«Гурт адями» конкурсын вормизы А. Урасинова но В. Ботников

Ангелина Снигирева
By Ангелина Снигирева Февраль 6, 2019 11:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем ар пумын ялэм «Гурт адями — 2018» вожвылъяськонмы йылпумъяськиз. Туэ куара сётон люкетэз 2 номинацияя радъяськиз. Куара сётон, азьвыл аръёсы сярысь, пӧсьгес пӧрмиз. Туэ нош ик выль рекордъёс пуктэмын.

Кылем арен ӵошатыса туэ — конкурсамы ӧжытгес адямиос ӵектэмын вал — пыриськиз 8 мурт. Но пӧсь споръяськон пуромиз котькуд номинациын — берпуметӥ нуналозь валамон ӧй вал, кин вормоз. «Ӟеч сюлэм» номинациын устоез луон понна 4 мурт нюръяськиз. Вормон понна зол вожмаськизы балезиноос но пургаос. Уйпал ёросысь лыдӟисьёсмы Юнды гуртысь Ангелина Урасинова понна ог 100 куаралы азьпалгес луизы. Шумпотымон, балезиноос 2-тӥ арзэ ужрадамы мыло-кыдо пыриськизы, 2 полаз ик вормизы. Анна Наговицына лыдӟисьмы сюлмаськемъя уйпал ёросъёс гуртэн-гуртэн «улэп» гожтэтъёс ыстылӥзы.

А. Урасинова

— Ангелина Урасиноваез ми палъёсын тодӥсьтэмез ӧвӧл — со трос лэсьтӥз бесерман калык культураез утён но азинтон понна, — вераз А. Наговицына. — Яр, Глазов ёросъёсысь тодмоосылы «Удмурт дунне» газетын потэм материалэз конвертэн ыстылӥ, Ангелина Петровна понна куара люканы курыса. Тросэз гуртоос вазиськизы!
Куара люкан зол уж ӝутэмын вал Интернетын. Ангелина Петровналэн Москваын улӥсь Ольга Урасинова внучкаез кунысьтымы но кунгож сьӧрысь эшъёссэ бабуэз понна куара сётыны ӝутказ. Озьы Ангелина Петровна понна 4 сюрс 659 куара люкаськиз — 7 ар ӵоже ортчылӥсь конкурсмылэн рекордэз пуктэмын! Кылем арын, 2 сюрс 304 куара бичаса, вожвылъяськонмылэсь рекордэ пуктӥзы вал сюмсиос.
Баграш-Биграысь музей лэсьтӥсьсы Николай Соколов понна пичи пургаос быдэс ёросэн сюлмаськизы. Коля агаймес туж гажаськом, данъяськиськом соин, гурт калыкмы понна со туж бадӟым уж лэсьтэ шуыса жингыръязы биграос. Н. Соколов А. Урасиновалэсь 93 куарлы гинэ бере кылиз: Бигралась адӟем карымон воргорон понна дурбасьтӥз 4 сюрс 566 мурт. Баграш-биграосты нимысьтыз пусъеммы потэ: соос вожвылъяськонамы 2 адямизэс ӵектӥзы, кыкез ик понна трос куара бичазы.
Но та пумысен ваньмызлэсь адӟем карымон луизы киясаос. Татысь лыдӟисьёсмы арлы быдэ быгатӥсь, тыршись, сюлмо гуртооссы, тодмоосы сярысь газетамы гожъяло. Туэ соос конкурсамы 3 муртсэс ӵектӥзы. «Ӟеч сюлэм» номинацие пыриськем Вуж Сальяысь Валентина Осипова 855 куара люказ. Уддядиысь хореограф Надежда Печникова понна 1 сюрс 234 мурт дурбасьтӥз.
3 мурт ӵектэмын вал «Выжыоссэ утись» номинацие. Татын но берпуметӥ нуналъёсы гинэ валамон луиз вормисьлэн нимыз. Баграш-биграос бӧтё выжыез утисьсы Владимир Ботников понна 4 сюрс 19 куара бичазы но азьпала потӥзы. Грак ёросысь Любовь Долгова понна висисьёс ӧжыт гинэ бере кылизы — 3 сюрс 715 куара люказы. Лолошур-Возжиысь лыдӟисьмы Галина Бахтина алигес редакциямы пыраз.

В. Ботников

— Газетады ялэм конкурсэ Любовь Долгова дышетӥсьмы пыриське шуыса тодӥ но гуртамы куара бичаны кутски. Калыкмы, Любовь Леонидовна сярысь шуныт кылъёс вераса, куара сётъяз. Со кадь ӟеч адями понна калыкез ӝуткамысь, ачид сомында умой мылкыд, кужым басьтӥськод, — шуиз кышномурт.
Вуж Сальялась Надежда Бочкарёва понна дурбасьтӥз 2 сюрс 28 адями.
Озьыен, туэ вормизы Балезиноысь Юнда гуртысь Ангелина Урасинова но Пичи Пурга ёросысь Баграш-Бигра гуртысь Владимир Ботников. Та адямиосты пусйыны ми нимысьтыз поталом, гурт калыкен пумиськон радъялом.

УД

Ангелина Снигирева
By Ангелина Снигирева Февраль 6, 2019 11:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<