёсын но мукет городъёсын улӥсьёс дунтэк юрттэтлы вазиськыны быгато Адвокатъёслэн палатаенызы юнматэм адвокатъёслы, соос вань ёросъёсын но городъёсын ужало. Озьы ик шаерысьтымы 15 юридической консультациосы.

Дунтэк ужась адвокатъёс, юристъёс сярысь юалляськоно:

  • Правительство бордын ужась Миръясь судьяослэсь ужзэс радъянъя управлениысь. Телефонъёсыз: 8(3412) 50-44-52, 50-40-05. Адресэз: Ижкар, Вормонлы 30 ар ульча, 17-тӥ юрт. Управленилэн сайтэз: www.uodms.udmurt.ru;
  • Удмуртиысь Адвокатъёслэн палатаысьтызы. Телефонэз: 8(3412) 43-00-85. Адресэз: Ижкар, Родниковой ульча, 62-тӥ юрт. Сайтэз: www.apur.ru;
  • котькуд муниципал кылдытэтлэн администрацияз.

УД

Туспуктэм басьтэмын uodms.udmurt.ru сайтысь

Ангелина Снигирева
By Ангелина Снигирева 19 февраля, 2019 16:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<