Гожъяськыны тунсыко но сӥлы

Ангелина Снигирева
By Ангелина Снигирева Февраль 13, 2019 16:57

2011-тӥ арысен «Удмурт Кенеш» огазеяськон ӟеч сяме пыӵаз ни удмуртлыкез ӝутон бордын ужась, калыклэсь лэчыт ужпумъёссэ усьтӥсь журналистъёс понна Эрик Батуев нимо премия юнматӥз. Та дыр ӵоже соин 20 адями пусъемын. Туэ эшшо 3 лауреат ватсаськиз: «Удмуртия» кун телерадиокомпаниысь журналист Валерий Сидоров, «Удмуртия» иворъёсъя агентстволэн редакторез Майя Бывальцева но Шаркан ёросысь «Вестник» газетысь корреспондент Надежда Максимова.

Кабъёсысь потӥсь

— Лауреат луыса, уж тросгес но, ӧжытгес но ӧз кыльы, — шуэ Валерий Сидоров. — Но мылкыдэз ӝутэ ик. Удмуртилэн Кун премиезлэн лауреатэз луэме бӧрсьы тамында ӟечкыласьёс ӧй вал. Кыӵе но кылъёс уг верало! Та нуналъёсы «Мылысь-кыдысь» передачаез гожтонэ Наталья Тур актрисаез ӧтимы. Студие таӵе-таӵе тортэн пыре. Милемлы асьмелы тортэн пумитано, шуисько. Юри ӟечкыланы лыктӥ, пе, премия басьтэмдэ адямиос тодытэк медаз кыле. Эфир дыръя ик тортсэ кузьмаз. Озьы мынам бенефисэ луыса кошкиз.

В. Сидоров

Валерий Сидоров 2-тӥ классысен тодэ ни вал: луоз гожъяськись. Удмурт кун университетысь филологияя факультетын дышетскыкуз гинэ, малпаськонэ усиз: газетын, радиоын я телевидениын ужано. Ассэ котькытын эскериз. Кафедрае но ужаны кельтыны туртто вал. Телевидение вуиз но, валаз: тани та мынам. Со дырысен «Удмуртия» ГТРК-ен улонэз герӟаськиз. Туннэ кадь ик тодаз возе «Юан-веран, тодон-валан», «Рос-прос» передачаосты нуэмзэ. Удмурт нылпиос понна кылдытӥз «Кокорико» крезьгуро ӵошатскон. Но ӵемгес тодаз вайылэ шаерысьтымы пичи гуртъёс сярысь передачаос лэсьтэмзэ.

— Котькуд ёросысь одӥг ке но пичи гуртэз возьматоно шуыса кутскимы, — вера Валерий Михайлович. — Озьы 100 пала передача кылдӥз. Тодӥсько на: огаз гуртэ зор-котэн вуимы. Вакчи кунчиё горд сапегъёсын дэриетӥ ветлыны яратылӥ. Кинлэн ке азбараз пыри, песянайлэсь интервью басьтӥсько. Айы ӟазег, горд сапегъёсме адӟонтэм карыса, лэся, шиетыса ик берпалам кокчалскиз. Микрофонме киысьтым кызьы ӧй уськыты! Быдэс арня пуксеме луытэк ветлӥ.

Али Валерий Сидоров вань дырзэ но мылкыдзэ сётэ «Мылысь-кыдысь» передачалы. Мынам вакытэ ортчиз ни, камера азе чебер муртэ пуктоно ни, шуэ. Аслыз воштӥсь 3-тӥ арзэ утча.

— Амалы ке луысал, егит ведущий шедьтыса, туннэ ик «Мылысь-кыдысьысь» кошкысал. Кӧттырымонам потэ фильмъёс лэсьтэме. Вал сярысь «Борька» кино лэсьтӥ. Со «Щит России» фестивальын вормиз. Али тани Иж-Балезино чугун сюрес лэсьтӥсьёс сярысь кино пуктӥсько. Юрттэ — режиссёр Николай Эскандеров. Куддыр уд но тодӥськы, кытчы тонэ кино вуттоз. Та ик бордаз кыске. Передачаын угось аслаз кабъёсыз. Со кабъёслэсь ортчем потэ. Кино лэсьтонэн нокин вырыны уг косы. Коллективын куддыр, оло, уггес но валало. Но валамзы но кулэ ӧвӧл — аслым ачим тунсыко мед луом. Соку учкисьёс дорозь трос выльзэ вуттэме луоз. Соин но дано адямиос сярысь «Мон» сузьет бордын ужасько. Геройёсын пумиськон, архивъёсын бугыръяськон выль кужым сётэ, сюлэмылы матын луэ.

Ожгарчи но, стюардесса но

— Лэсьтэм ужед сярысь ӟеч кыл верало ке, шумпотоно, нош премиен пусъё ке, воксё лӧптоно, — шуэ Майя Бывальцева. — Мон туж гажасько Эрик Батуевез журналистэз сямен но, публицистэз но, кылбурчиез сямен но. Соин ик улонысьтым ог 20 арзэ журналистикалы сӥземе бӧрсьы Э. Батуевен тазьы герӟаськон — со сюлэм вылэ вӧй кисьтон кадь, уката ик — солэн юбилей араз.

М. Бывальцева

Воксё пинал дыръяз Майялэн стюардесса луэмез потэ вал, собере — ожгарчи. Но удмурт кылъя дышетӥсез Лидия Васильевна Ложкина УдГУ-ысь филологияя факультетэ пырыны бурдъяз. Дышетӥсьын одӥг ар ужаса, Майя валаз: та мынам ӧвӧл. Огаз ужрадын «Удмуртия» ГТРК-ысь телевиденилэн кивалтӥсеныз пумиськиз но доразы ужаны куриськиз. Озьы улоназ шӧдтэк шорысь кылдӥз журналистика. Телевидение, радио, табере — «Удмуртия» агентство… Та аръёс ӵоже ужъя лобаны но, ожгар часте вуылыны но кылдӥз. Быръем удысэз пӧртэм профессиосты шӧмъяны луонлык сётэ.

— Телевидениын ужакум ай, Можга ёросысь нылпи колоние потӥмы, — тодаз вае Майя Бывальцева. — Сюресъёс трос, икыр-кукыресь. Мукет сюресэ пыриськеммы. Кӧня ке ортчыса, машинамы копак нӧдӥз — азьлань но, берлань но уг мыны ни. Эшшо одӥг журналистэн но операторен ӵош донганы выримы, номыр ӧз пӧрмы. Нош асьмеос пыдысен йырберозь быдэс наӵ-наӵ дэриен шобырскимы ни. Жингыртӥм колоние. Я, пе, юрттэт лэзём. Быдэс КамАЗ лыктӥз но машинамес мырдэм поттӥз. Асьмеос вылысьтымы дэриез кызьы быгатӥм ӵушим. Вуэммы бере мисьтӥськыны дыр сётӥзы на, но чылкыт ӧм луэ ни. Вот паймизы но горизы ваньзы. Тӥни озьы но ивор люкано луэ, паркет вылтӥ гинэ ветлоно ӧвӧл.

Али кыдёке азьпала мынӥсь бадӟым малпанъёсы ӧвӧл кадь. Иворъёс гожъяса, туннэ нуналэн гинэ улоно. Журналистлэн сямен кыӵе ке йыг-йыг, бадӟым материал гожтэм потылэ, но солы дыр уг тырмы. Кытын ке мукет удысын асме эскереме потэ на. Кунсьӧр кылэз дышетыса, мукет кунэ мынысал, шуэ.

Юнкоръёсты будэтӥсь

Надежда Максимовалэн Шарканысь «Вестник» газетын ужамезлы ӝоген 37 ар луоз ни. Улон татчы вуттоз шуыса, ноку ӧз малпалля. Анай-атаез колхозын ужазы бере, гуртын улонлэсь вань секытсэ пичиысен адӟылӥз. Соин но, лэся, дышетӥсьлэсь профессизэ бырйиз.

Н. Максимова

— Быземе бере Шарканэ улыны выжим, — вера Надежда Николаевна. — Школаын интыос ӧй вал. Та ик луиз редакцие куриськеме. Пичиысен «Дась лу!», «Советской Удмуртия» газетъёсы гожъяськылӥ угось. Нырысь-валысь нылпиос пӧлы сюлэм туж кыскылӥз. Отӥяз валай: газет пыр но нылпиосын кусып возьыны луэ.

Надежда Максимова ёрос газетлэн «Инвис» приложениез понна кыл кутэ. Ӵапак со пыр ик нылпиосын но ужа. «Удмурт Кенеш» огазеяськонлэн Шаркан ёросысь ёзэныз валче школаосын «Толсур пумиськонъёс» ужрад радъялля. Вуоно журналистъёсты но будэтыны юрттэ, юнкоръёслэн матысь эшсы луэ. Надежда Николаевналэн ёросысьтызы вуылытэк кылем одӥг гуртэз но ӧвӧл ни. Ужась, данъяськымон адямиос сярысь гожъя, бырись гуртъёсын тодматэ. Соин ик Эрик Батуевлэн премиеныз пусъемзы со понна туж вылӥ дунъет.

— Гожъямъёсы кинлы ке улонын юртто я уг — вераны шуг. Но тау карыса, адямиос ӵем вуо, — шуэ со. — Ачим но удмурт газетъёслэсь, журналъёслэсь потэмзэс чидатэк возьмасько. Газет медаз быры кадь потэ. Угось со пыр ивор вуэ калык дорозь. Соин но редакцие газетлы гожтӥськыны лыкто ке, тынэсьтыд но уждэ сӥлы каро кадь потэ. Эшшо золгес ужаны мылкыд ӝутӥське.

Елена Сараматова

Ангелина Снигирева
By Ангелина Снигирева Февраль 13, 2019 16:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<