Выльдӥськоз 17 юрт

Ангелина Снигирева
By Ангелина Снигирева Февраль 1, 2019 11:46

Туэ Сьӧлта ёросысь 17 социальной объектъёс — школаос, нылпи садъёс, медпунктъёс, лулчеберетъя юртъёс — тупатъямын луозы. Та сярысь ивортӥз Удмуртилэн Тӧроез А. Бречалов, сьӧлта калыкен пумиськыкуз.

Мар лэсьтэмын кылем арын но мар бордын ужано на, нырысь ивортӥз Сьӧлта ёрослэн йырыз Василий Протопопов. Тӧро талэсь азьвыл Сьӧлтала ветлэмез бере ёрос азе 40 ужпум пуктӥз вал.

— Мае али, ӧжытгес коньдон быдтыса, лэсьтыны быгатӥськомы, сое туннэ ик лэсьтоно, вуонолы кельтытэк, — пумиськон дыръя вераз А. Бречалов.

Соин ик туэ бадӟым саклык висъяськоз социальной объектъёсты тупатонлы. Ваньмыз-ӧвӧлэз туэ выльдэмез вите 17 объект — школаос, нылпи садъёс, клубъёс, медпунктъёс. Соосты тупатонлы ог 65 миллион манет висъямын.

Сьӧлта черкогуртысь анай-атайёсты далайгес ини сюлмаськытэ покчи классъёслы чаклам школа пуктон сярысь ужпум. Угось нылпиоссы школалы чакламтэ юртын дышетско — азьвыл отын тысь будэтон станция вылэм. Сиськон инты но, спортзал но ӧвӧл, классъёссы пичиесь. Собере, нылпиос сомында люкаськемын ни, 2 сменаен дышетсконо луо. Та вакытлы выль школалэн проектэз дась ни, пуктыны инты но шедьтэмын — шор ёзо школа вӧзы. Кызьы валэктӥз лэсьтӥськонъя, ЖКХ-я но энергетикая министрлэсь ужзэ быдэсъясь Дмитрий Сурнин. Сьӧлталась покчиослы школаез планъя 2025-тӥ арын гинэ пуктыны кулэ. Но мылкыдэз уськытоно ӧвӧл, луонлыкъёс кылдӥзы ке, кылсярысь, бюджетлэн палэнысьтыз уксёез кутыны пӧрмиз ке, школаез ӝутыны вазьгес но луоз.

Сюлмаськонзэс усьтӥзы Копки черкогуртысь улӥсьёс. Ёрос центрысен черкогуртозь ог 30 иськем. Сюрессы горд сюй, зор-кот дыръя, тулыс-сӥзьыл потаны-пыраны ярантэм луэ. Нош Копкиын 700-лэсь трос адями улэ. Гурт хозяйствозы азинске, турмаршрут усьтэмын. Транспортъя но сюрес хозяйствоя министр Алексей Горбачёв верамъя, туэ та сюреслэсь тужгес урод 10 иськемзэ изъёсын шобыртыны чакламын. Вуоно аръёсы та уж азинтэмын луоз, пе.

Копкиослэсь эшшо одӥг юан чузъяськиз. Марина Опарина вераз: черкогуртазы пу клубзы туж вуж ни — эшшо 1863-тӥ арын пуктэм маке! Гуртоос куро 100 интылы чаклам залэн выль юрт ӝутыны.

— Мон юнме шорысь вераськыны уг яратӥськы, соин ик кылме сётӥсько: туэ клуб пуктыны ӧм быгатэ ке, вуоно арын одно ик дорады лэсьтӥськон уж мытэмын луоз, — вераз А. Бречалов.

Сьӧлта ёросысь инвалидъёслэн огазеяськонысьтызы адямиос Тӧролы нимаз куронэн вазиськизы. Ёросысь коляскаен ворттылӥсь 7 адями спортэн эшъяське, шаерамы ортчылӥсь пӧртэм вожвылъяськонъёсы пыриськылэ. Но шугъяськон кылдэмын инвалидъёслы чаклам транспортэн — ёросын со ӧвӧл. Ужъя но калыкез утён политикая министр Татьяна Чуракова шумпоттӥз: Сьӧлталась инвалидъёслы пандусъёсын автобус висъямын, матысь дыре со ёросэ вуттэмын луоз.

Ольга Шаклеина ӝожтӥськиз, ёрос больницаын маммографсы ӧвӧл шуыса.

— Мон инвалид, маммография лэсьтон понна я Увае, я Иже келяло. Кылем арын ик оскытӥзы вал, ёросамы выль тӥрлык кылдоз ни шуыса. Но татчыозь висисьёс, арлыдоос тазалыксэс эскерон понна мукет ёросъёсы ветло, — шуиз кышномурт.

Тазалыкез утёнъя министр Игорь Титов та пумысен вераз: Удмуртиын кылем арысен ужаны кутскиз питран вылын ветлӥсь маммограф. Али со Вотка ёросэ потэмын. Азьланяз ёросъёсын маммография лэсьтӥсь 5 передвижной комплексъёс ужалозы. Отын дунтэк эскериськыны луоз. Тӧро куриз: сыӵе комплексъёслэсь ёросъёсы потан графиксэс тупатоно, соослэсь лыктэмзэс гурт калык азьлапал мед тодоз шуыса.

Ангелина Снигирёва

Туспуктэм басьтэмын udmurt.ru сайтысь

Ангелина Снигирева
By Ангелина Снигирева Февраль 1, 2019 11:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<